Read Nugunu Meŋiigíe 25 Bible Online

Meŋiigíe 25 - Nugunu bible

Meŋiigíe 25

¹Naá nnyimé ya medúgú mádadɔ́ mɛ́hɛ́ má go bola naá gigísi gá cí gɛ́ɛgɔ, Fésétusu go fadɛgɛna naá Sɛsalɛ́ɛ a bɛ́ɛ́ ɛ́dá naá Yolósalɛmɛ.

²Bagɔ́nɔ́ɔ bá bedúmbí bɛbáágá na bafɛanɔ́ɔ bá Beyúdene go mo dúfie gɛsɔ́mɛnɔ gɛ́ɛgɛ bá mbaá sɔ́mɔ́nɔ́ɔ Póolo.

³Kanɛ tɔmbɛ́nɔ́ɔ, bá mba lɛ́ bá bósógolonyo Ŋgɔ́mɔnɔ ba ogɔ́nɔ́ Fésétusu go go oliminyo goŋaá Póolo u úle naá Yolósalɛmɛ, goakɛ́ bá mbaá ŋá bá báá go mo gedinye ɛdɔgɛ há go mo óna go pɛ́.

⁴Kanɛ́ Fésétusu go bó gundie a amɔ́: «Póolo a lɛ́ naá ncíbo ya gɛaŋɔ́ naá Sɛsalɛ́ɛ, gó gɔnɔ gunde yɔmɔ́ɔ ba moatɛ́ cɛ gaá gɛ́gáa, kaá gundé fɛaŋɔ.»

⁵A báá gó gɔnɔ gálɛda a amɔ́: «Ŋgáa bagɔ́nɔ́ɔ bɛ́nyɔ́ bɛ́ ɛ́da olɔŋɔ namɛ naá Sɛsalɛ́ɛ, bɛ́ ɛ́da sɔ́mɔnɔ mɔtɔ mɔ́ɔnyɔ hɔ́ɔ aáŋa a lɛ́ ŋaáalú gɛbɛ́ gá boóma.»

⁶Fésétusu go bɛ́dɛmɛna naá Yolósalɛmɛ goana boóma bá medúgú aŋa mánnámanyɛ́, aŋa mɔ́ɔ́dɔ́ náana, gɛ́hɛ́ go gunde naá Sɛsalɛ́ɛ. Aŋa gó mbaá bélíe, gɛ́hɛ́ go ɛ́da lukumene naá undukí yá nɛgála ná bɛsɛnɛ, a búú úhúné goŋaá bú úle na Póolo.

⁷Aŋa Póolo a mbuú úlé, Beyúdene báaba bá mbɛɛ́ ɛ́dá go úle naá Yolósalɛmɛ go mo géŋgelidie, bá bɛ́ɛ́ ɛ́dá go mo dɔ́ɔnɔnɔ go gɛcɛcá gá bɛbɛ́ bá moóma bá kanɛ kɔ́ɔ.

⁸Póolo go ɛ́da go gálagala goŋaá a bósódio a amɔ́: «Ndɛ́ kanɛ go ŋa akɛ́ gɛbɛ́ gá boóma gímmue gɛ́ɛgɛ gɛ́ báláfamɔ́ gicele gá Beyúdene, akɛ́ Nnyaŋá ya Asaŋa, akɛ́ gɛ́ɛgɛ gɛ́ báláfamɔ́ ufuŋe Sɛsáalɛ.»

⁹Fésétusu aŋa a mbaá lɔmɔ́ a lɛ́galɛga goŋaá Beyúdene bá mo ɛ́na bese, go úhune kanɛ́ Póolo a amɔ́: «O lɛ́galɛga go ɛ́da naá Yolósalɛmɛ goŋaá gɛsɛnɛ gáhɔ gɛ́ɛgɛ gɛ́ ɛ́da bágálɛda hɔ́ɔ naá busío bámɛ o?»

¹⁰Póolo go gundie a amɔ́: «Anáa ndɔ́mɔ́ tɛ́nɛ́ɛ háalá, ndɛ́galɛgamɔ́ goŋaá gɛsɛnɛ gámɛ gɛ́ ɛ́da bágálɛda naá busío bá ufuŋe Sɛsáalɛ. Ndɛ́ kanɛ go ŋa Beyúdene gɛbɛ́ gá boóma, maamɔ́ɔ moatɛ́ moatɛ go íyimene nɔ́ɔnɔ bese bese.

