Read Nugunu 2 Kɔlɛ́ntɛ 9 Bible Online

2 Kɔlɛ́ntɛ 9 - Nugunu bible

2 Kɔlɛ́ntɛ 9

¹Go bɔ́ɔbɔ bó núunemú gióhiginyo gɛ́ɛgɛ dɛ lɔ́mɔ́ goŋaá dɛ fáa go busío bá boolímínyí, cɛ báá na boóma bá go nyó ɔ́ŋɛnɔ hɔ́ɔ.

²Ŋgíyimene bɛnɔ́gɔ́ bɛ́nyɔ́ bá mbééníŋínyí, kɔnɔ béségisegi gɛ́nyɔ́ naá boayá bá batɔ bá Masɛdóanɛ, mbó oyanɛna caá, batɔ bá Ekeyíi bá lɛ́ pɛnɛ́ɛ fueké nnyómá yíiní, go go fáanana bábɔ́ bodáŋɔ. Gɔ́ɔ tɔ́nɔ gobíiŋenene gɛ́nyɔ́ gó lɔ́mɔ́ gúlúmínyéelú gɛca gá biimbó bá boolímínyí.

³Kanɛ́ ŋgaá nyó dómɛ́ná bolimóní bɛ́cɔ́ naá gioliminyo, go goŋaá gobéségisegi gɔ́ɔgɔ ndɔ́mɔ́ na gɔ́ naá boayá bɛ́nyɔ́, gó do ɛ́yá go dugúnú naá bosɔ́mɔ bá gióhiginyo bɔ́ɔbɔ. Gɔnɔ́, aŋa ŋgoyanɛnamɔ́ batɔ, no bɛ́ɛmba na pááná sɛ́nyɔ́ go ombɔ́gɔ.

⁴Aáŋa caá nɔ́ɔnɔ, bó amɔ́ bó húme goŋaá ŋgúle olɔŋɔ na batɔ bá Masɛdóanɛ, dɛ nyó gíde kanɛ boóma go ombɔ́gɔ, odóɛ gonóa yó ga á kumbéné makɔ́nɔ́ naá cɛma odɛ́máa yɛ́ɛyɛ ndɔ́mɔ́ na yɛ́, kanɛ́ yɛ́nyɔ́ odóɛ gonóa yó gaá dómbáa.

⁵Go busío moánɛ gɔ́ɔ ŋgaá ná ɛ́ná bese goŋaá túenye bolimóní bɛ́cɔ́ naá bɛɛnyɔ́ɔ, no bégedie na pááná sɛ́ɛsɛ no mbaá dánáa. Aŋa no ŋamɔ́ no báa go bándɛgɛna pááná sɛ́ɛsɔ, bó gá á dúfie goŋaá no á fáánánáa na gɛnɔ́gɔ́ gá odɛ́má, caá akɛ́ naá gɛgaŋa.

⁶Bééníŋínyéemú nɔnɔ nogálɔ nɔ́ɔnɔ nó lɔ́mɔ́: Mɔ́ɔnyɔ a gónamɔ́ camɔ́ sɔŋɛ, masáŋa mɛ́hɛ́ má ŋga bɛ́ɛ́mbá tɔ́nɔ sɔŋɛ; mɔ́ɔnyɔ a gónamɔ́ gɛcɛcá gá camɔ́, masáŋa mɛ́hɛ́ má ŋga bɛ́ɛ́mbá tɔ́nɔ gɛcɛcá.

⁷Ŋgáa onyɔ moánɛ a fáa pááná yɛhɛ́ aŋa odɛ́má yɛ́hɛ́ yó béfiigenyemú, kanɛ mecíkílíi, kanɛ gɛgaŋa. Mɔtɔ mɔ́ɔnyɔ a fáananamɔ́ na bɛyaŋa a lɛ́ ugúle ba Asaŋa.

⁸Asaŋa a bɛanana bogaaga bá go nyó hóogonyo fundufundu na besé mbɔ́dɔ iŋkiménénée, go goŋaá, no do ságá boóma, no bɛanana bɛcamɛna biimée boóma bá go ŋanana bɛnɔ́gɔ́ bá meŋiigíe kɔ́ɔ.

⁹Ŋgɔ́ŋɛ́ yɛ oya yɛ amɔ́: A abana basógasoga oŋgíso mbúúnyíi, botɛ́nɛ́ɛ bɛ́hɛ́ bó lɛ́ kanɛ mmanɛ́náa[19].

¹⁰Asaŋa mɔ́ɔnyɔ a fáananamɔ́ ugúní camɔ́ na manyáanya máama má mo dúgemú[20], a ŋga nyó fáánánáa camɔ́ iŋkimée yɛ́ɛyɛ no lɛ́galɛgamɔ́, a yɛ degie, a gɔnɔ yɛ gúninie go goŋaá botɛ́nɛ́ɛ bɛ́nyɔ́ bó dómba.

¹¹A ŋga nyó fáá gɛca gá moóma, go goŋaá no ɛ́dana naá busío, no aba na basɔ́gɔ́ɔ; náana, gɛcɛcá gɛ́ ná béhiigi Asaŋa go pááná sɛ́nyɔ́ sɛ́ɛsɛ dɛ ná bó béekinyemú.

¹²Ɛɛ́ɛŋ, gióhiginyo gɛ́ɛgɛ no ŋananamɔ́, gɛ́ dɛ báá goana go boolímínyí, kanɛ́, gɛ́ gɔnɔ ŋanana goŋaá gɛcɛcá gɛ́ béhiigi Asaŋa go busío moánɛ.

¹³Aŋa bá nɛ́ ɛ́namɔ́ gióhiginyo gɛ́ɛgɔ naá odɛ́nɛ́ yá gɛ́, bá lɛ go ɛ́da go gúmenye Asaŋa go ŋgɔ́bɛnɔ yɛ́ɛyɛ no dúfenyemú go Gɛnɔ́gɔ́ gá Cɔ́mɔ gá Kilítusu; bá gɔnɔ mo béhiigi go niibo nɛ́ɛnɛ no ŋananamɔ́ nabɔ́, gɔnɔ́ na biimée.

¹⁴Bá ná bósógolonyo Asaŋa nɔ́ɔnɔ na bolɛbɛlɛbɛ go busío bɛ́nyɔ́ go goŋaá a lɛ́ nyó boogóolú a báá dómbáa

¹⁵Ŋgáa dɛ béhiigi Asaŋa go pááná yɛhɛ́ ya kanɛ gieninye.