Read Nugunu Meŋiigíe 18 Bible Online

Meŋiigíe 18 - Nugunu bible

Meŋiigíe 18

¹Naá nnyimé hɔ́ɔlɔ́, Póolo go fadɛgɛna naá Atɛ́nɛ, a bɛ́ɛ́ ɛ́dá naá Kɔlɛ́ɛntɛ.

²Bá báá lɛ gó lumene hɔ́ɔ na moɔnɔ́ ba Beyúdene, ufínó yɛ́hɛ́ Akɛ́lasɛ, bébíénéelú naá gigísi gá cí gá Pɔ́ŋɔ. Mɔtɔ mɔ́ɔnyɔ a mbaá ŋá a gá lɛ́ na go ɛ́da go úle Itelíi, olɔŋɔ na okɔ́dɔ bɛhɛ́ Pilisíile, goakɛ́ ufuŋe ogɔ́nɔ́ɔ yá Olóma, Kolóode, yó mbaá ŋá yó báa go nafa Beyúdene naá tɛ́sɔnɔ ya Olóma. Póolo go bénebiginye nabɔ́.

³Kanɛ́ aŋa a mbaá lɛ a yɔgɔnɔ buelí búmmue eé búmmue aŋa bɔ́ɔ — buelí bá go fóaga bincumu — gɛ́hɛ́ go lukumene nabɔ́, bá yɔgɔnɔ émmueé.

⁴Miisí má sábadɛ miimée, Póolo a mba lɛ́ a gɔ́lɔnɔ dogálɔ naá nnyaŋá ya mbósógólí ya Beyúdene, a fúmbe go ŋa goŋaá Beyúdene na Bágɛlɛ́gɛ bó oliminyo ŋgoyáamɔ́ yɛhɛ́.

⁵Aŋa Sɛ́lasɛ na Timotée bá mbaá bolá go go ɛ́da go úle gábɔ́ gɔ́ɔgɔ naá Masɛdóanɛ, Póolo go dómba go bííŋene uŋkimée uŋkimée bɛhɛ́ go go dúmenye nogálɔ ná Asaŋa, o oyanɛna Beyúdene a amɔ́ Mesíi a lɔ́mɔ́ Yésusu.

⁶Kanɛ́ aŋa Beyúdene bá mbií inyé go ɔ́bɔ ŋgoyáamɔ́ yɛhɛ́, bá mo sɛga, Póolo gɛ́hɛ́ go bó mihidene uduúdu yá bɛla bɛ́hɛ́, a bó gálagala a amɔ́: «No amɔ́ no yíme, bó lɔ́mɔ́ go bɛɛnyɔ́ɔ moatɛ́. Gɛ́ dɛ nnúúnée yɔmɔ́ɔ. A dúme godɔ́ɔdɔ, kɛɛ́ ɛ́dá naá báaba bá lɔ́mɔ́ bá dɛ bɛ́ɛ́mbá Beyúdene.»

⁷A á fadɛ́gɛ́ná hɔ́ɔlɔ́, Póolo go ɛ́da naá nnyaŋá ya mɔtɔ ummue ufíno yɛ́hɛ́ Títiu Yúsutu, moɔnɔ́ ba Bágɛlɛ́gɛ mɔ́ɔnyɔ a mbaá lɔmɔ́ a búlugenye Asaŋa, nnyaŋá yɛhɛ́ tɔ́nɔ mekúígíi na yɛ́ɛyɛ ya mbósógólí.

⁸Kilípusu, ogɔ́nɔ́ɔ ba nnyaŋá ya mbósógólí yɛ́ɛyɔ, go ága odɛ́má yɛ́hɛ́ naá Daadáa, mɔ́ɔ, na ncíbo yɛhɛ́ ya batɔ kɛ́. Batɔ bá Kɔlɛ́ɛntɛ gɛca báaba bá mbaá lɛ bá bódólonyo Póolo bá bóó olímínyóo tɔ́nɔ, bá báá béyumínyée.

