Read Nugunu 1 Kɔlɛ́ntɛ 12 Bible Online

1 Kɔlɛ́ntɛ 12 - Nugunu bible

1 Kɔlɛ́ntɛ 12

¹Bolimóní, cɛ lɛ́gálɛ́gáa goŋaá nnyó dɛ́ɛna kanɛ go nyó lincie mammana go bɔ́ɔbɔ bó núunemú meŋiigíe má Gimmúmpúu gá Giliíli.

²Bééníŋényéemú nɔnɔ aŋa gɔ́ɔgɔ no mbaá lɔmɔ́ no gá lɛ́ no do íyímé Asaŋa, bá mba lɛ́ bá nyó gɔ́gɔ aŋa begélígeli naá moɔcɔ; moɔcɔ mɔ́ɔmɔ mó do gálágáláa.

³Gó moánɛ nnyó oyanamɔ́ daŋɛ́daŋɛ caá, mɔtɔ mɔ́ɔnyɔ a gálagalamɔ́ aŋa Giliíli ba Asaŋa a mo fáananamɔ́, a dɛ bósó ba go gálɛda a amɔ́: «Yésusu a lɛ́ yɔmɛ́nɔ́ɔlú.» Gɔnɔ́, mɔtɔ a dɛ bósó ba go gálɛda a amɔ́: «Yésusu a lɛ́ Daadáa,» aáŋa bó do báá na bogaaga bá Gimmúmpúu gá Giliíli.

⁴Pááná sá Gimmúmpúu gá Giliíli sɛ́ lɛ́ mbɔ́dɔ aá mbɔ́dɔ, kanɛ́ Giliíli ummue eé ummue mɔ́ɔ a fáananamɔ́.

⁵Moyogónyóo má lɛ́ mbɔ́dɔ aá mbɔ́dɔ, kanɛ́, a lɔ́mɔ́ Daadáa ummue eé ummue mɔ́ɔ bá mo yɔgɔnɛnɔmɔ́.

⁶Meŋiigíe má lɛ́ mbɔ́dɔ aá mbɔ́dɔ, kanɛ́, a lɔ́mɔ́ Asaŋa ummue eé ummue mɔ́ɔ a lɔ́mɔ́ na má go biimée.

⁷Na onyɔ moánɛ, Giliíli a dúfenye bogaaga bɛ́hɛ́ na pááná go besé ya biimée.

⁸Na mɔ́ɔnyɔ Giliíli a mo fáanana nciŋí ya gogálagala dogálɔ dá nciŋí, na mɔ́ɔnyɔ uncodío, a mo fáanana nciŋí ya go íyimene.

⁹Giliíli ummue eé ummue a fáanana na mɔ́ɔnyɔ goágana odɛ́má naá Asaŋa, na múunyú, pááná ya go éŋugenye bɔgɔnɔ́gɔnɔ.

¹⁰Giliíli a fáanana na mɔ́ɔnyɔ bogaaga bá go ŋanana bɛsɛɔ, na múunyú, bogaaga bá go dúmbenye dogálɔ dá mbúsí sá Asaŋa; na mɔ́ɔnyɔ a fáanana bogaaga bá go lɛnca giliíli gá mammana na gɛ́ɛgɛ gá mbele. Na mɔ́ɔnyɔ gɔnɔ́, a fáanana bogaaga bá go gálagala dogálɔ dɔ́ɔdɔ a lɔ́mɔ́ a dɛ íyíménée, uncodío, a mo fáanana pááná ya go falona dogálɔ moánɛ.

¹¹Kanɛ́ a lɔ́mɔ́ gɔgɔ́ Giliíli ummue eé ummue mɔ́ɔ a lɔ́mɔ́ na meŋiigíe mɔ́ɔmɔ miimée, a aba go onyɔ moánɛ aŋa a lɛ́galɛgamɔ́[42].

