Read Nugunu 1 Kɔlɛ́ntɛ 15 Bible Online

1 Kɔlɛ́ntɛ 15 - Nugunu bible

1 Kɔlɛ́ntɛ 15

¹Bolimóní, ndɔ́mɔ́ goŋaá nnyó eniŋinye Gɛnɔ́gɔ́ gá Cɔ́mɔ gɛ́ɛgɛ mbaá nyó dóógínyóo, no báá gɛ́ gɛ́ndɛ́gɛ́ná, no báá gɔnɔ́ gɛ́ bágódɛna tɛ́ŋɛ́tɛŋɛ.

²Gɛ́ gɛ́ nyó sódonyomú no amɔ́ no gɛ́ gɛ́ndɛgɛna aŋa gɔ́ɔgɔ mmbaá nyó gɛ́ dóógínyóo; aáŋa caá nɔ́ɔ, gioliminyo gɛ́nyɔ́ gɛ́ lɛ́ go dugúnú.

³Mmba dóáná go nyó dúmbinye bɔ́ɔbɔ yɔmɔ́ɔ moatɛ́ mmbaá gɛ́ndɛ́gɛ́ná, bó lɔ́mɔ́: Kilítusu a mba gúé go bɛlɔgɔ bɛ́cɔ́ aŋa Ŋgɔ́ŋɛ́ sɛ́ oyamɔ́.

⁴Bá báá mo miée, a báá fúfúgé naá nnyimé ya medúgú mádadɔ́ aŋa Ŋgɔ́ŋɛ́ sɛ́ oyamɔ́.

⁵A bɛ́ɛ́ ɛ́nɛ́gɛ́ná Sɛ́fasɛ, a báá gɔnɔ́ go ɛ́nɛgɛna Bɛɔdɔ́ɔ na bɛ́andɛ́[47].

⁶Naá nnyimé, a bɛ́ɛ́ ɛ́nɛ́gɛ́ná go oŋɛndɔ táŋɛ́ yúmmue behúúní bá go dómba mantɛdɛ mátáanɔ; bóncodío naá olɔŋɔ yábɔ́, bá gá lɛ́ bɔgɔ́sɔ, kanɛ́ nɛnamá níntió nɛ́ mba gúé.

⁷Naá nnyimé, a bɛ́ɛ́ ɛ́nɛ́gɛ́ná Sáakɛ, a bɛ́ɛ́ ɛ́nɛ́gɛ́ná gɔnɔ́ baapótɛlɛ biimée.

⁸Naá mesúgidinye a báá ŋgɛ́nɛ́gɛ́ná tɔ́nɔ, yɔmɔ́ɔ mɔ́ɔnyɔ ndɔ́mɔ́ aŋa gifúnú.

⁹Ɛɛ́ɛŋ, ndɛ́ hɛómaŋkóma naá olɔŋɔ yá baapótɛlɛ, cɛ háánánáa goŋaá bá tɔ́ŋɛnɔ bá amɔ́ apótɛlɛ, goakɛ́ mmba séésényée boolímínyí Asaŋa[48].

¹⁰Kanɛ́ odɛ́nɛ́ yɔ́ɔyɔ ndɔ́mɔ́ hɔ́ɔ godɔ́ɔdɔ, yó lɔ́mɔ́ go niibo ná Asaŋa; kɔ́ɔ niibo nɛ́ɛnɛ a mbaá ŋŋaáa, nɛ́ dɛ mbó oba go cí. Moatɛ́, mmba yɔgɔ́nɔ́ɔ mbáá dómbá baapótɛlɛ báaba bóntió, caá akɛ́ yɔmɔ́ɔ, kanɛ́ niibo ná Asaŋa nɛ́ɛnɛ nɛ́ lɔ́mɔ́ namɛ.

