Read Nugunu Olóma 9 Bible Online

Olóma 9 - Nugunu bible

Olóma 9

¹Go ufíno yá Kilítusu, ŋgoya mammana, cɛ bélébélée. Odɛ́má yámɛ yɔ́ɔyɔ Gimmúmpúu gá Giliíli i indenyemú yó túfenye goŋaá boóma bɔ́ɔbɔ ŋgoyamɔ́ bó lɛ́ mammana:

²ndɛ́ na mecíkílí makɔ́nɔ́ naá odɛ́má, na makánya kanɛ mmanɛ́náa.

³Ɛɛ́ɛŋ, ndɛ́ ba go maamana goŋaá Asaŋa a nyɔmɛnɔ, kunde ŋgádogana na Kilítusu go bese ya bolimóní bámɛ bá mbíényée, boɛ́nɔ búmmue.

⁴Bá lɛ́ baaná bá Ɛ́sɛlahɛ́ɛlɛ: Asaŋa a mba bó íyídé go go bɛ́ɛmba baaná bɛ́hɛ́, a báá bó dúfíe nigúmi nɛ́hɛ́, a báá ladá bugúle nabɔ́, a báá bó fáá gicele, a báá gɔnɔ́ bó dúfie aŋa bá háananamɔ́ go mo búlugenye, a báá bó fáánánáa tánɔ[28].

⁵Bɔ́ɔ bá lɔ́mɔ́ biisée kɔ́nɔ́ɔ. Naá nogɔgɔ́ nábɔ́ gɔ́ɔ Kilítusu a bébíenemú aŋa mɔtɔ; mɔ́ɔ a lɔ́mɔ́ Asaŋa naá mmoɛná ya buimée, a lɛ́ fonáalú go bɛcamɛna biimée! Aamɛnɛ.

⁶Akɛ́ɛ! cɛ báá caá tánɔ ya Asaŋa ɛ mbo obá go cí. Bó do bósó mbíényée iŋkimée ya Ɛ́sɛlahɛ́ɛlɛ yɛ́ ɛ lɔ́mɔ́ baaná bá Ɛ́sɛlahɛ́ɛlɛ[29].

⁷Gɔnɔ́ báaba bá lɔ́mɔ́ naá nogɔgɔ́ ná Ábalaháma bá dɛ bósó biimée baaná bɛ́hɛ́. Asaŋa a mbo oyáná Ábalaháma a amɔ́: «Bó lɔ́mɔ́ nosaŋa ná Ɛ́saga nɔ́ bá ŋgaá dɔ́ŋɔ́nɔ́ɔ bá amɔ́ ɛnana yahɔ[30].»

⁸Nɔ́ɔnɔ go lɛ́ aá: baaná báaba bá bébíenemú naá mbɔ́dɔ yɛ́ɛyɛ batɔ bá bébíenemú bá dɛ bósó baaná bá Asaŋa[31], goana báaba bá mbaá bébíéné aŋa tánɔ ya Asaŋa ɛ mbaá lɛ yɛ oya.

⁹Kanɛ́ Asaŋa a mba fáá tánɔ a amɔ́: «Naá gɛcamɛna gɛ́ɛgɛ náana, nná nco gunde kíde Sáála a ná lɛ́ na moɔnɔ́[32].»

¹⁰Bó do súgénée goana hɔ́ɔlɔ́. Ɛlɛbɛ́ka na Isée kɔ́nɔ́ɔ bɛcɔ́ Ɛ́saga bá mba bíéné ɛbáása, bahaŋa báandɛ́.

¹¹Kanɛ́ Asaŋa a bɛanana nokɛsa nɛ́hɛ́ nɔ́ɔnɔ a hóogonyomú go ndɛ́ga yɛhɛ́. Caá akɛ́ go meŋiigíe má batɔ, kanɛ́ goana go ndɛ́ga ya mɔ́ɔnyɔ a dɔ́ŋɔnɔmɔ́. Go go dúfie goŋaá a lɛ́ nábɛnábɛ na nokɛsa nɛ́hɛ́, hɔ́ɔlɔ́ baábayɔ́ bɔ́ɔbɔ bá gá lɛ́ bá dɛ bébíéné, bá gá lɛ́ bá dɛ ŋaáa akɛ́ bese, akɛ́ gɛgáda, Asaŋa go oyana Ɛlɛbɛ́ka a amɔ́: «Ba ogɔ́nɔ́ a ŋga yɔgɔ́nɛ́nɔ́ɔ gifío[33].»

