Read Nugunu 2 Kɔlɛ́ntɛ 13 Bible Online

2 Kɔlɛ́ntɛ 13 - Nugunu bible

2 Kɔlɛ́ntɛ 13

¹Oŋɛndɔ yá gádadɔ́ɔ yɔ́yɔ́ɔ ŋgúlenemú naá bɛɛnyɔ́ɔ. Gɛsɛnɛ giimée gɛ́ bégedegedie naá gooya gá batɔ báandɛ́ ɛ́na akɛ́ bádadɔ́, aŋa Ŋgɔ́ŋɛ́ yɛ oyamɔ́[30].

²Kálagalamɔ́ go báaba bá mbaá ŋanánáa bɛlɔgɔ cóá, gɔnɔ́ na biimée báaba bóntió. Ínoni cɛ báá olɔŋɔ nɛnyɔ́, kanɛ́ ŋgaá bó fitíe aŋa go oŋɛndɔ yámɛ yá gáandɛ́ɛ caá, aŋa nná ncomɔ́ gunde, cɛ ŋgá bígie mɔtɔ;

³aŋa no lɛ́galɛgamɔ́ go ɛ́na goŋaá Kilítusu a gálagala naá yɔmɔ́ɔ. Kilítusu a dɛ báá na bonɔ́nɔ́ naá boayá bɛ́nyɔ́, kanɛ́ a dúfenyemú bogaaga bɛ́hɛ́ naá bɛɛnyɔ́ɔ.

⁴Ɛɛ́ɛŋ, bá mba mo gilénée naá kolósi go bonɔ́nɔ́ bɛ́hɛ́, kanɛ́ a lɛ́ ogɔ́sɔ go bogaaga bá Asaŋa. Naá go bálada gɔ́ɔgɔ nɛhɛ́, bɛɛcɔ́ɔ tɔ́nɔ dɛ lɛ́ na bonɔ́nɔ́, kanɛ́ dɛ ŋga bɛ́ɛ́mbá bɔgɔ́sɔ nɛhɛ́ go bogaaga bá Asaŋa bɔ́ɔbɔ a có fáananamɔ́ go go yɔgɔnɔ go busío bɛ́nyɔ́.

⁵Bébidéemú nɔnɔ, no báhɛnyahɛnya, bɛɛnyɔ́ɔ moatɛ́ go go ɛ́na aáŋa no ɔyɔ aŋa gioliminyo gɛ́ oyamɔ́. Lɛɛ́nca nɔnɔ goŋaá Kilítusu a lɛ́ nɛnyɔ́, aáŋa gó do húmé goŋaá gobébide gɛ́nyɔ́ gó dúfie kóka.

⁶Ndɛ́ odɛ́má goŋaá no gaá lɛncá mammana goŋaá dɛ lɛ́ boyogóní bá Asaŋa.

⁷Dɛ bósógolonyo Asaŋa go busío bɛ́nyɔ́ goŋaá no do gɔnɔ́ ŋa bobɛ́ akɛ́ bá búmmue. Bó do bósó goŋaá dɛ lɛ́galɛga go dúfie dɛ amɔ́, bɛɛcɔ́ɔ, dɛ á yɔgɔ́nɔ́ɔ gɛnɔ́gɔ́ gá buelí naá bɛɛnyɔ́ɔ; kanɛ́, dɛ lɛ́galɛgamɔ́ go nyó ɛ́na no ŋanana moóma má bese, akɛ́ bó húme goŋaá gobide gó dúfie gó amɔ́ bɛɛcɔ́ɔ dɛ lɛ́ naá giédie.

⁸Bɛɛcɔ́ɔ dɛ dɛ báá na bogaaga bá nuigenye mammana, dɛ lɔ́mɔ́ hɔ́ɔ goana go mammana.

⁹Dɛ lɛ́ na bɛyaŋa bɛcamɛna biimée bɛ́ɛbɛ bɛɛcɔ́ɔ dɛ lɔ́mɔ́ na bonɔ́nɔ́, bɛɛnyɔ́ɔ na bogaaga. Dɛ bósógolonyo Asaŋa go busío bɛ́nyɔ́ dɛ amɔ́: ŋgáa a nyó gúninie púmúpúmú naá pɛ́ yɛhɛ́.

¹⁰Go busío moánɛ gɔ́ɔ, tóanamɔ́ go nyó ɔ́ŋɛnɔ go masɔ́mɔ máama, ká lɛ́ halaháláa, goŋaá cɛ ɛ́yá ba go nyó sómbana bɛsɛnɛ go manɔ́ŋɔ́ nnyɔ́dɔ, gɔ́ɔgɔ nná bɛ́ɛmbamɔ́ olɔŋɔ nɛnyɔ́. Mammana, Daadáa a lɔ́mɔ́ páalú bogaaga bá go nyó gíndenye naá pɛ́ yɛhɛ́, caá akɛ́ bɔ́ɔbɔ bá go nyó gada.

¹¹Bolimóní, cúgidinyemú gɛ́nyɔ́ caá, bɛ́ɛ́mba nɔnɔ naá bɛyaŋa, no yɔgɔnɔ go go gónɛna naá pɛ́ yɛhɛ́, no gúlumeninye, no bɛ́ɛmba ukelú táŋɛ́ yúmmue, no ɔyɔ naá buumbénú; hɔ́ɔlɔ́ gɔ́ɔ Asaŋa mɔ́ɔnyɔ a maamanamɔ́ batɔ a gɔnɔ bó fáanana buumbénú, a ná bɛ́ɛmbamɔ́ nɛnyɔ́.

¹²Bédíígénínyéemú nɔnɔ na kude aŋa boolímínyí; boolímínyí biimée háalá, bá á nyó bédíígényée.

¹³Mbósógolonyo Asaŋa goŋaá no ɛ́dana naá busío no dáŋabana niibo nɛ́ɛnɛ Daadáa Yésu Kilítu a có fáananamɔ́, gɛnɔ́ɔ́nɛ́nɔ́ gá Asaŋa gɛ́ gɛ́ga nɛnyɔ́. Ŋgáa Gimmúmpúu gá Giliíli a yɔgɔnɔ goŋaá no gɛ́ga báladáalú biimée[31].