Read Nugunu 1 Kɔlɛ́ntɛ 10 Bible Online

1 Kɔlɛ́ntɛ 10 - Nugunu bible

1 Kɔlɛ́ntɛ 10

¹Bolimóní, cɛ lɛ́gálɛ́gáa goŋaá no bófoolio bɔ́ɔbɔ bó mbaá ŋaáa biisée bá biisée kɔ́nɔ́ɔ bɛ́cɔ́ naá giolóo gá bodɛ́agadɛ́. Bá mba lɛ́ bɛ́ ɛnda biimée, nogálámbá nó bó gɔ́gɔ naá busío, biimée bá báá yoogá máŋɛ́ má goɛ́la[28].

²Bó lɛ́ aŋa bá mba bɛáa bɔ́ɔ biimée giyuminye naá nogálámbá na naá máŋɛ́ go go bɛ́ɛmba báladáalú na Mɔ́sɛsɛ.

³Biimée bá mba nyáá manyáanya má go ɛ́da go úle naá mmoɛná,

⁴bá báá bónyó biimée miimpo má go ɛ́da go úle naá mmoɛná, goakɛ́ bá mba lɛ́ bá bónyóonono naá gɛdánɛ́dánɛ́ gá go ɛ́da go úle naá mmoɛná gɛ́ɛgɛ gɛ́ mbaá lɛ gɛ́ bó bienene; gɛdánɛ́dánɛ́ moánɛ, a mbaá lɔ́mɔ́ Kilítusu.

⁵Akɛ́ nɔ́ɔnɔ, degédegé naá olɔŋɔ yábɔ́ ɛ dɛ mbá bɛ́ɛmba bese naá oŋgíso yá Asaŋa; go busío moánɛ bɔ́ bá mbaá gúénénée naá giolóo gá bodɛ́agadɛ́[29].

⁶Muimée mɔ́ɔmɔ mó mba bádómbánáa go go có fáa gieninye, goŋaá dɛ dɛ lɛ́gá go ŋanana bobɛ́ aŋa bɔ́ɔ bá mbaá ŋanánáa[30].

⁷No do ɛ́dá go búlugenye moɔcɔ aŋa degédegé naá olɔŋɔ yábɔ́ ɛ mbaá ŋanánáa, aŋa bó lɔ́mɔ́ ɔ́ŋɔ́ɔlú goŋaá: Boɛ́nɔ bó mba lukúméné go manyáanya na nɛnyóa, naá nnyimé hɔ́ɔlɔ́ bá báa lɛ gó ɛ́da go ɛncɔnɔ[31].

⁸Dɛ dɛ bííŋénée ɛ́na akɛ́ go gɛɔyɔ gá hanyɔ́ aŋa degédegé naá olɔŋɔ yábɔ́ ɛ mbaá ŋanánáa; go busío moánɛ, batɔ tɔ́sɛnɔ nitíno na ɛ́dadɔ́ bá báá kúbúgé buisí táŋɛ́ búmmue[32].

⁹Dɛ dɛ gogónáa ɛ́na akɛ́ Kilítusu aŋa degédegé naá olɔŋɔ yábɔ́ ɛ mbaá ŋanánáa; go busío moánɛ, nnyɔ́gɔ sɛ́ báá bó fúúgíe[33].

¹⁰Naá mesúgidinye, no do ɛ́dá go uŋgule uŋgule aŋa degédegé naá olɔŋɔ yábɔ́ ɛ mbaá ŋanánáa; go busío moánɛ, ufúúgí a báá bó fúúgíe púmú[34].

¹¹Muimée mɔ́ɔmɔ mó mba bó bolánɛ́náa go go có fáa gieninye, bá báá mó ɔ́ŋɔ́ɔ go go có fáa nciŋí, bɛɛcɔ́ɔ báaba dɛ ná lɔ́mɔ́ mekúígíi na mesúgidinye má gɛcamɛna.

