Read Nugunu Galáatɛ 3 Bible Online

Galáatɛ 3 - Nugunu bible

Galáatɛ 3

¹Bágaláatɛ, biegu bá batɔ bɛ́ɛbɛ, ánɛ́ɛ a ná nyó gundíe mbɔ́dɔ yɛ́ɛyɛ náana, gɔ́ɔ bɛɛnyɔ́ɔ bá báá go nyó dúfenye daŋɛ́daŋɛ aŋa nɛɛ́nɛ Yésu Kilítu a mbaá gúé naá kolósi o?

²Nnyó úhune ŋgúhune táŋɛ́ mmue caá: go mbɔ́dɔ ɛhanɛ́ no lɔ́mɔ́ bɛáalú Gimmúmpúu gá Giliíli o? Bó lɔ́mɔ́ go gɔ́ɔgɔ no lɔ́mɔ́ beŋéelú gicele lí, ɛ́na, go go gɛ́ndɛgɛna gɔ́ɔgɔ no lɔ́mɔ́ gɛ́ndɛ́gɛ́náalú go gioliminyo Gɛnɔ́gɔ́ gá Cɔ́mɔ gɛ́ɛgɛ bá mbaá nyó dúmbínyée o?

³Nɛɛ́nɛ no lɔ́mɔ́ ba go bɛ́ɛmba biegu mbɔ́dɔ yɛ́ɛyɛ náana o? No mba dandá no ága odɛ́má yɛ́nyɔ́ naá Gimmúmpúu gá Giliíli; godɔ́ɔdɔ gɔ́ɔ no ná lɔ́mɔ́ goŋaá no súgidinye go ɔyɔ go bɛɛnyɔ́ɔ moatɛ́ o?

⁴Muimée mɔ́ɔmɔ no lɔ́mɔ́ luménéné luménéné na mɔ́ naá gɛɔyɔ gɛ́nyɔ́ mó ɛ́ ɛ́yá go dugúnú dɔ́gɔ́? Bó do sɛmɛ́gánánáa go bɛ́ɛmba nɔ́ɔnɔ.

⁵Gɔ́ɔgɔ Asaŋa a nyó fáamɔ́ Giliíli a gɔnɔ ŋanana bieninye bá gobékúke naá kadɛ́gadɛ́ɛ yɛnyɔ́, bó lɔ́mɔ́ go gɔ́ɔgɔ no lɔ́mɔ́ beŋéelú gicele lí, ɛ́na lí, bó lɔ́mɔ́ go gɔ́ɔgɔ no lɔ́mɔ́ gɛ́ndɛ́gɛ́náalú go gioliminyo Gɛnɔ́gɔ́ gá Cɔ́mɔ gɛ́ɛgɛ bá mbaá nyó dúmbínyée o?

⁶Bééníŋínyéemú nɔnɔ Ábalaháma; a mba ágá odɛ́má yɛ́hɛ́ uŋkimée naá Asaŋa, gɔ́ɔ tɔ́nɔ Asaŋa a mbaá mo ɛ́ná gɛtɛ́nɛ́ɛ gá mɔtɔ go nɔ́ɔ.

⁷Íyíme nɔnɔ kanɛ́ no amɔ́, biimée báaba bá áganamɔ́ odɛ́má yábɔ́ naá Asaŋa, bɔ́ɔ bá lɔ́mɔ́ baaná bá Ábalaháma.

⁸Moánɛ, gigísi gá Ŋgɔ́ŋɛ́ gímmue gɛ́ mba dúfíe goŋaá, Asaŋa a ŋgɛ ɛ́ná báaba bá lɔ́mɔ́ bá dɛ bɛ́ɛ́mbá Beyúdene bɛtɛ́nɛ́ɛ bá batɔ bá amɔ́ bá ága odɛ́má yábɔ́ naá mɔ́ɔ. Go busío moánɛ gɔ́ɔ, Ŋgɔ́ŋɛ́ ɛ mbaá dóáná go dóoginyo Ábalaháma Gɛnɔ́gɔ́ gá Cɔ́mɔ gɛ́ɛgɛ yɛ amɔ́: «O ŋga bɛ́ɛ́mbá mbɔ́gɔ́ ya gɛfona go bɛdɔŋɔ bá cí biimée[8].»

⁹Ábalaháma a mba ágá odɛ́má yɛ́hɛ́ naá Asaŋa, Asaŋa a báá mo foná; nɔ́ɔ gɔ́ɔ tɔ́nɔ, biimée báaba bá áganamɔ́ odɛ́má yábɔ́ naá Asaŋa, bá lɔ́mɔ́ fonáalú nɛhɛ́.

