Read Nugunu Olóma 16 Bible Online

Olóma 16 - Nugunu bible

Olóma 16

¹Ŋgaá nyó úhúné, go busío bá Ondimóní bɛcɔ́ ba okɔ́dɔ Fébée, uyogóní ba Asaŋa mɔ́ɔnyɔ naá giimbó gá boolímínyí gɛ́ɛgɛ naá Seŋkelée, caá:

²mo gɛ́ndɛ́gɛ́náamɔ́ nɔnɔ bese go ufíno yá Daadáa, aŋa gó háananamɔ́ naá kadɛ́gadɛ́ɛ ya boolímínyí. Mo óhígónyóomú nɔnɔ go boóma buimée bɔ́ɔbɔ a lɔ́mɔ́ ba go nyó baŋɛdɛna go bɔ́. Ɛɛ́ɛŋ, mɔ́ɔ moatɛ́ moatɛ a mbo óhígónyóo gɛca gá batɔ, dómbá dómbáa yɔmɔ́ɔ moatɛ́.

³Mbédíígínyéemú nɔnɔ Pilisíile na Akɛ́lasɛ báaba dɛ yɔgɔnɔmɔ́ buelí bá Yésu Kilítu olɔŋɔ nabɔ́.

⁴Bá mba ŋá bá báá yímíe gɛɔyɔ gábɔ́ go go sódio gɛ́ɛgɛ gámɛ, gó moánɛ mbó béhiigimú makɔ́nɔ́; caá akɛ́ goana yɔmɔ́ɔ mokáa, tɔ́nɔ, biimbó bá boolímínyí bɛ́ɛbɛ bɛ́ lɔ́mɔ́ bɛ́ dɛ bɛ́ɛ́mbá bá Beyúdene bɛ́ bó béhiigi.

⁵No bédíigie tɔ́nɔ giimbó gá boolímínyí gɛ́ɛgɛ naá nnyaŋá yabɔ́. No bédíigie bamɛ ba odɛ́má Ɛpɛnɛ́ɛtɛ; a lɛ́ ba busío ba go ága odɛ́má yɛ́hɛ́ naá Kilítusu naá gigísi gá cí ga Esíi.

⁶No bédíigie Malɛ́a mɔ́ɔnyɔ a ná gɔ́lɔ́nɔ́ɔ gɛdɔmbɔ makɔ́nɔ́ go busío bɛ́nyɔ́.

⁷No bédíigie boɔmɛ Andɛlɛnɛ́kɔsɔ na Yónɛasɛ báaba bá mbaá lɛ olɔŋɔ namɛ naá ncíbo ya gɛaŋɔ́. Bá lɛ́ bɛgaaga bá Baapótɛlɛ bɛ́ɛbɛ bɛ́ mbaá dóáná go oliminyo Kilítusu gámɛ.

⁸No bédíigie Ampɛlɛátɔsɔ, bamɛ ba odɛ́má naá Daadáa.

⁹No bédíigie Ulubéŋe mɔ́ɔnyɔ dɛ yɔgɔnɔmɔ́ buelí bá Kilítusu olɔŋɔ nɛhɛ́, na bamɛ ba odɛ́má Eselékisi.

¹⁰No bédíigie Ápɛlɛsɛ mɔ́ɔnyɔ a mbaá dúfíe gioliminyo gɛ́hɛ́ naá Kilítusu; no bédíigie ncíbo ya batɔ ya Elisitobíile.

¹¹No bédíigie Elódiono bamɛ ba nigúli. No bédíigie batɔ báaba bɔ́ ɔ́bɛnɔnɔmɔ́ na Daadáa naá nnyaŋá ya Nelesíise.

¹²No bédíigie Tɛlɛ́fɛnɛ na Tɛlɛ́fɔsɛ, báaba bá mbaá gɔ́lɔ́nɔ́ɔ gɛdɔmbɔ makɔ́nɔ́ go busío bá Daadáa. No bédíigie bamɛ ba odɛ́má Pelesíse mɔ́ɔnyɔ a mbaá gɔ́lɔ́nɔ́ɔ gɛdɔmbɔ makɔ́nɔ́ go busío bá Daadáa.

¹³No bédíigie Lúfusu[74], mɔ́ɔnyɔ Daadáa a mbií iyídé, na nnyeedíi mɔ́ɔnyɔ a lɔ́mɔ́ gɔnɔ́ nnyeedíi bamɛ.

¹⁴No bédíigie Eseŋkilíite, Felégono, Ɛlɛ́masɛ, Patolóbasɛ, Hɛ́lɛmɛsɛ na boolímínyí biimée báaba ba lɔ́mɔ́ olɔŋɔ nabɔ́.

¹⁵No bédíigie Filóloge na Yulíi, Nelée na ondimóní ba okɔ́dɔ, Olɛ́mpasɛ na boolímínyí biimée báaba bá lɔ́mɔ́ olɔŋɔ nabɔ́.