¹¹Pɛ́la páŋɛ́ɛ ɛ lɔ́mɔ́ goŋaá, akɛ́ bó bɛ́ɛmba yɔmɔ́ɔ akɛ́ bó bɛ́ɛmba bɔ́ɔ, bɔ́ɔbɔ dɛ oyamɔ́ no báá gɔnɔ́ bó oliminyo, bɔ́bɔ́ɔ.

¹²Aáŋa bó oya bá amɔ́ Kilítusu a mba fúfúgé naá kadɛ́dadɛ́ɛ ya begúe, nɛɛ́nɛ batɔ bóncodío naá kadɛ́gadɛ́ɛ yɛnyɔ́ bó oyamɔ́ bá amɔ́, púfuge ya begúe ɛ dɛ báá o?

¹³Aáŋa begúe bá dɛ fúfúgénée, Kilítusu tɔ́nɔ a dɛ mbá fúfuge.

¹⁴Kɔ́ɔ, aáŋa Kilítusu a dɛ mbá fúfuge, gooya gɛ́cɔ́ na gioliminyo gɛ́nyɔ́ mó lɛ́ kanɛ ŋgénéménée.

¹⁵Gɔnɔ́, bó bédúfenye goŋaá dɛ dɛ báá mammana ŋgominyo sá Asaŋa gɔ́ɔgɔ dɛ oyamɔ́ dɛ amɔ́, Asaŋa a mba fúfúné Kilítusu; asáa gɔgɔ́ a dɛ mbá mo fúfune, aáŋa bó lɛ́ mammana goŋaá begúe bá dɛ fúfúgénée.

¹⁶Aáŋa begúe bá dɛ fúfúgénée, Kilítusu tɔ́nɔ a dɛ mbá fúfuge.

¹⁷Kɔ́ɔ, aáŋa Kilítusu a dɛ mbá fúfuge, gioliminyo gɛ́nyɔ́ gɛ́ lɛ́ naá bɛanana; no gá lɛ́ naá bɛlɔgɔ bɛ́nyɔ́.

¹⁸Gó bayɛga hɔ́ɔlɔ́, akɛ́ báaba ba mbaá gúénénée naá gioliminyo gábɔ́ naá Kilítusu, bá mba solá.

¹⁹Aáŋa bó lɔ́mɔ́ goana go moóma má cí gɔ́ɔ dɛ mbaá ágá odɛ́má yɛ́cɔ́ naá Kilítusu, mahana nɛcɔ́ makɔ́nɔ́ naá oŋgíso yá batɔ.

²⁰Kanɛ́ mammana, Kilítusu a mba fúfúgé naá kadɛ́gadɛ́ɛ ya begúe; a lɛ́ ba busío go go dúfie goŋaá báaba bá mbaá gúénénée bá ŋga fúfúgénée tɔ́nɔ.

²¹Ɛɛ́ɛŋ, aŋa mɔtɔ ummue a mbuú úlé na nigúe, nɔ́ɔ gɔ́ɔ tɔ́nɔ mɔtɔ táŋɛ́ ummue u úlenemú na púfuge ya begúe.

²²Aŋa biimée bá gúenenemú go gobálada gɔ́ɔgɔ na Ádama, tɔ́nɔ go gobálada gɔ́ɔgɔ na Kilítusu, biimée bá ŋga bɛáa gɛɔyɔ[49].

²³Na onyɔ moánɛ aŋa púfuge ɛ mbaá bákɛsɛ́dá; Kilítusu a lɔ́mɔ́ ba busío go biimée, naá nnyimé, biimée báaba bɔ́ ɔ́bɛnɔnɔmɔ́ nɛhɛ́ naá gɛcamɛna gɛ́ɛgɛ a ŋgaá ncó gunde.

²⁴Manɛ́ kanɛ́ mesúgidinye má ŋgaá háá aŋa a ŋgaá gundínyée Asaŋa Isée bufuŋe, naá nnyimé ya go níŋiside kɔndɔ́ go cí, gɛmánɛgɛna giimée, bufuŋe buimée na bogaaga buimée.

