Read Nugunu Meŋiigíe 5 Bible Online

Meŋiigíe 5 - Nugunu bible

Meŋiigíe 5

¹Kanɛ́ kɔ́ɔ mɔtɔ ummue, ufíno yɛ́hɛ́ Ananɛ́asɛ, na ogɛ́ Safɛláa, bá dúemú gigísi gábɔ́ gá cí.

²Ananɛ́asɛ go gɛ́sa gigísi gá muinyí, a bɛ́ɛ ɛ́dá síe gigísi naá baapótɛlɛ. Ogɛ́ Safɛláa a mba lɛ́ i íyimene.

³Kɔ́ɔ Píele a mo gálɛdamɔ́ a amɔ́: «Ananɛ́asɛ, ɛkádɛ́ ohándá a go íŋeninemú naá odɛ́má goŋaá ó ba belé Gimmúmpúu gá Giliíli, o báá lɔbɛ́nɔ́ na gigísi gá muinyí go cí yɛ́ɛyɛ go á ná dúe o?

⁴Naá busío bá goŋaá u dúe cí moánɛ, caá yɛ á ná lɔmɔ́ yɛ ɔ́bɛnɔnɔ nahɔ o? Kanɛ́ aŋa go á ná dúé, ábɔ caá gɔgɔ́ muinyí mó á ná lɔmɔ́ mó ɔ́bɛnɔnɔ nahɔ o? Goakɛ́ kanɛ́ go á ná bɛáa gɛgáda gá mbééníŋínyí gá go ŋa gɛbɛ́ gá boóma aŋa gɛ́ɛgɛ náana o? Caákɛ́ batɔ báa o belebelemú, Asaŋa mɔ́ɔ o belebelemú.»

⁵Ananɛ́asɛ ɔ ɔ́ ɔ́bɔ́ dogálɔ dɔ́ɔdɔ, go fóncoga go oba go cí tisi, a báá dómbá go gúe. Gɛantá gá bofoá go gumbene batɔ biimée báaba bá mbɔɔ́ ɔ́bɔ́nɔ́ɔ boóma bɔ́ɔbɔ.

⁶Bɛtɔmbɔ́ɔ bá batɔ go úle, bɛ́ báá máŋáná gigúe nnɔ́mbɔ́ ya gɛla, go ɛ́da na gɛ́ bá báá miée.

⁷Boóma aŋa bigúlí bɛ́dadɔ́ bɛ́ á dómbá, ogánɛ́ Ananɛ́asɛ go íŋene, a dɛ íyímé boóma bɔ́ɔbɔ bó báá ná bádómbánáa.

⁸Píele go mo úhune a amɔ́: «Go muinyí mɔ́ɔmɔ gɔ́ɔ no á ná dúé ntɛ́mɛ́ yɛnyɔ́ o? Ŋgoyánáamɔ́ kanɛ́.» Okɔ́dɔ go gundie a amɔ́: «Ɛɛ́ɛŋ, bó lɔ́mɔ́ go muinyí mɔ́ɔmɔ.»

⁹Kɔ́ɔ Píele a mo oyanamɔ́ a amɔ́: «Nɛɛ́nɛ kanɛ́ no á ná húmé ukelú goŋaá no sɔgɛdɔ Giliíli ba Daadáa o? Ɛ́ná kanɛ́, batɔ báaba bá báá ná miée onɔ́mɛ bahɔ béení bá ná lɔ́mɔ́ naá gɛasɛ́ béení, bɔ́ɔ bá gaá nɛ́ ɛ́dá nahɔ bá go mie tɔ́nɔ.»

¹⁰Hɔ́ɔ na hɔ́ɔ, okɔ́dɔ go fóncoga, go oba naá bɛgɔ́ndɔ́ bá Píele go cí tisi, a báá gúé. Bɛtɔmbɔ́ɔ bá batɔ bí íŋenene, go gíde okɔ́dɔ a báa go gúe; bá á dúmbíe go mo bádóɛgɛna bá bɛ́ɛ ɛ́dá mo mie mekúígíi na onɔ́mɛ.

