Read Nugunu Galáatɛ 2 Bible Online

Galáatɛ 2 - Nugunu bible

Galáatɛ 2

¹Naá nnyimé ya nnyómá sɛ́ɔ́dɔ́ na ínni gɔ́ɔ kɔnɔmɔ́ go ɛ́da naá Yolósalɛmɛ olɔŋɔ na Banábasɛ; mmbɛ ɛ́dá tɔ́nɔ na Tíite[5].

²Go busío bá tóogio ya Asaŋa yɛ́ɛyɛ mmbaá lɔmɔ́ bɛáalú gɔ́ɔ mmbɛɛ́ ɛ́dá hɔ́ɔ. Mmba falónáa hɔ́ɔ, Gɛnɔ́gɔ́ gá Cɔ́mɔ gɛ́ɛgɛ mmbaá lɛ túmenye naá kadɛ́gadɛ́ɛ ya batɔ báaba bá lɔ́mɔ́ bá dɛ bɛ́ɛ́mbá Beyúdene. Mmba gɛ́ falónáa naá ŋkanɔ́ sɛ́ɛsɛ mmbaá bɛáa naá cumbé na biidí bá batɔ; cɛ mbá maamana goŋaá gɛdɔmbɔ gá buelí bámɛ bɔ́ɔbɔ mmbaá yɔgɔ́nɔ́ɔ, ɛ́na akɛ́ bɔ́ɔbɔ nyɔgɔnɔmɔ́, gɛ́ bɛ́ɛmba go dugúnú.

³Tíite mɔ́ɔnyɔ a mbaá lɛ olɔŋɔ namɛ, mɔ́ɔ moɔnɔ́ ba Bágɛlɛ́gɛ, bá lɛ́ kanɛ go mo gaŋɛna go go ancaba.

⁴Aáŋa Tíite a mba ancábá, gásɛ́ bó mba lɛ́ go bigíniginye bá bekuilí bá bolimóní naá gioliminyo báaba bá mbaá bɔ́nɔɔ́ɔ naá ɛlɔŋɔ yɛcɔ́; bá lɛ́ŋa go go íyime bofilíi bɔ́ɔbɔ dɛ bɛananamɔ́ naá Yésu Kilítu, bá lɛ́galɛga go có gundie naá boɔlɛ́.

⁵Dɛ lɛ́ kanɛ go fáa batɔ bɔ́ɔbɔ ŋgásɛ́ ya go bó ɔ́bɛnɔ, ɛ́na akɛ́ go go húme ukelú nabɔ́ go moɔnɔ́ ba gɛcamɛna; dɛ mba ŋaáa nɔ́ɔnɔ goŋaá, mammana yɛ́ɛyɛ Gɛnɔ́gɔ́ gá Cɔ́mɔ gɛ́ dúfenyemú ɛ lɔbɛnɔ tɛ́ŋɛ́tɛŋɛ go busío bɛ́nyɔ́.

⁶Moatɛ́ go báaba bá lɔ́mɔ́ aŋa biidí bá batɔ, bá lɛ́ kanɛ go cɔ́lɛgɛnɔ boóma búncodío[6]. Tɔ́nɔ, odɛ́nɛ́ yábɔ́ yó do mbáa lɛ yó nnúune go boóma. Asaŋa mɔ́ɔ a dɛ núúnée boóma bɔ́ɔbɔ batɔ bá lɔ́mɔ́.

⁷Moatɛ́, batɔ bɔ́ɔbɔ bá mbɛ ɛ́ná goŋaá Asaŋa a mba tílímínyée go go dúmenye Gɛnɔ́gɔ́ gá Cɔ́mɔ naá batɔ báaba bá lɔ́mɔ́ bá dɛ bɛ́ɛ́mbá Beyúdene, caŋa mmue aŋa a mbaá dílímínyée Píele, apótɛlɛ naá Beyúdene.

⁸Mammana, Asaŋa mɔ́ɔ a mbaá ágá Píele naá odɛ́nɛ́ yá apótɛlɛ ba Beyúdene, mɔ́ɔ a mbaá ŋgágá tɔ́nɔ yɔmɔ́ɔ naá odɛ́nɛ́ yá apótɛlɛ ba bɛdɔŋɔ bɛ́ɛbɛ bíncodío.

⁹Sáakɛ, Píele na Sáŋa báaba bá lɔ́mɔ́ aŋa mogoná má biimbó bá bakɛlɛ́tɛnɛ, bá mba lɛncá niibo nɛ́ɛnɛ Asaŋa a mbaá mboogóo. Gɔ́ɔ bá có bédíigiemú na ombɔ́gɔ, yɔmɔ́ɔ na Banábasɛ, go go dúfie goŋaá dɛ lɛ́ ukelú; bɛɛcɔ́ɔ dɛ ɛ́da gɛayáa gá báaba bá lɔ́mɔ́ bá dɛ bɛ́ɛ́mbá Beyúdene, bɔ́ɔ bɛ́ ɛ́da gɛayáa gá Beyúdene.

¹⁰Bá báá lɛ́gá goana goŋaá dɛ dɛ bófoolío basógasoga; ndɛ́ ŋaáalú nɔ́ɔ kanɛ go gɛ́gana[7].

¹¹Kanɛ́ aŋa Píele a mbaá ncó bola naá Óntiosi, gámɛ go mo goomɛna goŋaá a mba lɛ́ naá giédie.

