Read Nugunu Meŋiigíe 4 Bible Online

Meŋiigíe 4 - Nugunu bible

Meŋiigíe 4

¹Píele na Sáŋa bá gá lɛ́ naá go gálagala nɔ́ɔnɔ, bedúmbí bɛbáágá naá Asaŋa, ogɔ́nɔ́ɔ ba bebeŋíbéŋí Nnyaŋá ya Asaŋa na beseduseyéŋe, go úle bá báá bolá.

²Bá mba lɛ́ bɔ́ ɔ́bɔnɔ mpímí goŋaá Píele na Sáŋa bá mba lɛ́ bá húunenye gɛdɔŋɔ bá amɔ́ Yésusu a mba fúfúgé, gó dúfenye nɔ́ɔnɔ goŋaá begúe bá lɛ́ ba go fúfugene.

³Kɔ́ɔ bá dómbamɔ́ go bó gumbene bá báá bó ágá naá ncíbo ya gɛaŋɔ́ gó bɛ́ɛ́ ɛ́dá húme anáa ɛyɛ́nɛ́ɛ, goakɛ́ bó mbaá ŋá bó ná lɛ́ hɛɔbɔ́bɔ́ɔ.

⁴Akɛ́ nɔ́ɔnɔ, gɛca naá báaba bá mbɔɔ́ ɔ́bɔ́ gohúunenye gá Píele na Sáŋa bá mbo olímínyóo; ombanɔ yá boolímínyí go bólɛga ombanɔ batɔ makana tɔ́sɛnɔ ɛ́táanɔ.

⁵Aŋa gó mbaá bélíe, mefuŋe má Beyúdene na bafɛanɔ́ɔ na muloodio má gicele go bábándɛgɛna naá Yolósalɛmɛ.

⁶Bá mba lɛ́ hɔ́ɔ tɔ́nɔ Háanɛ, Ufuŋe yá bedúmbí bɛbáágá naá Asaŋa, Keyífe, Sáŋa, Alɛgɛsándɛlɛ na ncíbo ya batɔ iŋkimée ya ogɔ́nɔ́ɔ ba bedúmbí bɛbáágá naá Asaŋa.

⁷Kɔ́ɔ bá bó úlinemú na Píele na Sáŋa naá busío bábɔ́, go ɛ́da go bó úhene bá amɔ́: «Go bogaaga bóhanɛ́, ɛ́na go ufíno yóhanɛ́ɛ no báa ná ŋaáa giéŋugie gɛ́ɛgɛ o?»

⁸Gɔ́ɔ Píele, dácɛ na Gimmúmpúu gá Giliíli, a bó oyanamɔ́ a amɔ́: «Bɛɛnyɔ́ɔ mefuŋe má gɛdɔŋɔ na bafɛanɔ́ɔ:

⁹aŋa bá có úhenemú ínoni yɛ́ɛyɛ goŋaá dɛ báá básáágá go besé yɛ́ɛyɛ dɛ ŋamɔ́ onɛ́mɔnɛmɔ, dɛ gunde dɛ dúfie pɛ́ yɛ́ɛyɛ e éŋugemú go yɛ́,

¹⁰íyíme nɔnɔ bese, bɛɛnyɔ́ɔ biimée na gɛdɔŋɔ gá Ɛ́sɛlahɛ́ɛlɛ giimée goŋaá: bó lɔ́mɔ́ go ufíno yá Yésu Kilítu ba Násalɛdɛ, mɔ́ɔnyɔ bɛɛnyɔ́ɔ báaba ba moatɛ́ moatɛ no mbaá mo giléné naá kolósi. Kanɛ́ Asaŋa go mo fúfune naá begúe, gɔ́ɔ mɔtɔ mɔ́ɔnyɔ a lɔ́mɔ́ éŋúgéelú aŋa no mo núunemú náana, caá akɛ́ go ufíno yúntió.

¹¹Yésusu mɔ́ɔnyɔ mɔ́ɔ moánɛ Ŋgɔ́ŋɛ́ sɛ́ oyamɔ́ go busío bɛ́hɛ́ goŋaá: “Ɛdánɛ́ nɛ́ɛnɛ bɛɛnyɔ́ɔ befúégí no mbaá umbé, nɛ́ lɛ́ ɛ́yáalú ɛdánɛ́ ná bugído[26].”

¹²Goana mɔ́ɔ a lɔ́mɔ́ na gisódio go busío bá batɔ, goakɛ́ naá cí yɛ́ɛyɛ iŋkimée, Asaŋa a dɛ mbá fáa batɔ ufíno yúntió yɔ́ɔyɔ dɛ mbaá lɔmɔ́ ba go bɛa gisódio go yɔ́.»

