Read Nugunu 1 Kɔlɛ́ntɛ 4 Bible Online

1 Kɔlɛ́ntɛ 4 - Nugunu bible

1 Kɔlɛ́ntɛ 4

¹Ŋgáa kanɛ́ batɔ bá có gɔ́lɔnɔ aŋa boyogóní bá Kilítusu, aŋa bebídígíní masɔ́mɔ má nnindíi má Asaŋa.

²Buimée bɔ́ɔbɔ bó úhenemú umbídígíní masɔ́mɔ má Asaŋa, bó lɔ́mɔ́ goŋaá, a yɔgɔnɔ masɔ́mɔ moánɛ na pídefide.

³Gámɛ, bó do ŋgúlényée boóma aáŋa bɛɛnyɔ́ɔ no gálagala akɛ́ ŋkádɛ go busío bámɛ, ɛ́na lí, agála yá batɔ yá cómbana bɛsɛnɛ; akɛ́ yɔmɔ́ɔ moatɛ́ cɛ básómbánáa gɛsɛnɛ gámɛ.

⁴Mammana, odɛ́má yámɛ yó do koománɛ́náa go boóma; kanɛ́ bó do báá bɔ́ɔbɔ bɔ́ɔ bó ŋgíyienyemú gɛtɛ́nɛ́ɛ naá busío bá Asaŋa; usúmbí bɛsɛnɛ bamɛ a lɔ́mɔ́ Daadáa.

⁵Go busío bá ndiemi, no do báfáláa go sómbɛna mɔtɔ gɛsɛnɛ, gɛ́gánáa nɔnɔ Daadáa a ncó gunde. Mɔ́ɔ a ŋgaá hémíe naá gise bɔ́ɔbɔ mbíno yɛ ɔsɛgɔnɔmɔ́, a gɔnɔ dúfie dalaŋanyɛ mbééníŋínyí sɛ́ɛsɛ sɛ́ lɔ́mɔ́ naá ɛdɛ́má ya batɔ. Gɔ́ɔ, Asaŋa a ŋgaá fáá onyɔ moánɛ nuségi nɔ́ɔnɔ a háananamɔ́ na nɔ́.

⁶Bolimóní, bɛ́ɛ́mba nɔnɔ bieninye bɛ́cɔ́, no do ɛ́dá go bébúlugenye, no gundene nnyimé ya mɔ́ɔnyɔ, no inyene mɔ́ɔnyɔ. Go busío moánɛ gɔ́ɔ nnyó gálagalamɔ́ ndabana go gɛɔyɔ gɛ́cɔ́ namɛ na Apolóso.

⁷No do ɛ́dá go bɔ́gɔ́lɔnɔ aŋa no dómbana basɔ́gɔ́ɔ. Bá mba nyó fáá buimée bɔ́ɔbɔ no bɛananamɔ́. No do ɛ́dá kanɛ́ go bébúlugenye aŋa bá lɛ́ kanɛ go nyó fáá.

⁸Bɛɛnyɔ́ɔ yaanɔ́ no ná lɛ́ fundufundu, no ná lɛ́ na bonɔ́mɛ gɛca! Bɛɛnyɔ́ɔ yaanɔ́ no báa go ɛ́yá mefuŋe bɛɛcɔ́ɔ kanɛ go ɛ́yá! Besé makɔ́nɔ́ no ɛ́yá mefuŋe, goŋaá olɔŋɔ nɛnyɔ́, bɛɛcɔ́ɔ tɔ́nɔ dɛ ɛ́yá mefuŋe.

⁹Naá goɛ́na gámɛ, bó fóanɛna aŋa Asaŋa a lɛ́ có dambɛ́gáalú bɛɛcɔ́ɔ Baapótɛlɛ, a báá có ágá naá undukí yá mesúgidinye, aŋa batɔ báaba bá lɔ́mɔ́ naá ncíbo ya gɛaŋɔ́ bá gɛ́gana nigúe. A báá có ágá goŋaá batɔ bá cí iŋkimée na bɛɛ́ŋgɛlɛsɛ kɛ́ bá có lɛ́ɛma.

