Read Nugunu 2 Kɔlɛ́ntɛ 10 Bible Online

2 Kɔlɛ́ntɛ 10 - Nugunu bible

2 Kɔlɛ́ntɛ 10

¹Yɔmɔ́ɔ Póolo moatɛ́ moatɛ, ŋgaá nyó bósógólídío na bopɔ́ɔ na gɛnɔ́gɔ́ gá odɛ́má aŋa yá Kilítusu, yɔmɔ́ɔ mɔ́ɔnyɔ ndɔ́mɔ́ go gooya gá batɔ, cɛ otógánáa gɔ́ɔgɔ ndɔ́mɔ́ naá busío bɛ́nyɔ́, kanɛ́ na odɛ́má golala gɔ́ɔgɔ ndɔ́mɔ́ halaháláa nɛnyɔ́;

²sɔ́kɔlɛ, no do ŋaáa goŋaá gɔ́ɔgɔ kaá nú úlé hɔ́ɔlɔ́, mbɛ́ɛmba na odɛ́má golala nɛnyɔ́. Mammana ndɛ́galɛgamɔ́ go nyó dúfie na nigégé niimée go batɔ bóncodío báaba bá béeniŋenyemú bá amɔ́, buelí bɔ́ɔbɔ dɛ yɔgɔnɔmɔ́ bó lɔ́mɔ́ go nobóda ná moóma má cí.

³Dɛ lɛ́ batɔ bá bɛnamá, kanɛ́ nɛnoa nɛ́ɛnɛ dɛ noananamɔ́, nɛ́ dɛ bósó naá mbɔ́dɔ ya batɔ bá bɛnamá.

⁴Bɛlɛŋɔ bɛ́ɛbɛ dɛ noananamɔ́ na bɛ́, bɛ́ dɛ bósó ugedíe yá batɔ, Asaŋa mɔ́ɔ a có bɛ́ fáananamɔ́. Kɔ́ɔ bɛ́ lɔ́mɔ́ na bogaaga bá go gada mogága akɛ́ móhanɛ́ɛ. Dɛ gada megélégélíe má bagayagáyáa,

⁵na gobébúlugenye gábɔ́ guimée gɔ́ɔgɔ gó legenemú goŋaá batɔ bí íyime Asaŋa. Dɛ yɔgɔnɔ mbééníŋínyí sá batɔ goŋaá bɛ́ ɛ́da go ɔ́bɛnɔnɔ na Kilítusu.

⁶Gɔ́ɔgɔ no ná ŋamɔ́ no báa go ɔ́bɛnɔ Kilítusu go busío buimée, dɛ ná bɛ́ɛmba pɛnɛ́ɛ go go séesenye biimée báaba bá mo ŋananamɔ́ edúu.

⁷Núúnée nɔnɔ moóma go busío. Aáŋa mɔtɔ a lɛncana mammana goŋaá ɔ ɔ́bɛnɔnɔ na Kilítusu, ŋgáa a dómba go lɛnca goŋaá bɛɛcɔ́ɔ tɔ́nɔ dɛ ɔ́bɛnɔnɔ nɛhɛ́.

⁸Moatɛ́ akɛ́ mbéségi túmbidinye go gɔ́ɔgɔ Daadáa a lɔ́mɔ́ páalú nɛgaŋa ná go nyó gíndenye naá pɛ́ yɛhɛ́, caá akɛ́ nɛ́ɛnɛ ná go nyó gada, cɛ bósó ba go nóa odóɛ.

⁹No do gɔ́lɔ́ no amɔ́ bakálata báaba nnyó ɔ́ŋɔnɔmɔ́ bá lɔ́mɔ́ go go nyó degedenye;

¹⁰aŋa batɔ bá gálagalamɔ́ bá amɔ́, bakálata bɛ́hɛ́ bá nóa, bá lala. Kanɛ́ gɔ́ɔgɔ u úlemú mɔ́ɔ moatɛ́, a lɛ́ fágɔfágɔ, dogálɔ dɛ́hɛ́ boóma bá dugúnú.

