Read Nugunu 1 Kɔlɛ́ntɛ 6 Bible Online

1 Kɔlɛ́ntɛ 6 - Nugunu bible

1 Kɔlɛ́ntɛ 6

¹Gɔ́ɔgɔ no bɛananamɔ́ bɛsɛnɛ bɛɛnyɔ́ɔ na bɛɛnyɔ́ɔ, nɛɛ́nɛ no ɛ́damɔ́ bɛ́ gála naá bindiolímínyóo Asaŋa, gá goŋaá no bɛ́ gála naá kadɛ́gadɛ́ɛ yɛnyɔ́ o?

²Íyíme nɔnɔ no amɔ́ bɛɛnyɔ́ɔ báaba no ɔ́bɛnɔnɔmɔ́ na Asaŋa, bɛɛnyɔ́ɔ báa no ŋgaá sómbáa bɛsɛnɛ bá batɔ bá cí. Kanɛ́ aáŋa bɛɛnyɔ́ɔ bá no ŋgaá sómbáa bɛsɛnɛ bá cí, nɛɛ́nɛ no lɔ́mɔ́ no do bɛ́ɛ́mbá bá go gedegedie docɛcɛ́nɛ o?

³No do íyíménée no amɔ́ bɛɛcɔ́ɔ báa dɛ ŋgaá sómbánáa bɛɛ́ŋgɛlɛsɛ bɛsɛnɛ o? Nɛɛ́nɛ kanɛ́ dɛ lɔ́mɔ́ dɛ dɛ bɛ́ɛ́mbá bá go sómba bɛsɛnɛ bá cí yɛ́ɛyɛ o?

⁴Gɔ́ɔgɔ no bɛamɔ́ bɛsɛnɛ aŋa bɛ́ɛbɔ nɔ́ɔnɔ, nɛɛ́nɛ no ɛ́danamɔ́ na bɛ́ɛ naá batɔ báaba giimbó gá boolímínyí gɛ́ lɔ́mɔ́ gɛ́ dɛ íyíménée o?

⁵Odóɛ go nóa nɛnyɔ́ makɔ́nɔ́. Akɛ́ mɔtɔ ummue ba nciŋí a dɛ báá naá kadɛ́gadɛ́ɛ yɛnyɔ́ go go gedie gɛsɛnɛ gá bolimóní o?

⁶Nɛɛ́nɛ ummue ɛ ɛ́damɔ́ na ondimóní go go gála gɛsɛnɛ naá batɔ báaba bá lɔ́mɔ́ bá dɛ íyíménée Asaŋa o?

⁷Akɛ́ ŋkádɛ, bó ná lɛ́ gɛantáanta gá giédie goŋaá no ubenye bɛsɛnɛ bɛɛnyɔ́ɔ na bɛɛnyɔ́ɔ. Tɛ́ɔbɛnɔ a amɔ́ a go budide, o do bósó ba go mo bádɛ́ɛnɛna, akɛ́ a go ŋa ɛkádɛ o?

⁸Kanɛ́ bɛɛnyɔ́ɔ báa no ŋananamɔ́ bobɛ́, no ŋanana basɔ́gɔ́ɔ akɛ́ ŋkádɛ; batɔ báaba no bó ŋananamɔ́ nɔ́ɔnɔ bá lɔ́mɔ́ bolimóní bɛ́nyɔ́ naá gioliminyo.

⁹No do íyíménée no amɔ́ beŋií mobɛ́ bá dɛ ní íŋene naá bufuŋe bá Asaŋa o? No do bébelé, akɛ́ batɔ bá gɛɔyɔ gá hanyɔ́, akɛ́ batɔ bá go bienene bɛgɔgɔ́, akɛ́ badáŋadaŋa, akɛ́ batɔ báaba bɔ́ ɔyɔmɔ́ na basɔ́gɔ́ batɔ,

¹⁰akɛ́ biíbi, akɛ́ báaba bá bɔgɔnɔmɔ́ moóma má basɔ́gɔ́ɔ, akɛ́ báaba bá gúenenemú mɔgɛ́bɔ, akɛ́ báaba bá gálanamɔ́ basɔ́gɔ́ɔ modɔgɛ, akɛ́ beŋií mobɛ́, bá dɛ ní íŋene naá bufuŋe bá Asaŋa.