¹¹Gɛantáanta gá bofoá go gumbene nnyaŋá ya Asaŋa iŋkimée na batɔ biimée báaba bá mbɔɔ́ ɔ́bɔ́nɔ́ɔ moóma muimée mɔ́ɔmɔ.

¹²Gɔ́ɔ baapótɛlɛ bɛ́ ɛ́damɔ́ naá busío, bá ŋanana gɛca gá bɛsɛɔ na muune naá kadɛ́gadɛ́ɛ ya batɔ. Boolímínyí bá mba lɛ́ odɛ́má yúmmue, bɔ́ɔ biimée púmú lukúmé lukúmé naá balánda ba Salomɔ́ŋɔ.

¹³Mɔtɔ untió a dɛ mbáa lɛ a bɛanana kélemene ya go bó bégídene akɛ́ aŋa batɔ bá mbaá lɔmɔ́ bá bó maamana makɔ́nɔ́.

¹⁴Batɔ degédegé, banɔ́mɔtɔ́ na bakɔ́dɔ, bá mba lɛ́ bá ágana odɛ́má yábɔ́ naá Daadáa, bá bégídenine naá olɔŋɔ yábɔ́.

¹⁵Go muune na bɛsɛɔ bɛ́ɛbɔ, gɔ́ɔ batɔ bɛ́ ɛ́damɔ́ go émenye bɔgɔnɔ́gɔnɔ naá dokandá ɛ́na naá mokala naá maayá má pɛ́, goŋaá naá go nco dómba gá Píele, gófɛnaá gifií gɛ́hɛ́ gɛ́ báláfɛna akɛ́ ummue mɔ́ɔnyɔ naá bɔ́ɔ e éŋuge.

¹⁶Gɛca gá batɔ gíncoó gɛ́ mba lɛ́ gɛ́ ɛ́da kúlugugene tɔ́nɔ naá tɛ́sɔnɔ sɛ́ɛsɛ sɛ́ mbaá lɛ ombálá na Yolósalɛmɛ, bú úlene na bɔgɔnɔ́gɔnɔ, na batɔ báaba bá mbaá lɔmɔ́ na bɛgáda bá biliíli, biimée bɔ́ɔbɔ púmú bá bée éŋúgénée.

¹⁷Gɔ́ɔ Ogɔ́nɔ́ɔ ba bedúmbí bɛbáágá naá Asaŋa na batɔ biimée báaba bá mbaá lɔmɔ́ bá olɔŋɔ yɛ́hɛ́, nɔ́ɔnɔ gó lɛ́ aá batɔ bá giimbó gá Beseduseyéŋe, bá ágamɔ́ baapótɛlɛ hɛagá, bá báá saŋá boóma bɔ́ɔbɔ bá lɔ́mɔ́ ba go bó ŋa.

¹⁸Gáábɔ́ go gumbene baapótɛlɛ bá báá bó nɔɔ́ɔ naá ncíbo ya gɛaŋɔ́.

¹⁹Kanɛ́ na budúgú, ɛ́ŋgɛlɛsɛ ba Daadáa go nco buune bɛasɛ́ bá ncíbo ya gɛaŋɔ́, a báá húmíe baapótɛlɛ a báá bó oyáná a amɔ́:

²⁰«Ɛ́dá nɔnɔ naá Nnyaŋá ya Asaŋa, no oyana batɔ kanɛ bofoá buimée bɔ́ɔbɔ bó báláfamɔ́ gɛpáa gá gɛɔyɔ gɛ́ɛgɛ.»

²¹Baapótɛlɛ go ŋa ŋgɔ́bɛnɔ, gáábɔ́ go yáfa na gɛyɛ́nɛ́ túlúbú naá Nnyaŋá ya Asaŋa, go ɛ́da go húunenye. Naá gɛcamɛna gɛ́ɛgɔ, Ufuŋe yá bedúmbí bɛbáágá na batɔ bɛ́hɛ́ go bándɛgɛna bafɛanɔ́ɔ biimée bá gɛdɔŋɔ gá Beyúdene naá Nɛgála Nɛgɔ́nɔ́. Gɔ́ɔ bá dómamɔ́ bisimbi goŋaá bɛ́ ɛ́da gɔ́lɔ baapótɛlɛ naá ncíbo ya gɛaŋɔ́.

