Read Nugunu 1 Kɔlɛ́ntɛ 14 Bible Online

1 Kɔlɛ́ntɛ 14 - Nugunu bible

1 Kɔlɛ́ntɛ 14

¹Fúmbée nɔnɔ kanɛ́ go lɛ́ganalɛgana otóotoɛ yá boóma buimée, no gɔnɔ lɛ́ga tɔ́nɔ pááná sá Giliíli, dómbá dómbáa yɛ́ɛyɛ ya go dúmbenye Nogálɔ aŋa mbúsí sá Asaŋa.

²Mɔtɔ mɔ́ɔnyɔ a gálagalamɔ́ dogálɔ dɔ́ɔdɔ bá lɔ́mɔ́ bá dɛ íyíménée a dɛ gálágáláa go busío bá batɔ, kanɛ́ Asaŋa mɔ́ɔ ɔ ɔ́bɔnɔ. Mɔtɔ a dɛ ɔ́bɔ́nɔ́ɔ nnindíi ya dogálɔ dɔ́ɔdɔ a buŋemú na bogaaga bá Giliíli.

³Kanɛ́ mɔ́ɔnyɔ a dúmbenyemú Nogálɔ aŋa mbúsí sá Asaŋa a gálagalamɔ́ go busío bá batɔ; a bó gúninenye naá gioliminyo, a bó gíndenye, a bó bobonyo ɛdɛ́má.

⁴Mɔ́ɔnyɔ a gálagalamɔ́ dogálɔ dɔ́ɔdɔ bá lɔ́mɔ́ bá dɛ íyíménée, a bɛanana besé yɛhɛ́ ya mokáa, kanɛ́, mɔ́ɔnyɔ a dúmbenyemú Nogálɔ aŋa mbúsí sá Asaŋa, a ŋanana besé go boolímínyí biimée.

⁵Ndɛ́galɛga goŋaá bɛɛnyɔ́ɔ biimée no gálagala dogálɔ dɔ́ɔdɔ bá lɔ́mɔ́ bá dɛ íyíménée. Kanɛ́, kɔnɔ dómba go lɛ́galɛga goŋaá no dúmbenye Nogálɔ aŋa mbúsí sá Asaŋa. Mammana, mɔ́ɔnyɔ a dúmbenyemú Nogálɔ aŋa mbúsí sá Asaŋa, a lɛ́ gɛantáa a dómbana mɔ́ɔnyɔ a gálagalamɔ́ dogálɔ dɔ́ɔdɔ bá lɔ́mɔ́ bá dɛ íyíménée, aáŋa bó do bɛ́ɛ́mbá goŋaá mɔ́ɔnyɔ moánɛ a falona dogálɔ dɔ́ɔdɔ goŋaá boolímínyí bá gónɛna naá gioliminyo.

⁶Bolimóní, ŋgáa dɛ gɔ́lɔ gieninye gɛ́ɛgɛ: caá ŋgúle naá bɛɛnyɔ́ɔ, mbɛ́ɛ́ ɛ́dá go nyó gálagala dogálɔ dɔ́ɔdɔ bá lɔ́mɔ́ bá dɛ íyíménée, aáŋa cɛ nyó dóógínyóo boóma, aáŋa cɛ nyó fáá goíyime, aáŋa cɛ nyó dúmbínyée Nogálɔ aŋa mbúsí sá Asaŋa, aáŋa cɛ nyó húúnényée, cɛ nyó dúgúnée akɛ́ go boóma.

⁷Bó lɛ́ caŋa mmue aŋa mogóbagóbáa má gibíné mɔ́ɔmɔ mó lɔ́mɔ́ ncolí na timbilí; aáŋa ikelú ya mɔ́ ɛ dɛ báá kókakókáa, bá gaá ná lɛncá goómba gá mɔ́ nɛɛ́nɛ o?

⁸Aáŋa ɛdɔ́ŋɔ há bidé ɛ dɛ ómbáa hɛ́ selunenye bese, ánɛ́ɛ a gaá ná bégedíe go nɛnoa o?

⁹Caŋa mmue, aáŋa dogálɔ dɛ́nyɔ́ dó do oyáa boóma bá go ɔ́bɔ, dó dómbana aŋa ufufu.

¹⁰Dogálɔ dó lɛ́ mbɔ́dɔ aá mbɔ́dɔ naá cí, kanɛ́ nuimée nó oya boóma.

¹¹Kɔ́ɔ, aáŋa cɛ íyíménée nogálɔ ná mɔ́ɔnyɔ a kálagalamɔ́, ndɛ́ uŋunyí naá boayá bɛ́hɛ́, mɔ́ɔ tɔ́nɔ uŋunyí naá boayá bámɛ.

¹²Go busío bɛ́nyɔ́, bó lɛ́ caŋa mmue; aŋa no lɛ́galɛgamɔ́ pááná sá Gimmúmpúu gá Giliíli, sɛ́ fúmbéemú nɔnɔ gɛcamɛna giimée na bogaaga, bó bɛ́ɛmba kanɛ́ go goŋaá giimbó gá boolímínyí gɛ́ gónɛna naá gioliminyo.

