Read Nugunu 2 Kɔlɛ́ntɛ 11 Bible Online

2 Kɔlɛ́ntɛ 11 - Nugunu bible

2 Kɔlɛ́ntɛ 11

¹Ɛɛ́ɛŋ, mmɛnáamɔ́ nɔnɔ ginumpé, kaá gálágáláa aŋa uŋgegeegúu; akɛ́ nɔ́ɔnɔ, mmɛnáamɔ́ nɔnɔ ginumpé.

²Go busío bɛ́nyɔ́, ndɛ́ na hɛɔtɛ aŋa hɛ́ɛhɛ há Asaŋa; mmba nyó dánɛ́ná nɛbáná na mɔtɔ táŋɛ́ ummue mɔ́ɔnyɔ a lɔ́mɔ́ Kilítusu. Gɔ́ɔ, ndɛ́galɛgamɔ́ go nyó mo sɛncɛgɛna aŋa gimúkúkúu gá ombóla kanɛ biílo.

³Kanɛ́, aŋa nnyɔ́gɔ ɛ mbaá belé Ɛ́fa, ndɛ́ na bofoá goŋaá mbééníŋínyí sɛ́nyɔ́ sɛ́ dɛ ɛ́dá halaháláa na mammana ya pɛ́ ya Kilítusu[23].

⁴Ɛɛ́ɛŋ, gɔ́ɔgɔ mɔtɔ a nyó oyanamɔ́ Yésusu kókáa na mɔ́ɔnyɔ dɛ mbaá nyó oyáná, ɛ́na no báá gɔ́lɔ́ giliíli kókáa na gɛ́ɛgɛ no mbaá bɛáa, ɛ́na lí no báá gɛ́ndɛ́gɛ́ná Gɛnɔ́gɔ́ gá Cɔ́mɔ kókáa na gɛ́ɛgɛ no mbaá bɛáa, no lama no mo oliminyo.

⁵Mbéeniŋenye caá batɔ báaba no gɔ́lɔnɔmɔ́ no amɔ́ bá lɛ́ bɛantáanta bá baapótɛlɛ, bá dɛ tómbánáa go boóma.

⁶Bó lɛ́ mammana, naá bugélí, cɛ báá boóma, kanɛ́ naá goíyime, bó lɛ́ boóma búntió. Dɛ mba nyó bó dúfényée nɔ́ɔnɔ daŋɛ́daŋɛ, mbɔ́dɔ iŋkimée.

⁷Ábɔ, bó lɛ́ giédie aŋa gɔ́ɔgɔ yɔmɔ́ɔ moatɛ́ mmbaá bésiisíe goŋaá bɛɛnyɔ́ɔ no ɛ́ya bɛantáa, aŋa gɔ́ɔgɔ mmbaá nyó oyánɛ́náa Gɛnɔ́gɔ́ gá Cɔ́mɔ gá Asaŋa go dugúnú o?

⁸Íyíme nɔnɔ no amɔ́, gɔ́ɔgɔ mbaá lɛ́ naá bɛɛnyɔ́ɔ, biimbó bá boolímínyí bíntió bɛ́ bɛ́ mbaá bésúénényée go busío bámɛ go go nco yɔgɔnɔ naá bɛɛnyɔ́ɔ.

⁹Akɛ́ aŋa mmbaá lɛ kanɛ bɔ́ naá bɛɛnyɔ́ɔ, cɛ mbá nóɛna mɔtɔ, goakɛ́ bolimóní bá gó ɛ́da go úle naá Masɛdóanɛ, bá mba mbɛɛná buimée bɔ́ɔbɔ mbaá lɛ mbií ya bɔ́[24]. Naá pɛ́ iŋkimée, mmba bébeŋé goŋaá cɛ nyó nóɛ́náa, nɔ́ɔ gɔ́ɔ kaá nɛ́ ɛ́dánáa naá busío mbébeŋebeŋe bese bese.

¹⁰Mammana ya Kilítusu yɛ́ɛyɛ ɛ lɔ́mɔ́ naá yɔmɔ́ɔ, ŋgaá gálɛ́dá caá, naá bɛdɔŋɔ bá Ekeyíi biimée, mɔtɔ a dɛ ŋgá ndege go békelenye.

