Read Nugunu Olóma 1 Bible Online

Olóma 1 - Nugunu bible

Olóma 1

¹Yɔmɔ́ɔ Póolo, uyogóní bá Yésu Kilítu, Asaŋa a mba tɔ́ŋɛ́nɔ́ go go ɛ́ya Apótɛlɛ, a báá ŋgiyídé go go dúmenye Gɛnɔ́gɔ́ gá Cɔ́mɔ gɛ́hɛ́, yɔmɔ́ɔ mɔ́ɔ ŋgɔ́ŋɔmɔ́ kálata yɛ́ɛyɛ.

²Asaŋa a mba dáná Gɛnɔ́gɔ́ gá Cɔ́mɔ moánɛ fueké go eŋgúdé yá mbúsí sɛ́hɛ́ naá Ŋgɔ́ŋɛ́[1].

³Gɛnɔ́gɔ́ gá Cɔ́mɔ moánɛ gɛ́ núune Moɔnɔ́ bɛhɛ́ mɔ́ɔnyɔ a mbaá bébíéné naá boayá bá mɔtɔ naá nogɔgɔ́ ná Défidi.

⁴Naá boayá bá Gimmúmpúu gá Giliíli, bá mba mo dílímínyée Moɔnɔ́ ba Asaŋa na bogaaga buimée, go go fúfúgé gɛ́hɛ́ naá kadɛ́gadɛ́ɛ ya begúe. A lɔ́mɔ́ Yésu Kilítu Daadáa bɛcɔ́.

⁵Go busío bɛ́hɛ́, Asaŋa a mba ŋgíyíe Apótɛlɛ naá busi bɛ́hɛ́, goŋaá ŋgindenye batɔ bá bɛdɔŋɔ biimée, bá mo olimonyo, bá gɔnɔ mo ɔ́bɛnɔ.

⁶Bɛɛnyɔ́ɔ, no lɛ́ naá olɔŋɔ yá báaba Asaŋa a mbaá dɔ́ŋɛ́nɔ́ goŋaá no ɔ́bɛnɔnɔ na Yésu Kilítu.

⁷Bɛɛnyɔ́ɔ biimée báaba naá Olóma, Asaŋa a nyó maamana, gɔ́ɔ a mbaá nyó dɔ́ŋɛ́nɔ́ goŋaá no bɛ́ɛmba bɛ́hɛ́. Ŋgáa Asaŋa Baaba bɛcɔ́, na Daadáa Yésu Kilítu bá nyó boogo, bá gɔnɔ nyó fáa buumbénú.

⁸Go go bayɛga, mbéhiigi Asaŋa bamɛ gá Yésu Kilítu, go busío bɛ́nyɔ́ biimée, goakɛ́ batɔ bá cí iŋkimée bó oya bá amɔ́ no lɛ́ odɛ́má naá Asaŋa.

⁹Asaŋa mɔ́ɔnyɔ mmo yɔgɔnɛnɔmɔ́ na odɛ́má yámɛ uŋkimée, go go dúmenye Gɛnɔ́gɔ́ gá Cɔ́mɔ gɛ́ɛgɛ gɛ́ núunemú Moɔnɔ́ bɛhɛ́, i íyimene goŋaá ŋgoya mammana; i íyimene goŋaá nnyó béeniŋenye kanɛ tɔmbɛ́nɔ́ɔ,

¹⁰bɛcamɛna biimée bɛ́ɛbɛ mbósógolonyomú. Ŋgúhene Asaŋa goŋaá aáŋa a lɛ́galɛga, a mbuunene pɛ́ ya go úle naá bɛɛnyɔ́ɔ, goakɛ́ mmba lɛ́ na ncaná ya go úle naá bɛɛnyɔ́ɔ fueké.

¹¹Ndɛ́ na ncaná ya go nyó ɛ́na goŋaá nnyó bɛɛna bɔ́ɔbɔ Giliíli a á ná páá go go gíndie gioliminyo gɛ́nyɔ́.

¹²Ndɛ́galɛga dómbá dómbáa goŋaá mbɛ́ɛmba olɔŋɔ nɛnyɔ́, dɛ gíndeninye: yɔmɔ́ɔ, naá gioliminyo gɛ́nyɔ́, bɛɛnyɔ́ɔ, naá gɛ́ɛgɛ gámɛ.

¹³Bolimóní, ndɛ́galɛga caá no lɛnca goŋaá ɛŋɛndɔ gɛca, mmba lɛ́ mbéeniŋenye go úle naá bɛɛnyɔ́ɔ[2], kanɛ́ ndɛ́ kanɛ go bɛa pɛ́ gó nco húme godɔ́ɔdɔ. Mmba lɛ́ ndɛ́galɛga go úle naá bɛɛnyɔ́ɔ go go ŋa buelí bá go úme boóma naá bɛɛnyɔ́ɔ, aŋa gɔ́ɔgɔ ŋŋananamɔ́ naá mɛɛ́nɔ máama móncodío.

