Read Nugunu 2 Kɔlɛ́ntɛ 3 Bible Online

2 Kɔlɛ́ntɛ 3 - Nugunu bible

2 Kɔlɛ́ntɛ 3

¹Gɔ́gɔ́ɔ gó lɔ́mɔ́ goŋaá dɛ gɔnɔ bayɛga go bóoyoya bɛɛcɔ́ɔ moatɛ́ lí? Ɛ́na akɛ́ no gɛ́ganamɔ́ no amɔ́ dɛ nyó dúfie bakálata báaba bá loodonyomú goŋaá dɛ háanana naá odɛ́nɛ́ moánɛ aŋa batɔ bóntió bú úhenemú, ɛ́na gɔnɔ́ goŋaá bɛɛnyɔ́ɔ moatɛ́ no ɔ́ŋɔ bakálata bá go có ségisegi lí?

²Bɛɛnyɔ́ɔ báa no lɔ́mɔ́ kálata yɛcɔ́ moánɛ, ɔ́ŋɔ́ɔlú naá ɛdɛ́má yɛcɔ́; kálata yɛ́ɛyɛ mɔtɔ uŋkimée i íyimenemú a gɔnɔ yɛ bana.

³Ɛɛ́ɛŋ! bó lɛ́ mammana, bɛɛnyɔ́ɔ no lɔ́mɔ́ kálata yɛ́ɛyɛ Kilítusu a mbɔɔ́ ɔ́ŋɔ́, bɛɛcɔ́ɔ dɛ báá nyó yɛ béékínyée; ɛ lɛ́ ɔ́ŋɔ́ɔlú caá akɛ́ na hɛɔ́ŋɔ há batɔ, kanɛ́ na Giliíli ba Asaŋa ogɔ́sɔ. Ɛ lɛ́ ɔ́ŋɔ́ɔlú caá akɛ́ naá gɛgɔ́gɔ́ gá ɛdánɛ́, kanɛ́ naá ɛdɛ́má ya batɔ[4].

⁴Dɛ gálagala nɔ́ɔnɔ goŋaá dɛ ágana odɛ́má yɛ́cɔ́ naá Kilítusu go busío bá Asaŋa.

⁵Dɛ dɛ ŋanánáa nɔ́ɔnɔ go go báhóda gɛ́cɔ́ gá moatɛ́ aŋa gó ɛ́damɔ́ go úlene naá bɛcɔ́ moatɛ́, bogaaga bɛ́cɔ́ bó ɛ́damɔ́ go úlene naá Asaŋa.

⁶Mɔ́ɔ a có fáananamɔ́ bogaaga bá go yɔgɔnɛnɔ gɛpáa gá gɛlada bugúle gɛ́ɛgɛ gɛ́ lɔ́mɔ́ gɛ́ dɛ ɔ́bɔ́nɛ́nɔ́ɔ na gicele gá ɔ́ŋɔ́ɔlú, kanɛ́ na Gimmúmpúu gá Giliíli. Ɛɛ́ɛŋ gicele gá ɔ́ŋɔ́ɔlú gɛ́ ubenye batɔ naá gɛsɛnɛ, Giliíli mɔ́ɔ a fáanana gɛɔyɔ[5].

⁷Dogálɔ dá gicele dɔ́ɔdɔ dó ónamɔ́ dó mba lɛ́ ɔ́ŋɔ́ɔlú naá gɛgɔ́gɔ́ gá ɛdánɛ́, nigúmi ná Asaŋa nɛ́ báá bonyáa naá gɛcamɛna moánɛ. Nɛ́ mba bonyáa naá busío bá Mɔ́sɛsɛ, mbɔ́dɔ yɛ́ɛyɛ baaná bá Ɛ́sɛlahɛ́ɛlɛ ba mbaá lɛ bá dɛ bɛáa kélemene ya go bó núune cɛŋɛ[6], asáa gɔgɔ́ nigúmi ná ndiemi nɛ́ dɛ mbá gɛ́ga.

