Read Nugunu Meŋiigíe 9 Bible Online

Meŋiigíe 9 - Nugunu bible

Meŋiigíe 9

¹Naá gɛcamɛna gɛ́ɛgɔ, aŋa Sóole a mbaá lɔmɔ́ ɛ ɛ́dana naá busío a bó míneminie, a bó óna, go ɛ́da naá ogɔ́nɔ́ɔ ba bedúmbí bɛbáágá naá Asaŋa

²goŋaá á ba mo íŋéné bakálata go busío bá nnyaŋá sá mbósógólí sɛ́ɛsɛ naá Damáasɛ, mbɔ́dɔ ya goŋaá a amɔ́ a gíde batɔ hɔ́ɔ, banɔ́mɔtɔ́ na bakɔ́dɔ, báaba bá bienenemú pɛ́ ya Daadáa[49], a bó gumbene, a nco gundene nabɔ́ naá iŋgolí naá Yolósalɛmɛ.

³Aŋa a mbaá gɔ́lɔ́ kálata sɛ́ɛsɔ, gɛ́hɛ́ go biene pɛ́ go go ɛ́da naá Damáasɛ. A ná lɛ́ mekúígíi go go bola hɔ́ɔ, gɛ́hɛ́ go béteme naá gise gadɛ́ɛ gɛ́ ɛ́da go úlene naá mmoɛná.

⁴Gɔ́ɔ a dómbamɔ́ go oba go cí, go ɔ́bɔ ukelú yó mo gálagala yó amɔ́: «Sóole, Sóole, o céesenyemú goakɛ́ o?»

⁵Sóole go gundie a amɔ́: «Daadáa, o lɔ́mɔ́ ánɛ́ɛ o?» Ukelú go mo gundie yó amɔ́: «Ndɔ́mɔ́ Yésusu mɔ́ɔnyɔ o séesenyemú.

⁶Kanɛ́ fadɛ́gɛ́na, go íŋene naá tɛ́sɔnɔ, bá gaá go oyáná hɔ́ɔ boóma bɔ́ɔbɔ o sɛmɛgananamɔ́ go ŋa.»

⁷Batɔ báaba bá mbaá lɔmɔ́ olɔŋɔ nɛhɛ́ go lɔbɛnɔ hɔ́ɔlɔ́ tɛ́nɛ́ɛ, eŋgúdé buigéné buigéné na goélemene guimée. Bá mba lɛ́ bɔ́ ɔ́bɔnɔ goana ukelú kanɛ go ɛ́na mɔtɔ.

⁸Sóole go fadɛgɛna go cí, kanɛ́ akɛ́ aŋa oŋgíso yɛ́hɛ́ yá mbaá lɛ fuunéelú, a dɛ mbáa lɛ ɛ ɛ́nana boóma. Gɔ́ɔ bá mo gɔ́lɔmɔ́ go ombɔ́gɔ, bá bɛ́ɛ́ ɛ́dá nɛhɛ́ naá Damáasɛ.

⁹Medúgú mádadɔ́, a dɛ ŋgɛ́ ɛ́na boóma na mɔ́ oŋgíso, a dɛ nyáá boóma, a dɛ bónyó boóma.

¹⁰Hɔ́ɔlɔ́ kanɛ́ naá tɛ́sɔnɔ ya Damáasɛ, uhúúní ba Yésusu ummue a mba lɛ́ hɔ́ɔ, ufíno Ananɛ́asɛ. Daadáa go mo dɔ́ŋɛnɔ naá giínigie a amɔ́: «Ananɛ́asɛ.» Mɔ́ɔ go ɔ́dɔbɔ a amɔ́: «Yɔmɔ́ɔ mɔ́nyɔ́ɔ, Daadáa.»

¹¹Daadáa go mo oyana kanɛ́ a amɔ́: «Fadɛ́gɛ́na, go ɛ́da naá gɛbala gɛ́ɛgɛ bá dɔ́ŋɔnɔmɔ́ bá amɔ́ Gátɛ́nɛ́ɛ, go úhune naá nnyaŋá ya Yódasɛ, mɔtɔ ba Tálasɛ mɔ́ɔnyɔ bá dɔ́ŋɔnɔmɔ́ bá amɔ́ Sóole. Naá gɛcamɛna gɛ́ɛgɛ, a lɛ́ hɔ́ɔ a bósógolonyo;

¹²gó gɔnɔ gunde a lɛ́ bɛáalú giínigie, a bɛ́ɛ́ ɛ́ná mɔtɔ ufíno yɛ́hɛ́ Ananɛ́asɛ a bíí íŋéné, a báá mo dálá ɛmbɔ́gɔ goŋaá ɛ ɛ́da go gɔnɔ go ɛ́nanɛna.»

