Read Nugunu 1 Kɔlɛ́ntɛ 7 Bible Online

1 Kɔlɛ́ntɛ 7 - Nugunu bible

1 Kɔlɛ́ntɛ 7

¹Godɔ́ɔdɔ, ŋgáa dɛ nco gunde naá masɔ́mɔ máama no lɔ́mɔ́ ŋgɔ́ŋɛ́nɔ́ɔlú naá kálata yɛnyɔ́. Bó lɛ́ bese makɔ́nɔ́ goŋaá onɔ́mɔtɔ́ a bégumbene naá boayá bá okɔ́dɔ.

²Akɛ́ nɔ́ɔnɔ, ŋgáa onɔ́mɔtɔ́ uŋkimée a bɛa okɔ́dɔ bɛhɛ́, okɔ́dɔ uŋkimée a bɛa onɔ́mɛ bɛhɛ́ go go ásɛgana gɛɔyɔ gá hanyɔ́.

³Ŋgáa onɔ́mɔtɔ́ a hóogonyo masɔ́mɔ mɛ́hɛ́ má nɛbáná naá boayá bá ogɛ́, ogɛ́ a ŋanana nɔ́ɔ tɔ́nɔ caŋa mmue naá boayá bá onɔ́mɛ.

⁴Okɔ́dɔ a dɛ bósó go ɔ́bɛnɔnɔ na nnyɔ́dɔ yɛhɛ́ ya moatɛ́, a lɔ́mɔ́ onɔ́mɛ. Caŋa mmue, onɔ́mɔtɔ́ a dɛ bósó go ɔ́bɛnɔnɔ na nnyɔ́dɔ yɛhɛ́ ya moatɛ́, a lɔ́mɔ́ ogɛ́.

⁵No do fídénínyée nnyimé naá ombɛ́dɛ́, goana go amɔ́ no á húmé ukelú go go gɔ́lɔ gɛcamɛna gá go bósógolonyo. Kanɛ́ naá nnyimé hɔ́ɔlɔ́, dúmbényée nɔ́ɔnɔ na masɔ́mɔ mɛ́nyɔ́ má nɛbáná, sátana a dɛ labá, no obɛna naá gɛlɔgɔ go gɔ́ɔgɔ no lɔ́mɔ́ kanɛ bogaaga bá go bégumbene.

⁶Aáŋa kálagala náana, bó do báá goŋaá nnyó gaŋa; no amɔ́ no ɔyɔ nɔ́ɔ, bó lɛ́ besé makɔ́nɔ́.

⁷Naá bámɛ boayá, ndɛ́galɛga caá mɔtɔ uŋkimée a bɛ́ɛmba aŋa yɔmɔ́ɔ. Kanɛ́, onyɔ moánɛ a dáŋabana naá boayá bá Asaŋa, yɛhɛ́ pááná kóka, mɔ́ɔnyɔ a dáŋaba yɛ́ɛyɛ, mɔ́ɔnyɔ yɛ́ɛyɛ.

⁸Ŋgoó oyáná kanɛ́ bɛgona na bisí bá bakɔ́dɔ caá ŋgáa bá lɔbɛnɔ nɔ́ɔnɔ, aŋa yɔmɔ́ɔ.

⁹Kanɛ́ aáŋa bá dɛ bósó bá go bégumbene, ŋgáa bá giŋe; ɛɛ́ŋ, bese bá giŋe, bó dómba goŋaá odɛ́má yábɔ́ yó húmene go gɛɔyɔ gá hanyɔ́.

¹⁰Go báaba bá lɔ́mɔ́ giŋénéelú, ŋgií indígínyée, aŋa Daadáa o oyamɔ́ caá: Ŋgáa okɔ́dɔ a dɛ inyé onɔ́mɛ;

¹¹bó amɔ́ bó húme goŋaá a á mo inyé, ŋgáa a dɛ gɔnɔ́ giŋene na mɔtɔ uncoó, ɛ́na lí, ŋgáa a bégedie na onɔ́mɛ; ŋgáa onɔ́mɔtɔ́ tɔ́nɔ a dɛ inyé ogɛ́[19].