¹¹Aáŋa ndɛ́ na gɛoba, gɔnɔ́ aáŋa ndɛ́ ŋaáalú gɛbɛ́ gá boóma gɛ́ɛgɛ gɛ́ háananamɔ́ goŋaá kúe, cɛ inyénée nigúe. Kanɛ́ aáŋa boóma bá kɔ́ɔ bó do báá naá bɛsɛnɛ bɛ́ɛbɛ bá tɔ́ɔnɔnɔmɔ́ go bɛ́, mɔtɔ ba go túe gáábɔ́ a dɛ báá. Ŋgáa gɛsɛnɛ gámɛ gɛ́ ɛ́da goana naá busío bá ufuŋe Sɛsáalɛ.»

¹²Aŋa Fésétusu a mbaá ŋá a báá go ɔ́bɛnɔnɔ na basɔ́gɔ́ɔ báaba naá nɛgála, go gundie Póolo a amɔ́: «Aŋa o lɔ́mɔ́ go amɔ́ gɛsɛnɛ gáhɔ gɛ́ ɛ́da naá busío bá ufuŋe Sɛsáalɛ, gɛ́ gɛɛ́ ɛ́dá hɔ́ɔ.»

¹³Naá nnyimé ya baaná bá medúgú go dómba, ufuŋe Agɛlɛ́pa na Belenísi go bola gɔ́gɔ́ɔ naá Sɛsalɛ́ɛ go go bédíigie Fésétusu.

¹⁴Aŋa bá mbaá gɛ́gáa hɔ́ɔ gɛca gá medúgú, Fésétusu go dúfie ufuŋe Agɛlɛ́pa gɛsɛnɛ gá Póolo; a báá mo oyáná a amɔ́: «Féligisi a mba síé mɔtɔ ummue naá ncíbo ya gɛaŋɔ́ háalá.

¹⁵Aŋa ndɔ́mɔ́ ɛ́dáalú naá Yolósalɛmɛ, bagɔ́nɔ́ɔ bá bedúmbí bɛbáágá na bafɛanɔ́ɔ bá Beyúdene go mo sɔ́mɔnɔ naá yɔmɔ́ɔ goŋaá mmo fáa gɛoba.

¹⁶Gámɛ go bó gundie caá: Batɔ bá Olóma bá dɛ bɛanánáa caŋa ya go dóana go fáa mɔtɔ gɛoba, mɔ́ɔ kanɛ go dɛ́lɛmɛna go go básáaga na batɔ báaba bá mo sɔ́mɔnɔmɔ́ goŋaá á ba bósódío.

¹⁷Gɔ́ɔ dɛ mbaá ncó gunde nabɔ́ háalá; hɔ́ɔ na hɔ́ɔ, gó bélenye, mbáá lukúményée nɛgála, mbúú úhúné goŋaá bú úle na mɔtɔ mɔ́ɔnyɔ háalá.

¹⁸Babɛlɔ́bɛlɔ bɛ́hɛ́ bú ú úlé go go mo sɔ́mɔnɔ, gáábɔ́ go lɔbɛnɔ kanɛ go dúfie bɛbɛ́ bá moóma bɛ́ɛbɛ a mbaá ŋaáa aŋa mmbaá lɔmɔ́ mbéeniŋenye.

¹⁹Bá mbaá lɔmɔ́ goana go mpálɔ́ go masɔ́mɔ má gioliminyo gáábɔ́ na bosɔ́mɔ bá mɔtɔ uncodío bá dɔ́ŋɔnɔmɔ́ bá amɔ́ Yésusu. Yésusu ba ndiemi a mba gúé, kanɛ́ Póolo o oya a amɔ́ a lɛ́ ogɔ́sɔ.