¹³Ananɛ́asɛ go gundie a amɔ́: «Daadáa, ndɛ́ ɔ́bɔ́ɔlú go eŋgúdé yá batɔ gɛca aŋa mɔtɔ mɔ́ɔnyɔ a dómbamɔ́ go míneminie boolímínyí báhɔ naá Yolósalɛmɛ.

¹⁴Gó gɔnɔ gunde, bagɔ́nɔ́ɔ bá bedúmbí bɛbáágá naá Asaŋa bá lɛ́ mo dómáalú háalá na bogaaga bá go gumbenene biimée báaba bá buŋemú ufíno yá Yésusu. Boóma moánɛ bɔ́ a lɔ́mɔ́ úléelú go bɔ́.»

¹⁵Kanɛ́ Daadáa go mo oyana a amɔ́: «Ɛ́dá, goŋaá mbáa go iyide mɔtɔ mɔ́ɔnyɔ goŋaá á ba nyɔgɔ́nɛ́nɔ́ɔ go go dúfenye ufíno yámɛ go bɛdɔŋɔ bɛ́ɛbɛ bíncodío, go mefuŋe mábɔ́, na go gɛdɔŋɔ gá Ɛ́sɛlahɛ́ɛlɛ.

¹⁶Kɔnɔ gunde, mmo dúfie yɔmɔ́ɔ moatɛ́ moatɛ mbɔ́dɔ yɛ́ɛyɛ a sɛmɛgananamɔ́ na gɛɔ́bɛgɔ go ufíno yámɛ.»

¹⁷Ananɛ́asɛ go ɛ́da gɔ́gɔ́ɔ. Aŋa a mbɛɛ́ ɛ́dá bola naá nnyaŋá yɛ́ɛyɔ, gɛ́hɛ́ go dála Sóole ɛmbɔ́gɔ, go mo oyana a amɔ́: «Sóole, ondimóní bamɛ, Daadáa Yésusu mɔ́ɔnyɔ a á ná go ɛ́nɛ́gɛ́ná naá pɛ́ yɛ́ɛyɛ go á ná lɔmɔ́ go ɛ́da go úlenine hɔ́ɔ a á tómá goŋaá oŋgíso yáhɔ yá fuunuge, go ɛ́da go gɔnɔ go ɛ́nanɛna. O gunde o bɛ́ɛmba dácɛ na Gimmúmpúu gá Giliíli.»

¹⁸Hɔ́ɔ na hɔ́ɔ, moóma aŋa bɛbáabáa go ɛ́da go kóbakoba go oŋgíso, mó obana. Sóole go ɛ́da go ɛ́nanɛna. A báá gó fadɛgɛna, a báá béyumínyée;

¹⁹kanɛ́ naá nnyimé hɔ́ɔlɔ́ aŋa a mbaá ŋá a báa go nyáanya, gɛ́hɛ́ go bɛa bogaaga naá nnyɔ́dɔ. Kɔ́ɔ Sóole a gɛ́gɛdamɔ́ baaná bá medúgú na behúúní báaba bá mbaá lɔmɔ́ naá Damáasɛ.

²⁰Gɛ́hɛ́ kanɛ́ go dómba go ɛ́da o oya Gɛnɔ́gɔ́ gá Cɔ́mɔ naá nnyaŋá sá mbósógólí, a dúfenye goŋaá Yésusu a lɛ́ Moɔnɔ́ ba Asaŋa.

