Read Nugunu 2 Kɔlɛ́ntɛ 12 Bible Online

2 Kɔlɛ́ntɛ 12 - Nugunu bible

2 Kɔlɛ́ntɛ 12

¹Búúhene goŋaá mbéségi, bɔ́ɔbɔ moánɛ bó lɛ́ kanɛ ndénégée. Kanɛ́ mbóó oyáa godɔ́ɔdɔ biínigie na tóogio, mɔ́ɔmɔ Daadáa a mbaá túfíe.

²Ŋgíyimene uhúúní ba Kilítusu ummue, ínoni nnyómá sɛ́ɔ́dɔ́ na ínni, a mba bólɛ́gá naá mmoɛná gúunú gúunú[29]. Ɛ́na bó mba lɛ́ na nnyɔ́dɔ yɛhɛ́ o? Ɛ́na bó mba lɛ́ na giliíli gɛ́hɛ́ o? Cɛ dómbáa go íyimene, Asaŋa mokáa i íyimenemú.

³Ŋgíyimene caá mɔtɔ mɔ́ɔnyɔ, ɛ́na bó mba lɛ́ na nnyɔ́dɔ yɛhɛ́ o, ɛ́na bó mba lɛ́ kanɛ nnyɔ́dɔ yɛhɛ́ o, cɛ íyíménée, Asaŋa i íyimenemú.

⁴Mɔtɔ mɔ́ɔnyɔ a mba bólɛ́gá naá Peledísi, a bɔ́ɔ́ ɔ́bɔ́nɔ́ɔ dogálɔ dá kanɛ go selunye dɔ́ɔdɔ mɔtɔ a lɔ́mɔ́ a dɛ báá ba go dó fitie.

⁵Go busío bá mɔtɔ aŋa mɔ́ɔnyɔ nɔ́ɔnɔ, ndɛ́ ba go béségi; kanɛ́ naá bámɛ boayá, ndɔ́mɔ́ bá go ága nuségi námɛ naá bonɔ́nɔ́ bámɛ.

⁶Aáŋa mmba lɛ́ ndɛ́galɛga go béségi, cɛ mbáa lɛ ba go bɛ́ɛmba giegu goŋaá goana ŋgoya mammana; kanɛ́ mbégumbenene go goŋaá bá dɛ ŋgágá naá odɛ́nɛ́ yɔ́ɔyɔ yó dómbanamɔ́ bɔ́ɔbɔ bá núunemú ŋŋanana, ɛ́na lí, bɔ́ɔbɔ bá ŋgɔ́bɔnɔmɔ́ kálagala.

⁷Aŋa tóogio sɛ́ɛsɔ sɛ́ mbaá lɛ kanɛ gieninye, Asaŋa a mba ŋgágá makánya go goŋaá cɛ ɛ́dá go gayaba; makánya mɔ́ɔmɔ má lɛ́ aŋa osɔ́mɔsɔmɔ ba sátana, má nyíigenye odɛ́má, má ndegene goŋaá cɛ gayábáa.

⁸Go bosɔ́mɔ moánɛ, mmba bósógólónyóo Daadáa ɛŋɛndɔ ɛdadɔ́, goŋaá a tóŋonɛna makánya moánɛ.

⁹Gɔ́ɔ a mbaá kundíe a amɔ́: «Niibo námɛ mokáa nɛ́ háanana nahɔ; bogaaga bámɛ bó yɔgɔnɔ aŋa gó háananamɔ́ aŋa o lɔ́mɔ́ na bonɔ́nɔ́.» Nɔ́ɔnɔ, bese kanɛ́ ŋgága bogaya bámɛ naá bonɔ́nɔ́ bámɛ go goŋaá bogaaga bá Kilítusu bó lukumene naá yɔmɔ́ɔ.

¹⁰Go busío moánɛ, ŋgɔ́bɔnɔ bese aŋa ndɔ́mɔ́ na bonɔ́nɔ́, akɛ́ bá cɛga, akɛ́ bá kaŋɛna, akɛ́ bá céesenye, akɛ́ ndɛ́ na mogódí, go busío bá Kilítusu. Aŋa ndɔ́mɔ́ na bonɔ́nɔ́, gɔ́ɔ kanɛ́ ndɔ́mɔ́ gɛgaaga.

¹¹Dogálɔ dámɛ dó ɛ́yá aŋa dá mɔtɔ ba kanɛ nciŋí, bɛɛnyɔ́ɔ báa no ŋgíyiemú nɔ́ɔ. Asáa gɔgɔ́ bɛɛnyɔ́ɔ báa no lɔ́mɔ́ bá go oya bɔ́ɔbɔ ndɔ́mɔ́. Akɛ́ aŋa ndɔ́mɔ́ cɛ bósó boóma, báaba bɛɛnyɔ́ɔ no dɔ́ŋɔnɔmɔ́ no amɔ́ Baapótɛlɛ bagɔ́nɔ́, bá dɛ tómbánáa go boóma.