¹²Kanɛ́ ŋgáa dɛ gɔ́lɔ gieninye gɛ́ɛgɛ dɛ amɔ́: nnyɔ́dɔ ɛ lɛ́ táŋɛ́ mmue, gɔ́ɔ ɛ lɔ́mɔ́ na bɛnamá gɛca. Akɛ́ aŋa bɛnamá bɛ́ lɔ́mɔ́ gɛca, bɛ́ loŋa nnyɔ́dɔ táŋɛ́ mmue. Bó lɔ́mɔ́ nɔ́ɔnɔ caŋa táŋɛ́ mmue na Kilítusu[43].

¹³Kɔ́ɔ bɛɛcɔ́ɔ biimée dɛ mbaá béyumínyée naá Giliíli táŋɛ́ ummue go go bɛ́ɛmba nnyɔ́dɔ táŋɛ́ mmue, akɛ́ Beyúdene akɛ́ báaba bá lɔ́mɔ́ bá dɛ bɛ́ɛ́mbá Beyúdene; akɛ́ bɛɔlɛ́ akɛ́ báaba bá lɔ́mɔ́ bá dɛ bɛ́ɛ́mbá bɛɔlɛ́. Bɛɛcɔ́ɔ biimée dɛ mba bónyó naá Giliíli táŋɛ́ ummue mɔ́ɔnyɔ.

¹⁴Nnyɔ́dɔ ɛ dɛ báá loŋáalú na gɛnamá táŋɛ́ gímmue, ɛ lɛ́ na bɛ́ gɛca.

¹⁵Gɛgɔ́ndɔ́ gɛ́ amɔ́ gɛ́ oyɛda gɛ́ amɔ́: «Aŋa ndɔ́mɔ́ cɛ bɛ́ɛ́mbá ombɔ́gɔ, cɛ ɔ́bɛ́nɔ́nɔ́ɔ na nnyɔ́dɔ», bɔ́ bó gaá ná ŋaáa goŋaá gɛ́ dɛ ɔ́bɛ́nɔ́nɔ́ɔ na nnyɔ́dɔ o?

¹⁶Udúu yó amɔ́ yó oyɛda yó amɔ́: «Aŋa ndɔ́mɔ́ cɛ bɛ́ɛ́mbá niíso, cɛ ɔ́bɛ́nɔ́nɔ́ɔ na nnyɔ́dɔ», bɔ́ bó gaá ná ŋaáa goŋaá yó do ɔ́bɛ́nɔ́nɔ́ɔ na nnyɔ́dɔ o?

¹⁷Aáŋa nnyɔ́dɔ iŋkimée ɛ mba lɛ́ niíso, ɛ lɔ́mɔ́ ba go ɔ́bɔnɔ nɛɛ́nɛ o? Aáŋa ɛ mbaá lɔmɔ́ goana udúu, ɛ lɔ́mɔ́ ba go ɔ́bɔ ginumpé nɛɛ́nɛ o?

¹⁸Mammana, Asaŋa a mba ágánáa bɛnamá biimée naá nnyɔ́dɔ aŋa a mbaá lɛ́gálɛ́gáa.

¹⁹Aáŋa buimée bó lɛ́ gɛnamá táŋɛ́ gímmue, nnyɔ́dɔ ɛ gaá ná bɛ́ɛ́mbá áhanɛ́ɛ o?

²⁰Bɛnamá bɛ́ lɛ́ kanɛ́ gɛca go nnyɔ́dɔ táŋɛ́ mmue.

²¹Niíso nɛ́ dɛ bósó ba go oyana ombɔ́gɔ nɛ́ amɔ́: «Cɛ báá gáhɔ!» Akɛ́ odóɛ yó do bósó ba go oyana bɛgɔ́ndɔ́ yó amɔ́: «Cɛ báá gɛ́nyɔ́.»

²²Asáa gɔgɔ́ bɛnamá bɛ́ɛbɛ dɛ núunemú dɛ amɔ́ bɛ́ lɛ́ kanɛ magɛ́nda, bɛ́ lɛ́ na ndénégé.