¹¹Boóma bɔ́ɔbɔ nɛnamá níntió naá bɛɛnyɔ́ɔ, nɛ́ mbaá lɔmɔ́ cóá bɔ́bɔ́ɔ. Kanɛ́ godɔ́ɔdɔ, Giliíli ba Asaŋa bɛcɔ́ a báá go nyó soga, a báá nyó íyíe bimmúmpúu, a báá dúfíe goŋaá no lɛ́ bɛtɛ́nɛ́ɛ naá busío bɛ́hɛ́ go ufíno yá Daadáa Yésu Kilítu.

¹²Bóntió bá gálagala bá amɔ́: «Ndɛ́ bá go ŋanana buimée aŋa ndɛ́galɛgamɔ́.» Ɛɛ́ɛŋ, kanɛ́ buimée bó do báá bese. Ndɛ́ bá go oyɛda caá: «Ndɛ́ bá go ŋanana buimée aŋa ndɛ́galɛgamɔ́,» kanɛ́ cɛ lɛ́gálɛ́gáa go ɛ́ya gɛɔlɛ́ gá boóma.

¹³No gálagala tɔ́nɔ no amɔ́: «Manyáanya má lɔ́mɔ́ go gadɛ́ɛ, gadɛ́ɛ tɔ́nɔ go manyáanya.» Ɛɛ́ɛŋ, Asaŋa a ŋga díéŋíe muimée mɔ́ɔmɔ. Kanɛ́ nnyɔ́dɔ yɛcɔ́ ɛ dɛ báá gedíelú go gɛɔyɔ gá hanyɔ́, ɛ lɔ́mɔ́ go Daadáa, Daadáa tɔ́nɔ go nnyɔ́dɔ yɛcɔ́.

¹⁴Aŋa Asaŋa a mbaá fúfúné Daadáa, a ŋga có fúfúné nɔ́ɔ caŋa mmue go bogaaga bɛ́hɛ́.

¹⁵No íyimene bese bese no amɔ́ nnyɔ́dɔ yɛnyɔ́ ɛ lɔ́mɔ́ bɛnamá bá nnyɔ́dɔ ya Kilítusu. Nɛɛ́nɛ kaá ná gɔ́lɔ́ gɛnamá gá nnyɔ́dɔ ya Kilítusu go go gɛ́ nebiginye na nnyɔ́dɔ ya okɔ́dɔ ba gɛɔyɔ gá hanyɔ́ o? Cɛ báá ba go ŋa nɔ́ɔnɔ!

¹⁶No íyimene bese bese no amɔ́ mɔtɔ mɔ́ɔnyɔ a bénebiginyemú na okɔ́dɔ ba gɛɔyɔ gá hanyɔ́ ɛ ɛ́yana nɛhɛ́ nnyɔ́dɔ táŋɛ́ mmue o? Mammana, Ŋgɔ́ŋɛ́ yɛ oya náana: «Biimée báandɛ́ bá ŋga bɛ́ɛ́mbá nnyɔ́dɔ táŋɛ́ mmue[18].»

¹⁷Kɔ́ɔ, mɔ́ɔnyɔ a báladamɔ́ na Daadáa a ná lɛ́ nɛhɛ́ giliíli táŋɛ́ ummue.

¹⁸Báyáŋáamɔ́ nɔnɔ gɛɔyɔ gá hanyɔ́. Gɛlɔgɔ giimée gíntió gɛ́ɛgɛ mɔtɔ a lɔ́mɔ́ bá go ŋa gɛ́ dɛ bádáfáa nnyɔ́dɔ yɛhɛ́. Kanɛ́ mɔtɔ mɔ́ɔnyɔ a bienemú gɛɔyɔ gá hanyɔ́ a bɔ́lɔgɔmɔ́ mɔ́ɔ moatɛ́.

¹⁹Íyíme nɔnɔ bese no amɔ́ nnyɔ́dɔ yɛnyɔ́ ɛ lɔ́mɔ́ nnyaŋá ya Gimmúmpúu gá Giliíli, mɔ́ɔ a lɔ́mɔ́ naá bɛɛnyɔ́ɔ, Asaŋa mɔ́ɔ a mbaá nyó mo fáá, nɔ́ɔnɔ gó lɛ́ aá no do bábɛanánáa bɛɛnyɔ́ɔ moatɛ́.

²⁰Asaŋa a mba soáa makɔ́nɔ́ go go nyó fáŋa. Ágá nɔnɔ kanɛ́ nnyɔ́dɔ yɛnyɔ́ go buelí bá nigúmi nɛ́hɛ́.