Read Nugunu Meŋiigíe 27 Bible Online

Meŋiigíe 27 - Nugunu bible

Meŋiigíe 27

¹Aŋa gofíde gɛ́cɔ́ gá pɛ́ go go ɛ́da naá Itelíi gó mbaá bédílímínyée, bá báá gó gɔ́lɔ Póolo na batɔ bóncodío báaba bá mbaá lɔmɔ́ naá ncíbo ya gɛaŋɔ́, go bó íŋene go ogɔ́nɔ́ɔ ba bisimbi ntɛdɛ, ufíno yɛ́hɛ́ Yúliusu, ba olɔŋɔ yá bisimbi bá Ufuŋe Ogɔ́nɔ́ɔ yá Olóma.

²Gɛ́cɔ́ go bólɛga naá sitíme ya Adalamɛ́tɛ; ɛ mba lɛ́ yɛ ɛ́dana gɛayá gá gigísi gá cí gá Esíi; gɛ́cɔ́ go biene pɛ́. Alɛsɛtálakɛ, mɔtɔ ba Masɛdóanɛ, ba tɛ́sɔnɔ ya Tesoloníke, a mba lɛ́ olɔŋɔ nɛcɔ́.

³Naá gobélie, gɛ́cɔ́ go bola naá Sídono dɛ báá dɛ́lɛ́mɛ́ná hɔ́ɔ; Yúliusu, ba go beŋebeŋe Póolo, go mo íŋene bogaaga bá go ɛ́da go ɛ́na begúle bɛ́hɛ́ goŋaá bá mo fáa bɔ́ɔbɔ a mbaá lɔmɔ́ a lɛ́galɛga.

⁴Aŋa dɛ mbaá fádɛ́gɛ́ná hɔ́ɔlɔ́, gɛ́cɔ́ go ɛnda boayá boayá bá mbádá bá Sípele goŋaá ufufu yó mba lɛ́ yó có úlenine cɛŋɛ.

⁵Gɔ́ɔ dɛ dómbɛnamɔ́ naá máŋɛ́ mekúígíi na bigísi bá cí bá Silisíi na bá Penfilíi, gɛ́cɔ́ go ɛ́da bola naá tɛ́sɔnɔ ya Mɛ́la, yɛ́ɛyɛ naá Lisíi, dɛ báá dɛ́lɛ́mɛ́ná hɔ́ɔ.

⁶Hɔ́ɔ hɔ́ɔlɔ́, ogɔ́nɔ́ɔ ba bisimbi go ɛ́na sitíme ya Alɛsandalɛ́ɛ yɛ́ɛyɛ ɛ mbaá lɛ yɛ ɛ́dana naá Itelíi, a báá có búlúgíe kɔ́ɔ.

⁷Medúgú gɛca, oŋɛndɔ yɛ́cɔ́ naá miimpo go bɛ́ɛmba ndɔlɛ; dɛ dɛ mbáa lɛ dɛ gɔnɔ go ɛnda fɛaŋɔ fɛaŋɔ. Naá gɛdɔmbɔ makɔ́nɔ́ gɔ́ɔ dɛ ɛ́damɔ́ bola naá Sínidi. Aŋa ufufu yó mbaá lɔmɔ́ yó có legene goŋaá dɛ dɛ ɛ́dá naá busío gɛayá gɛ́ɛgɔ, gɛ́cɔ́ go dómbɛna boayá boayá bá mbádá bá Kɛlɛ́tɛ, mekúígíi na Salamɔ́nɛ, anáa ufufu yó mbaá lɔmɔ́ lɛɔɔ.

⁸Na gɛdɔmbɔ makɔ́nɔ́ gɔ́ɔ dɛ ɛ́damɔ́ naá busío na oŋɛndɔ boayá boayá, gɛ́cɔ́ go ɛ́da bola naá hoóma hémmue bá dɔ́ŋɔnɔ bá amɔ́ Bɛnɔ́gɔ́ bá Ayooga, mekúígíi na tɛ́sɔnɔ ya Lasáya.

⁹Medúgú má mbaá ŋá má báá go dómba makɔ́nɔ́, oŋɛndɔ yɔ́ɔyɔ naá miimpo yó ná lɛ́ gɛgáda; goakɛ́ gɛcamɛna gá go bécelene manyáanya gɛ́ mbaá ŋá gɛ́ báá go dómba. Boóma bá ndiemi bɔ́ Póolo a bó lɔsɛnɔmɔ́ a amɔ́:

¹⁰«Bɛsámbɔ́ɔ, ŋgɛ́nana caá oŋɛndɔ yɔ́ɔyɔ yó gaá bɛ́ɛ́mbá gɛgáda. Sitíme na bɛbɛa bá yɛ́ mó gaá dɛ́áŋádɛ́áŋáa gɛbɛ́, akɛ́ bɛɛcɔ́ɔ moatɛ́ moatɛ dɛ lɛ́ ba go sola.»

