Read Nugunu Olóma 14 Bible Online

Olóma 14 - Nugunu bible

Olóma 14

¹Gɛ́ndɛ́gɛ́na nɔnɔ bese ondimóní bɛnyɔ́ mɔ́ɔnyɔ a gá lɔ́mɔ́ a dɛ gɔ́nɛ́ná naá gioliminyo, kanɛ go fánɛna mbééníŋínyí sɛ́hɛ́[66].

²Batɔ bóncodío bá lɛ́ hɔ́ɔ báaba gioliminyo gábɔ́ gɛ́ bó fáananamɔ́ bogaaga bá go nyáanana boóma buimée, uncodío a nyáanana goana bɛgɛla.

³Sɔ́gɔ́ɔ mɔ́ɔnyɔ a nyáananamɔ́ boóma buimée a dɛ háánánáa go fánɛna mɔ́ɔnyɔ a lɔ́mɔ́ a dɛ nyáánánáa, tɔ́nɔ mɔ́ɔnyɔ a lɔ́mɔ́ a dɛ nyáánánáa busugé, a dɛ háánánáa go sómbɛna sɔ́gɔ́ɔ mɔ́ɔnyɔ a nyáananamɔ́ gɛsɛnɛ, goakɛ́ Asaŋa a lɛ́ mo gɛ́ndɛ́gɛ́náalú mɔ́ɔ tɔ́nɔ.

⁴Maamɔ́ɔ ánɛ́ɛ, go go sómbɛna uyogóní ba sɔ́gɔ́ɔ gɛsɛnɛ o? Akɛ́ a bɛ́ɛmba tɛ́ŋɛ́tɛŋɛ naá gioliminyo, akɛ́ o oba, bó núunemú ogɔ́nɔ́ɔ bɛhɛ́. Kɔ́ɔ a ŋgaá lɔbɛ́nɔ́ tɛ́ŋɛ́tɛŋɛ, goakɛ́ Daadáa, ogɔ́nɔ́ɔ bɛhɛ́, a bɛanana bogaaga bá go mo dímbigene.

⁵Go mɔ́ɔnyɔ, ɛ ɛ́nana goŋaá medúgú má lɛ́ hɔ́ɔ máama má lɔ́mɔ́ na ndénégé má dómba móncodío[67], uncodío ɛ ɛ́nana goŋaá má lɛ́ caŋa mmue. Kanɛ́ ŋgáa onyɔ moánɛ a bágódɛna mbééníŋínyí yɛ́hɛ́.

⁶Mɔ́ɔnyɔ ɛ ɛ́nanamɔ́ goŋaá medúgú má dómbanɛna, a ŋanana nɔ́ɔnɔ go busío bá Daadáa. Tɔ́nɔ mɔ́ɔnyɔ a nyáananamɔ́ boóma buimée a ŋananamɔ́ nɔ́ɔ go busío bá Daadáa, goakɛ́ a béhiigi Asaŋa go manyáanya mɛ́hɛ́. Gɔnɔ́ mɔ́ɔnyɔ a lɔ́mɔ́ a dɛ nyáánánáa boóma buimée, a ŋananamɔ́ nɔ́ɔ gɔgɔ́ go busío bá Daadáa, goakɛ́ mɔ́ɔ tɔ́nɔ a béhiigi Asaŋa.

⁷Moatɛ́, mɔtɔ naá olɔŋɔ yɛ́cɔ́ a dɛ ɔyɔ́ɔ goana go mɔ́ɔ moatɛ́, ɛ́na lí a dɛ gúénénée go mɔ́ɔ moatɛ́.

⁸Aáŋa dɛ ɔyɔ, dɛ ɔyɔmɔ́ go busío bá Daadáa, gɔnɔ́ aáŋa dɛ gúenene, dɛ gúenenemú go ufíno yá Daadáa. Kɔ́ɔ, ɛ́na akɛ́ dɛ ɔyɔ, ɛ́na akɛ́ dɛ gúenene, dɛ ɔ́bɛnɔnɔmɔ́ na Daadáa.

⁹Kilítusu a mba gúé a báá fúfúgé go go bɛ́ɛmba Daadáa ba begúe na ba bɔgɔ́sɔ.

¹⁰Maamɔ́ɔ kanɛ́, o sómbanɛnamɔ́ tɛ́ɔbɛnɔ gɛsɛnɛ goakɛ́ o? Tɔ́nɔ maamɔ́ɔ, o fánɛnafanɛnamɔ́ tɛ́ɔbɛnɔ goakɛ́ o? Bɛɛcɔ́ɔ biimée dɛ ná dɛ́lɛmɛna naá busío bá Asaŋa go go sómba gɛsɛnɛ gɛ́cɔ́.