²²Bisimbi bɛ́ ɛ́ ɛ́dá, go gíde goŋaá baapótɛlɛ bá dɛ báá gɔnɔ́ hɔ́ɔ. Kɔ́ɔ bɛ́ ncomɔ́ gunde na nnyimé na ŋgoyáamɔ́ ya goŋaá:

²³«Dɛ á gídé ncíbo ya gɛaŋɔ́ buigéelú bese bese, befífí tɛ́nɛ́ɛ naá bɛasɛ́. Kanɛ́ aŋa dɛ buunemú gɛasɛ́, dɛ dɛ ɛ́ná mɔtɔ naá gadɛ́ɛ.»

²⁴Aŋa ogɔ́nɔ́ɔ ba bebeŋíbéŋí Nnyaŋá ya Asaŋa na bagɔ́nɔ́ɔ bá bedúmbí bɛbáágá naá Asaŋa bá mbɔɔ́ ɔ́bɔ́ ŋgoyáamɔ́ moánɛ, nciŋí go bó yímene naá goságɛna gá baapótɛlɛ, bá búúhene ɛkádɛ gɛ́ báá ná báŋaáa.

²⁵Mɔtɔ ummue go úle a báá bolá, go bó oyana a amɔ́: «Ɔ́bɔ́ nɔnɔ. Batɔ báaba no á ná ágá naá ncíbo ya gɛaŋɔ́ bɔ́ɔ béení naá Nnyaŋá ya Asaŋa bá húunenye batɔ hɔ́ɔ.»

²⁶Gɔ́ɔ ogɔ́nɔ́ɔ ba bebeŋíbéŋí Nnyaŋá ya Asaŋa a dómbamɔ́ go ɛ́da na batɔ bɛ́hɛ́, bá bɛ́ɛ ɛ́dá gɔ́lɔ baapótɛlɛ kanɛ go bó séesenye; goakɛ́ bá mba lɛ́ bá díine goŋaá gɛdɔŋɔ gɛ́ gaá yibé go bó dóɛdana adánɛ́.

²⁷Aŋa bá mbaá ncó gunde nabɔ́, gáábɔ́ go bó díliminye naá Nɛgála Nɛgɔ́nɔ́. Ufuŋe yá bedúmbí bɛbáágá naá Asaŋa go ɛ́da go úhene ŋgúhune

²⁸a amɔ́: «Dɛ mba nyó legé busío buimée goŋaá no do gɔnɔ́ húunenye go ufíno yá mɔtɔ mɔ́ɔnyɔ. Kanɛ́ ɛkádɛ no báá ná ŋaáa o? No báa go sénigie gohúunenye gɛ́nyɔ́ naá tɛ́sɔnɔ ya Yolósalɛmɛ iŋkimée. No lɛ́galɛga go oyɛda goŋaá nigúe nɛ́hɛ́ nɛ́ có obanɛna[30] o?»

²⁹Píele na baapótɛlɛ báaba bóncoó go gundie bá amɔ́: «Dɛ háananamɔ́ go ɔ́bɛnɔ Asaŋa, bó dómba batɔ.

³⁰Asaŋa ba biisée bɛ́cɔ́ a mba fúfúné Yésusu mɔ́ɔnyɔ no mbaá giléné naá kolósi, a báá gúé.

³¹Mɔ́ɔ Asaŋa a mbaá mo búlúgíe naá ombɔ́gɔ onɔ́mɛ yɛ́hɛ́, a báá gundé a báá mo dílímínyée Ufuŋe na Usódí go go fáa boɛ́nɔ bá Ɛ́sɛlahɛ́ɛlɛ pɛ́ ya go núgie gɛɔyɔ gábɔ́, bá gɔnɔ bɛa ihéehinye há bɛlɔgɔ.

³²Dɛ lɛ́ ŋgominyo sá moóma mɔ́ɔmɔ muimée, bɛɛcɔ́ɔ na Gimmúmpúu gá Giliíli mɔ́ɔnyɔ Asaŋa a mbaá fáá biimée báaba bá mo ŋananamɔ́ ŋgɔ́bɛnɔ.»

