Read Nugunu Olóma 3 Bible Online

Olóma 3 - Nugunu bible

Olóma 3

¹Gɔ́ɔ kanɛ́ kasɛ́á besé Beyúdene bá bɛananamɔ́ goŋaá bá lɛ́ Beyúdene o? Buencí bó bó dúgune goakɛ́ o?

²Bó bó dúgune makɔ́nɔ́ go gɛca gá pɛ́. Pɛ́ ya busío ɛ lɔ́mɔ́ goŋaá Asaŋa a mbaá dóáná go dɛ́fɛna Beyúdene tánɔ sɛ́hɛ́.

³Kanɛ́ ɛkádɛ? Aáŋa bóncodío naá olɔŋɔ yábɔ́ bá mba lɔbɛ́nɔ́ kanɛ pídefide, kanɛ pídefide yabɔ́ moánɛ ɛ lɛ́ ba go lege Asaŋa go ŋa bɔ́ɔbɔ a mbaá gálɛ́dá lí?

⁴Akɛ́ manɛ́! Goana Asaŋa ŋgaá bɛ́ɛ́mbá mɔ́ɔnyɔ o oyamɔ́ mammana, mɔtɔ uŋkimée a bɛ́ɛmba oŋkanɔ́ŋkanɔ aŋa bó lɔ́mɔ́ ɔ́ŋɔ́ɔlú naá kálata ya Asaŋa goŋaá: «Maamɔ́ɔ Asaŋa, gɔ́ɔgɔ o gálagalamɔ́, ŋgáa mɔtɔ uŋkimée a lɛnca goŋaá go oya mammana. Bá amɔ́ bá go básómbɛna, o húme gɛtɛ́nɛ́ɛ[10].»

⁵Bóntió bá lɛ́ hɔ́ɔ báaba bó oyamɔ́ go mbééníŋínyí sá batɔ bá amɔ́, bobɛ́ bɔ́ɔbɔ dɛ ŋananamɔ́ bó dúfenye botɛ́nɛ́ɛ bá Asaŋa. Dɛ gaá ná bó gundíe dɛ amɔ́ ɛkádɛ o? Dɛ gaá ná gundíe dɛ amɔ́ Asaŋa a ŋanana gɛbɛ́ gɔ́ɔgɔ a có fáananamɔ́ noséésényée lí? Kálagalamɔ́ háalá naá mbɔ́dɔ yɛ́ɛyɛ batɔ bá gálagalamɔ́.

⁶Akɛ́, caá nɔ́ɔnɔ. Aáŋa Asaŋa a dɛ báá gɛtɛ́nɛ́ɛ, a ŋgaá ŋaáa cí ɛkada nɛ́ɛnɛ o?

⁷A amɔ́ ádaga bóntió bá gaá gɔnɔ́ go oyɛda bá amɔ́: gobɛ́ɛmba gá baŋkanɔ́ŋkanɔ gɔ́ɔgɔ dɛ lɔ́mɔ́ gó dúgune batɔ goŋaá bá lɛnca bá amɔ́ Asaŋa a lɛ́ gɛtɛ́nɛ́ɛ. Bɛ́ ɛ́da gɛ́hɛ́ go búlugenye. Aáŋa bó lɛ́ nɔ́ɔnɔ, nɛɛ́nɛ Asaŋa a gɔnɔmɔ́ có ágana gɛaŋɔ́ goŋaá dɛ lɛ́ bologílógí o?

⁸Bóntió bó oya bá amɔ́, ŋgáa dɛ ŋa bobɛ́ goŋaá besé ɛ báá húmé naá bobɛ́. Aŋa gɔ́ɔgɔ bóntió bá có básómbɛnamɔ́ bá amɔ́ nɔ́ɔnɔ gɔ́ɔ dɛ húunenyemú. Asaŋa a bó fáa noséésényée, bá háanana na nɔ́ɔ.

⁹Nɛɛ́nɛ kanɛ́! Bɛɛcɔ́ɔ Beyúdene dɛ dómbana basɔ́gɔ́ɔ báaba bóntió lí? Akɛ́ɛ! Bó lɛ́ goŋaá dɛ báá go dúfie dɛ amɔ́ batɔ biimée akɛ́ Beyúdene, akɛ́ baánɛ́ɛ, gɛlɔgɔ gɛ́ bó nɔdɛnɔ.

¹⁰Aŋa bó lɔ́mɔ́ ɔ́ŋɔ́ɔlú goŋaá: «Mɔtɔ ba gɛtɛ́nɛ́ɛ a dɛ báá, akɛ́ ummue táŋɛ́,

¹¹Mɔtɔ ba nciŋí a dɛ báá, akɛ́ ba ummue ba go fúmbe Asaŋa a dɛ báá.

¹²Biimée bá báá fíídíe Asaŋa nnyimé, biimée bá báá naná, ummue ba go ŋa besé a dɛ báá, akɛ́ ummue táŋɛ́.

¹³Nyuudé nábɔ́ nɛ́ lɛ́ aŋa gɛbɛ́lá gɛhóógónú, gɛlɛ́mbɛ gábɔ́ mbele aá mbele, bɔ́ɔbɔ naá bɛlágálága bábɔ́ bó lɔ́mɔ́ masamba má nnyɔ́gɔ,

¹⁴Eŋgúdé yábɔ́ na nnyɔmɛnɔ gɔnɔ́ na bonoa dácɛ.

¹⁵Bá lɛ́ fɛaŋɔ go ŋgónana.