²¹Batɔ biimée báaba bá mbaá lɔmɔ́ bá mo bódólonyo bá mba lɛ́ bá békúke, bá gálagala bá amɔ́: «Boɔmɛ, ábɔ caá mɔtɔ mɔ́ɔnyɔ a á ná lɔmɔ́ naá Yolósalɛmɛ a nuigenye biimée báaba bá bósógolonyomú bá buŋe ufíno yá Yésusu, caá mɔ́ɔ mɔ́nyɔ́ɔ o? Ábɔ caá a lɔ́mɔ́ háalá goana go go nco bó dóda naá iŋgolí ɛ ɛ́dana nabɔ́ naá bagɔ́nɔ́ɔ bá bedúmbí bɛbáágá naá Asaŋa o?»

²²Kanɛ́ Sóole a mba lɛ́ miisí miimée a gónɛna naá gioliminyo mbɔ́dɔ ya ŋaá Beyúdene báaba naá Damáasɛ bá dɛ gɔnɔ́ bɛa boóma bá go oyɛda, goakɛ́ a mba lɛ́ a bó oyanɛna a bó dúfenye go goŋaá Yésusu a lɛ́ Mesíi.

²³Medúgú gɛca má á dómbá, Beyúdene go ɔ́bɛnɔnɔ goŋaá bá mo óna.

²⁴Sóole go ɔ́bɔ ɛdɔgɛ hɛ́ɛhɔ. Aŋa siisíi aŋa budúgú, Beyúdene bá mba ágá batɔ bá go fɛ́fa bɛasɛ́ bá tɛ́sɔnɔ na mbééníŋínyí ya ŋaá bó óna Sóole.

²⁵Kanɛ́ na budúgú búmmue, batɔ báaba a mbaá lɛ a bó húunenye go mo gɔ́lɔ, go mo ága naá ŋŋambɛ́, go mo siisie na duelí naá nnyimé ya omɛndɛ́[50].

²⁶Aŋa Sóole a mbɛɛ́ ɛ́dá bola naá Yolósalɛmɛ, gɛ́hɛ́ go ɛ́da go fúmbe goŋaá a bénebiginye na behúúní bá Yésusu; kanɛ́ biimée bá mba lɛ́ na bofoá nɛhɛ́ goakɛ́ bá dɛ mbáa lɛ bó olimonyo, goŋaá a lɛ́ tɔ́nɔ mammana uhúúní aŋa bɔ́ɔ.

²⁷Banábasɛ go mo gɔ́lɔ, a bɛ́ɛ́ ɛ́dá nɛhɛ́ naá kadɛ́gadɛ́ɛ ya baapótɛlɛ, gɛ́hɛ́ go bó oyanɛna aŋa Sóole a mbɛɛ́ ɛ́ná Daadáa mɔ́ɔnyɔ a mbaá mo gálágáláa naá mmoɛná. A báá bó oyáná tɔ́nɔ aŋa Sóole a mbaá húúnényée na ufíno yá Yésusu naá tɛ́sɔnɔ ya Damáasɛ.

²⁸Gó bayɛga hɔ́ɔlɔ́, gɛ́hɛ́ go ɛ́da ɛ ɛnɛnda olɔŋɔ nabɔ́ naá Yolósalɛmɛ, ɛ ɛ́da a húunenye mammana mammana na ufíno yá Daadáa.

²⁹A mba lɛ́ tɔ́nɔ a gála, a ágana mpálɔ́ na Beyúdene báaba bá mbaá lɛ bá gálagala nogɛlɛ́gɛ. Kanɛ́ bɔ́ɔ bá mba lɛ́ bá fúmbe go mo óna.

³⁰Aŋa bolimóní behúúní bá mbɔɔ́ ɔ́bɔ́ nɔ́ɔnɔ, gáábɔ́ go ɛ́da nɛhɛ́ naá Sɛsalɛ́ɛ, hɔ́ɔ gáábɔ́ go mo dúmbie naá Tálasɛ.

³¹Boolímínyí biimée báaba naá Yudée, naá Gelilée na naá Samalɛ́ɛ bá mba lɛ́ naá buumbénú; bá bégíndenye, bá díine Daadáa, ombanɔ yábɔ́ yó goma go bogaaga bá Gimmúmpúu gá Giliíli.

³²Kanɛ́ Píele mɔ́ɔ a mba lɛ́ ɛ ɛ́da ɛ ɛnɛnda hoóma hiimée a yɔlɔnɔ boolímínyí go gɔsɔ naá Lɛ́da go go yɔlɔ tɔ́nɔ báaba bá mbaá lɔmɔ́ hɔ́ɔ.