¹⁶Bédíígénínyéemú nɔnɔ na kude aŋa boolímínyí. Biimbó biimée bɛ́ɛbɛ bɛ́ olimonyomu Kilítusu bɛ́ á nyó bédíígényée.

¹⁷Bolimóní, ŋgaá nyó oyáná caá, bébeŋéemú nɔnɔ go batɔ báaba bú úlenemú na gobásalasala, na go fúmbe go nenenye basɔ́gɔ́ɔ, bá bábɛndabɛnda kúunye yɛ́ɛyɛ no mbaá bɛáa; bó yáŋɛ́mɛ́dɛ́náamɔ́ nɔnɔ.

¹⁸Mbɔ́dɔ sá batɔ sɛ́ɛsɔ sɛ́ dɛ yɔgɔ́nɛ́nɔ́ɔ Daadáa bɛcɔ́ Kilítusu, kanɛ́ bá yɔgɔnɔmɔ́ go gadɛ́ɛ gábɔ́[75]. Na bɛnɔ́gɔ́ bábɔ́ bá dogálɔ dá mbele, bá bɔŋɔbɔŋɔ batɔ bá kanɛ gobédedie.

¹⁹Naá boayá bɛ́nyɔ́, mɔtɔ uŋkimée i íyimene ŋgɔ́bɛnɔ yɛnyɔ́ na Daadáa; boóma moánɛ bɔ́, ŋgɔ́bɔnɔmɔ́ bese go busío bɛ́nyɔ́. Kanɛ́, ndɛ́galɛga goŋaá no bɛa nciŋí go go ŋanana besé; no do nebígínyée besé na gɛbɛ́.

²⁰Asaŋa mɔ́ɔnyɔ a fáananamɔ́ batɔ buumbénú a gaá gá lɛ́ go níŋiside Sátana kɔndɔ́ go cí. Ŋgáa niibo ná Daadáa bɛcɔ́ Yésusu nɛ́ bɛ́ɛmba nɛnyɔ́.

²¹Timotée mɔ́ɔnyɔ dɛ yɔgɔnɔmɔ́ nɛhɛ́[76] a á nyó bédíígényée, tɔ́nɔ na boɔmɛ, Lúsiusu, Yásɔŋɔ na Sosɛpatɛ́ɛlɛ.

²²Yɔmɔ́ɔ Télétiusu, uŋgóŋí ba Póolo naá kálata yɛ́ɛyɛ, ŋgaá nyó bédíígényée go ufíno yá Daadáa.

²³Géyusu, anáa mbɛ́dɛmanamɔ́, a á nyó bédíígényée, tɔ́nɔ na boolímínyí báaba bá bábandamɔ́ naá nnyaŋá yɛhɛ́. Ɛlásɛtɛ, umbídígíní muinyí ba tɛ́sɔnɔ, a á nyó bédíígényée, tɔ́nɔ na ondimóní bɛcɔ́ Kélétusu[77]. [

²⁴Ŋgáa niibo ná Daadáa bɛcɔ́ Yésu Kilítu nɛ́ bɛ́ɛmba nɛnyɔ́. Aamɛnɛ].

²⁵Ŋgáa dɛ búlugenye Asaŋa! A bɛanana bogaaga bá go nyó gúninie naá gioliminyo, gɔgɔ́ aŋa Gɛnɔ́gɔ́ gá Cɔ́mɔ gɛ́ɛgɛ túmenyemú gɛ́ núune Yésu Kilítu; mammana yɛ́ɛyɛ ɛ mbaá lɛ naá nnindíi yɛ́ á dembímídíe obɔ moánɛ. Mammana ya nnindíi moánɛ ɛ lɛ́ kanɛ go bélincie ɛgɛlɛ aá ɛgɛlɛ.

²⁶Kanɛ́ godɔ́ɔdɔ, bɔ́ɔbɔ mbúsí sá Asaŋa sɛ́ mbɔɔ́ ɔ́ŋɔ́ɔ, bó á ŋaáa goŋaá batɔ bá lɛnca bese bese mammana moánɛ. Bó lɔ́mɔ́ naá ndɛ́ga ya Asaŋa mɔ́ɔnyɔ ɔ ɔyɔmɔ́ bɛcamɛna biimée; mɔ́ɔ a mbaá fáá bogaaga goŋaá mɛɛ́nɔ miimée má mo olimonyo, má gɔnɔ mo ɔ́bɛnɔ.

²⁷Ŋgáa dɛ búlugenye Asaŋa, mɔ́ɔ a lɔ́mɔ́ mokáa na nciŋí, ŋgáa bó bɛ́ɛmba nɔ́ɔnɔ go ufíno yá Yésu Kilítu, go bɛcamɛna biimée! Aamɛnɛ.