²⁰Yɔmɔ́ɔ cɛ mbíí íyime aŋa ndɔ́mɔ́ ba ŋaá mbide mbɔ́dɔ sá masɔ́mɔ moánɛ; boóma moánɛ bɔ́ mmbuú úhúné Póolo aáŋa o olimonyo go ɛ́da naá Yolósalɛmɛ goŋaá gɛsɛnɛ gɛ́ɛgɛ gɛ́ ɛ́da bágálɛda hɔ́ɔ.

²¹Kanɛ́ Póolo go úhune goŋaá gɛsɛnɛ gɛ́hɛ́ gɛ́ ɛ́da naá busío naá ufuŋe ogɔ́nɔ́ yá Olóma. Gɔ́ɔ ndɔ́mɔ́ íŋénéelú bogaaga goŋaá a gɛ́ga naá ncíbo ya gɛaŋɔ́ go ɛ́da húme aŋa nná mo dómamɔ́ naá ufuŋe Sɛsáalɛ.»

²²Agɛlɛ́pa go oyana Fésétusu a amɔ́: «Ndɛ́galɛga goŋaá yɔmɔ́ɔ moatɛ́ ŋgɔ́bɔ aŋa mɔtɔ mɔ́ɔnyɔ a gálagalamɔ́.» Fésétusu go gundie a amɔ́: «Nembeli, o gaá mo ɔ́bɔ́.»

²³Gó bélenye, Agɛlɛ́pa na Belenísi go úle bá báá bolá na nigúmi niimée, na gɛlɔŋɔlɔ́ŋɔ́ gá batɔ. Gáábɔ́ go nco go íŋene naá nɛgɛlɛ́ ná nɛgála. Olɔŋɔ na bagɔ́nɔ́ɔ bá bisimbi, na bɛyáŋáŋáa bá batɔ bɛ́ɛbɛ naá tɛ́sɔnɔ. Fésétusu go fáa bogaaga, bá búú úlé na Póolo.

²⁴Fésétusu go dúme dogálɔ a amɔ́: «Ufuŋe Agɛlɛ́pa, na bɛɛnyɔ́ɔ biimée báaba no lɔ́mɔ́ háalá nɛcɔ́, no núune mɔtɔ mɔ́ɔnyɔ gitúu gá Beyúdene giimée gɛ́ lɔ́mɔ́ ncó mo sɔ́mɔ́nɔ́ɔlú naá yɔmɔ́ɔ gó ɛ́da bayɛga naá Yolósalɛmɛ gó nco bola háalá, bó oya goŋaá a háanana na nigúe.

²⁵Kanɛ́ yɔmɔ́ɔ ndɛ́ ɛ́náalú goŋaá a lɛ́ kanɛ go ŋa gɛbɛ́ gá boóma gɛ́ɛgɛ a háananamɔ́ na nigúe go gɛ́. Kanɛ́ aŋa mɔ́ɔ moatɛ́ moatɛ a lɔ́mɔ́ úhúnéelú goŋaá gɛsɛnɛ gɛ́hɛ́ gɛ́ ɛ́da naá busío bá Ufuŋe ogɔ́nɔ́ yá Olóma, gɔ́ɔ ndɔ́mɔ́ olímínyóolú go mo dóma hɔ́ɔ.

²⁶Cɛ bɛanánáa boóma moatɛ́ bɔ́ɔbɔ ndɔ́mɔ́ ba ŋaá ŋgɔ́ŋɛnɔ Ufuŋe ogɔ́nɔ́ naá gɛsɛnɛ gɛ́hɛ́. Boóma moánɛ bɔ́ mbáá ná ŋaáa goŋaá a nco dɛ́lɛmɛna naá busío bɛ́nyɔ́, moatɛ́ dómba dómbáa naá busío báhɔ ufuŋe Agɛlɛ́pa. Aŋa bá gaá ná mo úhénée a báá gálágáláa, mbɛa boóma bá go ɔ́ŋɔ.

²⁷Mammana, ŋgɛ́nana caá bó do báá tɛ́nɛ́ɛ goŋaá tóma mɔtɔ ba gɛaŋɔ́ nɔ́ɔnɔ kanɛ go dúfie bese ɛdóɛ ya bɛsɛnɛ yɛ́ɛyɛ bá mo dɔ́ɔnɔnɔmɔ́ go yɛ́.»