³³Gɔ́ɔ a gídemú hɔ́ɔ, mɔtɔ uncodío ufíno yɛ́hɛ́ Enée mbɛ́dɛ́ɛ naá dokandá na ogɔnɔ́ yá nnyómá ɛ́nnámanyɛ́, bɛnamá gúénéné gúénéné; kanɛ padɛ́gɛ́nɛ́náa.

³⁴Píele go mo oyana a amɔ́: «Enée, Yésu Kilítu a á go éŋúgíe, fadɛ́gɛ́na, o gedie dokandá dáhɔ maamɔ́ɔ moatɛ́.» Hɔ́ɔ na hɔ́ɔ, mɔtɔ go dómba go fadɛgɛna.

³⁵Aŋa batɔ biimée báaba naá Lɛ́da na báaba naá osɛ́bɛ́ yá Sálɔnɔ bá mbaá mo ɛ́ná, gáábɔ́ go békikilidie ɛdɛ́má, bá bóo olímínyóo Daadáa.

³⁶Uŋgolímínyí ba okɔ́dɔ ufíno yɛ́hɛ́ Tabɛ́ta, nɔ́ɔnɔ gó lɛ́ aá Dolókasɛ, a mba lɛ́ hɔ́ɔ naá tɛ́sɔnɔ ya Yopée. A mba lɛ́ buelí bɛ́hɛ́ goana go ŋanana gá besé, a dúgune basógasoga.

³⁷Gɔ́ɔ o obamɔ́ na ogɔnɔ́ naá gɛcamɛna moánɛ a báa gúé. Naá nnyimé ya go mo dumbie, gáábɔ́ go ɛ́da mo ága naá nɛgɛlɛ́ nɛ́ɛnɛ nɛ́ mbaá lɔmɔ́ naá nnyaŋá mmoɛná.

³⁸Aŋa behúúní bá Yopée bá mbaá lɔmɔ́ bí íyimene bá amɔ́ Píele a lɛ́ naá Lɛ́da, gáábɔ́ go mo dómɛna batɔ báandɛ́ goŋaá bɛ́ ɛ́da mo oyana, u úle fɛaŋɔ fɛaŋɔ.

³⁹Kɔ́ɔ batɔ bɛ́ ɛ́damɔ́ bola go oyana Píele, mɔ́ɔ go dómba go fadɛgɛna olɔŋɔ nabɔ́. A á ncó bola, gáábɔ́ go mo gɔ́gɛdɔ naá nɛgɛlɛ́ ná ncíbo nɛ́ɛnɛ naá nnyaŋá mmoɛná. Bisí bá bakɔ́dɔ biimée go mo géŋgelidie na mbií, bɛ́ mo dúfenye bɛla bɛ́ɛbɛ Tabɛ́ta a mbaá lɔmɔ́ a noga a gá lɛ́ ogɔ́sɔ.

⁴⁰Kɔ́ɔ Píele a húmiemú mɔtɔ uŋkimée naá hanyɔ́, go kunce enúu go cí, go ɛ́da go bósógolonyo. Kanɛ́ gɛ́hɛ́ go bábondona gɛlɔ́ŋɔ́, go gálɛda a amɔ́: «Tabɛ́ta, fadɛ́gɛ́na.» Tabɛ́ta go fuune oŋgíso, aŋa a mbɛɛ́ ɛ́ná Píele, gɛ́hɛ́ go fadɛgɛna ndukíi.

⁴¹Píele go mo íŋene ombɔ́gɔ, a báá mo fedígínyée. Kɔ́ɔ a dɔ́ŋɛnɔmɔ́ bisí bá bakɔ́dɔ na boolímínyí báaba bóncodío, a báa bó dúfíe Tabɛ́ta ogɔ́sɔ.

⁴²Gɔ́ɔ batɔ biimée báaba naá tɛ́sɔnɔ ya Yopée bí íyimemú boóma buimée bɔ́ɔbɔ bó mbaá dómbánáa. Degédegé go ága odɛ́má yábɔ́ naá Daadáa.

⁴³Píele go dúmbie gɛca gá medúgú naá Yopée naá nnyaŋá ya Símono uyogóní bɛɔbɔ.