Read Nugunu 1 Kɔlɛ́ntɛ 9 Bible Online

1 Kɔlɛ́ntɛ 9 - Nugunu bible

1 Kɔlɛ́ntɛ 9

¹Ábɔ, cɛ báá na nɛgaŋa ná go ŋanana bɔ́ɔbɔ ndɛ́galɛgamɔ́ o? Ábɔ, cɛ báá apótɛlɛ o? Ábɔ, ndɛ́ kanɛ go ɛ́na Yésusu, Daadáa bɛcɔ́[22]o? Ábɔ, bɛɛnyɔ́ɔ moatɛ́ no do báá buelí bá ombɔ́gɔ yámɛ naá Daadáa o?

²Kanɛ́ bó lɔ́mɔ́ nɛɛ́nɛ? Aáŋa bóncodío bí inyene go oliminyo goŋaá ndɛ́ apótɛlɛ, bɛɛnyɔ́ɔ no háanana go olimonyo goŋaá ndɛ́ nɔ́ɔ. Ɛɛ́ɛŋ, go buelí bámɛ naá Daadáa, bɛɛnyɔ́ɔ no lɔ́mɔ́ gieninye gá bɔ́.

³Náana gɔ́ɔ kundenyemú báaba bá kálagalamɔ́ go dobɛ́:

⁴Ábɔ, dɛ dɛ bɛanánáa nɛgaŋa ná go nyáanya na ná go nyóanana o?

⁵Ábɔ, dɛ dɛ bɛanánáa bɛɛcɔ́ɔ tɔ́nɔ nɛgaŋa ná go gɔ́lɔ, na onyɔ moánɛ, okɔ́dɔ mɔ́ɔnyɔ a lɔ́mɔ́ uŋgolímínyí, aŋa baapótɛlɛ báaba bóncodío, aŋa bolimóní bá Daadáa, ɛ́na akɛ́ aŋa Sɛ́fasɛ[23] o?

⁶Ábɔ, bó lɔ́mɔ́ goŋaá, goana yɔmɔ́ɔ na Banábasɛ[24], báa dɛ sɛmɛgananamɔ́ go yɔgɔnɔ na ɛmbɔ́gɔ yɛcɔ́ dɛ lɛ go nyáa o?

⁷No á manɛ́ go ɔ́bɔ áhanɛ́ɛ goŋaá mɔtɔ a yɔgɔnɔ buelí bá busimbi mɔ́ɔ moatɛ́ a básoɛnanɛna o? Ánɛ́ɛ a lɔ́mɔ́ ba go góna bogónɛ́dá a lɔbɛnɔ a dɛ nyáá bɛsamɔ́ bá bɔ́ o? Ɛ́na lí, ánɛ́ɛ a lɔ́mɔ́ ba go beŋebeŋe bidúgé a lɔbɛnɔ a dɛ bédúgée na mabáanyɛ má bɛ́ o?

⁸Moóma mɔ́ɔmɔ mó do báá goana nɛkɛsa ná batɔ, gicele gɛ́ oya nɔ́ɔ caŋa mmue.

⁹Ɛɛ́ɛŋ, bó lɛ́ ɔ́ŋɔ́ɔlú naá kálata ya gicele ya Mɔ́sɛsɛ goŋaá: «Anáa gúlúge ɛ yɔgɔnɔmɔ́, o do yɛ legé go bákɛ́bɛda mefuge[25].» Kɔ́ɔ Asaŋa a dɛ yóbímídónóo goana go gúlúge.

¹⁰Aáŋa a gálagala nɔ́ɔnɔ, bó lɔ́mɔ́ go busío bɛ́cɔ́ goana. Mammana, bó lɔ́mɔ́ ɔ́ŋɔ́ɔlú nɔ́ɔnɔ go busío bɛ́cɔ́, goakɛ́ aŋa uyogóní a sɛmamɔ́ odɛ́má go buelí bɛ́hɛ́, nɔ́ɔnɔ caŋa mmue mɔ́ɔnyɔ a sáŋamɔ́ a sɛma odɛ́má go go bɛa bɛ́hɛ́ bodáŋɔ.

¹¹Aáŋa dɛ á gónáa go busío bɛ́nyɔ́ besé sɛ́ɛsɛ Giliíli a fáananamɔ́, ábɔ, gibinye gɛ́ gaá bɛ́ɛ́mbá hɔ́ɔ dɛ amɔ́ dɛ sáŋa buelí bá ɛmbɔ́gɔ yɛnyɔ́[26] o?

¹²Aáŋa bóncodío bá bɛanana nɛgaŋa ná go ŋanana nɔ́ɔ naá boayá bɛ́nyɔ́, goakɛ́ bɛɛcɔ́ɔ dɛ lɔ́mɔ́ dɛ dɛ bósó ba go ŋanana nɔ́ɔ dɛ dúmbidinye o? Kɔ́ɔ bɛɛcɔ́ɔ dɛ lɛ́ kanɛ go ŋa boóma aŋa bɔ́ɔbɔ nɔ́ɔnɔ, kanɛ́ dɛ gɔ́lɔnɔ gɛdɔmbɔ go buimée go goŋaá mɔtɔ a dɛ ágá gɛmbɛ́ná, i inye go oliminyo Gɛnɔ́gɔ́ gá Cɔ́mɔ gá Kilítusu.

¹³No íyimene bese goŋaá batɔ báaba bá yɔgɔnɔmɔ́ naá nnyaŋá ya Asaŋa bɔ́ ɔyɔmɔ́ na buelí moánɛ, báaba bá yɔgɔnɔmɔ́ naá gɛdálɛ́ná bá bɛanana bodáŋɔ naá bɛbáágá bɛ́ɛbɛ bá ncomɔ́ fáanana kɔ́ɔ.

