Read Nugunu 1 Kɔlɛ́ntɛ 3 Bible Online

1 Kɔlɛ́ntɛ 3 - Nugunu bible

1 Kɔlɛ́ntɛ 3

¹Bolimóní, go busío bámɛ, cɛ mbáa lɛ ba go nyó gálagala aŋa batɔ báaba Giliíli ba Asaŋa i indenyemú, kanɛ́, mmba nyó gálágáláa goana aŋa batɔ báaba bɔ́ ɔyɔmɔ́ go mbééníŋínyí sábɔ́, aŋa bihelege naá gioliminyo gá Kilítusu.

²Go busío bá ndiemi gɔ́ɔ mmbaá nyó dúgée na mabáanyɛ, caá akɛ́ na manyáanya má go lala, goŋaá no do mbáa lɛ ba go hóda go má mɛna[10]. Akɛ́ ínoni moatɛ́, no gá lɛ́ no do bɛ́ɛ́mbá ba go má hóda.

³No gá lɛ́ bɛɔlɛ́ bá mbééníŋínyí sɛ́nyɔ́ aŋa no gá lɔ́mɔ́ na hɛagá na mbɛlɔ́ bɛɛnyɔ́ɔ na bɛɛnyɔ́ɔ, ábɔ caá hɔ́ɔlɔ́ no dúfenyemú goŋaá no lɛ́ bɛɔlɛ́ bá mbééníŋínyí sɛ́nyɔ́ o? Caá no dúfenyemú goŋaá no ɔyɔ aŋa batɔ bá cí yɛ́ɛyɛ o?

⁴Gɔ́ɔgɔ ummue naá bɛɛnyɔ́ɔ o oyɛdamɔ́ a amɔ́: «Yɔmɔ́ɔ ndɔ́mɔ́ naá nnyimé ya Póolo,» uncoó a amɔ́: «Yɔmɔ́ɔ ndɔ́mɔ́ naá nnyimé yá Apolóso,» ábɔ, caá no ŋananamɔ́ aŋa batɔ bá cí yɛ́ɛyɛ o?

⁵Ánɛ́ɛ a lɔ́mɔ́ Apolóso, ánɛ́ɛ a lɔ́mɔ́ Póolo? Bɛɛcɔ́ɔ biimée dɛ lɔ́mɔ́ goana boyogóní bá Asaŋa báaba dɛ á ná nyó gɔ́gɛ́dɔ́ naá gioliminyo. Onyɔ moánɛ a báá yɔgɔ́nɔ́ɔ na bɔ́ɔbɔ Daadáa a mbaá mo fáá.

⁶Yɔmɔ́ɔ mbáá gónáa, Apolóso a báá libée, kanɛ́ Asaŋa a báá gumíe.

⁷Gɔ́ɔ, akɛ́ mɔ́ɔnyɔ a gónamɔ́, akɛ́ mɔ́ɔnyɔ a libemú, akɛ́ ba ummue a dɛ báá boóma, goana Asaŋa mɔ́ɔnyɔ a gumenyemú.

⁸Mɔ́ɔnyɔ a gónamɔ́ na mɔ́ɔnyɔ a libemú, bá lɛ́ odɛ́nɛ́ yúmmue; Asaŋa a ŋga soɛná onyɔ moánɛ go buelí bɛ́hɛ́ bɔ́ɔbɔ a yɔgɔnɔmɔ́.

⁹Dɛ yɔgɔnɔ olɔŋɔ buelí bá Asaŋa, no lɛ́ aŋa ntɛ́mɛ́ ya Asaŋa, gɛfóaga gɛ́hɛ́.

¹⁰Aŋa Asaŋa a mbaá mboogóo, ndɛ́ aŋa gɛnɔ́gɔ́ gá useŋí gɛfóaga. Tábɛga mogoná, ufúégí a lɛ go síene a fediginye nnyaŋá kɔ́ɔ. Kanɛ́, ŋgáa onyɔ moánɛ a bégedie naá go békeŋe gá mbɔ́dɔ yɛhɛ́ ya go fóaga.

