Read Nugunu Galáatɛ 4 Bible Online

Galáatɛ 4 - Nugunu bible

Galáatɛ 4

¹Ɔ́bɔ́ nɔnɔ kanɛ́ bese boóma bɔ́ɔbɔ ndɛ́galɛgamɔ́ go nyó oyana caá: gɛcamɛna giimée gɛ́ɛgɛ Moɔnɔ́ ba bigíndé a gá lɔ́mɔ́ gihelege, a lɛ́ gɔgɔ́ aŋa gɛɔlɛ́, akɛ́ aŋa buimée bó ɔ́bɛnɔnɔmɔ́ nɛhɛ́.

²Gɛcamɛna gɛ́ɛgɔ, a lɛ́ naá ɛmbɔ́gɔ ya uniní na ya mɔ́ɔnyɔ i indenyemú boóma buimée, gó ɛ́da húme aŋa gɛcamɛna gɛ́ɛgɛ Isée a mbaá sómbá gɛ́ háamɔ́.

³Caŋa mmue bɛɛcɔ́ɔ tɔ́nɔ, gɛcamɛna gɛ́ɛgɛ dɛ mbaá lɔmɔ́ dɛ gá lɛ́ baábayɔ́, dɛ mba lɛ́ naá boɔlɛ́ bá go ɛnda aŋa moóma má cí mó oyamɔ́[13].

⁴Kanɛ́ aŋa gɛcamɛna gɛ́ɛgɛ Asaŋa a mbaá sómbá gɛ́ mbaá háá, gɛ́hɛ́ go dóma Moɔnɔ́ bɛhɛ́. A mba bébíéné naá okɔ́dɔ, gicele gá Beyúdene gɛ́ mo nona.

⁵Bó mbaá lɛ go go fáŋa biimée báaba gicele gɛ́ mbaá lɛ́ gɛ́ bó nona; hɔ́ɔlɔ́ gɔ́ɔ a có fáamɔ́ pɛ́ ya goŋaá dɛ bɛ́ɛmba baaná bá Asaŋa.

⁶Aŋa no lɔ́mɔ́ mammana baaná, Asaŋa a mba ágá Giliíli ba Moɔnɔ́ bɛhɛ́ naá ɛdɛ́má yɛcɔ́, a có fáanana bogaaga bá go fínenye Asaŋa dɛ amɔ́: «Ába[14]» nɔ́ɔnɔ gó lɛ́ aá «Baaba.»

⁷O do báá kanɛ́ gɔnɔ́ gɛɔlɛ́, o lɔ́mɔ́ moɔnɔ́. Aŋa o lɔ́mɔ́ moɔnɔ́, o lɛ́ tɔ́nɔ moɔnɔ́ ba bigíndé go bogaaga bá Asaŋa.

⁸Cóá, aŋa no mbaá lɛ no do íyíménée Asaŋa, no mba lɛ́ moɔlɛ́ŋgɔlɛ́ má baasaŋa bɔ́ɔ bá dɛ bɛ́ɛ́mbá akɛ́ nɔ́ɔ[15].

⁹Kanɛ́ godɔ́ɔdɔ no íyimene Asaŋa, moánɛ, Asaŋa mɔ́ɔ a nyó íyimenemú. Nɛɛ́nɛ kanɛ́ no lɔ́mɔ́ ba go gɔnɔ bí íŋene go moómaŋkóma má dugúnú dugunu, mɔ́ɔ kanɛ bogaaga, goŋaá no gɔnɔ gunde doɔlɛ́ŋgɔlɛ́ o?

¹⁰No búlugenye medúgú móncodío, ɛfɛ́, bɛcamɛna bá nnyómá na nnyómá moatɛ́.

¹¹No á kólío bofoá goŋaá gɛdɔmbɔ gámɛ giimée gɛ́ɛgɛ ŋgaá ná gɔ́lɔ́nɔ́ɔ go busío bɛ́nyɔ́, gɛ́ ɛ́ya gá go sola.

¹²Bolimóní, ŋgaá nyó bósógólídío, biéne nɔnɔ gɛgɔ́ndɔ́ gámɛ, goŋaá ndɛ́ ɛ́yáalú aŋa bɛɛnyɔ́ɔ. No lɛ́ kanɛ go ŋŋa gɛbɛ́ gá boóma.

¹³No íyimene gɛcamɛna gɛ́ɛgɛ mmbaá nyó oyáná Gɛnɔ́gɔ́ gá Cɔ́mɔ go ɛŋɛndɔ yá busío; mmba lɛ́ nnóma.

¹⁴Nnyɔ́dɔ yamɛ ɛ dɛ mbáa lɛ ɛ fɛanana go núune, akɛ́ nɔ́ɔnɔ, no do mbá cɔ́mbɛdɔ, no do mbá mmɛ́nyɛda. Kanɛ́ no mba kɛ́ndɛ́gɛ́ná aŋa ɛ́ŋgɛlɛsɛ ba Asaŋa, gɔnɔ́ aŋa Yésu Kilítu.

¹⁵No mba lɛ́ na bɛyaŋa cóá, mbɔ́dɔ ya goŋaá no mba lɛ́ ba go bábála oŋgíso yɛ́nyɔ́ go go páa, ŋgíyimene nɔ́ɔ mammana. Godɔ́ɔdɔ yɛ́ɛyɛ, bɛyaŋa bɛ́nyɔ́ moánɛ bɛ́ á ná maná nɛɛ́nɛ?

