Read Nugunu Olóma 12 Bible Online

Olóma 12 - Nugunu bible

Olóma 12

¹Bolimóní, nyó téndenye go busío bá ŋgɛ́na mahana ya Asaŋa, goŋaá no bííŋene bɛɛnyɔ́ɔ moatɛ́ miisí miimée, aŋa gɛbáágá gɛgɔ́sɔ gɛ́ɛgɛ gɛ́ lɔ́mɔ́ go busío bá Asaŋa, gɛ́ gɔnɔ mo fɛɛnanɛna. Mammana ya go búlugenye Asaŋa yɛ́yɔ́ɔ.

²No do biené gɛɔyɔ gá batɔ bá ínoni,[58] dɛ́ɛ́na nɔnɔ Asaŋa a núgie gɛɔyɔ gɛ́nyɔ́, a nyó fáa gɛpáa gá nciŋí; go go háa naá odɛ́nɛ́ yá go lɛnca bɔ́ɔbɔ a lɛ́galɛgamɔ́ aŋa: bɔ́ɔbɔ bó lɔ́mɔ́ gisi, bɔ́ɔbɔ bó mo nɔ́ɔnɔnɔmɔ́ na bɔ́ɔbɔ bó lɔ́mɔ́ bese makɔ́nɔ́.

³Go busío bá gɛantáanta gá niibo nɛ́ɛnɛ a mbaá ŋŋaáa, ŋgoyanɛna onyɔ moánɛ naá bɛɛnyɔ́ɔ caá: no do ɛ́da go báágana naá odɛ́nɛ́ yɔ́ɔyɔ no lɔ́mɔ́ no do háánánáa hɔ́ɔ. Kanɛ́, bɛáa nɔnɔ nciŋí ya go íyime bɔ́ɔbɔ no lɔ́mɔ́ moatɛ́ moatɛ; onyɔ moánɛ ɛ ɛnda naá nɛnamá ná gioliminyo nɛ́ɛnɛ Asaŋa a mo fáananamɔ́.

⁴Dɛ lɛ́ onyɔ moánɛ nnyɔ́dɔ táŋɛ́ mmue, bɛnamá kɔ́ɔ gɛca; kanɛ́, bɛnamá bɛ́ɛbɔ bɛ́ dɛ yɔgɔ́nɔ́ buelí búmmue eé búmmue.

⁵Caŋa mmue, dɛ lɛ́ bɛɛcɔ́ɔ gɛca, dɛ bɛanana nnyɔ́dɔ táŋɛ́ mmue naá gobálada gɔ́ɔgɔ na Kilítusu; dɛ lɛ́ onyɔ moánɛ naá odɛ́nɛ́ yɛ́hɛ́, gɛnamá gá sɔ́gɔ́ɔ.

⁶Dɛ bɛanana bɛɛcɔ́ɔ biimée pááná mbɔ́dɔ mbɔ́dɔ, onyɔ moánɛ, aŋa niibo ná Asaŋa nɛ́ mo fáananamɔ́. Gɔ́ɔ, aáŋa mɔtɔ a á bɛáa pááná ya go gálagala aŋa mbúsí ya Asaŋa, ŋgáa a gálagala aŋa gioliminyo gɛ́ úhenemú.

⁷Aáŋa mɔtɔ a á bɛáa pááná ya go yɔgɔnɔ go basɔ́gɔ́ɔ, ŋgá a bííŋene go bɔ́. Mɔ́ɔnyɔ a bɛamɔ́ pááná ya go húunenye, ŋgáa a húunenye.

⁸Mɔ́ɔnyɔ a bɛamɔ́ pááná ya go téndenye basɔ́gɔ́ɔ, ŋgáa a bó téndenye. Mɔ́ɔnyɔ a fáananamɔ́, ŋgáa a fáanana kanɛ mbééníŋínyí intió. Mɔ́ɔnyɔ a gɔ́gɔmɔ́ basɔ́gɔ́ɔ, ŋgɛ́ɛ ɛ ɛnda nabɔ́ bese; mɔ́ɔnyɔ o óhigonyomú báaba bá lɔ́mɔ́ naá nogánagana, ŋgáa a yɔgɔnɔ buelí bɛ́hɛ́ na bɛyaŋa[59].