¹²Go báaba bóncodío, aáŋa uŋgolímínyí ba onɔ́mɔtɔ́ a á giŋé okɔ́dɔ mɔ́ɔnyɔ a lɔ́mɔ́ a dɛ bɛ́ɛ́mbá uŋgolímínyí, bá báá húmé ukelú go go ɔyɔ émmué, ŋgáa a dɛ mo inyé; yɔmɔ́ɔ mɔ́ɔ kálɛdamɔ́ nɔ́ɔnɔ, caá akɛ́ Daadáa.

¹³Caŋa mmue, aáŋa okɔ́dɔ mɔ́ɔnyɔ a lɔ́mɔ́ uŋgolímínyí a á giŋé onɔ́mɔtɔ́ mɔ́ɔnyɔ a lɔ́mɔ́ a dɛ bɛ́ɛ́mbá uŋgolímínyí, bá báá húmé ukelú go go ɔyɔ émmué, ŋgáa a dɛ mo inyé.

¹⁴Kálagalamɔ́ nɔ́ɔnɔ goŋaá, naá gobálada gábɔ́ gɔ́ɔgɔ naá nɛbáná, sɔ́gɔ́ɔ mɔ́ɔnyɔ a lɔ́mɔ́ uŋgolímínyí a háanana go ŋa goŋaá sɔ́gɔ́ɔ mɔ́ɔnyɔ a lɔ́mɔ́ a dɛ bɛ́ɛ́mbá uŋgolímínyí ɔ ɔ́bɛnɔnɔ na Asaŋa. Aáŋa bó do báá nɔ́ɔ, gásɛ́ baaná bɛ́nyɔ́ bá dɛ ɔ́bɛ́nɔ́nɔ́ɔ na Asaŋa, asáa gɔgɔ́ bɔ́ɔ bɛ́hɛ́.

¹⁵Aáŋa sɔ́gɔ́ɔ mɔ́ɔnyɔ a lɔ́mɔ́ a dɛ bɛ́ɛ́mbá uŋgolímínyí a lɛ́galɛga go inye sɔ́gɔ́ɔ mɔ́ɔnyɔ a lɔ́mɔ́ uŋgolímínyí, a lɛ́ ba go ŋa. Háalá, sɔ́gɔ́ɔ mɔ́ɔnyɔ a lɔ́mɔ́ uŋgolímínyí a dɛ báá naá gɛgaŋa, goakɛ́, Asaŋa a lɔ́mɔ́ nyó dɔ́ŋɛ́nɔ́ɔlú go go ɔyɔ naá buumbénú.

¹⁶Maamɔ́ɔ uŋgolímínyí ba okɔ́dɔ, o do íyi aáŋa o lɛ́ ba go óhiginyo onɔ́mɛ bahɔ goŋaá a bɛ́ɛmba uŋgolímínyí; caŋa mmue maamɔ́ɔ uŋgolímínyí ba onɔ́mɔtɔ́, o do íyi aáŋa o lɛ́ ba go óhiginyo okɔ́dɔ bahɔ goŋaá a bɛ́ɛmba uŋgolímínyí.

¹⁷Ŋgaá nyó oyáná kanɛ́ caá, ŋgáa onyɔ moánɛ ɔ ɔyɔ naá odɛ́nɛ́ yɔ́ɔyɔ Daadáa a mbaá mo déŋébíe, odɛ́nɛ́ yɔ́ɔyɔ a mbaá lɛ hɔ́ɔ aŋa Asaŋa a mbaá mo dɔ́ŋɛ́nɔ́. Ɛsɔ́mɔ hámɛ go biimbó bá boolímínyí biimée hɛ́ lɔ́mɔ́ nɔ́ɔnɔ.

¹⁸Aáŋa mɔtɔ a mba lɛ́ ancábáalú gɔ́ɔgɔ Asaŋa a mbaá mo dɔ́ŋɛ́nɔ́, a dɛ hóámá a dɛ ɔsɛ́gɔ́. Mɔ́ɔnyɔ a mbaá ŋá a gá lɛ́ a dɛ ancábá, bá dɛ gɔnɔ́ mo anca.

¹⁹Buencí bó do báá akɛ́ boóma, tɔ́nɔ kanɛ goancaba a dɛ báá akɛ́ boóma. Bɔ́ɔbɔ bó lɔ́mɔ́ na ndénégé bó lɔ́mɔ́ gobeŋe bɛlɔsɛnɔ bá Asaŋa.