¹¹Kanɛ́ kálagalamɔ́ nɔ́ɔnɔ goakɛ́? Bó lɔ́mɔ́ goŋaá cɛ nyó maamánáa lí? Akɛ́ɛ, Asaŋa moatɛ́ i íyimene a amɔ́ nnyó maamana!

¹²Bɔ́ɔbɔ ŋŋananamɔ́, nnɛ́ ɛ́dana naá busío mbó ŋanana, go go gɛ́mbɛna bagayagáyáa báaba bá bédúfenyemú bá amɔ́ bá yɔgɔnɔ buelí búmmue eé búmmue nɛcɔ́ pɛ́.

¹³Batɔ bɔ́ɔbɔ, bá dɛ báá bɛmammana bá baapótɛlɛ; bá lɔ́mɔ́ boyogóní bá nonyɛ́ɛna[25], bó oya bá amɔ́ bɔ́ɔ bá lɛ́ baapótɛlɛ bá Kilítusu.

¹⁴Kanɛ́ boóma bá go békúke hɔ́ɔlɔ́ bó do báá; Sátana moatɛ́ a ŋanana nɔ́ɔ bɛcamɛna bíntió, a amɔ́ a lɛ́ ɛ́ŋgɛlɛsɛ ba gise.

¹⁵Gɛsɛnɛ gɛ́ dɛ báá akɛ́ hɔ́ɔlɔ́ go boyogóní bɛ́hɛ́ bá nonyɛ́ɛna báaba bó oyamɔ́ bá amɔ́ bɔ́ɔ bá lɛ́ boyogóní bá botɛ́nɛ́ɛ. Gosúgudinye gábɔ́ gó ŋga bɛ́ɛ́mbá aŋa meŋiigíe mábɔ́.

¹⁶Ŋgaá gɔnɔ́ fitie, mɔtɔ a dɛ kɔ́lɔ́ aŋa giegu. Aáŋa gó do báá nɔ́ɔnɔ, kɔ́lɔ́ɔmɔ́ nɔnɔ aŋa giegu goŋaá yɔmɔ́ɔ tɔ́nɔ mbáá béségí sɔŋɛ.

¹⁷Bɔ́ɔbɔ kaá nó oyɛ́dá, bó do báá bɔ́ɔbɔ Daadáa a lɛ́galɛgamɔ́; kanɛ́ naá buegu mmoɛná, ŋgíyimene mammana odóɛ yá boóma yɔ́ɔyɔ mbéségimú go yɔ́.

¹⁸Aŋa bó lɔ́mɔ́ goŋaá batɔ gɛca bá béségi go buelí bábɔ́ bá batɔ bá bɛnamá, yɔmɔ́ɔ tɔ́nɔ kaá béségíi.

¹⁹Bɛɛnyɔ́ɔ báaba no lɔ́mɔ́ benciŋínciŋi, no dɛ́ɛnana naá kadɛ́gadɛ́ɛ yɛnyɔ́ batɔ báaba bá lɔ́mɔ́ naá gonana.

²⁰No bádɛ́ɛnana bá nyó íyenye bɛɔlɛ́, bá nyó nyɛ́ɛna, bá nyó yeyune, bá nyó fánɛnafanɛna, bá nyó míneminie.

²¹Ŋgoó oyɛ́dá caá bó lɛ́ odóɛ gonóa; bó lɛ́ aŋa dɛ á dúfíe bonɔ́nɔ́ bɛ́cɔ́. Asáa gɔgɔ́ bɔ́ɔbɔ mɔtɔ a lɔ́mɔ́ ba go lama a ŋa, yɔmɔ́ɔ tɔ́nɔ ndɛ́ ba go lama ŋŋa, kálagala nɔ́ɔnɔ aŋa giegu.

²²Bá béfínenye Beyúdene? Yɔmɔ́ɔ tɔ́nɔ ndɛ́ ba Beyúdene. Ba béfínenye batɔ bá Ɛ́sɛlahɛ́ɛlɛ? Yɔmɔ́ɔ tɔ́nɔ ndɛ́ mɔtɔ ba Ɛ́sɛlahɛ́ɛlɛ. Bá béfínenye naá nogɔgɔ́ ná Ábalaháma? Yɔmɔ́ɔ tɔ́nɔ ndɛ́ nɔ́ɔ[26].

²³Bá amɔ́ bɔ́ɔ bá lɛ́ boyogóní bá Kilítusu? Mbáá gálɛ́dá kanɛ́ aŋa giegu caá: yɔmɔ́ɔ tómbana nɔ́ɔnɔ. Naá bɛdɔmbɔ, bámɛ bɛ́ dómba. Naá ncíbo sá gɛaŋɔ́, gámɛ ɛŋɛndɔ kanɛ ombanɔ. Go megidenine, hɔ́ɔlɔ́ cɛ banáa. Naá bɛɛmba bá nigúe, bámɛ bɛ́ dómba.

²⁴Bagɔ́nɔ́ɔ bá Beyúdene bá bíí íŋéné bogaaga, bá báá cóáláa ɛlɔŋɔ ya bɛságɔ nitíno na buinyo ná bínni, nɔ́ɔnɔ ɛŋɛndɔ ɛtáanɔ,

²⁵ɛŋɛndɔ ɛdadɔ́ bá báá cóáláa bɛságɔ, oŋɛndɔ yúmmue bá báá tóɛ́dánáa adánɛ́[27], ɛŋɛndɔ ɛdadɔ́ gilué gɛ́ báá békúbé namɛ, mbáa dúmbíe buisí búmmue na budúgú búmmue naá ífindíi.

²⁶Bɛcamɛna gɛca, ŋŋɛnda go cí, mbéédenye nigúe naá ɛsaá na naá magálá má biíbi. Mbéédenye nigúe naá bolimóní bámɛ Beyúdene na naá báaba bá lɔ́mɔ́ bá dɛ bɛ́ɛ́mbá Beyúdene[28]. Mbéédenye nigúe naá tɛ́sɔnɔ, naá giolóo gá bodɛ́agadɛ́, naá máŋɛ́; akɛ́ báaba bá bóoyamɔ́ bá amɔ́ bɔ́ɔ bá lɛ́ boolímínyí bá céesenye.

²⁷Mbódombonyo, ŋgɔ́bɛgɔnɔ, bɛcamɛna bíntió cɛ ɛ́dá go dɔnɔ́ɔ; kɛ́ga na ncaná na inyúídi; bɛcamɛna bíntió ndɛ́ naá gɛgaŋa gá go bécelene manyáanya; mbɛ́dɛmana go isió kanɛ gɛla gá go báboa.

²⁸Kanɛ go bana bɛdɔmbɔ bɛ́ɛbɛ bíncodío, miisí miimée ndɔ́mɔ́ hɔ́ɔ goana go go béeniŋenye biimbó bá boolímínyí, mbényíigenye odɛ́má go bɛ́.

²⁹Uŋgolímínyí uŋkimée mɔ́ɔnyɔ a lɔbɛnɔmɔ́ a dɛ gɛ́ndáa naá pɛ́ ya Asaŋa, mbɛ́ɛmba naá odɛ́nɛ́ yɛ́hɛ́, mɔ́ɔnyɔ o obamɔ́ naá gɛlɔgɔ, odɛ́má yámɛ yó lɔ́kɔ.

³⁰Bó amɔ́ bó húme goŋaá mbéségi, kaá ná béségí go bonɔ́nɔ́ bámɛ.

³¹Asaŋa, Isée ba Daadáa Yésusu, a lɛ́ fonáalú go bɛcamɛna biimée; i íyimene a amɔ́ cɛ belée.

³²Aŋa mmbaá lɛ naá tɛ́sɔnɔ ya Damáasɛ, ŋgɔ́mɔnɔ udílímínyí ba ufuŋe Alɛtásɛ go kɛsa bisimbi naá bɛasɛ́ bá tɛ́sɔnɔ go go kumbene.

³³Kɔ́ɔ báaba bá mbaá lɛ olɔŋɔ namɛ bá ŋgágamɔ́ naá ŋŋambɛ́, go kúmie naá moɔnɔ́ ba gɛasɛ́ naá bɛcába mmoɛná, bá báá kosío naá bɛcába bá omɛndɛ́; gámɛ go pamba naá magálá má ŋgɔ́mɔnɔ.