¹²Otóotoɛ yá goŋaá nɛnamá ná batɔ nɛ́ɛnɛ Sáakɛ a mbaá dómá, nɛ́ bola, Píele a mba lɛ́ a nyáanya na batɔ báaba bá lɔ́mɔ́ bá dɛ bɛ́ɛ́mbá Beyúdene. Kanɛ́ aŋa báaba bóncodío bá mbaá bolá, gɛ́hɛ́ go yáŋɛmɛda, a báá dɔmbɔ́ go nyáanya na báaba bá lɔ́mɔ́ bá dɛ bɛ́ɛ́mbá Beyúdene, go bofoá bá batɔ báaba bá bienenemú bicele bá Beyúdene.

¹³Beyúdene bóncodío bá bɛ́ɛ́ ɛ́dá go ŋanana aŋa mɔ́ɔ, bó báá ŋaáa goŋaá Banábasɛ moatɛ́ o obɛna naá makoɛla mábɔ́.

¹⁴Aŋa mmbɛɛ́ ɛ́ná goŋaá bá dɛ ɛndáa tɛ́nɛ́ɛ aŋa Gɛnɔ́gɔ́ gá Cɔ́mɔ gɛ́ oyamɔ́, gámɛ go gálɛda Píele naá oŋgíso yá mɔtɔ uŋkimée caá: «Maamɔ́ɔ mɔ́ɔnyɔ o lɔ́mɔ́ ba Beyúdene, go ɔyɔ́ɔ háalá caá akɛ́ aŋa ba Beyúdene. Nɛɛ́nɛ o lɔ́mɔ́ ba go gaŋa báaba bá lɔ́mɔ́ bá dɛ bɛ́ɛ́mbá Beyúdene go go ɔyɔ aŋa Beyúdene o?»

¹⁵Bɛɛcɔ́ɔ dɛ lɛ́ Beyúdene bá mbíényée, dɛ dɛ ɔ́bɔ́nɛ́nɔ́ɔ na mɛɛ́nɔ máama má lɔ́mɔ́ má dɛ íyíménée gicele gá Asaŋa.

¹⁶Dɛ íyimene kanɛ́ dɛ amɔ́, bó do báá goŋaá mɔtɔ a ŋanana aŋa gicele gɛ́ oyamɔ́ gɔ́ɔ a lɔmɔ́ gɛtɛ́nɛ́ɛ naá busío bá Asaŋa, bó lɔ́mɔ́ go goágana odɛ́má yɛ́hɛ́ naá Yésu Kilítu. Bɛɛcɔ́ɔ tɔ́nɔ dɛ mba ágá odɛ́má yɛ́cɔ́ naá Yésu Kilítu go goŋaá dɛ bɛ́ɛmba bɛtɛ́nɛ́ɛ go busío bá gioliminyo gɛ́cɔ́ naá Kilítusu, caá akɛ́ goŋaá dɛ bienene aŋa gicele gɛ́ oyamɔ́. Mɔtɔ a dɛ bósó ba go bɛ́ɛmba gɛtɛ́nɛ́ɛ naá busío bá Asaŋa goŋaá ɛ ɛnda aŋa gicele gɛ́ oyamɔ́.

¹⁷Bɛɛcɔ́ɔ dɛ fúmbe goŋaá dɛ bɛ́ɛmba bɛtɛ́nɛ́ɛ naá busío bá Asaŋa gá Kilítusu. Kanɛ́ bá amɔ́ bá có ɛ́na bɛɛcɔ́ɔ tɔ́nɔ bologílógí, nɔ́ɔnɔ gó lɛ́ nɛɛ́nɛ naá cí, Kilítusu a lɛ́ nnyimé ya gɛlɔgɔ lí? Akɛ́ manɛ́ɛ!

¹⁸Moatɛ́, caá kunde na nnyimé naá gicele gɛ́ɛgɛ mmbaá cecúgíe, yɔmɔ́ɔ kɔnɔmɔ́ go ɛ́ya ulogílógí.

¹⁹Go gicele gɔ́ɔ mmbaá gúé naá gicele goŋaá mbɔ́ɔ́ ɔyɔ́ɔ go busío bá Asaŋa. Mmba gúé naá kolósi olɔŋɔ na Kilítusu.

²⁰Ŋgɔyɔ, kanɛ́, bó do báá gɔnɔ́ yɔmɔ́ɔ mɔ́ɔ ŋgɔyɔmɔ́, Kilítusu mɔ́ɔ ɔ ɔyɔmɔ́ naá yɔmɔ́ɔ. Gɛɔyɔ gámɛ gá boɔtɔ, kɛ́ ɔyɔ naá gioliminyo gɛ́ɛgɛ naá Moɔnɔ́ ba Asaŋa mɔ́ɔnyɔ a mbaá mmaamánáa, a báá bííŋéné go busío bámɛ.

²¹Cɛ lɛ́gálɛ́gáa go gundie niibo ná Asaŋa boóma bá dugúnú. Moatɛ́, aáŋa mɔtɔ ɛ ɛ́yana gɛtɛ́nɛ́ɛ naá busío bá Asaŋa goŋaá ɛ ɛnda aŋa gicele gɛ́ oyamɔ́, Kilítusu a mba gúé kanɛ́ go dugúnú.