¹⁶Naá tómbɛ́ná sábɔ́ iŋkimée, bá fúugenye, bá séesenye batɔ.

¹⁷Bá dɛ íyíménée bopɔ́ɔ.

¹⁸Bá dɛ hálámánánáa Asaŋa akɛ́ sɔŋɛ[11].»

¹⁹Ábɔ caá dɛ íyimene goŋaá buimée bɔ́ɔbɔ Gicele gɛ́ oyamɔ́, bó lɔ́mɔ́ go báaba bɔ́ ɔyɔmɔ́ naá Gicele, bó lɔ́mɔ́ nɔ́ɔnɔ go goŋaá mɔtɔ ba go básáagɛda a dɛ bɛ́ɛ́mbá, goakɛ́ biimée bá lɛ́ bologílógí naá oŋgíso yá Asaŋa.

²⁰Go busío moánɛ, mɔtɔ a dɛ ŋgá bóso go bɛ́ɛmba gɛtɛ́nɛ́ɛ naá busío bɛ́hɛ́ goŋaá ɛ ɛnda naá pɛ́ iŋkimée aŋa Gicele gɛ́ oyamɔ́, kanɛ́ Gicele gɛ́ gɛ́ dembimidenyemú bɛlɔgɔ bá batɔ goŋaá bá bɛ́ lɛnca.

²¹Kanɛ́ godɔ́ɔdɔ Asaŋa a á loodío daŋɛ́daŋɛ nɛɛ́nɛ a có gɔ́lɔnɔmɔ́ bɛtɛ́nɛ́ɛ naá oŋgíso yɛ́hɛ́ kanɛ go núune Gicele. Bakálata bá Gicele na Ŋgɔ́ŋɛ́ sá mbúsí mó oya nɔ́ɔnɔ mó amɔ́:

²²Asaŋa a gɔ́lɔnɔ batɔ bɛtɛ́nɛ́ɛ go gioliminyo gábɔ́ gɛ́ɛgɛ naá Yésu Kilítu, bó lɛ́ nɔ́ɔ go biimée báaba bó olimonyomú, ɛɛ́ŋ godádoga gó do báá naá kadɛ́gadɛ́ɛ ya batɔ.

²³Mammana, batɔ biimée bá mba lɔgɔ́ɔ gɔ́ɔ bá lɔ́mɔ́ bá dɛ háánánáa na nigúmi ná Asaŋa,

²⁴kanɛ́ a bó gɔ́lɔnɔ bɛtɛ́nɛ́ɛ go busi bɛ́hɛ́, bó lɛ́ pááná ya Asaŋa go dugúnú go busío bábɔ́ gá Yésu Kilítu mɔ́ɔnyɔ a bó fáŋanamɔ́ go gɛlɔgɔ.

²⁵Mɔ́ɔ Asaŋa a mbaá mo dágá go goŋaá a gúe go busío bá batɔ, manɔ́ŋɔ́ mɛ́hɛ́ má sogona bɛlɔgɔ bá báaba bá mo olimonyomú. A mba ŋaáa nɔ́ɔnɔ go go dúfie botɛ́nɛ́ɛ bɛ́hɛ́. A mba dɛ́ɛ́ná bɛlɔgɔ bɛ́ɛbɛ batɔ bá mbaá ŋanánáa cóá kanɛ go fáa noséésényée,

²⁶a mba lɛ́ a bédémbenye. Kanɛ́ godɔ́ɔdɔ a dúfenye goŋaá a lɛ́ gɛtɛ́nɛ́ɛ, gɔ́ɔ tɔ́nɔ a lɛ́galɛgamɔ́ go íyienye batɔ báaba bá áganamɔ́ odɛ́má yábɔ́ naá Yésusu bɛtɛ́nɛ́ɛ.

²⁷Boóma bá ŋaá dɛ gɔnɔ béségi go bɔ́ɔ bó lɛ́ hɔ́ɔ lí? Akɛ́ɛ! Asaŋa a mba có íyíe bɛtɛ́nɛ́ɛ goŋaá dɛ olimonyo Yésu Kilítu caá akɛ́ go goŋaá dɛ bienene Gicele.

²⁸Mammana, dɛ ɛ́nana bese goŋaá Asaŋa a gɔ́lɔnɔ mɔtɔ gɛtɛ́nɛ́ɛ naá busío bɛ́hɛ́ go gioliminyo caá akɛ́ go go hóogonyo gá meŋiigíe má Gicele.

²⁹Kɔ́ɔ Asaŋa a lɔ́mɔ́ goana ba Beyúdene, a dɛ báá ba basɔ́gɔ́ɔ báaba bóntió o? Ɛɛ́ɛŋ, a lɛ́ tɔ́nɔ ba basɔ́gɔ́ɔ báaba bóntió,

³⁰aŋa Asaŋa a lɔ́mɔ́ táŋɛ́ ummue[12], mɔ́ɔ i íyenyemú Beyúdene bɛtɛ́nɛ́ɛ go gioliminyo gábɔ́, a gɔnɔ go íyenye báaba bá lɔ́mɔ́ bá dɛ bɛ́ɛ́mbá Beyúdene bɛtɛ́nɛ́ɛ go gioliminyo gábɔ́.

³¹Kanɛ́ gɔ́ɔ, dɛ ú úlie Gicele go busío bá gioliminyo lí? Akɛ́ɛ, caá akɛ́ nɔ́ɔnɔ, Gicele gɛ́ lɛ́ naá undukí yá gɛ́.