¹¹Kanɛ́ ogɔ́nɔ́ɔ ba bisimbi a mba lɛ́ ɔ ɔ́bɔnɔ goana dogálɔ dá ugógí na dá mɔtɔ ba sitíme, a bíí inyé go ɔ́bɔ dá Póolo.

¹²Nɛyooga nɛ́ dɛ mbáa lɛ bese go go dúmbie gɛcamɛna gá isió hɔ́ɔ; boóma moánɛ bɔ́ gɛca gá batɔ naá sitíme gɛ́ húmemú ukelú goŋaá bú úlukie hɔ́ɔ; mbééníŋínyí yabɔ́ ɛ mbaá lɔmɔ́ goŋaá mmagɔ yɛ amɔ́ ɛ bɛ́ɛmba, bɛ́ ɛ́da bola naá Fenígisi, nɛyooga nímmue ná Kɛlɛ́tɛ nɛ́ɛnɛ nɛ́ núunemú gɛmbádáa na gɛmmoɛnáa gá mbɛ́dɛ́mɛ́nɛ́ná buisí, go go dúmbie gɛcamɛna gá isió hɔ́ɔ.

¹³Aŋa ufufu yá go ɛ́da go úle gɛmbádáa yó mbɛɛ́ ɛ́dá go fufe, gáábɔ́ go béeniŋinye goŋaá gosaŋa gábɔ́ go gɛɛ́ ɛndá bese; go fediginye gɛkɔ́ŋɔ gá go dílimenye sitíme, gáábɔ́ go ɛ́da go ɛnda boayá boayá naá máŋɛ́, mekúígíi na Kɛlɛ́tɛ.

¹⁴Moɔnɔ́ ba gɛcamɛna goana a á dómbá, gɛgaaga gá puŋe, ufíno yá gɛ́ Ɛlakɛlɔ́ŋɔ, go ɛ́da fadɛgɛna naá ɛgɔndɔ ya Kɛlɛ́tɛ.

¹⁵Kɔ́ɔ puŋe yɛ́ɛyɔ ɛ dandamɔ́ ɛ nóŋada sitíme ɛ báá dómbá na yɛ́ kanɛ mbátɛmbɛ́gɛ́ná. Gɛ́cɔ́ go bádɛ́ɛnɛna, sitíme ɛ báá dómbá nɛcɔ́.

¹⁶Gɛ́cɔ́ go ɛ́da dómba gɛmbádáa gá ikíkísi há gɛyɛŋɛ gá cí naá máŋɛ́, bá dɔ́ŋɔnɔmɔ́ bá amɔ́ Kóda, kɔ́ɔ dɛ bɛamɔ́ ŋgásɛ́ ya go gɔ́lɔ inendúe há gisódio na gɛdɔmbɔ makɔ́nɔ́.

¹⁷Aŋa bá mbaá hɛ́ búlúgíe naá mmoɛná, gáábɔ́ go gódana sitíme na duelí dá gidúgune. Kanɛ́ aŋa bá mbaá lɔmɔ́ bá díine goŋaá sitíme ɛ dɛ ɛ́dá bédímene naá mocánána má cɔ́lɔ sá Libíi, gáábɔ́ go siisie gidílímínínyé sitíme, bá báa bádɛ́ɛ́nɛ́ná puŋe ɛ bó indenye.

¹⁸Aŋa gó mbaá lamá gó ɛ́da bélie gɔgɔ́ puŋe ɛ dúmbenye na go có búugebugie, batɔ báaba naá sitíme go ɛ́da go gɔ́lɔnɔ bɛbɛa bú umbenene naá máŋɛ́.

¹⁹Naá buisí bá gádadɔ́ɔ, batɔ bá sitíme go ɛ́da go umbenene na ɛmbɔ́gɔ yabɔ́ ya moatɛ́ moatɛ moóma má sitíme naá miimpo.

²⁰Medúgú gɛca, buisí bó do hémé, muotóti mó do ɛ́nɛ́gá; gɔgɔ́ puŋe yɛ́ ɛ dúmbenyemú na bogaaga; bɛnamá bɛ́cɔ́ go gologosa dɛ báá yímíe mbééníŋínyí ya ŋaá dɛ gɔɔ́ ɔyɔ́.