²⁰Ŋgáa onyɔ moánɛ a lɔbɛnɔ naá odɛ́nɛ́ yɔ́ɔyɔ a mbaá lɔ́mɔ́ hɔ́ɔ cóá gɔ́ɔgɔ Asaŋa a mbaá mo dɔ́ŋɛ́nɔ́.

²¹Aáŋa o mba lɛ́ gɛɔlɛ́ gɔ́ɔgɔ Asaŋa a mbaá go dɔ́ŋɛ́nɔ́, o do ɛ́dá go yóbimidono; kanɛ́ tɔ́nɔ pɛ́ ya go bédúgune yɛ amɔ́ ɛ bɛ́ɛmba, o laba go yɛ́.

²²Kɔ́ɔ, gɛɔlɛ́ gɛ́ɛgɛ Asaŋa a dɔ́ŋɛnɔmɔ́ go go bɛ́ɛmba uŋgolímínyí, a lɛ́ gɛɔ́ndɔ gá Daadáa; caŋa mmue, mɔ́ɔnyɔ Asaŋa a mo dɔ́ŋɛnɔmɔ́ go go bɛ́ɛmba uŋgolímínyí, mɔ́ɔ kanɛ go bɛ́ɛmba naá boɔlɛ́, ɛ ɛ́ ɛ́yá gɛɔlɛ́ gá Kilítusu.

²³Asaŋa a mba soáa bɔ́ɔbɔ bó mbaá lɔmɔ́ bó úhene go go nyó fáŋa; no do ɛ́yá kanɛ́ bɛɔlɛ́ bá mɔtɔ uncodío.

²⁴Bolimóní, ŋgáa onyɔ moánɛ a lɔbɛnɔ naá busío bá Asaŋa naá odɛ́nɛ́ yɔ́ɔyɔ a mbaá lɛ́ kɔ́ɔ gɔ́ɔgɔ a mbaá mo dɔ́ŋɛ́nɔ́.

²⁵Go bɔ́ɔbɔ bó núunemú bɛgona, cɛ bɛanánáa gɛlɔsɛnɔ gá Daadáa go bɔ́; kanɛ́ go busío bá goŋaá Daadáa a lɛ́ ŋgɛ́náalú mahana, ndɛ́ mɔtɔ ba pídefide, mbééníŋínyí yamɛ yɛ́ nnyó oyanɛnamɔ́.

²⁶Go bɛdɔmbɔ bɛ́ɛbɛ bɛ́ lɔ́mɔ́ godɔ́ɔdɔ, yɔmɔ́ɔ ŋgɛ́nana goŋaá bó lɛ́ bese makɔ́nɔ́ goŋaá onyɔ moánɛ a lɔbɛnɔ naá odɛ́nɛ́ yɔ́ɔyɔ mɔ́ɔ moatɛ́ a mbií iyídé.

²⁷Aáŋa o lɛ́ giŋénéelú na okɔ́dɔ, o do fúmbée go ádogana nɛhɛ́; aáŋa o do báá giŋénéelú, lɔbɛ́nɔ ogona.

²⁸Kanɛ́, go amɔ́ giŋene, o do á gá lɔgɔ́. Ogona ba okɔ́dɔ a amɔ́ a giŋene, a dɛ á gá lɔgɔ́. Begiŋénú bá ŋga háánánáa go kélemenene bilúututu bá bɛdɔmbɔ; gɔ́ɔ, yɔmɔ́ɔ púmbemú goŋaá no bɛ́ ásɛgɛna.

²⁹Bolimóní, ŋgoyamɔ́ caá: gɛcamɛna gɛ́ lɛ́ gigúi. Gó bayɛga godɔ́ɔdɔ, ŋgáa mɔ́ɔnyɔ a lɔ́mɔ́ na okɔ́dɔ, ɔ ɔyɔ aŋa a lɛ́ kanɛ okɔ́dɔ;

³⁰báaba bá baŋamɔ́, bɔ́ ɔyɔ aŋa bá dɛ baŋáa; báaba bá yaŋamɔ́, bɔ́ ɔyɔ aŋa bá dɛ yaŋáa; báaba bá ɔ́ndɔmɔ́ moóma, bɔ́ ɔyɔ aŋa báaba bá lɔ́mɔ́ bá dɛ bɛanánáa.