¹⁶Ŋgɛɛ́ ɛ́yá obɛlɔ́bɛlɔ bɛnyɔ́ goŋaá nnyó oyanɛna mammana o?

¹⁷Gɛlola gɛ́ɛgɛ batɔ bóncodío bá lɔ́mɔ́ na gɛ́ go busío bɛ́nyɔ́ gɛ́ dɛ báá bese, bá lɛ́galɛgamɔ́ goana go nyó dádona namɛ, no bɛ́ɛmba bábɔ́.

¹⁸Kanɛ́ bó fɛanana go bɛa gɛlola go besé gɛcamɛna giimée, caá akɛ́ goana gɔ́ɔgɔ ndɔ́mɔ́ naá kadɛ́gadɛ́ɛ yɛnyɔ́.

¹⁹Baaná bámɛ, ká nómana gɔnɔ́ go busío bɛ́nyɔ́ aŋa okɔ́dɔ ba go bíene, gó ɛ́da go éme aŋa Kilítusu a ŋgaá lukúméné naá bɛɛnyɔ́ɔ.

²⁰Ndɛ́galɛga goŋaá mbɛ́ɛmba naá boayá bɛ́nyɔ́ naá gɛcamɛna gɛ́ɛgɛ, goŋaá mbáá nyó gálɛ́dá mbɔ́dɔ intió. Mammana cɛ íyíménée aŋa ndɔ́mɔ́ ba go ŋa nɛnyɔ́.

²¹Ŋgoyánáamɔ́ nɔnɔ, bɛɛnyɔ́ɔ báaba no lɛ́galɛgamɔ́ go ɛnda aŋa gicele gɛ́ oyamɔ́, no ɔ́bɔnɔ bese bese boóma bɔ́ɔbɔ gicele moánɛ gɛ́ oyamɔ́ o?

²²Bó lɛ́ ɔ́ŋɔ́ɔlú goŋaá Ábalaháma a mba bɛáa baaná báandɛ́, ummue na okɔ́dɔ mɔ́ɔnyɔ a mbaá lɔmɔ́ gɛɔlɛ́, ummue na okɔ́dɔ mɔ́ɔnyɔ a mbaá lɔmɔ́ a dɛ bɛ́ɛ́mbá gɛɔlɛ́.

²³Moɔnɔ́ ba okɔ́dɔ mɔ́ɔnyɔ a mbaá lɔmɔ́ gɛɔlɛ́ a mba bébíéné aŋa moɔnɔ́ uŋkimée; kanɛ́ ba okɔ́dɔ mɔ́ɔnyɔ a mbaá lɔmɔ́ a dɛ bɛ́ɛ́mbá gɛɔlɛ́, a mba bébíéné go tánɔ ya Asaŋa[16].

²⁴Dogálɔ dɔ́ɔdɔ dó lɛ́ aŋa ncaba: bakɔ́dɔ bɔ́ɔbɔ bá lɔ́mɔ́ bɛlada bugúle bɛ́andɛ́. Gímmue gɛ́ lɔ́mɔ́ gɛ́ɛgɛ Asaŋa a mbaá gódá naá ogɔndɔ yá Sineyíi; gɛ́ núunemú Agáalɛ mɔ́ɔnyɔ a bíenemú bɛɔlɛ́.

²⁵Agáalɛ, bó lɔ́mɔ́ ogɔndɔ yá Sineyíi yɔ́ɔyɔ yó lɔ́mɔ́ naá gɛdɔŋɔ gá Elebíi. A lɛ́ Yolósalɛmɛ ba ínoni mɔ́ɔnyɔ a lɔ́mɔ́ naá boɔlɛ́ na baaná bɛ́hɛ́ kɛ́.

²⁶Kanɛ́ Yolósalɛmɛ ba mmoɛná a dɛ báá gɛɔlɛ́, mɔ́ɔ a lɔ́mɔ́ nnyeedíi bɛcɔ́.

²⁷Bó lɛ́ ɔ́ŋɔ́ɔlú goŋaá: «Yaŋáa, maamɔ́ɔ gɛhóádá gá okɔ́dɔ, maamɔ́ɔ mɔ́ɔnyɔ o lɔ́mɔ́ kanɛ go bɛ́ɛ́na! Fɛ́náa dupópóo, maamɔ́ɔ mɔ́ɔnyɔ o lɔ́mɔ́ kanɛ go íyime aŋa bá nómanamɔ́ go go bíene! Mammana okɔ́dɔ mɔ́ɔnyɔ a lɔ́mɔ́ gibembelidie, a ŋga bɛáa gɛca gá baaná a dómba okɔ́dɔ mɔ́ɔnyɔ a lɔ́mɔ́ na onɔ́mɛ[17].»

²⁸Go busío bɛ́nyɔ́, bolimóní, no lɛ́ bébíénéelú go tánɔ ya Asaŋa, caŋa mmue aŋa Ɛ́saga.

²⁹Cóá, moɔnɔ́ mɔ́ɔnyɔ a mbaá bébíéné aŋa moɔnɔ́ uŋkimée a mba lɛ́ a nuigenye mɔ́ɔnyɔ a mbaá bébíéné naá Giliíli ba Asaŋa; bó gá báŋanana nