Read Nugunu Olóma 4 Bible Online

Olóma 4 - Nugunu bible

Olóma 4

¹Godɔ́ɔdɔ yɛ́ɛyɛ háalá, ŋgáa dɛ ɛ́na boóma bɔ́ɔbɔ bó mbaá bolɛ́ná Isée kɔ́nɔ́ɔ bɛcɔ́ Ábalaháma. A mbaá dáŋábá ɛkádɛ́ naá boɔtɔ bɛ́hɛ́ o?

²Gobɛ́ɛmba gɔ́ɔgɔ Ábalaháma a lɔ́mɔ́ bɛ́ɛ́mbáalú gɛtɛ́nɛ́ɛ, aáŋa bó mbaá lɛ go meŋiigíe mɛ́hɛ́ má moatɛ́, a mba lɛ́ ba go béségi, kanɛ́ caá naá busío bá Asaŋa.

³Kanɛ́, naá Ŋgɔ́ŋɛ́, dɛ bana hɔ́ɔ dɛ amɔ́: «Ábalaháma a mba ágá odɛ́má yɛ́hɛ́ naá Asaŋa, gɔ́ɔ Asaŋa a mbaá mo ɛ́ná gɛtɛ́nɛ́ɛ gá mɔtɔ go busío moánɛ[13].»

⁴Gɔ́ɔgɔ mɔtɔ a ŋamɔ́ buelí, bá báá mo soɛná, bɛsoɛná bɛ́ɛbɛ bɛ́ dɛ bósó pááná, bɛ́ lɔ́mɔ́ bɔ́ɔbɔ a háananamɔ́ na bɔ́ go giukú gɛ́hɛ́.

⁵Kanɛ́ mɔtɔ mɔ́ɔnyɔ a lɔ́mɔ́ a dɛ ŋanánáa boóma go bogaaga bɛ́hɛ́ bá moatɛ́, a báá ágá odɛ́má yɛ́hɛ́ naá Asaŋa mɔ́ɔnyɔ i íyenyemú ulogílógí gɛtɛ́nɛ́ɛ gá mɔtɔ, Asaŋa a mo ɛ́nana gɛtɛ́nɛ́ɛ go busío moánɛ.

⁶Nɔ́ɔnɔ gɔ́ɔ Défidi a áganamɔ́ osagɔ yá gɛfona, gɛfona gá mɔ́ɔnyɔ Asaŋa a mo ɛ́nanamɔ́ gɛtɛ́nɛ́ɛ gá mɔtɔ kanɛ go núune meŋiigíe mɛ́hɛ́:

⁷«Besé makɔ́nɔ́ na báaba Asaŋa a bó héehinenyemú bɛoba bábɔ́ a gunde u úlenye bɛlɔgɔ bábɔ́.

⁸Besé makɔ́nɔ́ na mɔtɔ mɔ́ɔnyɔ Daadáa a lɔ́mɔ́ a dɛ mo banɛ́ná bɛoba bɛ́hɛ́[14].»

⁹Kɔ́ɔ ŋgoyáamɔ́ ya besé makɔ́nɔ́ yɛ́ɛyɛ ɛ lɔ́mɔ́ go báaba bá lɔ́mɔ́ ancábáalú, tɔ́nɔ go báaba bá lɔ́mɔ́ kanɛ go ancaba. Dɛ oya kanɛ́ dɛ amɔ́: «Gioliminyo gá Ábalaháma gɛ mba ŋaáa goŋaá Asaŋa a mo ɛ́na gɛtɛ́nɛ́ɛ gá mɔtɔ!»

¹⁰Kanɛ́, gɛcamɛna gɛ́hanɛ́ Asaŋa a mbɛɛ́ ɛ́ná Ábalaháma gɛtɛ́nɛ́ɛ gá mɔtɔ o? Bó do mbáa lɛ naá nnyimé yɛhɛ́ ya go ancaba, kanɛ́ bó mbaá lɛ otóotoɛ yá goŋaá a ancaba.

¹¹Otóotoɛ yá goŋaá Ábalaháma a ancaba, a mba lɛ́ gɛtɛ́nɛ́ɛ gá mɔtɔ, goakɛ́ a mba lɛ́ a ágana odɛ́má yɛ́hɛ́ naá Asaŋa. Goana naá nnyimé yɛ́ɛyɔ, gɔ́ɔ a mbaá bɛáa gieninye gá buencí[15] gɛ́ɛgɛ gɛ́ mbaá lɛ gɛ́ dúfenye go goŋaá Asaŋa a á mo ɛ́ná gɛtɛ́nɛ́ɛ go gioliminyo gɛ́hɛ́. Caŋa mmue gɔ́ɔ Ábalaháma a mbɛɛ́ ɛ́yá Isée ba biimée báaba bá áganamɔ́ odɛ́má yabɔ́ naá Asaŋa akɛ́ bá lɛ́ kanɛ go ancaba, Asaŋa a bó ɛ́nana bɛtɛ́nɛ́ɛ bá batɔ.

¹²Ábalaháma, a mbɛ ɛ́yá tɔ́nɔ Isée ba báaba bá lɔ́mɔ́ ancábáalú, kanɛ́ caá goana go buencí bábɔ́ bá nnyɔ́dɔ, kanɛ́ go go bienene gioliminyo gá Isée bɛcɔ́ Ábalaháma gɛ́ɛgɛ a mbaá dúfíe gɛcamɛna gɛ́ɛgɛ a mbaá lɔmɔ́ a gá lɛ́ kanɛ go ancaba.