¹²Go busío moánɛ, ŋgáa mɔ́ɔnyɔ a béeniŋenyemú a amɔ́ ɔ ɔyɔ naá botɛ́nɛ́ɛ, a bébeŋe goŋaá a dɛ magá fubu.

¹³Bɛgogona mbɔ́dɔ iŋkimée yɛ́ɛyɛ ɛ mbaá nyó bolánɛ́náa, ɛ lɛ́ go mɔtɔ uŋkimée. Asaŋa, mɔ́ɔ a dɛ súgénée tánɔ sɛ́hɛ́, a dɛ bósó ba go oliminyo goŋaá no bɛa gɛgogona gɛ́ɛgɛ gɛ́ dómbanamɔ́ bogaaga bɛ́nyɔ́. Aŋa no bɛamɔ́ gɛgogona, a nyó fáanana pɛ́ ya goŋaá no do obɛ́ná kɔ́ɔ, na bogaaga bá goŋaá no gɛ́ gɛ́ndɛgɛna.

¹⁴Go busío moánɛ, bámɛ bá odɛ́má, báyáŋáamɔ́ nɔnɔ bɛgɔgɔ́.

¹⁵Nnyó gálagala aŋa go batɔ báaba bá lɔ́mɔ́ na nciŋí; hiehíe nɔnɔ bɛɛnyɔ́ɔ moatɛ́ boóma bɔ́ɔbɔ nnyó oyanɛnamɔ́.

¹⁶Ábɔ ɛnnyóɛ́ná há mɔgɛ́bɔ hɛ́ɛhɛ dɛ nyóananamɔ́ dɛ béhiigi Asaŋa, bó do báá gobálada gɛ́cɔ́ naá manɔ́ŋɔ́ má Kilítusu o? Ábɔ gɛlɛ́dɛ gɛ́ɛgɛ dɛ gɛ́sanagɛsanamɔ́, bó do báá gobálada gɛ́cɔ́ gɔ́ɔgɔ naá nnyɔ́dɔ ya Kilítusu[35] o?

¹⁷Aŋa gɛlɛ́dɛ gɛ́ lɔ́mɔ́ táŋɛ́ gímmue, bɛɛcɔ́ɔ biimée dɛ lɛ́ nnyɔ́dɔ táŋɛ́ mmue, goŋaá biimée dɛ ebinye ebinye gɛlɛ́dɛ gɛ́ɛgɔ.

¹⁸Ɛ́ná nɔnɔ kanɛ́ boóma bá Ɛ́sɛlahɛ́ɛlɛ: báaba bá nyáananamɔ́ nnyama sɛ́ɛsɛ bá fáananamɔ́ go gɛbáágá naá Asaŋa, bá lɛ́ báladáalú na gɛdálɛ́ná[36].

¹⁹Cɛ báá caá nnyama sá biséégé sɛ́ɛsɛ bóncodío bá fáananamɔ́ go moɔcɔ ɛ́na akɛ́ hɛɔcɔ moatɛ́, mó bɛanana boóma bá ndénégé kɔ́ɔ.

²⁰Akɛ́ɛ! Bɛbáágá bɛ́ɛbɛ bá fáananamɔ́ bɛ́ lɔ́mɔ́ go bɛgáda bá biliíli caá akɛ́ go busío bá Asaŋa[37]. Kɔ́ɔ, cɛ lɛ́gálɛ́gáa goŋaá no bɛ́ɛmba báladáalú na bɛgáda bá biliíli.

²¹No do bósó bá go nyóanana mɔgɛ́bɔ naá ɛnnyóɛ́ná há Daadáa, no gɔnɔ go ɛ́da nyóanana máama naá ɛnnyóɛ́ná há bɛgáda bá biliíli. No do bósó bá go nyáanya na Daadáa naá tábɛ́la yɛhɛ́, no gɔnɔ go ɛ́da nyáanya na bɛgáda bá biliíli naá tábɛ́la yabɔ́.

