Read Nugunu 1 Kɔlɛ́ntɛ 5 Bible Online

1 Kɔlɛ́ntɛ 5 - Nugunu bible

1 Kɔlɛ́ntɛ 5

¹Batɔ bó oya hoóma hiimée bá amɔ́ gɛɔyɔ gá hanyɔ́ gɛ́ lɛ́ naá olɔŋɔ yá bɛɛnyɔ́ɔ boolímínyí, mbɔ́dɔ yɛ́ɛyɛ bó lɔ́mɔ́ bó do bósó ba go báŋa akɛ́ naá kadɛ́gadɛ́ɛ ya bindiolímínyóo Asaŋa. Bó lɛ́ goŋaá, ummue naá olɔŋɔ yɛ́nyɔ́ a bɛ́dɛmana na okɔ́dɔ ba isée[14].

²Gɔ́ɔgɔ gá goŋaá no dúme mbií aŋa no lɛ́ go nigúe, no gúne mɔ́ɔnyɔ moánɛ naá kadɛ́gadɛ́ɛ yɛnyɔ́, bɛɛnyɔ́ɔ no lɛ́ hɔ́ɔ go go béségi.

³Naá bámɛ boayá, cɛ báá olɔŋɔ nɛnyɔ́, kanɛ́ ndɛ́ olɔŋɔ nɛnyɔ́ naá odɛ́má; mbáá go sómba gɛsɛnɛ gá mɔtɔ ba go ŋa bosɔ́mɔ moánɛ aŋa ndɛ́ hɔ́ɔ, caá:

⁴go ufíno yá Daadáa bɛcɔ́ Yésusu, gɔnɔ́ na nɛgaŋa nɛ́hɛ́, gɔ́ɔgɔ no gaá ná bábándɛ́gɛ́ná, yɔmɔ́ɔ hɔ́ɔ olɔŋɔ nɛnyɔ́ naá odɛ́má,

⁵dɛ́ɛ́na nɔnɔ mɔtɔ mɔ́ɔnyɔ naá magálá má ohándá, nnyɔ́dɔ yɛhɛ́ ɛ dɛ́aŋa; go goŋaá, Asaŋa a sódio giliíli gɛ́hɛ́ buisí bá Daadáa Yésusu goncogunde.

⁶Gobéségi gɛ́nyɔ́ gó lɛ́ mekesí. No íyimene no amɔ́ baaná bá ondɔ yá go fudugenye uguŋe, bá fedigenye gɛdɔ́bɔ́ giimée[15].

⁷Umbé nɔnɔ kanɛ́ gilunú gá ondɔ gɛ́ɛgɛ, no bɛ́ɛmba gɛpáa gá gɛdɔ́bɔ́ gɛ́ɛgɛ gɛ́ lɔ́mɔ́ kanɛ yɔ́. Hálá moánɛ, no ná lɛ́ gɛpáa gá gɛdɔ́bɔ́, goŋaá Kilítusu, aŋa moɔnɔ́ ba gɛdómbáa mɔ́ɔnyɔ bá sómbamɔ́ nyɔlɔ́ go gɛbáágá gá gibíné gá Pásɛ́ka ya Beyúdene, a mba gúé go bobɛ́ bɛ́cɔ́.

⁸Ŋgáa dɛ leebenye kanɛ́ gibíné gá mbáca, caá akɛ́ na bɛlɛ́dɛ bɛ́ɛbɛ bɛ́ lɔ́mɔ́ námbáalú na gilunú gá ondɔ, nɔ́ɔnɔ gó lɛ́ á bɛlɔgɔ, kanɛ́, ŋgáa dɛ leebenye na bɛlɛ́dɛ bɛ́ɛbɛ bɛ́ lɔ́mɔ́ kanɛ ondɔ, nɔ́ɔnɔ gó lɛ́ á sɔgɔ́nɔ[16].

⁹Ndɛ́ nyó ɔ́ŋɛ́nɔ́ɔlú naá kálata yamɛ mmue caá, no do háánánáa go bébuleebulie na batɔ báaba bɔ́ ɔyɔmɔ́ gɛɔyɔ gá hanyɔ́.

¹⁰Cɛ mbá gálɛda nɔ́ɔnɔ go biimée báaba naá cí háalá, bá bienenemú gɛɔyɔ gá hanyɔ́, bá hémenye gɛdɛ́mádɛ́má go muinyí, bá bɔgɔnɔ moóma má basɔ́gɔ́ɔ, bá bienene bɛgɔgɔ́. Aáŋa bó lɔ́mɔ́ nɔ́ɔnɔ, gásɛ́ no gaá háánánáa go úlukie naá cí yɛ́ɛyɛ.

¹¹Akɛ́ɛ, mmbaá lɛ ndɛ́galɛga go nyó oyana caá, no do ɛ́dá go bébuleebulie na báaba bá bádɔ́ŋɔnɔmɔ́ bá amɔ́ bakɛlɛ́tɛnɛ, asáa gɔgɔ́ bɔ́ɔ dácɛ naá gɛɔyɔ gá hanyɔ́, bá hémenye gɛdɛ́mádɛ́má go muinyí, bá bienene bɛgɔgɔ́, bá gálana basɔ́gɔ́ɔ modɔgɛ, bá gúenene mɔgɛ́bɔ, bá bɔgɔnɔ moóma má basɔ́gɔ́ɔ. Akɛ́ manyáanya, no do ɛ́dá go nyáanya olɔŋɔ nabɔ́.

¹²Cɛ báá naá odɛ́nɛ́ yá go sómbana báaba bá lɔ́mɔ́ bá dɛ bɛ́ɛ́mbá bakɛlɛ́tɛnɛ bɛsɛnɛ. Kanɛ́, bɛɛnyɔ́ɔ no háanana go sómbana báaba no lɔ́mɔ́ nabɔ́ giimbó bɛsɛnɛ.

¹³Go báaba bá lɔ́mɔ́ bá dɛ bɛ́ɛ́mbá giimbó nɛnyɔ́, Asaŋa a ná sómba gɛsɛnɛ gábɔ́. Gúné nɔnɔ ombɛ́ naá kadɛ́gadɛ́ɛ yɛnyɔ́[17].