¹²No íyimene buelí bámɛ naá kadɛ́gadɛ́ɛ yɛnyɔ́, mbégumbenene odɛ́máa naá gɛdɔmbɔ giimée, Asaŋa a ŋanana gámɛ bieninye bá gobékúke, bɛsɛɔ na biseyi bá moóma. Buelí bá boapótɛlɛ bɔ́bɔ́ɔ.

¹³No lɔ́mɔ́ kanɛ́ kanɛ go bɛa ŋkádɛ gɛ́ɛgɛ biimbó bá boolímínyí bíntió bɛ́ lɔ́mɔ́ bɛáalú o? Yɔmɔ́ɔ ndɛ́ kanɛ go nyó nyɛ́ɛna, kanɛ́ aáŋa goana go nɔ́ɔnɔ, kééhínyéemú nɔnɔ.

¹⁴Godɔ́ɔdɔ ndɛ́ mekúígíi go go úle naá bɛɛnyɔ́ɔ go oŋɛndɔ yá gádadɔ́, akɛ́ hɔ́ɔlɔ́, cɛ ná nyó nyɛ́ɛna; goakɛ́ bó do báá bonɔ́mɛ bɛ́nyɔ́ bɔ́ púmbemú, kanɛ́ bɛɛnyɔ́ɔ moatɛ́ moatɛ. Bó do bósó baábayɔ́ bɔ́ɔ bá yɔgɔnɔmɔ́ go go dúge bebíéní, kanɛ́, bebíéní bɔ́ɔ bá yɔgɔnɔmɔ́ go go dúge baábayɔ́.

¹⁵Go busío bámɛ, nnɛ́ ɛ́dana naá busío nyímenye bonɔ́mɛ bámɛ, mbéyímenye yɔmɔ́ɔ moatɛ́ go busío bɛ́nyɔ́. Ɛɛ́ɛŋ, no do inyé go mmaamana goŋaá yɔmɔ́ɔ nnyó maamana makɔ́nɔ́.

¹⁶Olímínyóo nɔnɔ no amɔ́ ndɛ́ kanɛ go bɛ́ɛmba gɛnóɛ́ go busío bɛ́nyɔ́. Kanɛ́ bóncodío naá olɔŋɔ yɛ́nyɔ́ bá amɔ́: «Póolo uliomí, a nyó nyɛ́ɛna go moloolio.»

¹⁷Naá batɔ bá bosɔ́mɔ báaba ndɔ́mɔ́ nyó dómɛ́náalú, ndɔ́mɔ́ nyó nyɛ́ɛ́náalú naá ohanɛ́ɛ naá bɔ́ɔ o?

¹⁸Mmbu úhúné Tíite goŋaá u úle naá bɛɛnyɔ́ɔ, mbáá mo dómá na sɔ́gɔ́ɔ «mɔ́ɔnyɔ no íyimenemú.» Tíite mɔ́ɔ a mbaá nyó nyɛ́ɛ́náa o? Akɛ́ɛ! Gobɔ́gɔ́lɔnɔ gámɛ na gá Tíite gó lɛ́ caŋa mmue; ŋgága ɛbaná, a ága ɛbaná.

¹⁹No béeniŋenye no amɔ́ fueké fueké dɛ lɔ́mɔ́ hɔ́ɔ go go básáaga naá busío bɛ́nyɔ́ o? Akɛ́ɛ, dɛ gálagalamɔ́ naá busío bá Asaŋa naá gobálada gɔ́ɔgɔ na Kilítusu. Bolimóní bɛ́cɔ́ bá odɛ́má, buimée bɔ́ɔbɔ bó lɔ́mɔ́ goŋaá no gónɛna naá gioliminyo.

²⁰Moatɛ́, ndɛ́ na bofoá goŋaá cɛ bolá hɔ́ɔlɔ́, nnyó gíde aŋa ndɛ́galɛgamɔ́, bɛɛnyɔ́ɔ tɔ́nɔ no do ŋgɛ́ná aŋa no lɛ́galɛgamɔ́. Cɛ gídé naá tɛ́mádɛ́má yɛnyɔ́, gobásalasala, hɛagá, mpímí, bɛbáaŋɛgana, nnyomí, bɛamɔ́ɔ, golala gá odóɛ na cuŋí mbɔ́dɔ iŋkimée.

²¹Ndɛ́ na bofoá go oŋɛndɔ yámɛ yɔ́ɔyɔ yó úlenemú, goŋaá Asaŋa bamɛ a dɛ ciisíe naá busío bɛ́nyɔ́, cɛ ɛ́yá ba go baŋa go gɛcɛcá gá báaba naá olɔŋɔ yɛ́nyɔ́, gɛ́ á ná lɔgɔ́ɔ, gɛ́ báá gɔnɔ́ lɔbɛnɔ kanɛ go bágóŋona go bobɛ́ bábɔ́, go gɛbɛ́ gábɔ́ gá gɛɔyɔ, na gɛɔyɔ gábɔ́ gá hanyɔ́!