⁹Maamánáa nɔnɔ basɔ́gɔ́ɔ kanɛ makoɛla. No bɛlabɛla bobɛ́, no bágódɛna bɔ́ɔbɔ bó lɔ́mɔ́ besé na bogaaga bɛ́nyɔ́ buimée.

¹⁰Naá gɛnɔ́ɔnɛ́nɔ́ gá bulimóní: maamánɛ́náa nɔnɔ na odɛ́má yɛ́nyɔ́ uŋkimée. Hálámánɛ́náa nɔnɔ, onyɔ moánɛ a lɛ́ga besé ya sɔ́gɔ́ɔ.

¹¹Bííŋénéemú nɔnɔ go buelí, no do bɛ́ɛ́mbá bɛnɔ́nɔ́; no yɔgɔnɛnɔ Daadáa na odɛ́má uŋkimée.

¹²Yaŋáa nɔnɔ aŋa no lɔ́mɔ́ na mbémineminie, no bɛa kélemene makɔ́nɔ́ naá bɛdɔmbɔ, no bágóɛga naá mbósógólí.

¹³Óhígónyóo nɔnɔ basɔ́gɔ́ɔ boolímínyí go bɔ́ɔbɔ bá lɔ́mɔ́ bá dɛ bɛanánáa; no gɛ́ndɛgana báaba bú úlenemú naá bɛɛnyɔ́ɔ bese.

¹⁴Ɔŋɔ́nɔ́ɔ nɔnɔ Asaŋa goŋaá a fona báaba bá nyó séesenyemú; no sɔ́nɔ besé yabɔ́ caá akɛ́ gɛbɛ́[60].

¹⁵Yaŋáa nɔnɔ na báaba bá lɔ́mɔ́ naá bɛyaŋa, no baŋa na báaba bá baŋamɔ́.

¹⁶Bɛ́ɛ́mba nɔnɔ ukelú yúmmue na basɔ́gɔ́ɔ. No do fúmbée bɛantá bá ɛdɛ́nɛ́, olímínyóo nɔnɔ akɛ́ yó lɛ́ sɔŋɛ; no do bɛ́ɛ́mbá onyɔ moánɛ a amɔ́, ŋgíyimene buimée[61].

¹⁷Mɔtɔ a amɔ́ a go ŋa boóma bá gɛbɛ́, o do mo gundínyée gɛbɛ́; kanɛ́, fúmbée go ŋanana bɔ́ɔbɔ bó lɔ́mɔ́ bese naá busío bá mɔtɔ uŋkimée.

¹⁸Naá boayá báhɔ, aáŋa pɛ́ ɛ lɛ́ hɔ́ɔ, ŋanánáa goŋaá go ɔyɔ naá buumbénú na basɔ́gɔ́ɔ biimée.

¹⁹Bámɛ bá odɛ́má, no do bégundényée go gɛbɛ́ gɛ́ɛgɛ basɔ́gɔ́ɔ bá nyó ŋananamɔ́; kanɛ́, dɛ́ɛna nɔnɔ mpímí ya Asaŋa ɛ gaŋɛmɛda, goakɛ́ bó lɛ́ ɔ́ŋɔ́ɔlú náana: «Yɔmɔ́ɔ mɔ́ɔ mbégundenyemú, yɔmɔ́ɔ páananamɔ́ onyɔ moánɛ bɔ́ɔbɔ a háananamɔ́ na bɔ́.»

²⁰Naá bɛ́nyɔ́ boayá: Aáŋa obɛlɔ́bɛlɔ bahɔ a lɛ́ na ncaná, mo fáamɔ́ manyáanya; aáŋa a lɛ́ na inyúidi, o mo fáa boóma bá go bónyo. Hɔ́ɔlɔ́, bó gaá bɛ́ɛ́mbá aŋa bɛgɔnyɛgɔnyɛ bá bɛkánya bɛ́ íyuke bɛ́ o mo dálanamɔ́ go odóɛ[62].

²¹O do hóámá o do bádɛ́ɛ́ná gɛbɛ́ gɛ́ dɛ go mɔ́mɛ́nɔ́ɔ, kanɛ́ mánɛ́gɛ́na gɛbɛ́ na go ŋanana gá besé.