¹⁰Naá goɛ́na gá batɔ, bɛɛcɔ́ɔ dɛ lɛ́ aŋa begeegú go gɔ́ɔgɔ dɛ dúmenyemú Kilítusu, kanɛ́ bɛɛnyɔ́ɔ no lɛ́ na nciŋí go gɔ́ɔgɔ no lɔ́mɔ́ báladáalú nɛhɛ́. Bɛɛcɔ́ɔ, dɛ lɛ́ kanɛ bogaaga, bɛɛnyɔ́ɔ na bɔ́; bá nyó gúmenye bɛɛnyɔ́ɔ, bɛɛcɔ́ɔ, bá có fánɛnafanɛna.

¹¹A nco húme godɔ́ɔdɔ, dɛ lɛ́ na ncaná na inyúídi; dɛ ɛnda nnyɔ́dɔ gɔdɔɔ́, bá có gúnegune, dɛ léelene hoóma hiimée.

¹²Dɛ bódombonyo go go yɔgɔnɔ bɛɛcɔ́ɔ moatɛ́[13]; bá có sɛga, bɛɛcɔ́ɔ, dɛ fona; bá có séesenye, dɛ kélemenene.

¹³Bá có sómbanɛna bɛamɔ́ɔ, bɛɛcɔ́ɔ dɛ bóombonyo. Dɛ lɛ́ ba go oyɛda dɛ amɔ́, gó nco húme godɔ́ɔdɔ, dɛ lɛ́ aŋa bɛnyáanyáa, dɛ lɛ́ boóma bá go nadana, go goɛ́nana gá batɔ bá cí.

¹⁴Aáŋa nnyó ɔ́ŋɔnɔ mbɔ́dɔ yɛ́ɛyɛ, bó do báá goŋaá nnyó núugie odóɛ, kanɛ́ bó lɔ́mɔ́ goŋaá no lɛ́ baaná bámɛ bá odɛ́má, gɔ́ɔ ndɔ́mɔ́ goŋaá no bétéetinye.

¹⁵Kɔ́ɔ bó lɔ́mɔ́, akɛ́ no bɛa muloodio batɔ́sɛnɔ batɔ́sɛnɔ mɔ́ɔmɔ mó nyó húunenyemú masɔ́mɔ má Kilítusu, no bɛanana isée táŋɛ́ ummue. A lɔ́mɔ́ yɔmɔ́ɔ mɔ́ɔnyɔ ŋgaá ná nyó bíéné naá gioliminyo gá Yésu Kilítu, mbáá nyó dúménínyée Gɛnɔ́gɔ́ gá Cɔ́mɔ gɛ́hɛ́.

¹⁶Ŋgaá nyó bósógólídío kanɛ́, gɔ́lɔ́ nɔnɔ gɛgɔ́ndɔ́ gámɛ.

¹⁷Go busío moánɛ bɔ́ ŋgaá ná nyó dómɛ́ná Timotée, moɔnɔ́ bamɛ ba odɛ́má na pídefide naá Daadáa. Mɔ́ɔ a ná nyó úncugeninyemú mbɔ́dɔ yamɛ ya gɛɔyɔ naá Yésu Kilítu; caŋa táŋɛ́ mmue aŋa kúunenyemú hoóma hiimée, naá biimbó bá boolímínyí biimée.

¹⁸Bóncodío naá olɔŋɔ yɛ́nyɔ́ bá lɛ́ ɛ́dáalú go béségi, bá bébúlugenye, bá amɔ́, cɛ ná gɔnɔ nco gunde hɔ́ɔlɔ́ naá bɛɛnyɔ́ɔ.

¹⁹Kanɛ́, Daadáa a amɔ́ a lɛ́ga, ŋgúlene naá bɛɛnyɔ́ɔ godɔ́ɔdɔ godɔ́ɔdɔ; mbɔ́ɔ́bɛnɔ yɔmɔ́ɔ moatɛ́, caá akɛ́ dogálɔ dá bagayagáyáa dɔ́ɔdɔ bá sugunenemú, kanɛ́ gobáhóda gábɔ́.

²⁰Bufuŋe bá Asaŋa bó do báá goana dogálɔ, bó lɔ́mɔ́ bogaaga bá meŋiigíe.

²¹Naá moóma móandɛ́ mɔ́ɔmɔ mó lɔ́: Ŋgúle naá bɛɛnyɔ́ɔ na gɛfáfɛ́na go go nyó gide lí, ŋgúle na gɛnɔ́ɔ́nɛ́nɔ́ na odɛ́má yá puu o? Iyíde nɔnɔ.