Read Nugunu 2 Kɔlɛ́ntɛ 7 Bible Online

2 Kɔlɛ́ntɛ 7 - Nugunu bible

2 Kɔlɛ́ntɛ 7

¹Bolimóní bámɛ bá odɛ́má, naá tánɔ iŋkimée sɛ́ɛsɛ dɛ bɛananamɔ́ sɛ́ɛsɛ, ŋgáa dɛ básogona bɛɛcɔ́ɔ moatɛ́ moatɛ́ biílo biiménénée bá nnyɔ́dɔ na bá giliíli; ŋgáa dɛ ága bogaaga dɛ ɔ́bɛnɔnɔ na Asaŋa go busío buimée, dɛ mo hálamanana.

²Có gɛ́ndɛ́gɛ́náamɔ́ nɔnɔ naá ɛdɛ́má yɛnyɔ́; dɛ lɛ́ kanɛ go budide mɔtɔ, dɛ lɛ́ kanɛ go íyie mɔtɔ osógasoga, dɛ lɛ́ kanɛ go nyɛ́ɛna mɔtɔ.

³No do bééníŋínyée no amɔ́ nnyó áganamɔ́ naá ncíbo ya gɛaŋɔ́ gɔ́ɔ kálagalamɔ́ nɔ́ɔnɔ, kanɛ́ mbáá go oyɛda caá, akɛ́ bó húme goŋaá dɛ gúe, akɛ́ bó húme goŋaá dɛ ɔyɔ, no lɛ́ naá ɛdɛ́má yɛcɔ́.

⁴Ndɛ́ na gɛantá gá mbémineminie naá boayá bɛ́nyɔ́; mbéségisegi go busío bɛ́nyɔ́. No có bobonyo ɛdɛ́má naá bɛdɔmbɔ, go busío moánɛ, ndɛ́ na bɛyaŋa dácɛ bɔmbɔbɔmbɔ.

⁵Ɛɛ́ɛŋ, naá gobola gɛ́cɔ́ naá Masɛdóanɛ, dɛ lɛ́ kanɛ go bɛa ŋgásɛ́ ya go fuugide, kanɛ́ dɛ lumenene na bɛdɔmbɔ mbɔ́dɔ iŋkimée. Batɔ bá có nuigenye, bɛɛcɔ́ɔ moatɛ́ na bofoá naá ɛdɛ́má.

⁶Kanɛ́ Asaŋa mɔ́ɔnyɔ a bobonyomú ɛdɛ́má ya báaba bá bésiisenyemú, a mba có bobío na gobola gá Tíite.

⁷Bó do mbáa lɛ goana go gobola gɛ́hɛ́, kanɛ́ tɔ́nɔ go gigúluminye gɛ́ɛgɛ a mbaá bɛáa naá bɛɛnyɔ́ɔ. A mba có oyáná aŋa no kɔndɛmɔmɔ́ odɛ́má no amɔ́ gásɛ́ no á gɔnɔ́ ŋgɛ́na, no bésíme bobɛ́ bɛ́nyɔ́, no fúmbe no amɔ́ gásɛ́ no á mbáfɛ́fá, bó báá ŋaáa goŋaá bɛyaŋa bámɛ bɛ́ gɔnɔ bɛ́ɛmba dácɛ bɔmbɔbɔmbɔ bɛ́ dómba.

⁸Mammana, cɛ bésímée aáŋa kálata yɛ́ɛyɛ mbaá nyó dómɛ́ná ɛ mba nyó fáá gokánya gá odɛ́má. Kanɛ́, aáŋa mba bésímídé, ŋgɛ́nana caá kálata yɛ́ɛyɔ ɛ mba nyó fáá gokánya naá odɛ́má go moɔnɔ́ ba gɛcamɛna.

⁹Ndɛ́ na bɛyaŋa godɔ́ɔdɔ, caá akɛ́ go gokánya gɛ́nyɔ́ gá odɛ́má, kanɛ́ go gɔ́ɔgɔ gokánya gɛ́nyɔ́ gá odɛ́má go lɔ́mɔ́ núgíelú gɛɔyɔ gɛ́nyɔ́. Ɛɛ́ɛŋ, gokánya gɛ́nyɔ́ gá odɛ́má gó lɛ́ bɛ́ɛ́mbáalú go ndɛ́ga ya Asaŋa; bɛɛcɔ́ɔ, dɛ lɛ́ kanɛ go nyó budide go boóma.

