Read Nugunu 2 Kɔlɛ́ntɛ 5 Bible Online

2 Kɔlɛ́ntɛ 5 - Nugunu bible

2 Kɔlɛ́ntɛ 5

¹Dɛ íyimene bese goŋaá nnyɔ́dɔ yɛ́ɛyɛ dɛ ɔyɔmɔ́ na yɛ́ naá cí háalá ɛ lɛ́ aŋa gincumu. Kɔ́ɔ gó lɔ́mɔ́, yɛ amɔ́ ɛ dɛ́aŋa, dɛ bɛanana ndáŋɛ ya Asaŋa go fóaga, kɛ́gɛ́ná ya bɛcamɛna biimée naá mmoɛná; ɛ dɛ báá buelí bá mɔtɔ.

²Dɛ lɛ go ɛ́da go híme[10], dɛ kɔndɛmɔ odɛ́má dɛ amɔ́ gásɛ́ dɛ á bécucényée na nnyɔ́dɔ kɛ́ yɛ́ɛyɛ dɛ lɔ́mɔ́ na yɛ́, kɛ́gɛ́ná yɛcɔ́ ya bɛcamɛna biimée.

³Bó ŋa goŋaá bá dɛ có ɛ́ná aŋa dɛ lɛ́ nnyɔ́dɔ gɔdɔɔ́, kanɛ́ na bɛla.

⁴Ɛɛ́ɛŋ bɛɛcɔ́ɔ báaba dɛ ɔyɔmɔ́ naá cí háalá na nnyɔ́dɔ yɛcɔ́ yɛ́ɛyɛ ɛ lɔ́mɔ́ aŋa gincumu, bɛdɔmbɔ bɛ́ có nɔdɛnɔ dɛ híme; goakɛ́ dɛ dɛ maamánáa go bóodona nnyɔ́dɔ yɛ́ɛyɛ dɛ lɔ́mɔ́ na yɛ́, kanɛ́ dɛ fúmbemú go bécucenye na yɛ́ kɛ́, kɛ́gɛ́ná ya mmoɛná, gó húme goŋaá bɔ́ɔbɔ bó lɔ́mɔ́ bó do gúénénée, bó cúbene bɔ́ɔbɔ bó gúenenemú.

⁵Asaŋa moatɛ́ moatɛ mɔ́ɔ a mbaá gedíe gonúgenye gɔ́ɔgɔ; a báá dóáná go có fáa Gimmúmpúu gá Giliíli mɔ́ɔnyɔ a lɔ́mɔ́ bodáŋɔ bá busío naá madáŋɔ máama a có bɛ́dɛganɛnamɔ́.

⁶Dɛ lɛ́ nɔ́ɔnɔ kanɛ́ dácɛ na mbémineminie, akɛ́ aŋa dɛ íyimenemú bese dɛ amɔ́ gɛcamɛna giimée gɛ́ɛgɛ dɛ gɔ́ ɔyɔmɔ́ na nnyɔ́dɔ yɛcɔ́ yɛ́ɛyɛ, dɛ lɛ́ halaháláa na kɛ́gɛ́ná ya Daadáa,

⁷goakɛ́ gioliminyo gɛ́ gɛ́ có indenyemú, caá akɛ́ bɔ́ɔbɔ dɛ ɛ́nanamɔ́.

⁸Ɛɛ́ɛŋ, dɛ lɛ́ na mbémineminie dácɛ, gɔ́ɔ dɛ lɛ́galɛgamɔ́ go úlukie naá nnyɔ́dɔ yɛ́ɛyɛ dɛ lɔ́mɔ́ kɔ́ɔ yɛ́ɛyɛ go go ɛ́da lukumene na Daadáa.

⁹Tɔ́nɔ pegíné yɛcɔ́ ɛ lɔ́mɔ́ goŋaá dɛ fɛɛna Daadáa, akɛ́ dɛ lɔbɛnɔ na nnyɔ́dɔ yɛ́ɛyɛ dɛ lɔ́mɔ́ kɔ́ɔ, akɛ́ dɛ úlukie kɔ́ɔ.

¹⁰Mammana gó úhene goŋaá bɛɛcɔ́ɔ biimée dɛ dambɛmɛda naá busío bá Kilítusu, a sómba gɛsɛnɛ gɛ́cɔ́, onyɔ moánɛ a dáŋaba bɛsoɛná go gɛɔyɔ gɛ́ɛgɛ a á nɔ́ ɔyɔ́ɔ na nnyɔ́dɔ yɛhɛ́, akɛ́ go besé, akɛ́ go bobɛ́[11].