²²No amɔ́ no ŋanana nɔ́ɔnɔ, no gaá búlúmúncée hɛɔtɛ há Daadáa[38], asáa bɛɛnyɔ́ɔ kanɛ bogaaga bá go mo gɛ́ndɛgɛna.

²³Degédegé yɛ oya yɛ amɔ́: «O lɛ́ ba go ŋanana buimée aŋa o lɛ́galɛgamɔ́», kanɛ́ buimée bó do báá bese. «O lɛ́ ba go ŋanana buimée aŋa o lɛ́galɛgamɔ́», kanɛ́ buimée bó do gíndényée giimbó gɛ́nyɔ́.

²⁴Ŋgáa onyɔ moánɛ a dɛ fúmbée besé yɛhɛ́ ya moatɛ́, kanɛ́ yɛ́ɛyɛ ya sɔ́gɔ́ɔ.

²⁵Nyáánánáa nɔnɔ buimée bɔ́ɔbɔ bá dúenenemú naá nyonyí, kanɛ go bédíbilenye odɛ́má go go fúmbe go íyime goɛ́da goúle gá bɔ́,

²⁶mammana, cí na buimée bɔ́ɔbɔ bó lɔ́mɔ́ kɔ́ɔ mó ɔ́bɛnɔnɔmɔ́ na Daadáa[39].

²⁷Mɔtɔ mɔ́ɔnyɔ a lɔ́mɔ́ a dɛ bɛ́ɛ́mbá uŋgolímínyí a amɔ́ a go dɔ́ŋɛnɔ naá mɔ́ nnyaŋá, o bóó olímínyóo go ɛ́da, nyáánánáa buimée bɔ́ɔbɔ bá gaá ná go fáá hɔ́ɔ, kanɛ go bédíbilenye odɛ́má go go fúmbe go íyime goɛ́da goúle gá bɔ́.

²⁸Kanɛ́ mɔtɔ a amɔ́ a go oyana a amɔ́: «Bó lɔ́mɔ́ nnyama ya giséégé», o do hóámá o do nyáá, o do ɛ́dá go bédíbilenye odɛ́má, goakɛ́ a báa go lɔsɛnɔ.

²⁹Kálagalamɔ́ gobédíbilenye gá odɛ́má háalá caá akɛ́ go busío báhɔ, kanɛ́ go mɔ́ɔnyɔ a báá ná go lɔsɛ́nɔ́. Mammana, mɔtɔ uncodío a nɛ́ ɛ́ná bofilíi bámɛ gɛbɛ́ go go bédíbilenye gó odɛ́má yɛ́hɛ́ o?

³⁰Mɔtɔ a gaá ná ŋgɛ́ná gɛbɛ́ nɛɛ́nɛ, aáŋa mbéhiigi Asaŋa go boóma bɔ́ɔbɔ nnyáananamɔ́ o?

³¹Kɔ́ɔ, akɛ́ no nyáanya, akɛ́ no nyóanana, akɛ́ no ŋa akɛ́ ŋkádɛ, ŋanánáa nɔnɔ buimée bɔ́ɔbɔ go ufíno yá Asaŋa.

³²No do bɛ́ɛ́mbá boóma bá batɔ go kúkenene, akɛ́ go Beyúdene, akɛ́ go báaba bá lɔ́mɔ́ bá dɛ bɛ́ɛ́mbá Beyúdene, akɛ́ go boolímínyí Asaŋa.

³³Náana gɔ́ɔ yɔmɔ́ɔ moatɛ́, mbégíndenyemú goŋaá mbɛ́ɛmba bese go mɔtɔ uŋkimée go pɛ́ iŋkimée; cɛ fúmbée besé yamɛ ya moatɛ́, kanɛ́, yɛ́ɛyɛ ya gɛcɛcá gá batɔ goŋaá Asaŋa a bó sódio.