²¹Medúgú má báá dómbá gɛca mɔtɔ a dɛ nyáá boóma. Gɔ́ɔ Póolo a fadɛgɛnamɔ́ naá kadɛ́gadɛ́ɛ yabɔ́, go bó oyana a amɔ́: «Begúle bámɛ, bó mba lɛ́ bese no ŋgɔ́bɛnɔ dɛ dɛ úlúkíe naá Kɛlɛ́tɛ; gásɛ́ gɛbɛ́ aŋa gɛ́ɛgɛ náana gɛ́ dɛ á gá có gídé.

²²Godɔ́ɔdɔ yɛ́ɛyɛ, ŋgaá nyó úhúné goŋaá no bɛa kélemene, akɛ́ mɔtɔ ba ummue naá olɔŋɔ yɛ́nyɔ́ɔ a dɛ gaá taŋá, goana sitíme yɛ́ ɛ gaá ná solá.

²³Mammana, Asaŋa mɔ́ɔnyɔ ŋgɔ́bɔnɛnɔmɔ́ nɛhɛ́ kunde mmo yɔgɔnɛnɔ, Ɛ́ŋgɛlɛsɛ bɛhɛ́ a báa ŋgɛ́nɛgɛna na budúgú,

²⁴a báá ŋgoyáná a amɔ́: “Póolo, o do gɔ́lɔ́ bofoá, o sɛmɛganana go dɛ́lɛmɛna naá busío bá Sɛsáalɛ. Asaŋa go busi bɛ́hɛ́, a á go fáá gɛɔyɔ na batɔ biimée báaba o lɔ́mɔ́ nabɔ́ naá sitíme.”

²⁵Gɔ́ɔ, begúle bámɛ, bɛáa nɔnɔ kélemene; goakɛ́ mbɛanana toodo odɛ́máa naá Asaŋa goŋaá bó gaá báŋaáa aŋa a á ná ŋgoyáná.

²⁶Kanɛ́ puŋe ɛ gɛɛ́ ɛ́dá có nɔ naá gɛyɛŋɛ gá cí gímmue naá tɛ́mádɛ́má ya máŋɛ́.»

²⁷Bó mba lɛ́ budúgú bá gɔ́ɔ́dɔ́ na génni, gɔgɔ́ puŋe ɛ có gɔ́gɔ naá máŋɛ́ má Meditilenée. Boóma bá tólóbóo ya budúgú, boyogóní bá sitíme go ɛ́na aŋa ɛ gaá gá lɛ́ go báláfɛna cí.

²⁸Gɔ́ɔ bá nɔɔmɔ́ nuelí na gɛdɔ́bɔ́ gá gɛkɔ́ŋɔ gódɛ́náalú kɔ́ɔ naá miimpo go go ɛ́na go íŋenene gá má: gá busío, bá bɛ́ɛ́ ɛ́ná goŋaá goíŋenene gó mba lɛ́ mɛ́da nitíno na buinyo na máandɛ́; bá á gɔnɔ́ báyɛkɛdɛna, bá báá gɔnɔ́ nɔɔ nuelí bá bɛ́ɛ́ ɛ́ná goŋaá goíŋenene gó lɛ́ mɛ́da nitíno na mánnámanyɛ́.

²⁹Kanɛ́ aŋa bá mbaá lɛ bá díine goŋaá sitíme yɛcɔ́ ɛ dɛ bádóɛ́dá go bɛdánɛ́dánɛ́, gáábɔ́ go nɔɔ bidílímínínyé sitíme bínni naá nnyimé ya yɛ́; go ɛ́da go gɛ́gana, bá file gobála gá gɛyɛ́nɛ́.

³⁰Boyogóní bá sitíme go ɛ́da go fúmbe pɛ́ ya goŋaá bá pamba. Kɔ́ɔ bá siisiemú inendúe há gisódio naá miimpo bá ágana gɛmbɛ́ná bá amɔ́ bɔ́ɔ báaba bɛ́ ɛ́da góda bese bidílímínínyé naá busío bá sitíme.

³¹Kanɛ́ Póolo go oyana ogɔ́nɔ́ɔ ba bisimbi ba Olóma na bisimbi a amɔ́: «Aáŋa batɔ béení bá dɛ lɔbɛ́nɔ́ naá sitíme no do gaá pambá.»

³²Gɔ́ɔ bisimbi bɛ́ dómbamɔ́ go sómba duelí dɔ́ɔdɔ dó mbaá lɔmɔ́ dó nona inendúe, bá báá hɛ́ dɛ́ɛ́ná, hɛ́ báá dómbá.