¹¹Mogoná mó ná lɛ́ dábɛ́gáalú, mɔ́ mó lɔ́mɔ́ Yésu Kilítu; mɔtɔ uncodío a dɛ bósó ba go nco dábɛga múncodío gɔnɔ́.

¹²Akɛ́ mɔtɔ a fóaga kɔ́ɔ na góolo, na gɛkɔ́ŋɔ gá muinyí, na adánɛ́ yá ntɔ́nɔ, na mɛɛ́tɛ ɛ́na na bisie,

¹³buelí bá onyɔ moánɛ bó ŋga bédúfíe. Buisí bá Daadáa goncogunde go go sómbana batɔ bɛsɛnɛ bɔ́ bó ŋgaá dúfíe, goakɛ́ bó ŋgu úlé na íyuke, hɛ́ lɛ go dúfie aŋa buelí bá onyɔ moánɛ bó lɔ́mɔ́.

¹⁴Mɔ́ɔnyɔ íyuke hɛ́ ŋgaá ŋá hɛ́ dɛ bigídíe buelí bɛ́hɛ́, a ŋga bɛáa bɛsoɛná.

¹⁵Mɔ́ɔnyɔ hɛ́ ŋgaá bigídíe buelí bɛ́hɛ́, a dɛ ŋgá bɛa boóma; kanɛ́ mɔ́ɔ moatɛ́ Asaŋa a lɛ go mo sódío, aŋa mɔtɔ mɔ́ɔnyɔ a pambanamɔ́ go íyuke.

¹⁶No íyimene no amɔ́ no lɛ́ Nnyaŋá ya Asaŋa, gɔnɔ́, Gimmúmpúu gá Giliíli a gɛ́ga naá bɛɛnyɔ́ɔ.

¹⁷Mɔtɔ a amɔ́ a gada Nnyaŋá ya Asaŋa, Asaŋa a ná mo gada tɔ́nɔ, goŋaá nnyaŋá ya Asaŋa ɛ lɛ́ gimmúmpúu, yɛ́ ɛ lɔ́mɔ́ bɛɛnyɔ́ɔ.

¹⁸Mɔtɔ a dɛ hóámá a dɛ bébele; aáŋa ummue naá bɛɛnyɔ́ɔ a béeniŋenye a amɔ́ a lɛ́ na nciŋí go mbɔ́dɔ ya batɔ bá cí yɛ́ɛyɛ, ŋgáa a bííyie uŋgegeegú go go ɛ́na gábɔ́, a lɛ go nco bɛa mammana ya nciŋí.

¹⁹Asaŋa a núune nciŋí ya batɔ bá cí yɛ́ɛyɛ aŋa boóma bá buegu. Bó lɛ́ moánɛ ɔ́ŋɔ́ɔlú naá kálata ya Asaŋa goŋaá: «A gumbenene benciŋínciŋi naá modámbɔ mábɔ́ má moatɛ́ moatɛ.»

²⁰Bó lɛ́ tɔ́nɔ ɔ́ŋɔ́ɔlú goŋaá: «Daadáa a lɛncana mbééníŋínyí sá benciŋínciŋi, sɛ́ lɛ́ boóma bá dugúnú[11].»

²¹Gɔ́ɔ, mɔtɔ a dɛ ágá nuségi nɛ́hɛ́ go batɔ bá cí yɛ́ɛyɛ, goakɛ́, buimée bó lɔ́mɔ́ bɛ́nyɔ́.

²²Akɛ́ a bɛ́ɛmba Póolo, Apolóso, ɛ́na Sɛ́fasɛ[12], akɛ́ bó bɛ́ɛmba cí, gɛɔyɔ ɛ́na nigúe, akɛ́ ínoni, akɛ́ nembeli, buimée bó lɔ́mɔ́ bɛ́nyɔ́.

²³Kanɛ́ bɛɛnyɔ́ɔ, no ɔ́bɛnɔnɔ na Kilítusu, Mɔ́ɔ, na Asaŋa.