¹³Aŋa batɔ báaba naá Nɛgála bá mbɛɛ́ ɛ́ná goŋaá Píele na Sáŋa bá gálagala kanɛ akɛ́ kégí, gɔ́ bɔ́ɔ bá mba lɛ́ bá núune goŋaá bá lɛ́ kanɛ go hóona kálata, kanɛ go íyime naá odóɛ, gáábɔ́ go békúke makɔ́nɔ́. Bá mba lɛ́ lɛncáalú goŋaá bá lɛ́ batɔ bá olɔŋɔ yá Yésusu.

¹⁴Kanɛ́ naá gɛcamɛna gɛ́ɛgɔ, bá mba lɛ́ bá núune tɔ́nɔ mɔtɔ mɔ́ɔnyɔ a mbaá lɔ́mɔ́ éŋúgéelú tɛ́nɛ́ɛ mekúígíi nabɔ́, gáábɔ́ go lɔbɛnɔ kanɛ boóma bá go gundie.

¹⁵Kɔ́ɔ bá húmiemú baapótɛlɛ naá hoóma há Nɛgála, go go gedegedie bɔ́ɔ na bɔ́ɔ aŋa bá lɔ́mɔ́ bá goŋaá bá sómba gɛsɛnɛ.

¹⁶Bá mba lɛ́ bá bágálɛnagalɛna, bá búúhenehene bá amɔ́: «Dɛ gaá ná ŋaáa batɔ báaba ɛkádɛ o? Mammana, batɔ báaba naá Yolósalɛmɛ biimée bí íyimene bá amɔ́ bɔ́ɔ bá báá ná ŋaáa gɛantá gá boóma gɛ́ɛgɛ, dɛ dɛ báá ba go sáŋona.

¹⁷Kanɛ́ go goŋaá boóma moánɛ bó do saáa gɛdɔŋɔ giimée, ŋgáa dɛ bó lɔsɛnɔ, dɛ bó lege goŋaá bá dɛ gɔnɔ́ go oyana mɔtɔ akɛ́ ɛkádɛ go ufíno yá Yésusu go busío buimée.»

¹⁸Gɔ́ɔ bá gɔnɔmɔ́ dɔ́ŋɛnɔ baapótɛlɛ bá báa bó legé goŋaá bá dɛ gɔnɔ́ gálɛda akɛ́ sɔŋɛ ɛ́na lí bá dɛ gɔnɔ́ húunenye go ufíno yá Yésusu go busío buimée.

¹⁹Kanɛ́ Píele na Sáŋa go bó gundie bá amɔ́: «Bɛɛnyɔ́ɔ moatɛ́ moatɛ núúnée nɔnɔ no gunde no oyɛda ɛ́na gó háanana goŋaá dɛ nyó ɔ́bɛnɔ gó dómba goŋaá dɛ ɔ́bɛnɔ Asaŋa.

²⁰Kanɛ́ naá bɛ́cɔ́ boayá, dɛ dɛ báá bá go lɔbɛnɔ akɛ́ sɔŋɛ goŋaá dɛ dɛ oyáa hoóma hiimée bɔ́ɔbɔ dɛ mbɛɛ́ ɛ́ná dɛ báá gundé dɛ bɔ́ɔ́ ɔ́bɔ́.»

²¹Batɔ bá Nɛgála go gɔnɔ bó lɔsɛnɔ bá báá bó dɛ́ɛ́ná. Bá dɛ mbá bɛa pɛ́ ya go bó fáa noséésényée, goakɛ́ mɔtɔ uŋkimée a mba lɛ́ a gúmenye Asaŋa go bosɔ́mɔ bɔ́ɔbɔ bó mbaá bádómbánáa.

²²Mɔtɔ mɔ́ɔnyɔ a mbaá lɔ́mɔ́ éŋúgéelú naá buune mmoɛná a mba lɛ́ na nnyómá otíno áhandɛ́ na oŋɛndɛ́gá.

²³Bá dɛ́ɛnana Píele na Sáŋa nɔ́ɔnɔ, gáábɔ́ go dómba bá bɛ́ɛ́ ɛ́dá gíde begúle bábɔ́, go ɛ́da go bó dúfenye buimée bɔ́ɔbɔ bagɔ́nɔ́ɔ bá bedúmbí bɛbáágá naá Asaŋa na bafɛanɔ́ɔ bá mbaá bó oyánɛ́náa.

²⁴Aŋa bɔ́ɔ biimée bá mbɔɔ́ ɔ́bɔ́ ŋgoyáamɔ́ yɛ́ɛyɛ, boolímínyí gáábɔ́ go ága ukelú yúmmue naá mbósógólí yɛ́ɛyɛ bá amɔ́: «Daadáa Asaŋa, maamɔ́ɔ mɔ́ɔ o mba besíe mmoɛná, cí, máŋɛ́, na moóma muimée mɔ́ɔmɔ mó lɔ́mɔ́ kɔ́ɔ[27].

