Read Nugunu 1 Kɔlɛ́ntɛ 8 Bible Online

1 Kɔlɛ́ntɛ 8 - Nugunu bible

1 Kɔlɛ́ntɛ 8

¹Go bɔ́ɔbɔ bó núunemú nnyama sɛ́ɛsɛ bá sómbamɔ́ go biséégé bá moɔcɔ, dɛ lɛ́ ukelú goŋaá dɛ bɛanana bɛɛcɔ́ɔ biimée goíyime gɔ́ɔgɔ hɔ́ɔ[20]. Kanɛ́ goíyime gɔ́ɔgɔ gó ŋanana goŋaá mɔtɔ a béségi; gɛnɔ́ɔ́nɛ́nɔ́ gɛ́, gɛ́ gíndenye giimbó.

²Aáŋa mɔtɔ a béeniŋenye a amɔ́ i íyimene boóma, a gá lɛ́ a dɛ íyímé aŋa gó háananamɔ́ go íyime.

³Mɔ́ɔnyɔ a maamanamɔ́ Asaŋa, Asaŋa a mo íyimene.

⁴Gɔ́ɔ mɔtɔ a lɛ́ ba go nyáa mesugé má nnyama sá biséégé bá moɔcɔ o? Dɛ íyimene goŋaá naá cí háalá, moɔcɔ mó do dúgúnée mɔtɔ go boóma; gɔnɔ́ Asaŋa a lɛ́ táŋɛ́ ummue, uncodío a dɛ báá.

⁵Gɔgɔ́ akɛ́ aŋa bɛlogaloga bá baasaŋa bɛ́ lɔ́mɔ́ hɔ́ɔ naá mmoɛná na naá cí, moatɛ́ bɛ́ lɛ́ hɔ́ɔ gɛca na badaadáa gɛca,

⁶kanɛ́ go busío bɛ́cɔ́, Asaŋa a lɛ́ táŋɛ́ ummue, Isée mɔ́ɔnyɔ buimée bó ɛ́damɔ́ go úlene naá mɔ́ɔ, mɔ́ɔ dɛ ɔyɔmɔ́ gɛ́hɛ́; gɔnɔ́ Daadáa a lɛ́ táŋɛ́ ummue, Yésu Kilítu, mɔ́ɔnyɔ buimée bó mbaá bégedíe nɛhɛ́, dɛ gɔnɔmɔ́ go ɔyɔ gɛ́hɛ́.

⁷Kɔ́ɔ, batɔ biimée bá dɛ bɛanánáa goíyime gɔ́ɔgɔ. Bóncodío báaba bá gá lɔ́mɔ́ na go ɛ́da go úlukie naá gɛɔyɔ gá biséégé bá moɔcɔ, bá béeniŋenye bá amɔ́, gɔ́ɔgɔ bá nyáamɔ́ nnyama sɛ́ɛsɛ hɔ́ɔ, báá budée. Bá béeniŋenye nɔ́ɔnɔ, goakɛ́ nciŋí yabɔ́ ɛ gá lɛ́ kanɛ go gónɛna.

⁸Bó do báá boóma bá go nyáa bɔ́ bó gaá ná ŋaáa goŋaá dɛ báyɛkɛna Asaŋa. Akɛ́ dɛ bó nyáa, boóma bá go bégídene naá gɛɔyɔ gɛ́cɔ́ bó do báá. Akɛ́ dɛ dɛ nyáa, boóma bá go úlukie naá gɛɔyɔ gɛ́cɔ́, bó do báá[21].

⁹Kanɛ́ bɛɛnyɔ́ɔ báaba no bɛananamɔ́ nɛgaŋa ná go ŋanana akɛ́ ŋkádɛ́, bébeŋéemú goŋaá no do bɛ́ɛ́mbá gikumí go báaba bá gá lɔ́mɔ́ doɛndá lɛbɛlɛbɛ.

¹⁰Ɛɛ́ɛŋ, maamɔ́ mɔ́ɔnyɔ o lɔ́mɔ́ na goíyime, sɔ́gɔ́ɔ mɔ́ɔnyɔ a lɔ́mɔ́ doɛndá lɛbɛlɛbɛ a amɔ́ a go gídemú ndukíi naá gɛɔ́fɔ o nyáanana nnyama sá biséégé bá moɔcɔ, ábɔ, bó do gaá mo dómá tɔ́nɔ go go nyáa o?

¹¹Kɔ́ɔ, goíyime gáhɔ go gaá ŋaáa goŋaá tɛ́ɔbɛnɔ mɔ́ɔnyɔ a gá lɔ́mɔ́ doɛndá lɛbɛlɛbɛ a yíme, asáa gɔgɔ́ Kilítusu a mba gúé go busío bɛ́hɛ́.

¹²Aŋa no ŋananamɔ́ bobɛ́ nɔ́ɔnɔ naá boayá bá bolimóní bɛ́nyɔ́, no díeŋenye nciŋí yabɔ́ yɛ́ɛyɛ ɛ gá lɔ́mɔ́ kanɛ go gónɛna, no do íyíménée no amɔ́, naá boayá bá Kilítusu bɔ́ no lɔgɔmɔ́ o?

¹³Go busío moánɛ aáŋa boóma bá go nyáa bó gaá ŋaáa goŋaá ondimóní bamɛ o oba naá gɛlɔgɔ, ŋginye go nyáanana busugé go busío buimée, gó dómba goŋaá mmo ubie naá gɛlɔgɔ.