³³Batɔ bá Nɛgála Nɛgɔ́nɔ́ aŋa bá mbɔɔ́ ɔ́bɔ́ nɔ́ɔnɔ, ɛdɛ́má yabɔ́ go dɛ́aŋa, bá bɛ́ɛ́ ɛ́dá go fúmbe pɛ́ ya go óna baapótɛlɛ.

³⁴Kanɛ́ mɔtɔ ummue ba giimbó gá Befelisiéŋe a mba lɛ́ naá olɔŋɔ yábɔ́, ufíno yɛ́hɛ́ Geméliele, iloodio há bicele hɛ́ɛhɛ gɛdɔŋɔ giimée gɛ́ mbaá lɛ gɛ́ mo hálamanana. Gɛ́hɛ́ go fadɛgɛna, go úhune goŋaá bá húmie baapótɛlɛ go moɔnɔ́ ba gɛcamɛna.

³⁵Gɛ́hɛ́ go oyana batɔ bá Nɛgála a amɔ́: «Bɛɛnyɔ́ɔ batɔ bá Ɛ́sɛlahɛ́ɛlɛ báaba, lukúméné nɔnɔ bese go boóma bɔ́ɔbɔ no lɛ́galɛgamɔ́ go ŋa batɔ báaba.

³⁶Medúgú má gá lɛ́ má dɛ dómbá gɛca gɔ́ɔ, Tɛ́dasɛ a mbaá bológá na go bóoya goŋaá a lɛ́ gɛantá gá mɔtɔ; batɔ makana mantɛdɛ ménni bá mba lɛ́ mo fídéelú. Kanɛ́ bá mba mo óná, batɔ biimée báaba bá mbaá mo biené bá báá sálámándá, olɔŋɔ yɛ́hɛ́ yó báá fúé.

³⁷Naá nnyimé yɛhɛ́, naá gɛcamɛna gá ombanɔ, kɔ́ɔ Yódasɛ, mɔtɔ ba Bégelilée, a gɔnɔmɔ́ bologa, a báá gɔ́gɛ́dɔ́ gitúu gá batɔ. Kanɛ́ bá mba mo óná tɔ́nɔ, biimée báaba bá mbaá mo biené bá báá sálámándá.

³⁸Godɔ́ɔdɔ kanɛ́, ŋgaá nyó oyáná caá, dɔmbɔ́ nɔnɔ go bienene batɔ báaba, no bó dɛ́ɛna bá dómba. Aáŋa dogálɔ dábɔ́ na buelí bábɔ́ mó ɛ́damɔ́ go úlene naá batɔ, mó gaá béfúíné mɔ́ moatɛ́.

³⁹Kanɛ́ ɛ́na naá mammana mó ɛ́damɔ́ go úlene naá Asaŋa, no do bósó ba go mó gada. Bébeŋéemú nɔnɔ, no do ɛ́dá go nuugenye Asaŋa.» Gɔ́ɔ batɔ bá Nɛgála Nɛgɔ́nɔ́ bɔ́ ɔ́bɛnɔmɔ́ Geméliele.

⁴⁰Gáábɔ́ go gɔnɔ go íŋenye baapótɛlɛ, bá báá dómá batɔ bá báá bó gidée, bá báá gɔnɔ́ bó lɔsɛnɔ goŋaá bá dɛ gɔnɔ́ buŋene mɔtɔ ufíno yá Yésusu. Gáábɔ́ go bó dɛ́ɛna.

⁴¹Gɔ́ɔ baapótɛlɛ bú úlukiemú hɔ́ɔlɔ́ naá Nɛgála Nɛgɔ́nɔ́, go dómba bá bɛ́ɛ́ ɛ́dá bɔ́ ɔ́bɔnɔ bese goŋaá Asaŋa a á bó búlúgíe a báá hɛmá goŋaá bá bó fánɛnafanɛna go ufíno yá Yésusu.

⁴²Medúgú miimée, naá Nnyaŋá ya Asaŋa na naá nnyaŋá sábɔ́, baapótɛlɛ bá dɛ mbá dɔmbɔ go húunenye na go dúmeninye Gɛnɔ́gɔ́ gá Cɔ́mɔ goŋaá Mesíi a lɔ́mɔ́ Yésusu.