¹¹Kanɛ́ báaba bá gálagalamɔ́ nɔ́ɔnɔ, ŋgáa bí íyime bese bá amɔ́, aŋa dɛ lɔ́mɔ́ naá dogálɔ dɔ́ɔdɔ naá bakálata bɛ́cɔ́, halaháláa, dɛ lɔ́mɔ́ tɔ́nɔ nɔ́ɔ aŋa dɛ lɔ́mɔ́ hɔ́ɔ tɛ́nɛ́ɛ, naá meŋiigíe mɛ́cɔ́.

¹²Mammana dɛ dɛ báá na nigégé go go báágana naá odɛ́nɛ́ ɛ́na go go bédide na batɔ bóncodío báaba bá bóoyoyamɔ́ bɔ́ɔ bá moatɛ́. Bá bɔ́gɔ́lɔnɔ bɔ́ɔ bá moatɛ́ moatɛ go gieninye, bá gɔnɔ bédide na bɔ́ɔ moatɛ́; goŋanana gábɔ́ gɔ́ɔgɔ gó dúfenye goŋaá nciŋí yabɔ́ ɛ lɛ́ mbúdíi.

¹³Kanɛ́ go busío bɛ́cɔ́, dɛ dɛ gɛɛ́ ɛ́dá go báfáanana ufíno dɛ dómba ombálá; ombálá yɛ́cɔ́ yá buelí yó lɔ́mɔ́ yɔ́ɔyɔ Asaŋa mɔ́ɔ moatɛ́ moatɛ a lɔ́mɔ́ có sómbɛ́náalú, dɛ nco bola naá bɛɛnyɔ́ɔ.

¹⁴Ɛɛ́ɛŋ, dɛ dɛ á gá bácaá ombálá yɛ́cɔ́ yá buelí, aáŋa bó lɛ́ goŋaá dɛ dɛ á gá ncó bola naá bɛɛnyɔ́ɔ. Dɛ á ncó bola mammana batɔ bá busío naá bɛɛnyɔ́ɔ go go dúmenye Gɛnɔ́gɔ́ gá Cɔ́mɔ gá Kilítusu.

¹⁵Dɛ amɔ́ dɛ béségimú go buelí bɔ́ɔbɔ basɔ́gɔ́ɔ bóncodío bá ná yɔgɔ́nɔ́ɔ, gásɛ́ bɛyaŋa bɛ́cɔ́ bɛ́ dɛ bá mammana. Kanɛ́, dɛ sɛmamɔ́ odɛ́má goŋaá gɔ́ɔgɔ gioliminyo gɛ́nyɔ́ gɛ́ gaá nɛ́ ɛ́dánáa naá busío gɛ́ goma, buelí bɛ́cɔ́ tɔ́nɔ bó gɛɛ́ ɛ́dánáa naá busío bó goma naá bɛɛnyɔ́ɔ, kanɛ go báca ombálá yɔ́ɔyɔ bá mbaá có sómbɛ́ná[21].

¹⁶Nɔ́ɔnɔ, dɛ gɛɛ́ ɛ́dánáa naá busío, dɛ dúmenye Gɛnɔ́gɔ́ gá Cɔ́mɔ naá bigísi bá cí bɛ́ɛbɛ bɛ́ lɔ́mɔ́ boayá búunú nɛnyɔ́, kanɛ go béségi na buelí bá basɔ́gɔ́ɔ bóntió bɔ́ɔbɔ bá yɔgɔnɔmɔ́ naá ɛmbálá yɛ́ɛyɛ ɛ lɔ́mɔ́ yabɔ́.

¹⁷Ŋgɔ́ŋɛ́ yɛ oya yɛ amɔ́: «Mɔ́ɔnyɔ a béségimú, ŋgáa a béségi naá Daadáa[22].»

¹⁸A dɛ bósó mɔ́ɔnyɔ a bóoyoyamɔ́ mɔ́ɔ ba moatɛ́, mɔ́ɔ a fɛɛnanɛnamɔ́ Daadáa, kanɛ́ a lɔ́mɔ́ mɔ́ɔnyɔ Daadáa a mo ségimú.