²⁵Maamɔ́ɔ mɔ́ɔ o mbaá gálɛ́dá dogálɔ dɔ́ɔdɔ isée bɛcɔ́, uyogóní bahɔ Défidi, a mbaá húmíe naá mɔ́ nyuudé go bogaaga bá Gimmúmpúu gá Giliíli a amɔ́: “Bɛdɔŋɔ bɛ́ bábɛ́gamɔ́ na bogaaga goakɛ́? Mɛɛ́nɔ má gódamɔ́ modɔgɛ má kanɛ ŋgénéménée goakɛ́ o?

²⁶Bagɔ́nɔ́ɔ bá cí bá báá gó dɛ́lɛmana go nɛnoa, Mefuŋe má báa go bénebigenye go go nuugenye Daadáa na Giiyide bɛhɛ́[28].”

²⁷«Ɛɛ́ɛŋ, bó lɛ́ mammana goŋaá Elóode nɛhɛ́ na Pɔ́ŋɔsɛ Pɛlátɛ bá mba bénebígínyée naá tɛ́sɔnɔ yɛ́ɛyɛ olɔŋɔ na biinyí gɔnɔ́ na egúli yá Ɛ́sɛlahɛ́ɛlɛ go go nuugenye Gimmúmpúu gáhɔ gá uyogóní Yésusu mɔ́ɔnyɔ o mbií iyídé[29].

²⁸Bá mbaá ŋaáa nɔ́ɔnɔ go go hóogio buimée bɔ́ɔbɔ go bogaaga báhɔ na ndɛ́ga yahɔ, o mbaá dóáná go kɛsɛda.

²⁹Daadáa Asaŋa kanɛ́ godɔ́ɔdɔ, ɛ́ná aŋa bá có séesenyemú, o fáa boyogóní báhɔ bogaaga bá go oya Nogálɔ náhɔ na masánca.

³⁰Dúfíe bogaaga báhɔ goŋaá biéŋugie, bɛsɛɔ na bieninye bá gobékúke mó báŋanana go ufíno yá gimmúmpúu gáhɔ gá uyogóní Yésusu.»

³¹Aŋa bá mbaá maná mbósógólí, hoóma háaha bá mbaá lɔmɔ́ bábándɛ́gɛ́náalú hɔ́ɔ go yiŋkimide. Kɔ́ɔ Gimmúmpúu gá Giliíli a bó hóogomú bɔ́ɔ biimée, gáábɔ́ go ɛ́da go dúmenye nogálɔ ná Asaŋa na masánca.

³²Giimbó gá boolímínyí gɛ́ mba lɛ́ mammana bágódɛ́náalú, na odɛ́má yúmmue na mbééníŋínyí mmue. Moóma mábɔ́ mó mba lɛ́ émmué, mɔtɔ ummue a dɛ mbáa lɛ ba go bágóba ombɔ́gɔ a amɔ́ bɔ́ɔbɔ bó ɔ́bɛnɔnɔmɔ́ namɛ.

³³Na bogaaga buimée gɔ́ɔ baapótɛlɛ bá mbaá lɛ bó oya kúme gɛbɛ́láa ya Daadáa Yésusu, Asaŋa a fona boolímínyí biimée makɔ́nɔ́.

³⁴Naá olɔŋɔ yábɔ́, mɔtɔ a dɛ mbáa lɛ mbií ya boóma. Kɔ́ɔ gó mbaá lɛ, mɔtɔ uŋkimée mɔ́ɔnyɔ a lɔ́mɔ́ na ntɛ́mɛ́, akɛ́ nnyaŋá, a mó dúe, u úle na muinyí mɔ́ɔmɔ a báa ná bódá,

³⁵a nco go íŋene baapótɛlɛ; bá lɛ go ɛ́da kanɛ́ go abana onyɔ moánɛ muinyí aŋa bosɔ́mɔ bɛ́hɛ́ bó lɔ́mɔ́.

³⁶Nɔ́ɔnɔ gɔ́ɔ, mɔtɔ ummue ufíno yɛ́hɛ́ Yósɛbɛ, moɔnɔ́ ba Belefíte, mbíényée ya Sípele, mɔ́ɔnyɔ baapótɛlɛ bá mbaá mo logá goŋaá Banábasɛ (nɔ́ɔnɔ gó lɛ́ aá mɔtɔ mɔ́ɔnyɔ a gíndenyemú),

³⁷a dúemú ntɛ́mɛ́ yɛhɛ́, a búu úlé na muinyí a báa ncó go íŋene baapótɛlɛ.