²³Gɔnɔ́ bɛ́ɛbɛ dɛ lɔ́mɔ́ bɛ́ dɛ dómbáa na ufíno, bɛ́ dɛ búlugenyemú makɔ́nɔ́. Bɛ́ɛbɛ dɛ núunemú dɛ amɔ́ bɛ́ lɛ́ kanɛ ndénégé, bɛ́ bɛ́ moánɛ dɛ gɔ́lɔnɔmɔ́ gɛcamɛna go go bɛ́ gedegedie.

²⁴Bɛnamá bá nnyɔ́dɔ yɛcɔ́ bɛ́ɛbɛ dɛ núunemú bɛ́ dɛ úhénée goŋaá dɛ bɛ́ gedegedie nɔ́ɔnɔ. Kanɛ́ Asaŋa a mba gedíe nnyɔ́dɔ, a báá yɛ fáá goŋaá bɛnamá bá yɛ́ bá kanɛ ndénégé bɛ́ bɛa mbúlugie makɔ́nɔ́.

²⁵Hɔ́ɔlɔ́ gɔ́ɔ, gobásalasala gó lɔ́mɔ́ gó do bɛ́ɛ́mbá naá nnyɔ́dɔ, kanɛ́ bɛnamá bá yɛ́ biimée bɛ́ oyinyo oyinyo.

²⁶Aáŋa gɛnamá gímmue gɛ́ ɔ́bɛgɔnɔ, bɛnamá bɛ́ɛbɛ bíncodío bɛ́ ɔ́bɛgɔnɔ olɔŋɔ na gɛ́. Aáŋa gɛnamá gímmue gɛ́ gúme, bɛ́ɛbɛ bíncodío bɛ́ yaŋa olɔŋɔ na gɛ́.

²⁷Kɔ́ɔ bɛɛnyɔ́ɔ no lɛ́ nnyɔ́dɔ ya Kilítusu, onyɔ moánɛ naá bɛɛnyɔ́ɔ a lɛ́ gɛnamá gá nnyɔ́dɔ yɛ́ɛyɔ.

²⁸Nɔ́ɔ gɔ́ɔ naá nnyaŋá ya Asaŋa, Asaŋa a mbaá dílímínyée naá olɔŋɔ yá busío baapótɛlɛ, naá olɔŋɔ yá gáandɛ́ɛ mbúsí sá Asaŋa, olɔŋɔ yá gádadɔ́ muloodio[44]. Naá nnyimé hɔ́ɔlɔ́, bá lɛ́ hɔ́ɔ báaba bá ŋananamɔ́ bɛsɛɔ, báaba bé éŋugenye bɔgɔnɔ́gɔnɔ, báaba bó óhigonyomú na báaba bí indenyemú basɔ́gɔ́ɔ. Bá lɛ́ hɔ́ɔ tɔ́nɔ báaba bá gálagalamɔ́ dogálɔ dɔ́ɔdɔ bá lɔ́mɔ́ bá dɛ íyíménée.

²⁹Biimée bá dɛ báá baapótɛlɛ, ɛ́na mbúsí sá Asaŋa, ɛ́na muloodio; biimée bá dɛ bɛanánáa pááná ya go ŋanana bɛsɛɔ,

³⁰ɛ́na ya go éŋugenye bɔgɔnɔ́gɔnɔ, ɛ́na ya go gálagala dogálɔ dɔ́ɔdɔ bá lɔ́mɔ́ bá dɛ íyíménée, ɛ́na ya go falona dogálɔ moánɛ.

³¹Lɛ́gá nɔnɔ kanɛ́ pááná sɛ́ɛsɛ sɛ́ dómbamɔ́ bese. Godɔ́ɔdɔ, nco nyó dúfie pɛ́ yɛ́ɛyɛ ɛ lɔ́mɔ́ besé makɔ́nɔ́.