¹¹Bó lɛ́ ɔ́ŋɔ́ɔlú naá Ŋgɔ́ŋɛ́ goŋaá: Yɔmɔ́ɔ Daadáa mɔ́ɔnyɔ a lɔ́mɔ́ ogɔ́sɔ, ŋgaá bálɛa caá: batɔ biimée bá ŋga kuncée enúu naá busío bámɛ, bá gunde bá búlugenye nigúmi ná Asaŋa[68].

¹²Hɔ́ɔlɔ́ gɔ́ɔ, onyɔ moánɛ a ŋgaá básáágáa go mɔ́ɔ moatɛ́ naá busío bá Asaŋa.

¹³Ŋgáa dɛ dɔmbɔ kanɛ́ go básómbanɛna bɛsɛnɛ. Bégedíemú nɔnɔ goana goŋaá mɔtɔ a dɛ bɛndɛ́gɛ́ná sɔ́gɔ́ɔ boóma go pɛ́ bá goŋaá a kúkene ɛ́na lí o oba naá gɛoba.

¹⁴Aŋa ndɔ́mɔ́ báladáalú na Daadáa Yésusu, ŋgíyimene mammana mammana caá boóma bá biílo bó do báá[69]. Kanɛ́ mɔtɔ a amɔ́ oyɛda a amɔ́ boóma bá biílo bó lɛ́ hɔ́ɔ, bó lɔ́mɔ́ na biílo go busío bɛ́hɛ́.

¹⁵Go amɔ́ go óbigio tɛ́ɔbɛnɔ go boóma bá go nyáa, o do gɔnɔ́ go ɛnda aŋa gɛnɔ́ɔ́nɛ́nɔ́ gɛ́ oyamɔ́. Go boóma bá go nyáa o do óná mɔ́ɔnyɔ Kilítusu a mbaá gúé go busío bɛ́hɛ́.

¹⁶Bɔ́ɔbɔ bó lɔ́mɔ́ bese go busío bɛ́nyɔ́, bó do bɛ́ɛ́mbá boóma bá goŋaá basɔ́gɔ́ɔ bɛ́ ɛ́da go nyó gálagala go dobɛ́.

¹⁷Mammana, Bufuŋe bá Asaŋa bó do báá gɛsɛnɛ gá manyáanya ɛ́na lí gá boóma bá go bónyóo. Bufuŋe bá Asaŋa bó lɔ́mɔ́ botɛ́nɛ́ɛ, buumbénú na bɛyaŋa mɔ́ɔmɔ Gimmúmpúu gá Giliíli a fáananɛnamɔ́.

¹⁸Mɔtɔ mɔ́ɔnyɔ a yɔgɔnɛnɔmɔ́ Kilítusu nɔ́ɔnɔ, a fɛɛnanɛna Asaŋa, gɔnɔ́ batɔ bá mo hálamanana.

¹⁹Ŋgáa dɛ no fúmbe kanɛ́ bɔ́ɔbɔ bo fáananamɔ́ buumbénú, bó gɔnɔ có óhiginyo goŋaá dɛ gónɛna bɛɛcɔ́ɔ biimée naá gioliminyo.

²⁰O do díéŋíe buelí bá Asaŋa go gɛgámbɛ́. Bó lɛ́ mammana goŋaá boóma bá go nyáa buimée bó lɛ́ kanɛ biílo; kanɛ́ bó do báá bese go go nyáa boóma bɔ́ɔbɔ bó lɔ́mɔ́ bá go ubininye tɛ́ɔbɛnɔ naá gɛoba.

²¹Bɔ́ɔbɔ bó lɔ́mɔ́ bese bó lɔ́mɔ́ goŋaá, o do nyáá busugé, o do nyóá mɔgɛ́bɔ; o bécele buimée bɔ́ɔbɔ bó lɔ́mɔ́ bá go ubininye tɛ́ɔbɛnɔ naá gɛoba.

²²Aáŋa go olimonyo ŋgoyáamɔ́ yɛ́ɛyɛ, yɛ bɛ́dɛ́gɛ́náamɔ́ naá mamɔ́ odɛ́má naá busío bá Asaŋa. Besé makɔ́nɔ́ na mɔ́ɔnyɔ odɛ́má yɛ́hɛ́ yó lɔ́mɔ́ yó do mo goománɛ́náa go bɔ́ɔbɔ ɛ́nanamɔ́ a amɔ́ bó lɛ́ tɛ́nɛ́ɛ.

²³Kanɛ́ mɔ́ɔnyɔ a lɔ́mɔ́ na cuŋí naá bɔ́ɔbɔ a nyáananamɔ́, a báa go básómbɛna gɛsɛnɛ, goakɛ́ a dɛ ŋanánáa bɔ́ɔbɔ odɛ́má yɛ́hɛ́ yó olimonyomú. Buimée bɔ́ɔbɔ bó lɔ́mɔ́ bó do bɛ́ɛ́mbá bɔ́ɔbɔ odɛ́má yó olimonyomú, bó lɛ́ gɛlɔgɔ.