⁹Budúgú búmmue, Daadáa go ɛ́nɛgɛna Póolo a amɔ́ gɛ́hɛ́ aá: «O do gɔ́lɔ́ bofoá, ɛ́dáná naá busío na go gálagala, o do mámá,

¹⁰goakɛ́ ndɛ́ nahɔ, mɔtɔ a dɛ bósó ba go go gélidie a go ŋa gɛbɛ́, goakɛ́ naá tɛ́sɔnɔ yɛ́ɛyɛ, bá lɛ́ degédegé hɔ́ɔ báaba bá lɔ́mɔ́ bámɛ.»

¹¹Póolo go dúmbie hɔ́ɔ hɔ́ɔlɔ́ naá Kɔlɛ́ɛntɛ, nnyómá mmue na gigísi, a húunenye batɔ nogálɔ ná Asaŋa.

¹²Naá gɛcamɛna gɛ́ɛgɛ Gálɛyɔnɛ a mbaá lɔmɔ́ ŋgɔ́mɔnɔ ba Olóma naá gigísi gá cí gá Ekeyíi, Beyúdene go bágálɛdɛna, bá báa gumbéné Póolo, go ɛ́da nɛhɛ́ naá Nɛgála

¹³bá amɔ́: «Mɔtɔ mɔ́ɔnyɔ a fúmbe go ŋa goŋaá batɔ báaba bɛ́ ɛ́da go búlugenye Asaŋa kóka na Gicele.»

¹⁴Póolo a amɔ́ á ba dúmé dogálɔ, Gálɛyɔnɛ go oyana Beyúdene a amɔ́: «Hóókó, Beyúdene báaba. Ɛ́ná bó lɛ́ goŋaá mɔtɔ mɔ́ɔnyɔ o ó óná mɔtɔ, ɛ́na lí a á ŋaáa gɛantáanta gá gɛoba, ŋgúle ŋgɔ́bɔnɔ.

¹⁵Kanɛ́ aŋa bó lɔ́mɔ́ cuŋí sɛ́ɛsɛ sɛ́ bádáfamɔ́ bɛbana, ifíno na Gicele gɛ́nyɔ́ gá moatɛ́, bó nyó núunemú bɛɛnyɔ́ɔ. Yɔmɔ́ɔ cɛ bósó ba go dɛ́lɛmɛna go go gála mbɔ́dɔ sá bɛsɛnɛ aŋa sɛ́ɛsɛ náana.»

¹⁶Kɔ́ɔ a bó nafamɔ́ naá nnyaŋá ya Nɛgála.

¹⁷Biimée go gumbene Sosotɛ́nɛ, ogɔ́nɔ́ɔ ba nnyaŋá ya mbósógólí, go ɛ́da go mo gide naá oŋgíso yá begélí bɛsɛnɛ. Kanɛ́ bó do mbáa lɛ bó fóanɛna ŋgɔ́mɔnɔ Gálɛyɔnɛ.

¹⁸Póolo go gɔnɔ ŋa gɛantá gá gɛcamɛna hɔ́ɔlɔ́ naá Kɔlɛ́ɛntɛ. Kɔ́ɔ a ádoganamɔ́ na boolímínyí, go yala sitíme go go ɛ́da naá Silíi; Pilisíile na Akɛ́lasɛ bá bɛ́ɛ́ ɛ́dá olɔŋɔ nɛhɛ́. Otóotoɛ yá go biene pɛ́, Póolo a mba lɛ́ bámoáalú odóɛ naá Seŋkelée, goakɛ́ a mba lɛ́ fáalú Asaŋa mefúnyi[71].

¹⁹Bɛ́ ɛ́ ɛ́dá bola naá Ɛ́fɛsɛ, gɛ́hɛ́ go síe Akɛ́lasɛ na Pilisíile. Mɔ́ɔ a bíí íŋéné naá nnyaŋá ya mbósógólí, a bɛ́ɛ́ ɛ́dá go gálagala hɔ́ɔ na Beyúdene.