¹³Nogálɔ nɔ́ɔnɔ nó lumenene na núncodío nɔ́ɔnɔ nó lɔ́mɔ́ ɔ́ŋɔ́ɔlú goŋaá: «Mmba maamánáa Yɔ́kɔbɔ, mbáá bɛlábɛ́láa Esóo[34].»

¹⁴Dɛ oyɛdamɔ́ dɛ amɔ́ nɛɛ́nɛ o? Asaŋa a dɛ báá gɛtɛ́nɛ́ɛ lí? Akɛ́ɛ!

¹⁵A mbo oyáná mammana Mɔ́sɛsɛ a amɔ́: «Ka ŋga ŋaáa busi go mɔ́ɔnyɔ ndɛ́galɛgamɔ́ go mo ŋa busi, ka ŋga gɔ́lɔ́ mahana go mɔ́ɔnyɔ ndɛ́galɛgamɔ́ go mo gɔ́lɔ mahana[35].»

¹⁶Bó do báá kanɛ́ go ndɛ́ga ya batɔ ɛ́na go bogaaga bábɔ́, kanɛ́ bó lɔ́mɔ́ Asaŋa mɔ́ɔnyɔ a ŋananamɔ́ busi.

¹⁷Naá Ŋgɔ́ŋɛ́, Asaŋa o oyanɛna ufuŋe Falaɔ́ŋɔ a amɔ́: «Ndɔ́mɔ́ go dílímínyéelú ufuŋe goŋaá túfie bogaaga bámɛ naá maamɔ́ɔ, tɔ́nɔ bá gúmenye ufíno yámɛ naá cí iŋkimée[36].»

¹⁸Gɔ́ɔ kanɛ́ Asaŋa a gɔ́lɔnɔ mɔ́ɔnyɔ a maamanamɔ́ mahana, a gunde a leleenye odɛ́má yá mɔ́ɔnyɔ a maamanamɔ́.

¹⁹Gódaga o lɛ́ bá go ŋgoyana go amɔ́: aáŋa bó lɔ́mɔ́ nɔ́ɔnɔ, Asaŋa a gá goomanɛnamɔ́ batɔ goakɛ́ o? Ánɛ́ɛ a lɔ́mɔ́ ba go lɔbɛnɔ gɛ́ndɛ́ŋɛ́gɛndɛŋɛ go bɔ́ɔbɔ Asaŋa a lɛ́galɛgamɔ́ o?

²⁰Kanɛ́ maamɔ́ɔ mɔtɔ, o lɔ́mɔ́ ánɛ́ɛ goŋaá o suŋe na Asaŋa o? Ɛtɛ́lɛ́a há noma hɛ́ lɛ́ bá go úhune mɔtɔ mɔ́ɔnyɔ a mbaá hɛ́ maáa hɛ́ amɔ́: O mbaá kedíe nɔ́ɔnɔ goakɛ́[37] o?

²¹Umií a lɛ́ ba go gedie buimée bɔ́ɔbɔ a lɛ́galɛgamɔ́ na noma. A lɛ́ ba go gedie na noma nɛ́hɛ́ nɔ́ɔnɔ ɛtɛ́lɛ́a há ntɔ́nɔ na ɛtɛ́lɛ́a há mɔbɔ́yɔgɔnɔ má miisí miimée[38].

²²Gɔ́ɔgɔ gá goŋaá Asaŋa a dúfie mpímí yɛhɛ́ a gunde a lincie bogaaga bɛ́hɛ́ go báaba bá mbaá lɔmɔ́ bá mo óbonyo mpímí, bɔ́ɔ pɛnɛ́ɛ go go yíme, kanɛ́ a mba bégumbéné odɛ́má makɔ́nɔ́.

