Read Nugunu Meŋiigíe 3 Bible Online

Meŋiigíe 3 - Nugunu bible

Meŋiigíe 3

¹Buisí búmmue, gɔ́ɔ Píele olɔŋɔ na Sáŋa bá fadɛgɛnamɔ́ bá báa bólɛ́gá naá Nnyaŋá ya Asaŋa go go ɛ́da bósógolonyo Asaŋa hɔ́ɔ, gɛcamɛna gá bigúlí bɛ́dadɔ́.

²Naá miíŋene má gɛasɛ́ gá Nnyaŋá ya Asaŋa gɛ́ɛgɛ bá mbaá lɔmɔ́ bá dɔ́ŋɔnɔ bá amɔ́ «Gɛnɔ́gɔ́ gá Gɛasɛ́», mɔtɔ ummue a mba lɛ́ hɔ́ɔ bésúgúlídéelú go cí, a mba lɛ́ bébíénéelú gɛcɛ́gɛlɛ. Miisí miimée, bá mba lɛ́ bú úle nɛhɛ́ bá nco mo dɛ́ɛna hɔ́ɔlɔ́ goŋaá ɔ ɔŋɔnɔ batɔ báaba bá mbaá lɔmɔ́ bá nco go íŋenene naá Nnyaŋá ya Asaŋa moóma.

³Aŋa a mbɛɛ́ ɛ́ná Píele nɛhɛ́ na Sáŋa bú úlene go go nco go íŋene naá Nnyaŋá ya Asaŋa, gɛ́hɛ́ go ɛ́da go bó ɔŋɔnɔ muinyí.

⁴Gɔ́ɔ Píele nɛhɛ́ na Sáŋa bá mo ágɛnamɔ́ oŋgíso bá bɛ́ɛ́ ɛ́dá go mo núune, kanɛ́ Píele na Sáŋa go mo oyana bá amɔ́: «Có núúnéemú.»

⁵Mɔtɔ go ɛ́da go bó núune cóóó, goakɛ́ a mba lɛ́ a bágɛ́gana goŋaá bá mo fáa boóma.

⁶Píele go mo oyana kanɛ́ a amɔ́: «Akɛ́ muinyí, akɛ́ góolo, bá búmmue cɛ bɛanánáa. Kanɛ́ ko fáamɔ́ bɔ́ɔbɔ ndɔ́mɔ́ na bɔ́, bó lɔ́mɔ́: go ufíno yá Yésu Kilítu ba Násalɛdɛ, ɛndáa.»

⁷Kɔ́ɔ Píele a mo gumbenemú go ombɔ́gɔ onɔ́mɛ a báa mo fedígínyée tɛ́nɛ́ɛ. Bɛgɔ́ndɔ́ na mogɔ́lɛgɔ́lɛ́ má mɔtɔ mɔ́ɔnyɔ go dómba go bɛa bogaaga;

⁸mɔtɔ go yáhoga tɛ́nɛ́ɛ, a bɛ́ɛ ɛ́dá go ɛnda. Olɔŋɔ na Píele na Sáŋa, gɛ́hɛ́ go íŋene naá Nnyaŋá ya Asaŋa, ɛ ɛnda, a bécume, a gúmenye Asaŋa.

⁹Batɔ biimée bá mba lɛ́ bá mo núune aŋa a mbaá lɛ ɛ ɛnda, a gúmenye Asaŋa.

¹⁰Aŋa batɔ bá mbaá mo bétémbúgínyée bá bíí íyímé bá amɔ́ mɔ́ɔ a mbaá lɔmɔ́ a gɛ́ga bésúgúlídéelú go cí naá miíŋene má Gɛnɔ́gɔ́ gá Gɛasɛ́ gá Nnyaŋá ya Asaŋa go go ɔŋɔnɔ muinyí, gáábɔ́ go bɛa bofoá na bibékúkí go boóma bɔ́ɔbɔ bó mbaá lɛ báŋaáalú.

¹¹Kanɛ́ aŋa mɔtɔ mɔ́ɔnyɔ a mbaá lɔmɔ́ nábɛnábɛ na Píele na Sáŋa, a dɛ bó síé, batɔ biimée na bibékúkí dácɛ, go kúluguge bá bɛ́ɛ́ ɛ́dá anáa bá mbaá lɔmɔ́ naá balánda mɔ́ɔnyɔ bá mbaá lɔmɔ́ bá dɔ́ŋɔnɔ bá amɔ́ «Balánda bá Salomɔ́ŋɔ.»

¹²Aŋa Píele a mbɛɛ́ ɛ́ná nɔ́ɔnɔ, gɛ́hɛ́ go ɛ́da go oyanɛna batɔ a amɔ́: «Bɛɛnyɔ́ɔ batɔ bá Ɛ́sɛlahɛ́ɛlɛ báaba, goakɛ́ kanɛ́ no békúkemú giéŋugie gɛ́ɛgɛ o? Ɛkádɛ́ no có núunemú aŋa bɛɛcɔ́ɔ bá moánɛ dɛ báá ná ŋaáa goŋaá mɔtɔ mɔ́ɔnyɔ ɛ ɛnda go bogaaga bɛ́cɔ́, ɛ́na lí bó lɔ́mɔ́ go gobɛ́ɛmba gɛ́cɔ́ gɔ́ɔgɔ báladáalú na Asaŋa o?

¹³«Asaŋa ba Ábalaháma, ba Ɛ́saga, ba Yɔ́kɔbɔ, Asaŋa ba biisée kɔ́nɔ́ɔ bá biisée bɛ́cɔ́[21], mɔ́ɔ a fáamɔ́ uyogóní bɛhɛ́ Yésusu nigúmi. Bɛɛnyɔ́ɔ moatɛ́ no mbaá lɔmɔ́ mo dúelú, no báá mo básáŋóná naá busío bá Pɛ́latɛ, mɔ́ɔ bégedíelú goŋaá a mo dɛ́ɛna.