¹⁴Bó háanana goŋaá túmenye Gɛnɔ́gɔ́ gá Cɔ́mɔ go batɔ biimée, naá Bágɛlɛ́gɛ, na naá báaba bá lɔ́mɔ́ biinyí; naá benciŋínciŋi, na naá báaba bá lɔ́mɔ́ kanɛ nciŋí.

¹⁵Go busío moánɛ gɔ́ɔ, ndɛ́galɛgamɔ́ go nco dúmenye Gɛnɔ́gɔ́ gá cɔ́mɔ naá bɛɛnyɔ́ɔ tɔ́nɔ, batɔ bá Olóma.

¹⁶Odóɛ gonóa yó do báá namɛ go go dúmenye Gɛnɔ́gɔ́ gá Cɔ́mɔ. Gɛ́ lɛ́ na bogaaga bɔ́ɔbɔ Asaŋa a bɛananamɔ́ go go sódio biimée báaba bá lɔ́mɔ́ odɛ́má naá mɔ́ɔ; gó bayɛga Beyúdene, gó ɛ́da go éme naá báaba bá lɔ́mɔ́ bá dɛ bɛ́ɛ́mbá Beyúdene.

¹⁷Mammana, Gɛnɔ́gɔ́ gá Cɔ́mɔ gɛ́ lincienye aŋa Asaŋa i íyienyemú batɔ bɛtɛ́nɛ́ɛ naá busío bɛ́hɛ́. Bó lɔ́mɔ́ goana go gioliminyo, pɛ́ intió ɛ dɛ báá, moatɛ́ Ŋgɔ́ŋɛ́ yɛ oya yɛ amɔ́: «Mɔ́ɔnyɔ a lɔ́mɔ́ gɛtɛ́nɛ́ɛ go go ágana gɛ́hɛ́ gá odɛ́má naá Asaŋa a ŋgɔ ɔyɔ́ɔ.»

¹⁸Mammana, Asaŋa a dúfenye mpímí yɛhɛ́ naá mmoɛná go batɔ biimée báaba bá lɔ́mɔ́ bá dɛ hálámánánáa moóma mɛ́hɛ́, bá dɛ ɛndáa naá botɛ́nɛ́ɛ. Bá legene basɔ́gɔ́ɔ go go íyime mammana na bɛbɛ́ bábɔ́ bá moóma bɛ́ɛbɛ bá ŋananamɔ́.

¹⁹Asaŋa a bó dúfenye mpímí yɛhɛ́, goakɛ́ pɛ́ ya goŋaá bá mo íyime ɛ lɛ́ naá gise; mɔ́ɔ moatɛ́ moatɛ a mbaá bó yɛ dúfíe daŋɛ́daŋɛ.

²⁰Mammana, naá mabayɛga má cí, Asaŋa a mbaá gedíe cí, moóma mɔ́ɔmɔ a mbaá gedégédíe mó dúfenye batɔ nɛɛ́nɛ a lɔ́mɔ́, akɛ́ aŋa bá lɔ́mɔ́ bá dɛ mo ɛ́nánáa. Bó lɛ́ mammana goŋaá a bɛanana bogaaga bá kanɛ mmanɛ́náa, gɔnɔ́, mɔ́ɔ mokáa a lɔ́mɔ́ Asaŋa. Gɔ́ɔ batɔ bá lɔ́mɔ́ bá dɛ bɛanánáa bihéehinye naá busío bɛ́hɛ́.

²¹Bí íyimene Asaŋa, kanɛ́ bá dɛ mo búlúgényée, bá dɛ mo béhiigíi aŋa gó sɛmɛgananamɔ́. Mbééníŋínyí sábɔ́ sɛ́ lɔ́mɔ́ goana go moóma má dugúnú, bá gɛ́ga naá mbíno, ɛdɛ́má yabɔ́ goana bɛlalaga.

²²Bó oya bá amɔ́ bá lɛ́ na nciŋí, asáa gɔgɔ́ bá lɛ́ biegu.

²³Gá goŋaá bá búlugenye Asaŋa ba nigúmi mɔ́ɔnyɔ a lɔ́mɔ́ a dɛ gúénénée, bɔ́ɔ bá búlugenye bieninye; bieninye bá mɔtɔ mɔ́ɔnyɔ a gúenenemú, bieninye bá munoní, bá nnyama na bá nnyɔ́gɔ[3].