²³A mbaá ŋaáa nɔ́ɔ go go dúfie gɛantáanta gɛ́hɛ́ gá nigúmi naá boayá bá báaba a mbaá bó gɔ́lɔ́ mahana; báaba a mbaá dóáná go bó gedie go go bɛa nigúmi nɛ́hɛ́.

²⁴Dɛ lɛ́ naá olɔŋɔ yá báaba a mbaá dɔ́ŋɛ́nɔ́ caá akɛ́ goana naá kadɛ́gadɛ́ɛ ya Beyúdene, kanɛ́ tɔ́nɔ naá báaba bá lɔ́mɔ́ bá dɛ bɛ́ɛ́mbá Beyúdene.

²⁵Bó lɛ́ ɔ́ŋɔ́ɔlú naá kálata ya Osée goŋaá: «Boɛ́nɔ bɔ́ɔbɔ bó mbaá lɛ bó do bɛ́ɛ́mbá bámɛ, ka ŋga bó dɔ́ŋɛ́nɔ́ caá: boɛ́nɔ bámɛ. Gɔnɔ́ báaba mmbaá lɛ cɛ bó maamánáa, ka ŋga bó dɔ́ŋɛ́nɔ́ caá: bindiŋi bámɛ.

²⁶Anáa bá mboó oyɛ́dá bá amɔ́: no do báá boɛ́nɔ bámɛ, hɔ́ɔ bá ŋgaá bó dɔ́ŋɛ́nɔ́ bá amɔ́: baaná bá Asaŋa ogɔ́sɔ[39].»

²⁷Naá boayá bá Iseyíi, a gálagala go busío bá Ɛ́sɛlahɛ́ɛlɛ a amɔ́: «Akɛ́ baaná bá Ɛ́sɛlahɛ́ɛlɛ bá dege aŋa ɛcánána hɛ́ɛhɛ naá cɔ́lɔ ya máŋɛ́, nɛnamá ná batɔ naá bɔ́ɔ nɛ́ nɛ́ ŋgaá sɔ́dɔ́.

²⁸Ɛɛ́ɛŋ, nogálɔ ná Daadáa nó ŋgɛ ɛ́nánɛ́náa go púmúpúmú gɔnɔ́ fɛaŋɔ fɛaŋɔ naá cí iŋkimée[40].»

²⁹Iseyíi a mba dóáná go oyɛda a amɔ́: «Amóŋa Daadáa ba bogaaga a dɛ mbá có síene ɛnana, gásɛ́ dɛ ŋga bɛ́ɛ́mbá aŋa tɛ́sɔnɔ ya Sɔdɔ́mɔ na ya Gɔmɔ́ɔlɔ[41].»

³⁰Kanɛ́ dɛ lɔ́mɔ́ bá go oyɛda dɛ amɔ́ nɛɛ́nɛ o? Batɔ báaba bá mbaá lɛ bá dɛ bɛ́ɛ́mbá Beyúdene, bá dɛ fúmbée go bɛ́ɛmba bɛtɛ́nɛ́ɛ bá batɔ naá oŋgíso yá Asaŋa, bá mbɛ ɛ́yá bɛtɛ́nɛ́ɛ bá batɔ go gioliminyo.

³¹Asáa gɔgɔ́ nigúli ná Ɛ́sɛlahɛ́ɛlɛ nɛ́ mba lɛ́ nɛ́ fúmbe botɛ́nɛ́ɛ naá ŋgɔ́bɛnɔ ya gicele, kanɛ́ bá dɛ mbá bɛa.

³²Goakɛ́ o? Bá dɛ mbáa lɛ bá fúmbe go fɛɛna Asaŋa naá gioliminyo, bá mba lɛ bá fúmbe go ɛ́ya bɛtɛ́nɛ́ɛ bá batɔ go meŋiigíe. Gɔ́ɔ bá mbaá kúkéné ɛdánɛ́ ná osɛmbɔ.

³³Ŋgɔ́ŋɛ́ sɛ́ oyamɔ́ sɛ́ amɔ́: «Ŋgaá dábɛ́gá ɛdánɛ́ ná osɛmbɔ naá Síyono, gɛdánɛ́dánɛ́ gá go obeninye. Kanɛ́ mɔ́ɔnyɔ a nɛ́ bédímbigenemú a dɛ ŋgá nóa odóɛ[42].»