¹⁴Caŋa mmue, Daadáa a mba fáá báaba bá yɔgɔnɔmɔ́ buelí bá go dúmenye Gɛnɔ́gɔ́ gá Cɔ́mɔ nɛgaŋa ná go ɔyɔ na buelí moánɛ[27].

¹⁵Kanɛ́ yɔmɔ́ɔ ndɛ́ kanɛ go ŋa boóma akɛ́ bá búmmue naá moóma mɔ́ɔmɔ, gɔ́ɔ cɛ ɔ́ŋɔ́ɔ kálata yɛ́ɛyɛ goŋaá ŋgúhene boóma. Bese kúe! Naá pɛ́ yɛ́ɛyɔ, mɔtɔ a dɛ ŋgá bɔgɔ nigúmi námɛ.

¹⁶Go busío bámɛ, go dúmenye gá Gɛnɔ́gɔ́ gá Cɔ́mɔ gó do báá boóma bá go bákanya, bó lɛ́ ndénégé yɛ́ɛyɛ ɛ kódamɔ́. Gɛbɛ́ makɔ́nɔ́ namɛ amóŋa cɛ dúményée Gɛnɔ́gɔ́ gá Cɔ́mɔ!

¹⁷Aáŋa nyɔgɔnɔ buelí bɔ́ɔbɔ go yɔmɔ́ɔ moatɛ́, gásɛ́ káanana na bɛsoɛná; kanɛ́ aáŋa gɛgaŋa gɛ́ ndɔ́mɔ́ hɔ́ɔ, bó lɛ́ gɛnóɛ́ gɛ́ɛgɛ bá mbaá tóɛ́gɛ́ná.

¹⁸Bɛsoɛná bámɛ bɛ́ lɔ́mɔ́ kanɛ́ ŋkádɛ o? Bɛ́ lɔ́mɔ́ goŋaá túmenye Gɛnɔ́gɔ́ gá Cɔ́mɔ go dugúnú, cɛ úhúné akɛ́ boóma bɔ́ɔbɔ gɛ́ páananamɔ́ nɛgaŋa ná go bó bɛa.

¹⁹Ɛɛ́ɛŋ, cɛ báá akɛ́ gɛɔlɛ́ gá mɔtɔ ummue, kanɛ́ aáŋa mmba bííyíe gɛɔlɛ́, bó lɔ́mɔ́ goŋaá kɔ́gɛdɔ gɛcɛcá gá batɔ naá Kilítusu.

²⁰Mmba lɛ́ na Beyúdene ŋgɔyɔ nabɔ́ aŋa ba Beyúdene, goŋaá mbó bɔ́gɔ́gɛdɛnɔ. Mmba lɛ́ na báaba bá lɔ́mɔ́ bɛɔlɛ́ bá gicele aŋa yɔmɔ́ɔ moatɛ́ ndɛ́ nɔ́ɔ, asáa gɔgɔ́ cɛ bɛ́ɛ́mbá nɔ́ɔ, go go bɔ́gɔ́gɛdɛnɔ báaba bá lɔ́mɔ́ bɛɔlɛ́ bá gicele.

²¹Mmba lɛ́ na báaba bá lɔ́mɔ́ kanɛ gicele aŋa yɔmɔ́ɔ moatɛ́ ndɛ́ nɔ́ɔ, asáa gɔgɔ́ ndɛ́ na gicele gá Asaŋa, goakɛ́ Kilítusu a lɔ́mɔ́ gicele gámɛ; bó mbaá lɛ go go bɔ́gɔ́gɛdɛnɔ báaba bá lɔ́mɔ́ kanɛ gicele.

²²Mmba lɛ́ na batɔ báaba bá lɔ́mɔ́ kanɛ magɛ́nda aŋa yɔmɔ́ɔ moatɛ́ ndɛ́ nɔ́ɔ, goŋaá mbó bɔ́gɔ́gɛdɛnɔ. Mmba bííyíe buimée go biimée go goŋaá akɛ́ nɛɛ́nɛ kɔ́gɛdɔ nɛnamá naá Asaŋa, a bó sódio.

²³Kanɛ́ buimée bɔ́ɔbɔ, mbó ŋanana go busío bá Gɛnɔ́gɔ́ gá Cɔ́mɔ, goŋaá mbɛa bodáŋɔ kɔ́ɔ.

²⁴No íyimene bese goŋaá batɔ báaba bá lɔ́mɔ́ go gɛáyɛna gá odɛ́dá bá díine biimée naá nnyaáŋgadɛ́ɛ, kanɛ́ ummue táŋɛ́ a áyɛnanamɔ́. Díínée nɔnɔ kanɛ́ mbɔ́dɔ ya goŋaá no áyɛna.

²⁵Batɔ bá gɛáyɛna biimée bá báfáanana duséésényée mbɔ́dɔ mbɔ́dɔ. Bɔ́ɔ, bó lɔ́mɔ́ go bɛsoɛná bá kanɛ go líhe, bɛɛcɔ́ɔ, bó lɔ́mɔ́ go bɛsoɛná bá go líhe kanɛ mmanɛ́náa.

²⁶Yɔmɔ́ɔ, tíine, kanɛ́ caá akɛ́ aŋa ugélígeli; nnoanana, kanɛ́ bibúme bámɛ bɛ́ dɛ obánáa go cí.

²⁷Yɔmɔ́ɔ nnyogonyo nnyɔ́dɔ yamɛ na bogaaga, nyɛ nona aŋa gɛɔlɛ́, goŋaá naá nnyimé ya go dúmeninye basɔ́gɔ́ɔ Gɛnɔ́gɔ́ gá Cɔ́mɔ, bá dɛ ɛ́yá ba go tóŋona yɔmɔ́ɔ moatɛ.