¹³Mammana, gɔ́ɔgɔ Asaŋa a mbaá dánɛ́ná Ábalaháma go go bɛa cí na ɛnana yɛhɛ́[16], bó do mbáa lɛ go goŋaá a mba beŋé Gicele. Kanɛ́ gó mbaá lɛ goŋaá Asaŋa a mba mó ɛ́ná gɛtɛ́nɛ́ɛ go gioliminyo gɛ́hɛ́.

¹⁴Aáŋa bó lɛ́ go goŋaá báaba bá beŋemú Gicele bɔ́ɔ bá háananamɔ́ go bɛa bodáŋɔ naá tánɔ, gásɛ́ gioliminyo gɛ́ lɛ́ kanɛ ndénégé, tánɔ ya Asaŋa kanɛ mbɔ́gɔ́.

¹⁵Mammana, Gicele gɛ́ gɛ́ úlenemú na mpímí ya Asaŋa, goakɛ́ bá dɛ gɛ́ bienénée. Kanɛ́ anáa Gicele gɛ́ lɔ́mɔ́ gɛ́ dɛ bɛ́ɛ́mbá, gocaŋabɛna Gicele gó dó báá.

¹⁶Go nɔ́ɔ gɔ́ɔ tánɔ ya Asaŋa ɛ lɔ́mɔ́ go báaba bá mo olimonyomú. Tánɔ ya ndiemi ɛ bɛ́ɛmba pááná ya Asaŋa yɛ́ɛyɛ ɛ lɔ́mɔ́ go ɛnana ya Ábalaháma iŋkimée, caá akɛ́ goana yɛ́ɛyɛ ɛ beŋemú Gicele, kanɛ́ go báaba bó olimonyomú aŋa Ábalaháma, goakɛ́ a lɛ́ Isée bɛcɔ́ ba biimée.

¹⁷Aŋa bó lɔ́mɔ́ ɔ́ŋɔ́ɔlú go goŋaá: «Ndɛ́ go dílímínyéelú go goŋaá o bɛ́ɛmba Isée ba bitúu bitúu bá mɛɛ́nɔ[17].» A lɛ́ Isée bɛcɔ́ naá oŋgíso yá Asaŋa. A ágana toodo odɛ́máa yɛhɛ́ naá mɔ́ɔnyɔ a fáananamɔ́ begúe gɛɔyɔ, mɔ́ɔnyɔ a besenyemú moóma mɔ́ɔmɔ mó lɔ́mɔ́ mó do ɔyɔ́ɔ.

¹⁸Kanɛ́ akɛ́ aŋa Ábalaháma a mbaá lɛ gɔnɔ́ kanɛ boóma bá go ágana toodo odɛ́máa go bɔ́ɔ, a mbɛ ɛ́dánáa naá busío a ágana odɛ́má yɛ́hɛ́ naá Asaŋa go tánɔ yɛhɛ́. Gɔ́ɔ a lɔ́mɔ́ ɛ́yáalú Isée ba gɛcɛcá gá mɛɛ́nɔ gɔgɔ́ aŋa Asaŋa a mbaá mó oyáná a amɔ́: Ɛnana yahɔ ɛ ŋga bɛ́ɛ́mbá gɛcɛcá[18].

¹⁹A mba lɛ́ a ná lɛ́ go bɛ́ɛ́nana kanɛ bogaaga, goakɛ́, a mba lɛ́ na boóma bá nnyómá ntɛdɛ, tɔ́nɔ okɔ́dɔ bɛhɛ́ Sáála a dɛ gɔnɔ́ bɛ́ɛmba na bogaaga bá go súge ibume, a bíene. Akɛ́ nɔ́ɔnɔ, gioliminyo gɛ́hɛ́ gɛ́ lɛ́ kanɛ go oba go cí[19].

²⁰Kanɛ́, gá goŋaá a ága tánɔ ya Asaŋa go cuŋí, i inye go olimonyo, a báá bɛáa bogaaga bɛ́hɛ́ naá gioliminyo, a lɛncana bogɔ́nɔ́ɔ bá Asaŋa.

²¹A mba lɛ́ gɔnɔ́ na mbémineminie ya goŋaá Asaŋa a bɛanana bogaaga ba go hóogio tánɔ yɛhɛ́.

²²Go gioliminyo gɛ́hɛ́ moánɛ gɔ́ɔ Asaŋa a mbaá mo gɔ́lɔ́ gɛtɛ́nɛ́ɛ gá mɔtɔ naá busío bɛ́hɛ́.

²³Kanɛ́ nogálɔ nɔ́ɔnɔ bá mbɔɔ́ ɔ́ŋɔ́ bá amɔ́: «Asaŋa a mba mo gɔ́lɔ́ gɛtɛ́nɛ́ɛ gá mɔtɔ naá busío bɛ́hɛ́», nó do mbáa lɛ gɛ́hɛ́ mokáa.

²⁴No lɛ́ tɔ́nɔ gɛ́cɔ́. Asaŋa a ná gɔ́lɔ́ bɛtɛ́nɛ́ɛ bá batɔ naá busío bɛ́hɛ́, bɛɛcɔ́ɔ báaba dɛ áganamɔ́ toodo odɛ́máa yɛcɔ́ naá mɔ́ɔnyɔ a mbaá fúfúné naá olɔŋɔ ya begúe, a lɔ́mɔ́ Yésusu, Daadáa bɛcɔ́.

²⁵Bá mba mo óná go bɛoba bɛ́cɔ́[20], Asaŋa a báá mo fúfúné go go có íyie bɛtɛ́nɛ́ɛ bá batɔ naá busío bɛ́hɛ́.