Read Nugunu 1 Kɔlɛ́ntɛ 11 Bible Online

1 Kɔlɛ́ntɛ 11 - Nugunu bible

1 Kɔlɛ́ntɛ 11

¹Bienénée nɔnɔ ɛbaná námɛ aŋa yɔmɔ́ɔ moatɛ́ ndɔ́mɔ́ na Kilítusu.

²Nnyó ségisegi go gɔ́ɔgɔ no lɔ́mɔ́ no do mbófoolóónyóo go pɛ́ iŋkimée, no bɛ́dɛgana kúunye sɛ́ɛsɛ mmbaá nyó dúmbénínyée.

³Ndɛ́galɛga kanɛ́ goŋaá no íyime no amɔ́: ogɔ́nɔ́ɔ ba onɔ́mɔtɔ́ uŋkimée a lɔ́mɔ́ Kilítusu; ogɔ́nɔ́ɔ ba okɔ́dɔ a lɔ́mɔ́ onɔ́mɔtɔ́, ogɔ́nɔ́ɔ ba Kilítusu a lɔ́mɔ́ Asaŋa.

⁴Nɔ́ɔ gɔ́ɔ onɔ́mɔtɔ́ uŋkimée mɔ́ɔnyɔ a bósógolonyomú ɛ́na a dúmbenye nogálɔ ná Asaŋa odóɛ boáalú, a lɔ́mɔ́ a dɛ hálámánánáa Kilítusu, ogɔ́nɔ́ɔ bɛhɛ́.

⁵Kanɛ́, okɔ́dɔ uŋkimée mɔ́ɔnyɔ a bósógolonyomú ɛ́na a dúmbenye nogálɔ ná Asaŋa kanɛ go boa odóɛ, a lɔ́mɔ́ a dɛ hálámánánáa onɔ́mɔtɔ́, ogɔ́nɔ́ɔ bɛhɛ́. Bó lɛ́ caŋa mmue aŋa okɔ́dɔ ba odóɛ moáalú.

⁶Okɔ́dɔ, aáŋa a dɛ báboáa odóɛ, ŋgáa bá mo sómba cóɛ. Kanɛ́ aáŋa bó lɛ́ odóɛ gonóa go okɔ́dɔ goŋaá bá mo sómba cóɛ, ɛ́na bá mo moa, ŋgáa a báboa odóɛ.

⁷Onɔ́mɔtɔ́ mɔ́ɔ, a dɛ háánánáa go báboa odóɛ; a lɛ́ púényí, a gɔnɔ dúfenye bogɔ́nɔ́ɔ bá Asaŋa; kanɛ́ okɔ́dɔ mɔ́ɔ a dúfenye bogɔ́nɔ́ɔ bá onɔ́mɔtɔ́.

⁸Mammana, caá akɛ́ na okɔ́dɔ gɔ́ɔ Asaŋa a mbaá gedíe onɔ́mɔtɔ́, kanɛ́ na onɔ́mɔtɔ́ gɔ́ɔ a mbaá gedíe okɔ́dɔ.

⁹A báá gedíe okɔ́dɔ go busío bá onɔ́mɔtɔ́, caá akɛ́ onɔ́mɔtɔ́ go busío bá okɔ́dɔ[40].

¹⁰Go busío moánɛ gɔ́ɔ, okɔ́dɔ a sɛmɛgananamɔ́ go báága naá odóɛ gieninye gá bogɔ́nɔ́ɔ bɔ́ɔbɔ ɔ ɔ́bɛnɔnɔmɔ́ na bɔ́ go busío bá bɛɛ́ŋgɛlɛsɛ.

¹¹Asáa gɔgɔ́ naá busío bá Daadáa, okɔ́dɔ a dɛ ádógánánáa na onɔ́mɔtɔ́, onɔ́mɔtɔ́ na okɔ́dɔ.

¹²Mammana, aáŋa na onɔ́mɔtɔ́ gɔ́ɔ bá mbaá gedíe okɔ́dɔ, okɔ́dɔ mɔ́ɔ a bíenemú onɔ́mɔtɔ́; buimée bɔ́ɔbɔ, Asaŋa mɔ́ɔ a lɔ́mɔ́ na bɔ́.