⁸Nɛ́ɛnɛ kanɛ́ nigúmi ná Giliíli nɛ́ ga ná ŋá nɛ́ dɛ bonyáa nɛ́ dómba naá buelí bá gɛ́ o?

⁹Aáŋa buelí bá gicele bɔ́ɔbɔ bú ubenyemú batɔ naá gɛsɛnɛ bó mba gúmée, bɔ́ɔbɔ bá botɛ́nɛ́ɛ bó ŋga gɔnɔ́ gúme bó dómba nɔ́ɔnɔ.

¹⁰Ɛɛ́ɛŋ, dɛ amɔ́ dɛ eninye nigúmi ná gicele nɛ́ɛnɛ nɛ́ mbaá lɛ cóá na nɛ́ɛnɛ ná botɛ́nɛ́ɛ nɛ́ɛnɛ nɛ́ lɔ́mɔ́ godɔ́ɔdɔ, ná godɔ́ɔdɔ nɛ́ bonya nɛ́ dómbana.

¹¹Mammana, aáŋa boóma bá kanɛ go gɛ́ga bó mba bɛáa nigúmi, bó lɛ́ tɔ́nɔ mammana goŋaá bɔ́ɔbɔ bá go gɛ́ga bó ŋga bɛáa nigúmi bó dómba.

¹²Na mbɔ́dɔ ya toodo odɛ́má aŋa yɛ́ɛyɛ náana dɛ gálagala moóma má Asaŋa daŋɛ́daŋɛ.

¹³Dɛ dɛ ŋanánáa aŋa Mɔ́sɛsɛ mɔ́ɔnyɔ a mbaá lɛ a bá boɛgana busío goŋaá baaná bá Ɛ́sɛlahɛ́ɛlɛ bá dɛ ɛ́ná mamaná má gobonya gá kanɛ go gɛ́ga[7].

¹⁴Kanɛ́ nciŋí yabɔ́ ɛ mba bɛ́ɛ́mbá naá mbíno. A nco go éme godɔ́ɔdɔ yɛ́ɛyɛ, gɔ́ɔgɔ bá banamɔ́ Ŋgɔ́ŋɛ́ naá gɛcóá gá gɛlada bugúle, mbíno yɛ́ɛyɛ ɛ lɛ́ hɔ́ɔ. Ɛ lɛ́ gɔgɔ́ hɔ́ɔ, goakɛ́ naá Kilítusu gɔ́ɔ ɛ ságɛnanamɔ́.

¹⁵Ɛɛ́ɛŋ! a nco go éme godɔ́ɔdɔ, aŋa bá banamɔ́ bakálata bá Mɔ́sɛsɛ, mbíno ɛ lɛ́ naá odɛ́má yábɔ́.

¹⁶Mbíno ɛ dómbanamɔ́ gɛcamɛna gɛ́ɛgɛ mɔtɔ a kikilidiemú gɛɔyɔ gɛ́hɛ́ naá Daadáa.

¹⁷Mammana, Daadáa a lɛ́ Giliíli, gɔnɔ́, anáa Giliíli ba Daadáa a lɔ́mɔ́, bofilíi bó lɛ́ hɔ́ɔ.

¹⁸Go bɛɛcɔ́ɔ biimée báaba dɛ lɔ́mɔ́ dɛ dɛ gɔnɔ́ bɛ́ɛmba naá mbíno, dɛ gunde dɛ sána gise gá nigúmi ná Daadáa, dɛ lɛ́ bénúgíelú naá gieninye gímmue eé gímmue. Nigúmi nɛ́cɔ́ nɛ́ bonya nɛ́ dómba gɛcamɛna giimée go gobálada gɛ́cɔ́ gɔ́ɔgɔ na Daadáa mɔ́ɔnyɔ a lɔ́mɔ́ Giliíli.