¹¹Dɛ íyimene ŋkádɛ bó lɔ́mɔ́ gohálamanana gá Daadáa, gɔ́ɔ moánɛ dɛ fúmbemú goŋaá batɔ bó oliminyo. Asaŋa a có íyimene bese bese, kɔ́ɔ mbéeniŋenyemú caá, naá ɛdɛ́má yɛnyɔ́, no có íyimene tɔ́nɔ.

¹²Dɛ dɛ lɛ́gálɛ́gáa go béségi bɛɛcɔ́ɔ moatɛ́ naá boayá bɛ́nyɔ́, kanɛ́ dɛ lɛ́galɛgamɔ́ go nyó dúfie pɛ́ ya goŋaá no béségisegi gɛ́cɔ́; náana, no bɛáa bɔ́ɔbɔ no lɔ́mɔ́ bá go baga batɔ báaba bá béségimú go moóma má oŋgíso, caá akɛ́ go bɔ́ɔbɔ bó lɔ́mɔ́ naá odɛ́má.

¹³Aáŋa bó lɛ́ mammana goŋaá dɛ lɛ́ biegu, bó lɔ́mɔ́ go busío bá Asaŋa gɔ́ɔ dɛ lɔ́mɔ́ nɔ́ɔ; kanɛ́ aáŋa dɛ lɛ́ na nciŋí, bó lɔ́mɔ́ go busío bɛ́nyɔ́.

¹⁴Ɛɛ́ɛŋ, gɛnɔ́ɔ́nɛ́nɔ́ gá Kilítusu gɛ́ có gaŋɛna gɔ́ɔgɔ dɛ béeniŋenyemú dɛ amɔ́, ummue táŋɛ́ a mba gúé go busío bá batɔ biimée, gɔ́ɔ biimée bá bɛananamɔ́ bodáŋɔ go nigúe nɛ́hɛ́.

¹⁵A mba gúé go batɔ biimée goŋaá báaba bɔ́ ɔyɔmɔ́, ba dɛ gɔnɔ́ go ɔyɔ go busío bábɔ́ bá moatɛ́, bɔ́ ɔyɔ go busío bá mɔ́ɔnyɔ a mbaá gúé a báá gɔnɔ́ fúfuge go busío bábɔ́.

¹⁶Boóma moánɛ bɔ́ dɛ lɔ́mɔ́ dɛ dɛ gɔnɔ́ gɔ́lɔnɔ mɔtɔ go goɛ́na gá batɔ. Akɛ́ aŋa dɛ mbaá gɔ́lɔ́ Kilítusu cóá go goɛ́na gá batɔ, dɛ dɛ gɔnɔ́ mo gɔ́lɔnɔ nɔ́ɔ godɔ́ɔdɔ.

¹⁷Aáŋa mɔtɔ a lɛ́ báladáalú na Kilítusu, a lɛ́ gɛpáa gá gigedie. Moóma má cóá mó á ságɛ́ná, má mofáa mɔ́ mó lɔ́mɔ́ hɔ́ɔ.

¹⁸Buimée bó ɛ́damɔ́ go úlene naá Asaŋa mɔ́ɔnyɔ a mbaá bégedíe nɛcɔ́ gá Kilítusu; a báá có fáá buelí bá goŋaá dɛ oyana batɔ bá bégedie nɛhɛ́.

¹⁹Mammana, Asaŋa moatɛ́ mɔ́ɔ a lɔ́mɔ́ bégedíelú na batɔ biimée, a báá gondá gá Kilítusu; a lɛ́ kanɛ go bana bɛoba bábɔ́, a báá có fáá bɛɛcɔ́ɔ buelí bá go oya nogálɔ ná gobégedie na Asaŋa.

²⁰Gɔ́ɔ dɛ lɔ́mɔ́ naá odɛ́nɛ́ yá bedílímínyí go ufíno ya Kilítusu; bó lɔ́mɔ́ aŋa Asaŋa mɔ́ɔ a dɔ́ŋɔnɔmɔ́ batɔ a gonda gɛ́cɔ́ a amɔ́: Ŋgaá nyó bósógólídío go ufíno yá Kilítusu caá bégedíemú nɔnɔ na Asaŋa.

²¹Kilítusu mɔ́ɔnyɔ a mbaá lɛ kanɛ go ŋa gɛlɔgɔ, naá undukí yɛ́cɔ́, Asaŋa a báá sómbá gɛsɛnɛ gɛ́hɛ́ aŋa a lɛ́ ulogílógí. Bó mba bádómbánáa nɔ́ɔnɔ goŋaá naá gobálada gɔ́ɔgɔ nɛhɛ́, dɛ bɛ́ɛmba bɛtɛ́nɛ́ɛ naá busío bá Asaŋa.