¹³Hiehíe nɔnɔ, no ŋgoyana aáŋa bó lɛ́ bese goŋaá okɔ́dɔ a bósógolonyo Asaŋa odóɛ kanɛ go boa.

¹⁴Batɔ moatɛ́ bá bɛ́ɛ́ ɛ́ná goŋaá bó lɛ́ odóɛ gonóa go onɔ́mɔtɔ́ go bɛ́dɛgana bɛntaálala bá cóɛ.

¹⁵Kanɛ́ bó lɛ́ nɛnɔ́gɔ́ go okɔ́dɔ goŋaá Asaŋa a mba mo fáá bɛntaálala bá cóɛ aŋa boóma bá go boanana odóɛ yɛ́hɛ́ kɔ́ɔ.

¹⁶Aáŋa mɔtɔ a lɛ́ hɔ́ɔ mɔ́ɔnyɔ a áganamɔ́ cuŋí naá bosɔ́mɔ moánɛ, bɛɛcɔ́ɔ dɛ dɛ fílényée nɔ́ɔnɔ, akɛ́ tɔ́nɔ biimbó bá boolímínyí.

¹⁷Gɛ́ɛgɛ gɔnɔ́ gɛ́gɔ́ɔ, go bɔ́ɔbɔ bó núunemú biluméní bɛ́nyɔ́, cɛ báá ba go nyó ségi, goakɛ́, bɛ́ dɛ ŋanánáa goŋaá no goma, kanɛ́ bɛ́ nyó ŋananamɔ́ gɛbɛ́.

¹⁸Bá busío bó lɔ́mɔ́ goŋaá, gɔ́ɔgɔ no lumenenemú naá nɛbábánda nɛ́nyɔ́; bá ŋgoyanɛna bá amɔ́, gobásalasala gó lɛ́ naá kadɛ́gadɛ́ɛ yɛnyɔ́. Ŋgɛ́nana caá múncodío mó lɛ́ hɔ́ɔ mammana.

¹⁹Moánɛ, gó úhene goŋaá gobásalasala gó bɛ́ɛmba naá olɔŋɔ yɛ́nyɔ́, go go ɛ́na báaba bá lɔ́mɔ́ bá go gɛ́ndɛgɛna ɛsɔgɛdɔ moánɛ.

²⁰Náana, gɔ́ɔgɔ no bábándɛgɛnamɔ́, bó do báá manyáanya má Daadáa má no nyáananamɔ́.

²¹Aŋa gɛcamɛna gá manyáanya gɛ́ háamɔ́, onyɔ moánɛ a gúnene manyáanya mɛ́hɛ́ má moatɛ́, gó lɛ go húme goŋaá mɔ́ɔnyɔ a lɛ́ na ncaná, mɔ́ɔnyɔ uncodío gúelú mɔgɛ́bɔ.

²²Ábɔ no lɛ́ kanɛ nnyaŋá sɛ́nyɔ́ go go nyáanya no nyóanana hɔ́ɔ o? Bó lɔ́mɔ́ goŋaá no fánɛnafanɛna nnyaŋá ya Asaŋa, no gɔnɔ núugenye báaba bá lɔ́mɔ́ háanɔ háanɔ odóɛ o? Nnyó oyanamɔ́ caá ŋkádɛ, nnyó ségi lí? Akɛ́ɛ, naá pɛ́ yɛ́ɛyɔ, cɛ gaá nyó ségí.

²³Ɛɛ́ɛŋ, bɔ́ɔbɔ mmbaá bɛáa naá Daadáa, mbáá nyó dúmbínyée bɔ́bɔ́ɔ bó lɔ́mɔ́: Daadáa Yésusu, naá budúgú bɔ́ɔbɔ bá mbaá mo dúé, a mba gɔ́lɔ́ gɛlɛ́dɛ,

²⁴naá nnyimé ya go béhiigi Asaŋa, a báá gɛ́ gɛ́ságɛ́sáa, go oyɛda a amɔ́: «Bɔ́ɔbɔ bó lɔ́mɔ́ nnyɔ́dɔ yamɛ, ɛ lɔ́mɔ́ go busío bɛ́nyɔ́; ŋanánáa nɔnɔ boóma moánɛ no mbéeniŋenye.»