¹⁴No mbi inyé mɔ́ɔnyɔ a mbaá lɔmɔ́ Gimmúmpúu gɔnɔ́ Usi, no báá lɛ́gá go ɔŋɛnɔ Pɛlátɛ goŋaá a nyó dɛ́ɛnɛna mɔ́ɔnyɔ a mbaá lɔmɔ́ uŋgúníní batɔ[22].

¹⁵Nɔ́ɔ gɔ́ɔ no mbaá ŋaáa goŋaá Ogɔ́nɔ́ɔ ba gɛɔyɔ a gúe. Kanɛ́ Asaŋa a mba mo fúfúné naá nigúe, a báá mo gundíe naá gɛɔyɔ, bɛɛcɔ́ɔ dɛ lɛ́ ŋgominyo sɛ́ɛsɛ kɔ́ɔ.

¹⁶Kanɛ́ go mɔtɔ mɔ́ɔnyɔ no mo núunemú no gɔnɔ mo íyimene mɔ́ɔnyɔ, bó lɔ́mɔ́ bogaaga bá ufíno yá Yésusu bɔ́ bó fáamɔ́ mɔtɔ mɔ́ɔnyɔ giéŋugie go busío bá gioliminyo go Yésusu.

¹⁷«Akɛ́ nɔ́ɔnɔ, bolimóní bámɛ, ŋgíyimene bese goŋaá bɛɛnyɔ́ɔ na mefuŋe mɛ́nyɔ́ no mba ŋaáa Yésusu nɔ́ɔnɔ naá kanɛ go íyime.

¹⁸Kanɛ́ nɔ́ɔnɔ gɔ́ɔ Asaŋa a mbaá hóógío nogálɔ nɛ́hɛ́ nɔ́ɔnɔ mbúsí sá Asaŋa sɛ́ mbaá lɛ húmíelú cóá cóá goŋaá: “Mesíi bɛhɛ́ a ŋgɔ ɔ́bɛ́gɔ́nɔ́ɔ[23]”.

¹⁹Núgíe nɔnɔ kanɛ́ gɛɔyɔ gɛ́nyɔ́, no gunde naá Asaŋa, gɔ́ɔ a gaá ná nyó hééhínyée bɛlɔgɔ bɛ́nyɔ́.

²⁰Nɔ́ɔnɔ gɔ́ɔ Daadáa Asaŋa a ná nyó dómɛnamɔ́ bɛcamɛna bá go fuuge, a gunde a nyó dómɛna Mesíi mɔ́ɔnyɔ a mbaá lɔmɔ́ iyídéelú gɛcamɛna gɛ́ gá lɛ́ naá busío go busío bɛ́nyɔ́; mɔ́ɔ a lɔ́mɔ́ Yésusu.

²¹Godɔ́ɔdɔ háalá, Yésu Kilítu a háanana go gɛ́ga naá mmoɛná bó ɛ́da húme naá gɛcamɛna gɛ́ɛgɛ boóma buimée bó ŋgaá gɔnɔ́ bégedie, aŋa Asaŋa a mbaá lɔmɔ́ oyɛ́dáalú fueké fueké naá eŋgúdé yá bimmúmpúu bɛ́hɛ́ bá mbúsí sá Asaŋa.

²²Moatɛ́. Mɔ́sɛsɛ a mbo oyɛ́dá a amɔ́: “Daadáa Asaŋa bɛnyɔ́ a ŋga nyó dómɛ́ná mbúsí aŋa yɔmɔ́ɔ, ɛ ŋga bɛ́ɛ́mbá mɔtɔ ba gɛdɔŋɔ gɛ́nyɔ́. Gɔ́ɔ no ŋgaá mo bódólónyóo, no ɔ́bɔ boóma buimée bɔ́ɔbɔ a ŋgaá nyó oyáná.

²³Mɔtɔ uŋkimée mɔ́ɔnyɔ a ŋgií inyé go ɔ́bɛnɔ mbúsí moánɛ, bá ŋga mo émíe naá boɛ́nɔ bá Asaŋa, bá mo óna[24]”.

²⁴Bó lɔ́mɔ́ go medúgú máama gɔ́ɔ mbúsí sá Asaŋa iŋkimée, gó ɛ́da bayɛga naá mbúsí ya Asaŋa Sémuele, sɛ́ mbaá gálágáláa, sɛ́ báá gɔnɔ́ dóógónyóo.

²⁵Tánɔ yɛ́ɛyɛ Asaŋa a mbaá fáá naá eŋgúdé yá mbúsí sá Asaŋa ɛ lɔ́mɔ́ go busío bɛ́nyɔ́, gɔ́ɔ no lɔ́mɔ́ naá gɛlada bugúle gɛ́ɛgɛ Asaŋa a mbaá ŋaáa na biisée bɛ́nyɔ́ naá hoóma háaha Asaŋa a mbo oyáná Ábalaháma a amɔ́: “Na mbɔ́dɔ yahɔ ya batɔ gɔ́ɔ ka ŋgaá foná egúli eŋkimée yáaya naá cí[25].”

²⁶Náana, manɛ́ go busío bɛ́nyɔ́ gɔ́ɔ Asaŋa a mbaá ŋaáa goŋaá uyogóní bɛhɛ́ u úle. A mba mo dómá go go nco nyó fona, bó húme goŋaá uŋkimée mɔ́ɔnyɔ naá bɛɛnyɔ́ɔ a dɛ́ɛna bɛgáda bɛ́hɛ́ bá meŋiigíe.»