¹⁰Mammana, batɔ biimée báaba bɛ́ ɛndamɔ́ aŋa gicele gɛ́ oyamɔ́, bá lɛ́ biimée púmú naá pɛ́ ya ɛyɔmɛnɔ, goakɛ́ Ŋgɔ́ŋɛ́ yɛ oya yɛ amɔ́: «Mɔtɔ uŋkimée mɔ́ɔnyɔ a lɔbɛnɔmɔ́ a dɛ bágóɛ́gá go go ɛnda aŋa gicele giimée gɛ́ oyamɔ́, a háanana na ɛyɔmɛnɔ.»

¹¹Bó lɛ́ mammana goŋaá mɔtɔ a dɛ bósó ba go bɛ́ɛmba gɛtɛ́nɛ́ɛ naá oŋgíso yá Asaŋa goŋaá ɛ ɛnda aŋa gicele gɛ́ oyamɔ́; kanɛ́ mɔ́ɔnyɔ a lɔ́mɔ́ gɛtɛ́nɛ́ɛ go go ágana gɛ́hɛ́ gá odɛ́má naá Asaŋa a ŋgɔ ɔyɔ́ɔ.

¹²Kanɛ́ gicele gɛ́ dɛ luménénée na gioliminyo, goakɛ́ gicele gɛ́ gɛ́ oya gɛ́ amɔ́ mɔ́ɔnyɔ a ŋgaá hóógío buimée bɔ́ɔbɔ bó lɔ́mɔ́ hɔ́ɔ, a ŋgɔ ɔyɔ́ɔ go gɛ́[9].

¹³Kilítusu a mba có fáŋá go ɛyɔmɛnɔ há gicele hɛ́ɛhɛ hɛ́ mbaá lɛ́ hɛ́ có nɔdɛnɔ, a bɛ́ɛ́ ɛ́yá mɔ́ɔ moatɛ́ moatɛ ɛyɔmɛnɔ go busío bɛ́cɔ́, goakɛ́ bó lɛ́ ɔ́ŋɔ́ɔlú goŋaá: Ɛyɔmɛnɔ hɛ́ gumbenene uŋkimée mɔ́ɔnyɔ a lɔ́mɔ́ dóŋáalú naá boɛ́tɛ.

¹⁴Yésu Kilítu a mba ŋaáa nɔ́ɔnɔ goŋaá, go busío bɛ́hɛ́, gɛfona gá Ábalaháma gɛ́ báakɛna báaba bá lɔ́mɔ́ bá dɛ bɛ́ɛ́mbá Beyúdene, nɔ́ɔnɔ dɛ bɛa go gioliminyo, Giliíli mɔ́ɔnyɔ Asaŋa a mbaá dáná.

¹⁵Bolimóní, kɔ́lɔ gieninye naá gɛɔyɔ gá medúgú miimée caá: gɔ́ɔgɔ mɔtɔ ɔ ɔ́ŋɔ́ɔmɔ́ kálata ya tɛ́fá bese bese, mɔtɔ untió a dɛ bósó ba go úlie ɛ́na a gídene boóma kɔ́ɔ.

¹⁶Gɔ́ɔ, Asaŋa a mbaá fáá Ábalaháma na onana yɛ́hɛ́, tánɔ sɛ́hɛ́. Ŋgɔ́ŋɛ́ ɛ dɛ oyá yɛ amɔ́: «na ɛnana yɛhɛ́», aŋa ɛ lɛ́ degédegé, kanɛ́, yɛ oyamɔ́ yɛ amɔ́: na onana yáhɔ[10], nɔ́ɔnɔ gó lɛ́ aá, mɔtɔ táŋɛ́ ummue, mɔ́ɔ a lɔ́mɔ́ kanɛ́ Kilítusu.

¹⁷Mbééníŋínyí yamɛ kanɛ́ yɛ́yɛ́ɛ caá: Asaŋa a mba dóáná go ɔ́ŋɔ kálata ya tɛ́fá bese bese. Gicele gɛ́ɛgɛ gɛ́ síenemú gɛ́ úle naá nnyimé ya nnyómá mantɛdɛ ménni na nitíno na sɛ́ɔ́dɔ́[11], gɛ́ dɛ bósó ba go úlie tɛ́fá ya ndiemi, goŋaá tánɔ yɛ ɛ́ya boóma bá dugúnú.

¹⁸Kanɛ́ aáŋa boóma bɔ́ɔbɔ Asaŋa a mbaá dáná bó ɛ́damɔ́ go úlene naá gicele, bó do bósó bá go gɔnɔ go ɛ́da go úle naá tánɔ. Asáa gɔgɔ́, bó lɔ́mɔ́ go tánɔ gɔ́ɔ Asaŋa a mbaá dúfíe gɛnɔ́ɔ́nɛ́nɔ́ gɛ́hɛ́ naá boayá bá Ábalaháma.

