Read Nugunu 2 Kɔlɛ́ntɛ 8 Bible Online

2 Kɔlɛ́ntɛ 8 - Nugunu bible

2 Kɔlɛ́ntɛ 8

¹Bolimóní, dɛ lɛ́galɛga go nyó dúfie niibo nɛɛ́nɛ Asaŋa a lɔ́mɔ́ ŋaáalú go biimbó bá boolímínyí bá Masɛdóanɛ.

²Gɔgɔ́ akɛ́ aŋa bá mbaá lɛ naá magóda má bɛdɔmbɔ bɛ́ɛbɛ bá mbaá luménénée na bɛ́, bá mba bɛáa gɛantá gá bɛyaŋa, bó báá ŋaáa goŋaá bá fáanana makɔ́nɔ́nɔ́ɔ, bɔ́ɔ naá gɛantá gá gosóga.

³Ŋgaá nyó oyáná caá, bá mba fáánánáa makɔ́nɔ́nɔ́ɔ, gobáhóda gábɔ́ gó báá dómbɛ́dáná, mɔtɔ a dɛ mbá bó gaŋa.

⁴Bá mba có úhénée na bogaaga goŋaá dɛ bó fáa pɛ́, bɔ́ɔ tɔ́nɔ bá fáa gábɔ́ gɛfancɔ́ go go óhiginyo biimbó bá boolímínyí.

⁵Naá golɛ́ga gá Asaŋa, bá báá bííŋéné bɔ́ɔ moatɛ́ manɛ́ naá Daadáa, go ɛndɛga naá bɛɛcɔ́ɔ, nɔ́ɔnɔ, bá báá ŋaáa gó báá dómbɛ́dáná bɔ́ɔbɔ bɛɛcɔ́ɔ dɛ mbaá lɛ dɛ béeniŋenye naá boayá bábɔ́.

⁶Go busío moánɛ gɔ́ɔ dɛ lɔ́mɔ́ gɔɔgɔ́nɔ́ gɔɔgɔ́nɔ́ɔ Tíite goŋaá a nco gunde naá bɛɛnyɔ́ɔ, a yibe gɛnɔ́gɔ́ gá buelí gɛ́nyɔ́ gɛ́ɛgɔ aŋa a mbaá bayɛ́gá.

⁷Gɔ́ɔ, aŋa no lɔ́mɔ́ na buimée púmú fundufundu: no ágana odɛ́má yɛ́nyɔ́ naá Kilítusu, no lɛ́ bɛnɔ́gɔ́ bá begélí, no íyimene mammana, no bííŋenene uŋkimée uŋkimée bɛnyɔ́, no có maamana makɔ́nɔ́, bɛáa nɔnɔ tɔ́nɔ gɛnɔ́gɔ́ gá odɛ́má fundufundu naá buelí bɔ́ɔbɔ.

⁸Cɛ nyó oyánɛ́náa nɔ́ɔnɔ aŋa bó lɛ́ gɛgaŋa; kanɛ́ gɔ́ɔgɔ nnyó oyanɛnamɔ́ masɔ́mɔ má gobííŋenene gá basɔ́gɔ́ɔ, nnyó fáananamɔ́ pɛ́ ya go dúfie mammana yɛnyɔ́ ya gɛnɔ́ɔ́nɛ́nɔ́.

⁹Ɛɛ́ɛŋ, no íyimene mbɔ́dɔ ya gɛnɔ́gɔ́ gá odɛ́má gá Daadáa bɛcɔ́ Yésu Kilítu; mɔ́ɔ na buimée, a báá bííyíe osógasoga go busío bɛ́nyɔ́[16]. Bó mbaá lɛ goŋaá, go gosóga gɛ́hɛ́, no ɛ́ya bɛnɔ́mɛ.

¹⁰Ɔ́bɔ́ nɔnɔ kanɛ́ nnyó oyana gámɛ goɛ́na naá bosɔ́mɔ bɔ́ɔbɔ: bó lɛ́ bese go busío bɛnyɔ́, goakɛ́ nnyómá ya gaala, bɛɛnyɔ́ɔ bá no mbaá dóáná, caá akɛ́ goana go bayɛga go bánda bonɔ́mɛ, kanɛ́ tɔ́nɔ go húme ukelú go go ŋa bosɔ́mɔ moánɛ.

¹¹Godɔ́ɔdɔ kanɛ́, maná nɔnɔ buelí moánɛ aŋa no mbaá bayɛ́gá. Bó ŋa goŋaá bɛnɔ́gɔ́ bɛ́nyɔ́ bá kɛsɛ́ná bɛ́ lumene tɔ́nɔ na go hóogonyo gá bɛ́ naá gobáhóda gɛ́nyɔ́.

¹²Gɔ́ɔgɔ mbééníŋínyí yɛnyɔ́ ɛ lɔ́mɔ́ mammana bese, Asaŋa a gɔ́lɔnɔ bese bɔ́ɔbɔ no lɔ́mɔ́ na bɔ́ɔ, a dɛ núúnée bɔ́ɔbɔ no lɔ́mɔ́ kanɛ bɔ́ɔ.

¹³Cɛ báá caá nnyó ága naá nogánágana go go fúmbe go menie nɔ́ɔnɔ ná basɔ́gɔ́ɔ, kanɛ́ bó lɔ́mɔ́ goŋaá bocɔ́bɛcɔ́bɛ bó bɛ́ɛmba.

¹⁴Nɔ́ɔnɔ gó lɛ́ aá, bɔ́ɔbɔ no bɛananamɔ́ bó dómbɛdana, bó hóogio bɔ́ɔbɔ basɔ́gɔ́ɔ bá bɛananamɔ́, kanɛ́ bó lɔ́mɔ́ sɔŋɛ. Tɔ́nɔ buisí búntió, bɔ́ɔbɔ bɔ́ɔ bá ŋgaá bɛáa bó dómbɛdana, bó hóogio bɔ́ɔbɔ bɛɛnyɔ́ɔ, no lɔ́mɔ́ na bɔ́ɔ, kanɛ́ bó lɔ́mɔ́ sɔŋɛ. Bocɔ́bɛcɔ́bɛ kanɛ́ bɔ́ bɔ́bɔ́ɔ,

¹⁵aŋa Ŋgɔ́ŋɛ́ yɛ oyamɔ́ yɛ amɔ́: Mɔ́ɔnyɔ a mbaá bádáa makɔ́nɔ́, a lɛ kanɛ go bɛa bó dómbɛdana, mɔ́ɔnyɔ a mbaá bádáa sɔŋɛ, a dɛ mbá bɛa boóma bá go taŋa[17].

¹⁶Ŋgáa Asaŋa a gɔ́lɔ nigúmi go gɔ́ɔgɔ a mbaá ágá naá odɛ́má ya Tíite, gobííŋenene gúmmue eé gúmmue nɛcɔ́ go busío bɛ́nyɔ́.

¹⁷Tíite go oliminyo ŋgoyáamɔ́ yɛcɔ́, gɛ́hɛ́ go bágáyɛga go nco gunde naá kadɛ́gadɛ́ɛ yɛnyɔ́, bɛɛcɔ́ɔ kanɛ go mo gaŋa.

¹⁸Dɛ lɛ́ mo dómáalú olɔŋɔ na sɔ́gɔ́ɔ untió mɔ́ɔnyɔ biimbó biimée bá boolímínyí bɛ́ mo ségisegimú go gɛnɔ́gɔ́ gɛ́hɛ́ gá buelí gá go dúmenye gɛnɔ́gɔ́ gá cɔ́mɔ.

¹⁹A lɛ́ gɔnɔ́ mɔ́ɔnyɔ biimbó bá boolímínyí bɛ́ mbaá mo iyídé go go có díligenene naá gɛnɔ́gɔ́ gá buelí gɛ́ɛgɛ. Bó lɛ́ buelí bɔ́ɔbɔ dɛ yɔgɔnɔmɔ́ go nigúmi ná Daadáa moatɛ́ moatɛ́, nɔ́ɔnɔ dɛ hóogonyo bɛnɔ́gɔ́ bɛ́cɔ́ bá mbééníŋínyí.

²⁰Dɛ bébeŋebeŋe bese goŋaá mɔtɔ a dɛ có fɛlɛ́dá gɛfɛlɛ́ɔ naá goyɔgɔnɔ na gɛcɛcá gá muinyí gɛ́ɛgɛ bá lɔ́mɔ́ có dóɛ́gɛ́náalú.

²¹Dɛ fúmbe go yɔgɔnɔ bese, caá akɛ́ goana naá oŋgíso yá Asaŋa, kanɛ́ tɔ́nɔ naá oŋgíso yá batɔ[18].

²²Dɛ á dómá batɔ bá bosɔ́mɔ olɔŋɔ na ondimóní bɛcɔ́ ummue. A lɛ́ mɔ́ɔnyɔ dɛ lɔ́mɔ́ ɛ́náalú go bííŋenene gɛ́hɛ́ bɛcamɛna biimée naá buelí bá Asaŋa. A á gɔnɔ́ dúfie godɔ́ɔdɔ nɔ́ɔ go dómba, goakɛ́ a ágana odɛ́má yɛ́hɛ́ uŋkimée naá bɛɛnyɔ́ɔ.

²³Tíite, a lɛ́ udílígíní bamɛ, dɛ yɔgɔnɔ olɔŋɔ nɛhɛ́ go busío bɛ́nyɔ́; bolimóní bɛ́cɔ́ báaba bá lɔ́mɔ́ olɔŋɔ nɛ́hɛ́, biimbó bá boolímínyí bɛ́ bɛ́ lɔ́mɔ́ bó dómáalú; bá yɔgɔnɔ go nigúmi ná Kilítusu.

²⁴Dúfíe nɔnɔ kanɛ́ naá busío bá biimbó bá boolímínyí bɛ́ɛbɛ bɛ́ lɔ́mɔ́ bó dómáalú goŋaá no bó maamana. No dúfie tɔ́nɔ batɔ bɔ́ɔbɔ goŋaá gobéségisegi gɔ́ɔgɔ dɛ lɔ́mɔ́ na gɔ́ go busío bɛ́nyɔ́ gó do báá go dugúnú.