²⁴Go busío moánɛ gɔ́ɔ Asaŋa a mbaá bó dɛ́ɛ́ná go go ŋanana bɛbɛ́ bá moóma bɛ́ɛbɛ bá lɛ́galɛgamɔ́. Nɔ́ɔnɔ, bá ŋanana sábɔ́ moóma má odóɛ gonóa na nnyɔ́dɔ, bɔ́ɔ na bɔ́ɔ.

²⁵Bá báá dɛ́ɛ́ná mammana yɛ́ɛyɛ ɛ núunemú Asaŋa, bá báá biené mbele. Bá búlugenye, bá yɔgɔnɛnɔ moóma mɔ́ɔmɔ Asaŋa a mbaá gedíe, naá undukí yá Mɔ́ɔ mɔ́ɔnyɔ a mbaá gedíe buimée. Mɔ́ɔ mɔ́ɔnyɔ a háananamɔ́ na mbúlugie bɛcamɛna biimée. Aamɛnɛ.

²⁶Go busío moánɛ gɔ́ɔ Asaŋa a mbaá bó dɛ́ɛ́ná go go ŋanana moóma má odóɛ gonóa mɔ́ɔmɔ bá lɛ́galɛgamɔ́. Bakɔ́dɔ bá dɛ gɔnɔ́ bɛ́dɛmɛna na banɔ́mɔtɔ́, bá bɛ́dɛmana na basɔ́gɔ́ɔ bakɔ́dɔ. Mbɔ́dɔ ya go ŋanana moánɛ ɛ dɛ báá aŋa Asaŋa a mbaá gedíe.

²⁷Caŋa mmue na banɔ́mɔtɔ́, bá dɛ́ɛna ombɛ́dɛ́ na bakɔ́dɔ, bá lola odɛ́má go go bɛ́dɛmana na basɔ́gɔ́ banɔ́mɔtɔ́. Banɔ́mɔtɔ́ bɔ́ɔ naabɔ́, bá ŋanana moóma má odóɛ gonóa; bá bɔ́gɔ́gɔnɔ noséésényée nɔ́ɔnɔ bá háananamɔ́ na nɔ́ɔ go busío bá gɛlɔgɔ gɛ́ɛgɛ bá ŋananamɔ́.

²⁸Aŋa batɔ bɔ́ɔbɔ bá lɔ́mɔ́ bá dɛ lɛ́gálɛ́gáa go lɛnca Asaŋa, a mba bó dɛ́ɛ́ná go go bienene bɛbɛ́ bábɔ́ bá mbééníŋínyí, bá ŋanana moóma mɔ́ɔmɔ bá lɔ́mɔ́ bá dɛ sɛmɛ́gánánáa go ŋanana.

²⁹Ɛdɛ́má yabɔ́ ɛ lɛ́ dácɛ na moóma mɔ́ɔmɔ mó lɔ́mɔ́ mó do bá tɛ́nɛ́ɛ; bá lɛ́ na gɛdɛ́mádɛ́má, na hɛagá, bó óna batɔ, bá lɛ́ begélí cáŋɔ́, bebelíbélí, bá ŋanana bɛbɛ́ bá moóma, bá díeŋedieŋe ifíno ya basɔ́gɔ́ɔ.

³⁰Bá gálagala dobɛ́ naá nnyimé ya basɔ́gɔ́ɔ, bá lɛ́ babɛlɔ́bɛlɔ bá Asaŋa, bá fúmbe bɛsɛnɛ, bá bébúlugenye, bá béségisegi, bá béeniŋenye gɔgɔ́ bɛbɛ́ bá moóma, bá dɛ ɔ́bɛ́nɔ́nɔ́ɔ bebíéní bábɔ́.

³¹Bá dɛ gɔnɔ́ go íyimene bɔ́ɔbɔ bó lɔ́mɔ́ bese, bá dɛ hóógónyóo bɔ́ɔbɔ bá báá ná dáná, bá lɛ́ kanɛ odɛ́má, bá dɛ gɔ́lɔ́nɔ́ɔ basɔ́gɔ́ɔ mahana.

³²Akɛ́ aŋa bí íyimenemú gosómba gá Asaŋa gá bɛsɛnɛ gɔ́ɔgɔ gó oyamɔ́ gó amɔ́, báaba bá ŋananamɔ́ mbɔ́dɔ sá moóma sɛ́ɛsɔ, bá háanana na nigúe, bɔ́ɔ, bɛ́ ɛ́dana naá busío na go mó ŋanana; bá gɔnɔ go ɔ́bɔnɔ bese na bóncodío báaba bá mó ŋananamɔ́ tɔ́nɔ.