³³Aŋa bá mbaá ŋá bá gá gɛ́gana goŋaá gɛyɛ́nɛ́ gɛ́ bála, Póolo go úhune goŋaá ŋgáa mɔtɔ uŋkimée a nyáanya, a gálagala a amɔ́: «Ínoni, medúgú mɔ́ɔ́dɔ́ na ménni mámáa no lɔ́mɔ́ no báá gɛ́gáa, no do nyáá boóma.

³⁴Ŋgaá nyó úhúné goŋaá no nyáanya, goakɛ́ bó háanana nɛnyɔ́ goŋaá no ɔyɔ. Kanɛ́ akɛ́ mɔtɔ ba ummue naá olɔŋɔ yɛ́nyɔ́, cabá ɛ dɛ gaá mo kusídé.»

³⁵Naá nnyimé ya dogálɔ dɔ́ɔdɔ, Póolo go gɔ́lɔ gɛlɛ́dɛ, go bósógolidio Asaŋa naá busío bá batɔ biimée, go gɛ́ gɛ́sa a bɛ́ɛ́ ɛ́dá go nyáanana.

³⁶Gɔ́ɔ batɔ biimée bá bɛamɔ́ masánca bá báá nyáányáa tɔ́nɔ.

³⁷Dɛ mba lɛ́ naá sitíme batɔ mantɛdɛ máandɛ́ na otíno ádadɔ́ na buinyo na ummue.

³⁸Aŋa bá mbaá nyáányáa bá báá hóógío, gáábɔ́ go umbenene belée yɛ́ɛyɛ ɛ mbaá síéné goŋaá sitíme ɛ bɛ́ɛmba láhɔ láhɔ.

³⁹Aŋa gɛyɛ́nɛ́ gɛ́ mbaá bálá, boyogóní bá sitíme bá dɛ mbá lɛnca cí. Kanɛ́ gáábɔ́ go ɛ́na gɛnana gɔnɔ́ na hoóma há ɛcánána; gáábɔ́ go gedie goŋaá bá díliminye sitíme hɔ́ɔ aáŋa bó lɛ́ ba go ɛnda.

⁴⁰Gáábɔ́ go fulune bidílímínínyé sitíme bá báá bɛ́ dɛ́ɛ́ná naá máŋɛ́. Bá báá fulúné naá gɛcamɛna gímmue eé gímmue duelí dá bɛbosa bɛ́ɛbɛ bɛ́ mbaá lɔmɔ́ bɛ́ oyoyo go go indenye sitíme. Kɔ́ɔ bá ágamɔ́ sanda ya ufufu naá busío bá sitíme goŋaá ufufu yó yɛ dídigene, bá bɛ́ɛ́ ɛ́dá bɛ́ ɛ́dana anáa hoóma há ɛcánána.

⁴¹Kɔ́ɔ bɛ́ ɛ́damɔ́ bola naá hoóma há gɛca gá ɛcánána naá cí ya miimpo, sitíme go kákɛna hɔ́ɔ. Busío bá yɛ́ bó báá bédíménée naá gɛca gá ɛcánána gadɛ́ɛ, ɛ dɛ gɔnɔ́ bégélidie. Naá gɛcamɛna gɛ́ɛgɔ, miimpo máama má mbaá lɔmɔ́ má bádóɛdana na bogaaga naá nnyimé má yɛ gada.

⁴²Bisimbi bɛ́ mba lɛ́ bɛ́ lɛ́galɛga go óna bɛmbɔgɔ goŋaá akɛ́ gímmue gɛ́ dɛ ságɛ́ná na gɛnɛ́ŋa.

⁴³Kanɛ́ ogɔ́nɔ́ɔ ba bisimbi ba Olóma a mba lɛ a lɛ́galɛga go sódio Póolo, gɔ́ɔ a bó legemú goŋaá bá dɛ ŋaáa aŋa bá béeniŋenyemú nɔ́ɔnɔ. A báá fáá báaba bá mbaá lɔmɔ́ bí íyimene gɛnɛ́ŋa bogaaga bá ŋaá bá dóana go bɔ́nɔ naá miimpo bá yooga bɛ́ ɛ́da naá cɔ́lɔ.

⁴⁴Báaba bóncodío bá síene bá bienene naá nnyimé, bá bégumbeninene naá biseli bá mabámá ɛ́na lí naá bigísi bá sitíme. Nɔ́ɔnɔ gɔ́ɔ bá yoogamɔ́ biimée kanɛ ummue ba cabá go mo kuside.