¹⁰Gokánya gá odɛ́má go ndɛ́ga ya Asaŋa, go ŋanana goŋaá mɔtɔ a núgie gɛɔyɔ gɛ́hɛ́, a bɛa mammana ya gɛɔyɔ. Mbɔ́dɔ ya gokánya gá odɛ́má aŋa yɛ́ɛyɔ nɔ́ɔnɔ, mɔtɔ a dɛ bésímée go yɛ́. Kanɛ́ mbɔ́dɔ ya gokánya gá odɛ́má ya batɔ bá cí yɛ́ɛyɛ, yɛ úlene na nigúe.

¹¹Ɛ́ná nɔnɔ kanɛ́ bɔ́ɔbɔ gokánya gá odɛ́má go ndɛ́ga ya Asaŋa, bó lɔ́mɔ́ ŋaáalú naá bɛɛnyɔ́ɔ, kasɛ́á mbɔ́dɔ ya gobágáyɛga yɛ́ɛyɛ no lɔ́mɔ́ na yɛ́ go go ŋanana moóma, kasɛ́á bihéehinye bɛ́ɛbɛ no lɔ́mɔ́ na bɛ́ bɛɛnyɔ́ɔ na bɛɛnyɔ́ɔ! Kasɛ́á mbɔ́dɔ ya mpímí yɛ́ɛyɛ no lɔ́mɔ́ na yɛ́ naá busío bá gɛbɛ́ gá boóma! Kasɛ́á mbɔ́dɔ ya go díine go ŋanana bobɛ́! Kasɛ́á mbɔ́dɔ ya gokɔndɛmɔ odɛ́má go go gɔnɔ ŋgɛ́na! Kasɛ́á mbɔ́dɔ ya go bííŋenene go busío bámɛ! Kasɛ́á mbɔ́dɔ ya gɛlola go go fáa bobɛ́ noséésényée! Moánɛ, bɛɛnyɔ́ɔ moatɛ́ moatɛ no lɛ́ dúfíelú goŋaá no do mbáa lɛ ombɔ́gɔ naá gɛsɛnɛ gɛ́ɛgɛ.

¹²Pɛ́lɛdamɔ́ caá, aáŋa ndɛ́ nyó ɔ́ŋɛ́nɔ́ɔlú kálata yɛ́ɛyɔ, bó do mbáa lɛ go mɔ́ɔnyɔ a mbaá ŋaáa giédie, ɛ́na akɛ́ go mɔ́ɔnyɔ bá mbaá mo ŋaáa giédie. Kanɛ́ bó mbaá lɛ go go dúfie naá busío bɛ́nyɔ́, Asaŋa a núune, mbɔ́dɔ ya go bííŋenene yɛ́ɛyɛ no lɔ́mɔ́ na yɛ́ go busío bɛ́cɔ́.

¹³Bɔ́ɔbɔ bɔ́ bó mbaá có bobío odɛ́má. Bó do báá goana ibobio odɛ́má hɛ́ɛhɔ hɛ́ dɛ mbaá bɛáa; dɛ mba gɔnɔ́ békelenye tɔ́nɔ makɔ́nɔ́ go bɛyaŋa bɛ́ɛbɛ Tíite a mbaá lɔmɔ́ na bɛ́, go gɔ́ɔgɔ bɛɛnyɔ́ɔ biimée no mbaá fáá odɛ́má yɛ́hɛ́ magɛ́nda makɔ́nɔ́.

¹⁴Kɔ́ɔ, aáŋa mmba dúfíe Tíite gobéségisegi gámɛ go busío bɛ́nyɔ́, bó do mbáa lɛ go dugúnú aŋa no íyimenemú, dɛ báasa dɛ nyó oyanɛna gɔgɔ́ mammana; nɔ́ɔnɔ, gobéségisegi gɛ́cɔ́ go busío bɛ́nyɔ́ gɔ́ɔgɔ dɛ mbaá dúfíe naá busío bá Tíite gó ɛ́nánɛ́náa mammana.

¹⁵Gɛcamɛna gɛ́ɛgɛ Tíite a mbuú úlé naá bɛɛnyɔ́ɔ, no mba mo gɛ́ndɛ́gɛ́ná bese, bɛɛnyɔ́ɔ biimée no mo hálamanana, no mo ɔ́bɛnɔnɔ. Gɔ́ɔ, a lɔ́mɔ́ aŋa a béeniŋinyemú nɔ́ɔnɔ, gɛnɔ́ɔnɛ́nɔ́ gɛ́hɛ́ go busío bɛ́nyɔ́ gɛ́ lɛ go gɔnɔ goma gɛ́ dómba.

¹⁶Mbékelenye go gɔ́ɔgɔ ndɔ́mɔ́ na mbémineminie naá boayá bɛ́nyɔ́ go boóma buimée.