¹³Go busío moánɛ gɔ́ɔ, mɔ́ɔnyɔ a gálagalamɔ́ dogálɔ dɔ́ɔdɔ bá lɔ́mɔ́ bá dɛ íyíménée a háanana go bósógolonyo goŋaá a bɛa pááná ya go dó falona.

¹⁴Aáŋa mbósógolonyo na dogálɔ dá basɔ́gɔ́ɔ, odɛ́má yámɛ yɔ́ yó lɔ́mɔ́ naá mbósógólí, kanɛ́ muúne mámɛ má dɛ yɔgɔ́nɔ́ɔ.

¹⁵Ndɔ́mɔ́ ba go ŋa kanɛ́ nɛɛ́nɛ o? Kaá bósógólónyóo aŋa Giliíli a túfenyemú, kanɛ́ tɔ́nɔ muúne mámɛ kɔ́ɔ. Kaá ágánáa ɛsagɔ aŋa Giliíli a túfenyemú, kanɛ́ kaá yɛ ágánáa muúne mámɛ kɔ́ɔ.

¹⁶Kɔ́ɔ, go amɔ́ béhiigi Daadáa goana aŋa odɛ́má yáhɔ yó go dómanamɔ́, aáŋa mɔ́ɔnyɔ a bódólonyomú naá gitúu a dɛ íyíménée bɔ́ɔbɔ go oyamɔ́, nɛɛ́nɛ a lɔ́mɔ́ ba go oliminyo a amɔ́ Aamɛnɛ naá mbósógólí yahɔ ya bibéhiigí o?

¹⁷Kanɛ cuŋíi, mbósógólí yahɔ ya bibéhiigí ɛ lɛ́ gɛnɔ́gɔ́, kanɛ́ ɛ dɛ ohígónyóo sɔ́gɔ́ɔ go boóma.

¹⁸Mbéhiigi Asaŋa go gɔ́ɔgɔ kálagalamɔ́ dogálɔ dá basɔ́gɔ́ɔ nnyó dómbana bɛɛnyɔ́ɔ biimée.

¹⁹Kanɛ́ naá giimbó gá boolímínyí, bó lɛ́ bese kálɛda dogálɔ dótáanɔ dɔ́ɔdɔ bá lɔ́mɔ́ ba go ɔ́bɔ go go húunenye, gó dómba goŋaá kálagala gɛcɛcá gá dɔ́ɔdɔ bá lɔ́mɔ́ bá dɛ ɔ́bɔ́nɔ́ɔ.

²⁰Bolimóní, go mbɔ́dɔ yɛnyɔ́ ya goɛ́nana moóma, no do bɛ́ɛ́mbá aŋa bihelege; naá goŋanana gá bobɛ́, bɛ́ɛ́mba nɔnɔ aŋa bihelege. Go goɛ́nana gɛ́nyɔ́ gá moóma, bɛ́ɛ́mba nɔnɔ bɛgɔ́nɛ́naga bá batɔ.

²¹Bó lɛ́ naá Ŋgɔ́ŋɛ́ goŋaá: «Daadáa a amɔ́, go batɔ bá nogálɔ núntió, gɔnɔ́ na eŋgúdé yá biinyí, ka ŋga gálágáláa boɛ́nɔ bɔ́ɔbɔ, akɛ́ nɔ́ɔnɔ bó do ŋgá ŋgɔ́bɔ[46].»

²²Gɔ́ɔ bó lɔ́mɔ́, dogálɔ dɔ́ɔdɔ bá lɔ́mɔ́ bá dɛ íyíménée dó lɔ́mɔ́ gilincie go báaba bá lɔ́mɔ́ bá dɛ olimónyóo, caá akɛ́ go báaba bó olimonyomú. Go dúmbenye gá Nogálɔ aŋa mbúsí sá Asaŋa gó lɛ́ gilincie go báaba bó olimonyomú, caá akɛ́ go báaba bá lɔ́mɔ́ bá dɛ olímónyóo.

²³Ŋgáa dɛ no ága gieninye gɛ́ɛgɛ dɛ amɔ́, boolímínyí biimée bá amɔ́ bá bábándɛgɛna, gɔnɔ́ biimée bá bɛ́ɛ́ ɛ́dá go gálagala dogálɔ dɔ́ɔdɔ bá lɔ́mɔ́ bá dɛ íyíménée, batɔ báaba bá nyó bódólonyomú ɛ́na lí bindiolímínyóo bɛ́ búú úlé bɛ́ bíí íŋéné, bá dɛ gaá nyó gɔ́lɔ́ aŋa begeegú o?

²⁴Kanɛ́ aáŋa biimée bá dúmbenye Nogálɔ aŋa mbúsí sá Asaŋa, gindiolímínyóo ɛ́na lí mɔtɔ mɔ́ɔnyɔ a bódólonyomú a búú úlé a bíí íŋéné, a goó olímínyóo gɛoba gɛ́hɛ́ go bɔ́ɔbɔ a báá nɔ́ ɔ́bɔ́, bó sómba gɛsɛnɛ gɛ́hɛ́.

