Read Nugunu Olóma 10 Bible Online

Olóma 10 - Nugunu bible

Olóma 10

¹Bolimóní, boóma bɔ́ɔbɔ ŋgɔŋɔnɔmɔ́ Asaŋa kɔnɔ bó lɛ́galɛga naá odɛ́má yámɛ uŋkimée bó lɔ́mɔ́ goŋaá a sódio Beyúdene.

²Kálagala daŋɛ́daŋɛ go busío bábɔ́ caá: bá húmenye odɛ́má makɔ́nɔ́ go busío bá Asaŋa kanɛ́ bá dɛ bósó go íyimene mammana ya pɛ́ yɛhɛ́.

³Bá lɛ́ kanɛ go lɛnca mbɔ́dɔ yɛ́ɛyɛ Asaŋa i íyenyemú batɔ bɛtɛ́nɛ́ɛ, bɔ́ɔ bá fúmbe botɛ́nɛ́ɛ goana go nciŋí yabɔ́ ya moatɛ́. Bá báá lɔbɛ́nɔ́ bá dɛ olímínyóo mbɔ́dɔ yɛ́ɛyɛ mɔ́ɔ i íyenyemú batɔ biimée bɛtɛ́nɛ́ɛ.

⁴Goúle gá Kilítusu gó mba meníe bogaaga bá gicele goŋaá biimée báaba bó olimonyomú bɛ́ ɛ́ya bɛtɛ́nɛ́ɛ naá oŋgíso yá Asaŋa.

⁵Náana gɔ́ɔ Mɔ́sɛsɛ a mbɔɔ́ ɔ́ŋɔ́ go botɛ́nɛ́ɛ bɔ́ɔbɔ bú úlenemú naá gicele a amɔ́: Mɔtɔ mɔ́ɔnyɔ a ŋgaá ŋaáa aŋa gɛ́ oyamɔ́, a ŋgɔ ɔyɔ́ɔ go gɛ́[43].

⁶Kanɛ́ náana gɔ́ɔ botɛ́nɛ́ɛ bɔ́ɔbɔ bó úlenemú naá gioliminyo bó oyamɔ́: O do bágálɛ́dɛ́ná naá odɛ́má go amɔ́: Ánɛ́ɛ a ŋgaá bólɛ́gá naá mmoɛná o? Nɔ́ɔnɔ gó lɛ́ go siisie gá Kilítusu.

⁷Ɛ́na lí: Ánɛ́ɛ a ŋgaá siisé naá cí gúunú o? Nɔ́ɔnɔ gó lɛ́ go gundie gá Kilítusu naá kadɛ́gadɛ́ɛ ya begúe.

⁸Kanɛ́ Ŋgɔ́ŋɛ́ yɛ oyamɔ́ yɛ amɔ́ ŋkádɛ́ o? Nogálɔ ná Asaŋa nó lɛ́ mekúígíi nahɔ, nó lɛ́ naá mamɔ́ nyuudé, nó lɛ́ tɔ́nɔ naá mamɔ́ odɛ́má[44]. Nogálɔ ná gioliminyo nɔ́ɔnɔ, nɔ́ moánɛ dɛ dúmeninyemú.

⁹Kɔ́ɔ go amɔ́ o gálagala na nyuudé náhɔ go amɔ́ Yésusu a lɛ́ Daadáa, aáŋa go olimonyo naá odɛ́má yáhɔ go amɔ́ Asaŋa a mba mo fúfúné naá kadɛ́gadɛ́ɛ ya begúe, Asaŋa a ŋga go sódío.

¹⁰Mammana, mɔ́ɔnyɔ o olimonyomú naá odɛ́má yɛ́hɛ́, Asaŋa a mo íyenye gɛtɛ́nɛ́ɛ; gɔnɔ́, mɔ́ɔnyɔ o oyamɔ́ daŋɛ́daŋɛ na nyuudé nɛ́hɛ́ a amɔ́ Yésusu a lɛ́ Daadáa, Asaŋa a mo sódonyo.

¹¹Ŋgɔ́ŋɛ́ yɛ oya yɛ amɔ́: Mɔ́ɔnyɔ a áganamɔ́ odɛ́má yɛ́hɛ́ naá mɔ́ɔ, a dɛ ŋgá nóa odóɛ[45].