²⁵Mammana bó háanana goŋaá a nona cí gó ɛ́da húme aŋa a ŋgaá ágá babɛlɔ́bɛlɔ bɛ́hɛ́ biimée naá bɛgɔ́ndɔ́ bɛ́hɛ́ cí[50].

²⁶Obɛlɔ́bɛlɔ ba mesúgidinye ba go mo níŋiside kɔndɔ́ go cí a lɔ́mɔ́ nigúe.

²⁷Bó lɛ́ ɔ́ŋɔ́ɔlú goŋaá: «Asaŋa a mba ágá buimée naá bɛgɔ́ndɔ́ bɛ́hɛ́ cí[51].» Aŋa ŋgɔ́ŋɛ́ yɛ oyamɔ́ goŋaá: «Buimée bó lɛ́ naá bɛgɔ́ndɔ́ bɛ́hɛ́ cí,» bó lɛ́ mammana goŋaá Asaŋa mɔ́ɔnyɔ a mbaá ágá buimée naá bɛgɔ́ndɔ́ bɛ́hɛ́ cí, mɔ́ɔ moatɛ́ a dɛ báá kɔ́ɔ.

²⁸Aŋa bá ŋgaá ágá buimée naá bɛgɔ́ndɔ́ bɛ́hɛ́ cí, manɛ́ kanɛ́ Moɔnɔ́ moatɛ́ moatɛ a ŋgaá bésiisíe naá cí ya bɛgɔ́ndɔ́ bá mɔ́ɔnyɔ a mbaá mo ágɛ́ná buimée naá bɛgɔ́ndɔ́ cí, go goŋaá Asaŋa a bɛ́ɛmba uŋkimée naá biimée.

²⁹Batɔ bóncodío bá béyumeninye go ufíno yá begúe. Boóma moánɛ bó bó dúgune go ɛkádɛ o? Aáŋa begúe bá dɛ fúfúgénée, goakɛ́ bá béyumeninyemú go ufíno yábɔ́ o?

³⁰Bɛɛcɔ́ɔ moatɛ́ dɛ básɛncɛganamɔ́ naá nigúe gɛcamɛna giimée goakɛ́ o?

³¹Bolimóní, mbásɛncɛgana miisí miimée naá nigúe bó lɛ́ mammana; bó lɛ́ tɔ́nɔ mammana goŋaá ŋgɔ́bɔnɔ bese nɛnyɔ́ naá gobálada gɔ́ɔgɔ na Yésu Kilítu, Daadáa bɛcɔ́.

³²Gɔ́ɔgɔ mbaá noanánáa na nnyama sá bɛsɔgɔ naá Ɛ́fɛsɛ, bó mba lɛ́ bá go túgune goakɛ́ aáŋa bó mba lɛ́ go goɛ́na gá batɔ o? Aáŋa begúe bá dɛ fúfúgénée, ŋgáa dɛ nyáanya dɛ nyóanana goŋaá nembeli dɛ gaá gúé[52].

³³No do bébelé, bɛbɛ́ bá megúle bɛ́ díeŋenye bɛnɔ́gɔ́ bá ndoŋá.

³⁴Ncó no gunde uŋkimée uŋkimée bɛnyɔ́ naá mammana ya pɛ́, no dɔmbɔ go lɔgɔ, ŋgaá gálɛ́dá nɔ́ɔnɔ go odóɛ nnóa yɛnyɔ́, degédegé naá bɛɛnyɔ́ɔ ɛ dɛ íyíménée Asaŋa.

³⁵Mɔtɔ a lɛ́ ba go úhune kanɛ́ nɛɛ́nɛ begúe ba fúfugenemú o? Nnyɔ́dɔ ɛhanɛ́ bá ŋgaá bɛ́ɛ́mbá na yɛ́ o?

³⁶O lɛ́ kanɛ nciŋí o? Gɔ́ɔgɔ go ágamɔ́ camɔ́ go cí, ɛ lɛ go basa.

