Read Nugunu 1 Kɔlɛ́ntɛ 13 Bible Online

1 Kɔlɛ́ntɛ 13 - Nugunu bible

1 Kɔlɛ́ntɛ 13

¹Gɔ́ɔgɔ ka ŋgaá gálágáláa dogálɔ dá batɔ, akɛ́ dá bɛɛ́ŋgɛlɛsɛ, aáŋa cɛ báá na gɛnɔ́ɔ́nɛ́nɔ́, ndɛ́ goana aŋa ŋgóŋó yɛ́ɛyɛ yɛ ɔ́ŋɔnɔmɔ́ na incéŋé hɛ́ɛhɛ hɛ́ gidemú.

²Gɔ́ɔgɔ ka ŋgaá bɛáa bogaaga bá go dúmbenye dogálɔ dá mbúsí sá Asaŋa; akɛ́ mbɛa goɔ́bɔ gá moóma má nnindíi muimée, akɛ́ mbɛa goíyime gá buimée; akɛ́ mbɛa gɛantáanta gá gioliminyo gá go bála ɛgɔndɔ[45], aáŋa cɛ bɛanánáa gɛnɔ́ɔ́nɛ́nɔ́, cɛ báá boóma.

³Gɔ́ɔgɔ ka ŋgaá abánáa bancanáncana bonɔ́mɛ bámɛ buimée, gɔ́ɔgɔ akɛ́ ka ŋgaá bɔ́dɔ́yɛ́gɔ́, aáŋa cɛ báá na gɛnɔ́ɔ́nɛ́nɔ́, bɔ́ɔbɔ bó lɛ́ go dugúnú.

⁴Gɛnɔ́ɔ́nɛ́nɔ́ gɛ́ lɛ́ na gobánona gá odɛ́má, gɛ́ yɔgɔnɛnɔ basɔ́gɔ́ɔ. Gɛ́ lɛ́ kanɛ hɛagá, gɛ́ dɛ gayábáa, gɛ́ dɛ béségíségíi.

⁵Gɛ́ dɛ ŋanánáa boóma bá odóɛ gonóa. Gɛ́ dɛ fúmbée besé ya gɛ́ mokáa, gɛ́ dɛ ɔ́bɔ́nɔ́ɔ mpímí, gɛ́ dɛ bábɛ́dɛ́gánáa bobɛ́.

⁶Gɛ́ dɛ békelényée na moóma má mmɛndɛ́ɛ, gɛ́ ɔ́bɔnɔmɔ́ besé na mammana.

⁷Gɛnɔ́ɔnɛ́nɔ́ gɛ́ héehinenye buimée, gɛ́ olimonyo buimée, gɛ́ lɛ́ na mbémineminie go buimée, gɛ́ bánona odɛ́má go buimée.

⁸Gɛnɔ́ɔ́nɛ́nɔ́ gɛ́ dɛ ŋgá mana; cɔ́mɔ sá mbúsí sá Asaŋa sɛ́ ŋga sómbɛ́gɛ́ná, dogálɔ dó ŋga maná, goíyime gó ŋga sómbɛ́gɛ́ná.

⁹Goíyime gɛ́cɔ́ gó lɛ́ gigísi, godúmenye gɛ́cɔ́ gá cɔ́mɔ sá mbúsí sá Asaŋa gó lɛ́ gigísi.

¹⁰Aŋa gɔ́ɔgɔ bɔ́ɔbɔ bó dómbamɔ́ bese makɔ́nɔ́ bó ŋgaá bɛ́ɛ́mbá, bá gigísi bó ŋga sómbɛ́gɛ́ná.

¹¹Gɔ́ɔgɔ mmbaá lɔmɔ́ gihelege, mmba lɛ́ kálagala, mbéeniŋenye, kundenye aŋa gihelege. Aŋa mmbɛɛ́ ɛ́yá ogɔ́nɔ́, mbáá bófoolío moóma má buhelege.

¹²Godɔ́ɔdɔ dɛ ɛ́nana moóma fiífií, dɛ mó ɛ́nana aŋa naá gɛbálɛ́ŋana. Kanɛ́ naá goɛ́da go úle, dɛ ŋgɛ ɛ́nánáa dalaŋanyɛ. Godɔ́ɔdɔ goíyime gámɛ gó lɛ́ gigísi, kanɛ́ naá goɛ́da goúle, ka ŋgi íyímé Asaŋa go busío buimée aŋa mɔ́ɔ a ŋgíyimenemú.

¹³Godɔ́ɔdɔ, moóma má módadɔ́ mɔ́ɔmɔ mó lɔ́mɔ́ gioliminyo, mbémineminie na gɛnɔ́ɔnɛ́nɔ́ mɔ́ mó síenemú; kanɛ́, gɛnɔ́ɔ́nɛ́nɔ́ gɛ́ lɛ́ gɛantáanta gɛ́ dómba muimée.