²⁰Bá báá lɛ gó mo úhune goŋaá a ŋa nabɔ́ gɛantáanta gá gɛcamɛna, Póolo a bíí inyé.

²¹A báá lɛ gó ádogana nabɔ́, a báá bó oyáná a amɔ́: «Nná gɔnɔ nco gunde, Asaŋa a amɔ́ o oliminyo.» Kɔ́ɔ a yalamɔ́ sitíme, a búú úlúkíe naá Ɛ́fɛsɛ.

²²Aŋa a mbɛɛ́ ɛ́dá siise naá Sɛsalɛ́ɛ, gɛ́hɛ́ go ɛ́da naá Yolósalɛmɛ go go bédíigie boolímínyí báaba hɔ́ɔ, go dómba naá Óntiosi.

²³A á ŋaáa hɔ́ɔ moɔnɔ́ ba gɛcamɛna, gɛ́hɛ́ go dúmbenye na oŋɛndɔ yɛ́hɛ́. A lɛ́ naá Gelesíi, a báá dómbá naá Filisíi, ɛ ɛ́da a gíndenye boolímínyí naá gioliminyo.

²⁴Moɔnɔ́ ba Beyúdene, ufíno yɛ́hɛ́ Apolóso, bébíénéelú naá tɛ́sɔnɔ ya Alɛsandalɛ́ɛ, a mba lɛ́ boláalú naá Ɛ́fɛsɛ. A mba lɛ́ mɔtɔ mɔ́ɔnyɔ a mbaá lɛ i íyimene go gálagala, a gunde i íyimene bese bese Bimmúmpúu bá Ŋgɔ́ŋɛ́.

²⁵A mba lɛ́ a báá go béhúunenye go ɔyɔ aŋa Daadáa a lɛ́galɛgamɔ́. Na masánca miimée, a mba lɛ́ o oya, a húunenye kanɛ go bénenie bɔ́ɔbɔ bó mbaá lɔmɔ́ bó núune Yésusu. Kanɛ́, Apolóso a mbaá lɔmɔ́ i íyimene goana giyuminye gá Sáŋa.

²⁶Gɛ́hɛ́ go ɛ́da go gálagala daŋɛ́daŋɛ kanɛ bofoá naá nnyaŋá ya mbósógólí. Aŋa Pilisíile na Akɛ́lasɛ bá mbaá mo ɔ́bɔ́ a gálagala, gáábɔ́ go mo dɔ́ŋɛnɔ, go mo falonanɛna gɔnɔ́ pɛ́ ya Asaŋa bese bese.

²⁷Kɔ́ɔ Apolóso a bɛamɔ́ mbééníŋínyí ya go ɛ́da naá Ekeyíi. Boolímínyí go mo téndie, bá bɔ́ɔ́ ɔ́ŋɛ́nɔ́ boolímínyí báaba naá Ekeyíi kálata goŋaá bá mo gɔ́lɔ bese. Aŋa a mbɛɛ́ ɛ́dá bola hɔ́ɔ, a báa lɛ gó bɛ́ɛmba gɛantáanta gá gióhiginyo go báaba bá mbɛɛ́ ɛ́yá boolímínyí na bogaaga bá Asaŋa.

²⁸Mammana, na bɛmammana bɛ́hɛ́ bá dogálɔ, a mba lɛ́ a dúfenye daŋɛ́daŋɛ Beyúdene báaba bá mbaá lɔmɔ́ bá dɛ olímínyóo Yésusu goŋaá bá lɛ́ naá giédie. A mba lɛ́ a bó falonanɛna naá Ŋgɔ́ŋɛ́ goŋaá Yésusu bá ndiemi mɔ́ɔ a lɔ́mɔ́ Mesíi.