³⁷Bɔ́ɔbɔ o gónamɔ́ bó do báá mbɔ́gɔ́ ya boóma bɔ́ɔbɔ bó gaá ná basá, bó lɔ́mɔ́ goana camɔ́, akɛ́ ɛ bɛ́ɛmba ya mbasa akɛ́ ya bogónɛ́dá bóhanɛ́ɛ.

³⁸Asaŋa a lɛ go yɛ fáa nnyɔ́dɔ aŋa a lɛ́gamɔ́; camɔ́ iŋkimée na mbɔ́gɔ́ ya yɛ́ kóka.

³⁹Bigedie biimée bɛ́ɛbɛ bɛ́ ɔyɔmɔ́ bɛ́ dɛ báá na mbɔ́dɔ ya nnyɔ́dɔ táŋɛ́ mmue; tádoga ɛ lɛ́ hɔ́ɔ na nnyɔ́dɔ ya mɔtɔ, ya nnyama, ya munoní, ya moɔbɔ́.

⁴⁰Caŋa mmue, bigedie bá mmoɛná bɛ́ lɛ́ hɔ́ɔ, bá cí bɛ́ lɛ́ hɔ́ɔ; biimée bɛ́ dɛ bósó go bɛanana bonɔ́gɔ́ búmmue eé búmmue.

⁴¹Buisí bó bonya kóka, ofɛ́ kóka, muotóti kóka, naá muotóti moatɛ́, gobonya gá mɔ́ gó lɛ́ kóka aá kóka.

⁴²Bó lɛ́ nɔ́ɔ caŋa mmue na púfuge ya begúe; bɔ́ɔbɔ bá mienenemú bó lɛ́ giyiki, aŋa bó fúfugemú, bó do gɔnɔ́ gúenene.

⁴³Bɔ́ɔbɔ bá mienenemú bó lɛ́ mahana kanɛ bogaaga, aŋa bó fúfugemú, bó lɛ́ na nigúmi, bɔ́ na magɛ́nda.

⁴⁴Bɔ́ɔbɔ bá mienenemú bó lɛ́ nnyɔ́dɔ ya dugúnú aá dugúnú, aŋa bó fúfugemú, Giliíli ba Asaŋa a lɛ go bó fáa mammana ya gɛɔyɔ. Aáŋa nnyɔ́dɔ ya dugúnú aá dugúnú ɛ lɛ́ hɔ́ɔ, yɛ́ɛyɛ Gimmúmpúu gá Giliíli a yɛ fáananamɔ́ gɛɔyɔ, ɛ lɛ́ hɔ́ɔ.

⁴⁵Ŋgɔ́ŋɛ́ yɛ oya goŋaá: «Mɔtɔ ba busío Ádama a mba lɛ́ gigedie, ɔ ɔyɔ[53].» Kanɛ́ Ádama ba mesúgidinye a lɛ́ dácɛ na Giliíli, a dúmbeninye gɛɔyɔ.

⁴⁶Nnyɔ́dɔ ya dugúnú aá dugunu yɛ́ ɛ́ lɔ́mɔ́ ya busío; yɛ́ɛyɛ ya Giliíli ɛ lɛ go ɛndɛga.

⁴⁷Mɔtɔ ba busío mɔ́ɔnyɔ bá mbaá gedíe na cánɔ́[54], ɔ ɔ́bɛnɔnɔmɔ́ na cí; ba gáandɛ́ɛ mɔ́ɔ ɛ ɛ́damɔ́ go úlene naá mmoɛná.

⁴⁸Aŋa mɔtɔ ba cí a mbaá lɔ́mɔ́, tɔ́nɔ nɔ́ɔ batɔ bá cí bá lɔ́mɔ́. Aŋa mɔtɔ ba mmoɛná a lɔ́mɔ́, tɔ́nɔ nɔ́ɔ batɔ bá mmoɛná bá ŋgaá bɛ́ɛ́mbá.

