Read Nugunu Olóma 13 Bible Online

Olóma 13 - Nugunu bible

Olóma 13

¹Mɔtɔ uŋkimée a háanana go ɔ́bɛnɔ baŋgɔ́mɔnɔ báaba bí indenyemú cí, goakɛ́ nɛgaŋa nábɔ́ nɛ́ ɛ́damɔ́ go úlene naá Asaŋa, mɔ́ɔ a bó dílimenyemú.

²Nɔ́ɔ gɔ́ɔ, mɔ́ɔnyɔ a báaŋɛgamɔ́ baŋgɔ́mɔnɔ, i í inyé go ɛnda aŋa Asaŋa a lɛ́galɛgamɔ́. Báaba bá báaŋɛganamɔ́, bá báá ágana bɔ́ɔ moatɛ́ naá ncíbo ya gɛaŋɔ́.

³Báaba bá ŋananamɔ́ besé, bá dɛ háánánáa go bɛa bofoá na batɔ báaba bí indenyemú cí; goana batɔ báaba bá ŋananamɔ́ gɛbɛ́, bɔ́ɔ bá háananamɔ́ go díine baŋgɔ́mɔnɔ. Gɔ́ɔ, ŋanánáa besé goŋaá bá go ségisegi.

⁴Ŋgɔ́mɔnɔ a lɔ́mɔ́ naá buelí bá Asaŋa go go fáanana mɔtɔ magɛ́nda má go ŋanana bese. Kanɛ́, go amɔ́ o ŋa gɛbɛ́, bɛáa bofoá nɛhɛ́, goakɛ́ bó do báá go dugúnú gɔ́ɔ, a bɛananamɔ́ bogaaga bá go go séesenye. A lɛ́ naá buelí go go dúfie mpímí ya Asaŋa go mɔ́ɔnyɔ a ŋananamɔ́ gɛbɛ́.

⁵Boóma moánɛ bɔ́ dɛ háananamɔ́ go ɔ́bɛnɔ baŋgɔ́mɔnɔ, caá akɛ́ goana go go díine mpímí ya Asaŋa, kanɛ́ goŋaá, odɛ́má yɛ́cɔ́ yó có dúfenye nɔ́ɔnɔ.

⁶Boóma moánɛ tɔ́nɔ bɔ́ no soananamɔ́ tásɛ, Asaŋa mɔ́ɔ a mbaá bó dílímínyée go go gɔ́lɔnɔ tásɛ yɛ́ɛyɔ, bá yɔgɔnɔ buelí bese.

⁷Soɛ́na nɔnɔ onyɔ moánɛ, bɔ́ɔbɔ bó háananamɔ́ nɛhɛ́; no soa tásɛ naá mɔ́ɔnyɔ a háananamɔ́ na tásɛ, tíkédi ya nyonyí naá mɔ́ɔnyɔ a háananamɔ́ na tíkédi, no bɛa ŋgɔ́bɛnɔ naá mɔ́ɔnyɔ a háananamɔ́ na ŋgɔ́bɛnɔ, no hálamana mɔ́ɔnyɔ a háananamɔ́ na kálamana[63].

⁸Mɔtɔ a dɛ háánánáa go bɛɛnanɛna sɔ́gɔ́ɔ ufínó, aáŋa caá goana yá gɛnɔ́ɔ́nɛ́nɔ́ gɛ́ɛgɛ gɛ́ háananamɔ́ go bɛ́ɛmba naá kadɛ́gadɛ́ɛ yɛnyɔ́. Mɔ́ɔnyɔ a maamanamɔ́ basɔ́gɔ́ɔ, a báa go hóogio gicele giimée.

⁹Naá bɛlɔsɛnɔ bá Asaŋa bɛ́ɛbɛ bɛ́ lɔ́mɔ́: «O do ŋaáa gɛdáŋa, o do óná mɔtɔ, o do íbé boóma, o do bɛáa gɛdɛ́mádɛ́má go boóma bá sɔ́gɔ́ɔ», na bɛlɔsɛnɔ bɛ́ɛbɛ bíntió, bɛ́ lumenene naá nogálɔ táŋɛ́ númmue nɔ́ɔnɔ nó lɔ́mɔ́: «O maamana sɔ́gɔ́ɔ bahɔ aŋa maamɔ́ɔ moatɛ́[64].»

¹⁰Mɔ́ɔnyɔ a maamanɛnamɔ́, a dɛ ŋanánáa sɔ́gɔ́ɔ boóma bobɛ́. Kɔ́ɔ mɔ́ɔnyɔ a maamanamɔ́ sɔ́gɔ́ɔ, a á hóógío gicele giimée.

¹¹Bégíndíemú nɔnɔ, goakɛ́ no íyimene gɛcamɛna gɛ́ɛgɛ dɛ ná lɔ́mɔ́ kɔ́ɔ; gɛcamɛna gɛ́ á háá gá goŋaá no foyoga naá dɔnɔ́ɔ dɛ́nyɔ́[65]. Godɔ́ɔdɔ, gisódio gɛ́ ná lɛ́ mekúígíi nɛcɔ́, gó dómba gɛcamɛna gɛ́ɛgɛ dɛ mboó olímínyóo.

¹²Budúgú bó ná lɛ́ páábɔ́, buisí bó gaá gá lɛ́ go bála; ŋgáa dɛ búumbene moóma má mbíno, dɛ gɔ́lɔ bɛlɛŋɔ bá go noanana na bɛ́ naá gise.

¹³Ŋgáa dɛ no ɔyɔ naá botɛ́nɛ́ɛ aŋa batɔ báaba bɛ́ ɛndamɔ́ naá gise; dɛ dɛ nyáányáa ɛ́na lí dɛ dɛ nyóánánáa na ginití; dɛ ásɛgɛna gɛbɛ́ gá gɛɔyɔ na gɛɔyɔ gá hanyɔ́, cáŋɔ́ na hɛagá.

¹⁴Ŋgáa dɛ bɛ́ɛmba aŋa Daadáa Yésu Kilítu; dɛ dɔmbɔ go ŋanana bɛbɛ́ bá moóma bɛ́ɛbɛ nnyɔ́dɔ yɛcɔ́ ɛ lɛ́galɛgamɔ́.