²⁵A báá ŋaáa nɔ́ɔ caŋa mmue na ɛnnyóɛ́ná, naá nnyimé ya manyáanya a amɔ́: «Ɛnnyóɛ́ná hɛ́ɛhɛ hɛ́ lɔ́mɔ́ gɛpáa gá gɛlada bugúle naá manɔ́ŋɔ́ mámɛ; ŋanánáa nɔnɔ nɔ́ɔ, gɛcamɛna giimée gɛ́ɛgɛ no ná ŋamɔ́ no hɛ́ bónyóonono, no mbéeniŋenye[41].»

²⁶Ɛɛ́ɛŋ, gɛcamɛna giimée gɛ́ɛgɛ no nyáananamɔ́ gɛlɛ́dɛ gɛ́ɛgɛ no gɔnɔ nyóanana ɛnnyóɛ́ná hɛ́ɛhɛ, no dúmenye nigúe ná Daadáa gó ɛ́da húme aŋa a ná ncomɔ́ gunde.

²⁷Go busío moánɛ, mɔtɔ mɔ́ɔnyɔ a ŋgaá nyáá gɛlɛ́dɛ ɛ́na a bónyo ɛnnyóɛ́ná há manɔ́ŋɔ́ má Daadáa, mɔ́ɔ kanɛ go bɛ́ɛmba naá odɛ́nɛ́, a ŋga bɛáa gɛsɛnɛ naá boayá bá nnyɔ́dɔ na manɔ́ŋɔ́ má Daadáa.

²⁸Ŋgáa onyɔ moánɛ a bébidide otóotoɛ yá go nyáa gɛlɛ́dɛ gɛ́ɛgɛ, a bónyo ɛnnyóɛ́ná hɛ́ɛhɛ,

²⁹goakɛ́ mɔ́ɔnyɔ a nyáamɔ́ a gɔnɔ nyóɛna kanɛ go lɛnca ɛkádɛ bó lɔ́mɔ́ nnyɔ́dɔ ya Kilítusu, a bɔ́gɔ́gɔnɔ noséésényée nɛ́hɛ́ mɔ́ɔ moatɛ́.

³⁰Boóma moánɛ bɔ́ɔ, degédegé naá bɛɛnyɔ́ɔ ɛ nómamɔ́, bóntió kanɛ bogaaga, gɔnɔ́ nɛnamá níntió nɛ́ báá gúénénée.

³¹Dɛ amɔ́ dɛ bayɛga go bébide bɛɛcɔ́ɔ bá moatɛ́, Daadáa a dɛ ŋgá có ubie naá gɛsɛnɛ.

³²Kanɛ́ gɔ́ɔgɔ a có séesenyemú, bó lɔ́mɔ́ goŋaá a có bónona, go goŋaá, gɔ́ɔgɔ a ŋgaá sómbɛ́ná batɔ bá cí gɛsɛnɛ, bɛɛcɔ́ɔ dɛ dɛ bɛ́ɛ́mbá kɔ́ɔ.

³³Nɔ́ɔ gɔ́ɔ bolimóní, gɔ́ɔgɔ no bábándɛgɛnamɔ́ go manyáanya, no bélimbe basɔ́gɔ́ɔ.

³⁴Aáŋa mɔtɔ a lɛ́ na ncaná, ŋgáa a nyáanya naá mɔ́ nnyaŋá, goŋaá no do bɔ́gɔ́gɛ́dɛ́nɔ́ noséésényée ná Asaŋa gɔ́ɔgɔ no bábándɛgɛnamɔ́. Go mɔ́ɔmɔ múntió, nná mó gedie go falona aŋa nnú úlemú naá bɛɛnyɔ́ɔ.