²⁵Mbééníŋínyí sɛ́ɛsɛ naá odɛ́má yɛ́hɛ́ sɛ́ báa go dambɛmɛda, a lɛ go dába busío go cí a búlugenye Asaŋa a amɔ́: «Mammana, Asaŋa a lɛ́ naá kadɛ́gadɛ́ɛ yɛnyɔ́.»

²⁶Bolimóní, dɛ lɔ́mɔ́ bá go ŋa kanɛ́ nɛɛ́nɛ o? Gɔ́ɔgɔ no bábándɛgɛnamɔ́, ummue naá bɛɛnyɔ́ɔ a lɛ́ ba go ágana osagɔ, ummue a húunenye, uncodío a dúmbenye Nogálɔ aŋa mbúsí sá Asaŋa; uncodío gɔnɔ́ a lɛ́ ba go gálagala dogálɔ dɔ́ɔdɔ bá lɔ́mɔ́ bá dɛ íyíménée, ɛ́na lí, a dó falona. Ŋgáa buimée bó báŋa goŋaá biimée bá gónɛna naá gioliminyo.

²⁷Aáŋa batɔ bá gálagala dogálɔ dɔ́ɔdɔ bá lɔ́mɔ́ bá dɛ íyíménée, ŋgáa báandɛ́ ɛ́na lí bádadɔ́ bá gálagala, go ummue go ummue. Kanɛ́, ŋgáa mɔtɔ ummue a falona.

²⁸Aáŋa mɔtɔ ba go falona a dɛ báá, ŋgáa mɔ́ɔnyɔ a gálagalamɔ́ naá gitúu a dɔmbɔ go gálagala ukelú naá mmoɛná, o oya ŋkanɔ́ na Asaŋa naá mɔ́ odɛ́má.

²⁹Go báaba bá dúmbenyemú Nogálɔ aŋa mbúsí sá Asaŋa, ŋgáa báandɛ́, ɛ́na lí bádadɔ́ bá gálagala, báaba bóncodío bá hɛnyahɛnya bɔ́ɔbɔ bá gálagalamɔ́.

³⁰Kanɛ́ ummue naá báaba bá lɔ́mɔ́ hɔ́ɔ a amɔ́ a bɛa nogálɔ nɔ́ɔnɔ Asaŋa a mo dóoginyomú, ŋgáa mɔ́ɔnyɔ a gálagalamɔ́ a máma.

³¹No lɛ́ ba go dúmbenye Nogálɔ aŋa mbúsí sá Asaŋa, onyɔ moánɛ naá nnyimé ya sɔ́gɔ́ɔ, go goŋaá no bɛa nciŋí no bégúluminye naá gioliminyo.

³²Báaba bá dúmbenyemú dogálɔ dɔ́ɔdɔ nɔ́ɔnɔ aŋa mbúsí sá Asaŋa, bá sɛmɛganana go bégumbene odɛ́má.

³³Ɛɛ́ɛŋ! Asaŋa a dɛ báá Asaŋa ba go beŋgelenye, kanɛ́ a lɔ́mɔ́ Asaŋa ba buumbénú. Aŋa bó báŋananamɔ́ naá biimbó bá boolímínyí Asaŋa biimée,

³⁴ŋgáa bakɔ́dɔ bá mámana naá biimbó. Bá dɛ bɛanánáa nɛgaŋa ná go gɔ́lɔ nogálɔ; bá háanana go bésiisie, aŋa gicele gá Mɔ́sɛsɛ gɛ́ oyamɔ́.

³⁵Aáŋa bá lɛ́galɛga go íyime boóma, onyɔ moánɛ a háanana go gúluge u úhune onɔ́mɛ naá nnyaŋá. Bó do báá bese goŋaá okɔ́dɔ a gɔ́lɔ nogálɔ naá giimbó gá boolímínyí.

³⁶No béeniŋenye no amɔ́ nogálɔ ná Asaŋa nó mbaá ncó go úle naá bɛɛnyɔ́ɔ lí? No lɛ́ bákáa bá go nó gɛ́ndɛgɛna lí?

³⁷Aáŋa mɔtɔ a béeniŋenye a amɔ́ a lɛ́ mbúsí ya Asaŋa ɛ́na lí, a bɛanana pááná ya Gimmúmpúu gá Giliíli, a háanana go lɛnca goŋaá bɔ́ɔbɔ nnyó ɔ́ŋɛnɔmɔ́ bó lɔ́mɔ́ gɛlɔsɛnɔ gá Daadáa.

³⁸Aáŋa mɔtɔ a dɛ íyímé nɔ́ɔnɔ, bó dúfenye goŋaá Asaŋa tɔ́nɔ a dɛ mo íyíménée.

³⁹Gɔ́ɔ, bolimóní, fúmbée nɔnɔ na bogaaga goŋaá no dúmbenye dogálɔ aŋa mbúsí sá Asaŋa, kanɛ́, no do legé goŋaá batɔ bá gálagala dogálɔ dɔ́ɔdɔ bá lɔ́mɔ́ bá dɛ íyíménée.

⁴⁰Ŋanánáa nɔnɔ buimée naá puuu na naá gokɛsa.