Read Nugunu 1 Kɔlɛ́ntɛ 16 Bible Online

1 Kɔlɛ́ntɛ 16 - Nugunu bible

1 Kɔlɛ́ntɛ 16

¹Go bosɔ́mɔ bɔ́ɔbɔ bó núunemú bɛbáágá bɛ́ɛbɛ no bándamɔ́ go boolímínyí bá Yolósalɛmɛ[57], ndɛ́galɛga caá no biene témbuginye sɛ́ɛsɛ mmbaá fáá boolímínyí báaba naá Galáatɛ.

²Buisí bá busío bá gɛanyɛ, ŋgáa onyɔ moánɛ a ága go boayá bɔ́ɔbɔ a lɔ́mɔ́ ba go bɛ́dɛgɛna, goŋaá bá dɛ gɛ́gánáa gobola gámɛ go go bándɛgɛna bɛbáágá.

³Aŋa nná bolamɔ́, nná dóma báaba no ŋgií iyídé go go ɛ́da síe bɛbáágá bɛ́nyɔ́ naá Yolósalɛmɛ na bakálata bá bosɔ́mɔ.

⁴Bó amɔ́ bó bɛ́ɛmba goŋaá ŋgɛ́da yɔmɔ́ɔ moatɛ́ moatɛ, nná bɛ́ɛmba olɔŋɔ nabɔ́.

⁵Gɔ́ɔgɔ nnú úlemú naá bɛɛnyɔ́ɔ, nnɛ́ ɛndɛna ya Masɛdóanɛ, goakɛ́ nná fɛ́lɛda hɔ́ɔ[58].

⁶Ndɛ́ ba go dúmbie gɛcamɛna naá bɛɛnyɔ́ɔ, gódaga moánɛ gɛcamɛna gá isió giimée, go goŋaá no ŋgóhiginyo na boóma bá go dúmbenye pɛ́ yamɛ.

⁷Cɛ lɛ́gálɛ́gáa goŋaá nnyó ɛ́na tómbana go tómbana, kɔ́ɔ mmaamanamɔ́ goŋaá kɛ́gɛda moɔnɔ́ ba gɛcamɛna nɛnyɔ́, Daadáa a amɔ́ o oliminyo.

⁸Kanɛ́ nná gɛ́ga naá Ɛ́fɛsɛ gó ɛ́da húme naá buisí bá Pantɛkótɛ[59].

⁹Gɛantá gá ŋgásɛ́ gɛ́ á bébuuné hɔ́ɔ goŋaá mbáá yɔgɔ́nɔ́ɔ buelí bámɛ, akɛ́ aŋa babɛlɔ́bɛlɔ bámɛ bá lɔ́mɔ́ hɔ́ɔ makɔ́nɔ́[60].

¹⁰Timotée a amɔ́ u úle hɔ́ɔlɔ́, no mo beŋe bese goŋaá a dɛ bɛáa bofoá naá kadɛ́gadɛ́ɛ yɛnyɔ́, goakɛ́ namɛ nɛhɛ́ dɛ yɔgɔnɔ buelí bá Daadáa.

¹¹Mɔtɔ a dɛ mo fánɛ́ná kanɛ́. Mo fáamɔ́ nɔnɔ boóma bá go mo óhiginyo go pɛ́, a nco kundine odɛ́má na bɛyaŋa, mmo gɛ́gana olɔŋɔ na bolimóní.

¹²Naá boayá bá ondimóní bɛcɔ́ Apolóso, mmo gúlumeninye gɛcamɛna giimée goŋaá u úle naá bɛɛnyɔ́ɔ olɔŋɔ na bolimóní, kanɛ́ a dɛ lɛ́gálɛ́gáa go úle godɔ́ɔdɔ. A nú úle aŋa a ná bɛamɔ́ gɛcamɛna.

¹³Gɛ́gáa nɔnɔ pɔnyɛ́ɛ, no bɛ́ɛmba tɛ́ŋɛ́tɛŋɛ naá gioliminyo, no bɛa nigégé, no bɛ́ɛmba bɛgaaga.

¹⁴No ŋanana buimée na gɛnɔ́ɔ́nɛ́nɔ́.

¹⁵Bolimóní, gɛlɔsɛnɔ gíntió gɛ́gɔ́ɔ gɛ́ lɔ́mɔ́: no íyime goŋaá Ɛsɛtɛfánasɛ na ncíbo yɛhɛ́ ya batɔ bá lɛ́ boolímínyí bá busío hɔ́ɔlɔ́ naá Ekeyíi. Bá mba bííŋéné go go yɔgɔnɛnɔ basɔ́gɔ́ɔ boolímínyí.

¹⁶Olímínyóo nɔnɔ goŋaá batɔ aŋa bɔ́ɔbɔ nɔ́ɔnɔ bá nyó indenye, na uŋkimée mɔ́ɔnyɔ a gɔ́lɔnɔmɔ́ bodáŋɔ naá buelí na bɛdɔmbɔ bábɔ́.

¹⁷Ŋgɔ́bɔnɔ bese makɔ́nɔ́ na goúle gá Ɛsɛtɛfánasɛ, Folotonásɛ na Ekeyíkusu, goakɛ́ bá lɛ́ ŋaáalú bɔ́ɔbɔ no mbaá lɔmɔ́ bá go ŋa naá yɔmɔ́ boayá.

¹⁸Bá mba fuugíe yɔmɔ́ odɛ́má na yɛ́nyɔ́ kɛ́. Íyíme nɔnɔ kanɛ́ go búlugenye batɔ aŋa bɔ́ɔbɔ nɔ́ɔnɔ.

¹⁹Biimbó bá boolímínyí bɛ́ɛbɛ naá gigísi gá cí gá Esíi bɛ́ nyó bédíigenye. Akɛ́lasɛ na Pɛlɛsɛ́ka[61], na giimbó gá boolímínyí gɛ́ɛgɛ gɛ́ bábándamɔ́ naá nnyaŋá yabɔ́ bá á nyó bédíígíe go ufíno yá Daadáa.

²⁰Bolimóní biimée bá á nyó bédíígíe. Bédíígénínyée nɔnɔ na kude aŋa bolimóní.

²¹Ombɔ́gɔ yámɛ yá Póolo moatɛ́ yɔ́ yó ɔ́ŋɔmɔ́ mbédíígí yɛ́ɛyɛ.

²²Aáŋa mɔtɔ a dɛ maamánáa Daadáa, ŋgáa Asaŋa a mo yɔmɛnɔ. Malaná ta, nɔ́ɔnɔ gó lɛ́ aá: Daadáa, úlé[62]!

²³Ŋgáa niibo ná Daadáa Yésusu nɛ́ bɛ́ɛmba nɛnyɔ́!

²⁴Nnyó maamana bɛɛnyɔ́ɔ biimée naá gobálada gɔ́ɔgɔ na Yésu Kilítu.