¹²Gɔ́ɔ, godádoga gó lɔ́mɔ́ gó do bɛ́ɛ́mbá na Beyúdene na boɛ́nɔ búntió. Bá lɛ́ Daadáa babɔ́ táŋɛ́ ummue. Biimée báaba bá mo fínenyemú, a bó ŋanana niibo.

¹³Ɛɛ́ɛŋ, uŋkimée mɔ́ɔnyɔ a ŋgaá fínídínyée ufíno yá Daadáa, Asaŋa a ŋga mo sódío[46].

¹⁴Kanɛ́ bá ŋgaá mo fínényée nɛɛ́nɛ aáŋa bá lɛ́ kanɛ go ága odɛ́má yábɔ́ naá mɔ́ɔ o? Gɔnɔ́ bá ŋgaá ágá odɛ́má yábɔ́ naá mɔ́ɔ nɛɛ́nɛ, bɔ́ɔ kanɛ go mo ɔ́bɔ o? Gɔnɔ́ bá ŋgaá mo ɔ́bɔ́ nɛɛ́nɛ, aáŋa mɔtɔ ba go mo dúmenye a dɛ bɛ́ɛ́mbá hɔ́ɔ o?

¹⁵Gɔnɔ́, mɔtɔ ba go mo dúmenye a ŋgaá bɛ́ɛ́mbá hɔ́ɔ nɛɛ́nɛ, aáŋa bá dɛ mo dómá o? Nɔ́ɔ gɔ́ɔ tɔ́nɔ bó lɔ́mɔ́ naá Ŋgɔ́ŋɛ́ goŋaá: Ɛ́ná aŋa bɛ́ lɔ́mɔ́ bɛnɔ́gɔ́! bɛgɔ́ndɔ́ bá báaba bá dúmenyemú bɛnɔ́gɔ́ bá Cɔ́mɔ[47]!

¹⁶Kanɛ́ mɔtɔ uŋkimée a lɛ́ kanɛ go oliminyo Gɛnɔ́gɔ́ gá Cɔ́mɔ moánɛ. Mbúsí ya Asaŋa Iseyíi yɛ oya moatɛ́ yɛ amɔ́: Daadáa, ánɛ́ɛ a mboó olímínyóo Cɔ́mɔ yɛcɔ́[48] o?

¹⁷Bɛ́ ɛ́yanamɔ́ uŋgolímínyí go Cɔ́mɔ yɛ́ɛyɛ go ɔ́bɔnɔmɔ́, kanɛ́ Cɔ́mɔ ya ndiemi, gibédímbígéné gá yɛ́ gɛ́ lɔ́mɔ́ nogálɔ ná Kilítusu.

¹⁸Gɔ́ɔ ŋgúhenemú caá: Bá lɛ́ kanɛ go ɔ́bɔ nogálɔ moánɛ o? Bá mba nó ɔ́bɔ! Ŋgɔ́ŋɛ́ yɛ oya yɛ amɔ́: Ikelú ya moóma mɔ́ɔmɔ Asaŋa a mbaá gedíe yɛ á dónógógá naá cí iŋkimée. Dogálɔ dá mɔ́ dó báá saáa naá cí iŋkimée.

¹⁹Kɔ́ɔ ŋgúhunemú caá: Boɛ́nɔ bá Ɛ́sɛlahɛ́ɛlɛ bó lɛ́ kanɛ go ɔ́bɔ cɔ́mɔ moánɛ lí? Mɔ́sɛsɛ a mba lɛ́ ba busío ba go bó oyana go busío bá Asaŋa, a amɔ́: Ka ŋga ŋaáa goŋaá no bɛa hɛagá na boɛ́nɔ bá kanɛ ŋgénéménée. Ka ŋga búlúmúncée mpímí yɛnyɔ́ na boɛ́nɔ bá kanɛ nciŋí.

²⁰Iseyíi ɛ ɛ́dana naá busío o oya go busío bá Asaŋa a amɔ́: Bá lɛ́ kídéelú, báaba bá mbaá lɔmɔ́ bá dɛ púúmbée. Mmba gɔnɔ́ bóloodio go báaba bá mbaá lɔmɔ́ bá dɛ ŋgúhúné boóma.

²¹Kanɛ́ o oya go busío bá Ɛ́sɛlahɛ́ɛlɛ a amɔ́: Buisí buimée buimée mmba lɛ́ tóŋonyo ɛmbɔ́gɔ go boɛ́nɔ bá kanɛ ŋgɔ́bɛnɔ na mpálɔ́[49].