⁴⁹Caŋa mmue aŋa dɛ lɔ́mɔ́ bɛ́ɛ́mbáalú naá púényí ya mɔtɔ ba cí, dɛ ŋga bɛ́ɛ́mbá tɔ́nɔ púényí ya mɔtɔ ba go ɛ́da go úle naá mmoɛná.

⁵⁰Bolimóní, ndɔ́mɔ́ caá, bɔ́ɔbɔ bó lɔ́mɔ́ gedíelú na nnyɔ́dɔ na manɔ́ŋɔ́, bó do ŋgá bɛa bodáŋɔ naá bufuŋe bá Asaŋa; akɛ́ bɔ́ɔbɔ bó yɛkamɔ́ bó do ŋga bɛa bodáŋɔ naá bɔ́ɔbɔ bó lɔ́mɔ́ bó do gúénénée.

⁵¹Godɔ́ɔdɔ, nnco nyó dóoginyo boóma bá nnindíi; bó lɔ́mɔ́ goŋaá, bó do báá bɛɛcɔ́ɔ biimée bá dɛ ŋgaá gúé. Kanɛ́ bɛɛcɔ́ɔ biimée dɛ ná bénúgie.

⁵²Bó ŋgaá bá ŋaáa naá gigeléŋéndée, aŋa gokéfimide, aŋa cɛ́bá ya mesúgidinye ɛ ŋgaá góbá. Gɔ́ɔgɔ cɛ́bá ɛ ŋgaá góbɛ́dá, begúe bá ŋgaá fúfúgénée na nnyɔ́dɔ ya kanɛ go yɛka, bɛɛcɔ́ɔ dɛ ná bénúgie[55].

⁵³Bó háanana goŋaá nnyɔ́dɔ yɛ́ɛyɛ ɛ yɛkamɔ́ ɛ bɛ́ɛmba goŋaá ɛ dɛ gɔnɔ́ yɛka. Gɔnɔ́, nnyɔ́dɔ yɛ́ɛyɛ ɛ gúenenemú, ɛ bɛ́ɛmba goŋaá ɛ dɛ gɔnɔ́ gúenene.

⁵⁴Kanɛ́ gɔ́ɔgɔ nnyɔ́dɔ ya go yɛka yɛ́ɛyɛ ɛ ná ŋamɔ́ ɛ dɛ gɔnɔ́ bɛ́ɛmba ya go yɛka, gɔnɔ́, nnyɔ́dɔ ya go gúenene yɛ́ɛyɛ ɛ ná ŋamɔ́ ɛ dɛ gɔnɔ́ bɛ́ɛmba ya go gúenene, gɔ́ɔ nogálɔ ná Asaŋa nɔ́ɔnɔ nó ŋgɛɛ́ ɛ́nánɛ́náa. Nó lɔ́mɔ́ goŋaá: «Nigúe nɛ́ á maná, gɛmánɛgɛna gɛ́ lɛ́ go busío buimée.

⁵⁵Nigúe, gɛmánɛgɛna gáhɔ gɛ́haágɛ o? Nigúe, bogaaga báhɔ bá go óna bɔ́ bóhaábɔ[56] o?»

⁵⁶Bogaaga bá nigúe bó úlenemú naá gɛlɔgɔ, gicele gɛ́ fáanana gɛlɔgɔ bogaaga.

⁵⁷Ŋgáa dɛ béhiigi Asaŋa mɔ́ɔnyɔ a có fáananamɔ́ gɛmánɛgɛna gá Daadáa bɛcɔ́ Yésu Kilítu.

⁵⁸Gɔ́ɔ, bámɛ bá odɛ́má, bɛ́ɛ́mba nɔnɔ tɛ́ŋɛ́tɛŋɛ no do bádɛ́ɛ́ná, no yɔgɔnɔ buelí bá Daadáa kanɛ tɔmbɛ́nɔ́ɔ, no íyime goŋaá gɛdɔmbɔ gɛ́ɛgɛ no gɔ́lɔnɔmɔ́ go busío bɛ́hɛ́ gɛ́ dɛ solánáa.