³¹Báaba bá lɔ́mɔ́ go go fúmbe bonɔ́mɛ bá cí yɛ́ɛyɛ, bɔ́ ɔyɔ aŋa bá dɛ bɛanánáa; mammana, cí yɛ́ɛyɛ ɛ dɛ báá gɔnɔ́ go gɛntaálala gá gɛcamɛna.

³²Cɛ lɛ́gálɛ́gáa goŋaá no gɔnɔ go ɛ́da go yóbimidono. Ogona, a yóbimidono go buelí bá Daadáa; a yɔgɔnɔ goŋaá a bɛ́ɛmba bese naá busío bá Daadáa.

³³Kanɛ́ mɔ́ɔnyɔ a lɔ́mɔ́ giŋénéelú, a yóbimidono go masɔ́mɔ má cí yɛ́ɛyɛ; a yɔgɔnɔ goŋaá a bɛ́ɛmba bese naá busío bá ogɛ́;

³⁴a lɛ go bɛ́ɛmba mɔ́ɔ mokáa, pɛ́ ɛ́handɛ́. Caŋa táŋɛ́ mmue, ogona ba okɔ́dɔ na ombóla bá yóbimidono go buelí bá Daadáa, go goŋaá bá fúmbe go bɛ́ɛmba sɔgɔ́nɔ naá nnyɔ́dɔ na naá mbééníŋínyí sábɔ́. Okɔ́dɔ mɔ́ɔnyɔ a lɔ́mɔ́ giŋénéelú, a yóbimidono go masɔ́mɔ má cí, a yɔgɔnɔ goŋaá a bɛ́ɛmba bese naá busío bá onɔ́mɛ.

³⁵Bó do báá ɛdámbɔ hɛ́ nnyó dámbɛnanamɔ́, aáŋa kálagala nɔ́ɔnɔ; bó lɔ́mɔ́ go bese yɛnyɔ́ ya moatɛ́, go goŋaá no ŋanana bɔ́ɔbɔ bó dómbamɔ́ bese, no gɛ́ga báladáalú na Daadáa na odɛ́má yɛ́nyɔ́ uŋkimée uŋkimée.

³⁶Aáŋa ohaŋa a húmenye odɛ́má makɔ́nɔ́ go gɛɔŋɛnɔ gɛ́hɛ́, naá nnyimé hɔ́ɔlɔ́ a lɛ go ɛ́ná goŋaá a gaá mo palábɛ́ná, gɔnɔ́ masɔ́mɔ má go lada nɛbáná nábɔ́ má ɛ́dana naá busío, ŋgáa a ŋa aŋa odɛ́má yɛ́hɛ́ yó mo oyanɛnamɔ́. A dɛ lɔgɔ́ɔ, ŋgáa bá giŋene.

³⁷Kanɛ́ ohaŋa mɔ́ɔnyɔ a bɛ́ɛmbamɔ́, kanɛ gɛgaŋa, a báá bágálɛ́dɛ́ná naá odɛ́má yɛ́hɛ́ goŋaá a dɛ háánánáa go palabɛna gɛɔŋɛnɔ gɛ́hɛ́, a amɔ́ a hóda go bégumbene, mɔ́ɔnyɔ moánɛ a ŋanana bese.

³⁸Náana, ohaŋa mɔ́ɔnyɔ a giŋemú gɛɔŋɛnɔ gɛ́hɛ́, a ŋanana bese; kanɛ́ mɔ́ɔnyɔ inyemú go giŋene a á ŋa bese gó báá dómbáa.

³⁹Okɔ́dɔ a háanana go gɛ́ga báladáalú na onɔ́mɛ gɛcamɛna giimée gɛ́ɛgɛ a gɔ́ ɔyɔmɔ́. Onɔ́mɛ a amɔ́ a gúe, a lɛ́ ba go gɔnɔ giŋene akɛ́ na ánɛ́ɛ mɔ́ɔnyɔ a lɛ́galɛgamɔ́; ba ndiemi a bɛ́ɛmba kɛlɛ́tɛnɛ.

⁴⁰Kanɛ́ naá gámɛ goɛ́na, bó lɛ́ bese nɛhɛ́ makɔ́nɔ́ a lɔbɛnɔ nɔ́ɔnɔ; yɔmɔ́ɔ tɔ́nɔ mbɛanana Giliíli ba Asaŋa.