¹⁹Kanɛ́ godɔ́ɔdɔ, gicele gɛ́ ncomɔ́ ŋanana ŋkádɛ o? Gɛ́ ncomɔ́ bégídenine go go dúfie meŋiigíe máama má lɔ́mɔ́ má dɛ luménénée na ndɛ́ga ya Asaŋa, gó ɛ́da go éme aŋa onana yá Ábalaháma yɔ́ɔyɔ tánɔ ɛ lɔ́mɔ́ gɛ́hɛ́ yó ŋgaá ncó bola. Bɛɛ́ŋgɛlɛsɛ bɔ́ɔ bá mbaá lincíe gicele, mɔtɔ ummue a báá bɛ́ɛ́mbá menebíe.

²⁰Kanɛ́ bá dɛ gɔnɔ́ go úhune menebíe gɔ́ɔgɔ mɔtɔ a lɔ́mɔ́ táŋɛ́ ummue, Asaŋa mɔ́ɔ, a lɛ́ táŋɛ́ ummue.

²¹Gicele gɛ́ bábɛndabɛnda tánɔ sá Asaŋa lí? Akɛ́ manɛ́ɛ! Aáŋa Asaŋa a mbi íŋéné gicele gɛ́ɛgɛ gɛ́ fáananamɔ́ gɛɔyɔ, gásɛ́ mɔtɔ a lɛ́ ba go bɛ́ɛmba gɛtɛ́nɛ́ɛ naá oŋgíso yá Asaŋa goŋaá ɛ ɛnda aŋa gicele gɛ́ oyamɔ́.

²²Kanɛ́ Ŋgɔ́ŋɛ́ yɛ oya yɛ amɔ́, batɔ bá cí iŋkimée bá lɛ́ naá boɔlɛ́ bá gɛlɔgɔ, go goŋaá Asaŋa a fáa batɔ báaba bá mbaá ágá odɛ́má yábɔ́ naá Yésu Kilítu, buimée bɔ́ɔbɔ a mbaá dáná.

²³Otóotoɛ yá goŋaá gioliminyo gɛ́ bola, dɛ mba lɛ́ bɛɔlɛ́ bá gicele. Bó mba lɛ́ bó úhene goŋaá dɛ gɛ́gana gɛcamɛna gɛ́ɛgɛ Asaŋa a mbaá lɔmɔ́ ba go có lincie gioliminyo moánɛ.

²⁴Nɔ́ɔnɔ gɔ́ɔ, gicele gɛ́ mbaá lɔmɔ́ aŋa ufífí bɛcɔ́, gó ɛ́da go éme naá go nco bola gá Kilítusu, go goŋaá dɛ bɛ́ɛmba bɛtɛ́nɛ́ɛ bá batɔ go gioliminyo.

²⁵Kanɛ́ aŋa gioliminyo gɛ́ mbaá bolá, dɛ dɛ gɔnɔ́ go ɔ́bɛnɔnɔ na ufífí mɔ́ɔnyɔ.

²⁶Mammana, naá gioliminyo gɛ́ɛgɛ naá Yésu Kilítu, no lɛ́ baaná bá Asaŋa.

²⁷Bɛɛnyɔ́ɔ biimée, no mba báladá na Kilítusu go giyuminye gɛ́ɛgɛ no mbaá bɛáa, gɔ́ɔ no mbɛɛ́ ɛ́yá púényí sɛ́hɛ́.

²⁸Nɔ́ɔ gɔ́ɔ dɛ lɔ́mɔ́ boóma búmmue naá busío bá Asaŋa; godádoga gó do báá gɔnɔ́ hɔ́ɔ na Beyúdene na báaba bá lɔ́mɔ́ bá dɛ bɛ́ɛ́mbá Beyúdene, godádoga gó do báá na gɛɔlɛ́ na mɔ́ɔnyɔ a lɔ́mɔ́ a dɛ bɛ́ɛ́mbá gɛɔlɛ́, godádoga gó do báá na onɔ́mɔtɔ́ na okɔ́dɔ; mammana dɛ lɛ́ ummue naá gobálada gɔ́ɔgɔ na Yésu Kilítu.

²⁹Aŋa no ná lɔ́mɔ́ go ɔ́bɛnɔnɔ na Kilítusu, no ná lɛ́ kanɛ́ ɛnana ya Ábalaháma; no ná lɛ́ ba go dáŋaba moóma muimée mɔ́ɔmɔ Asaŋa a mbaá dáná[12].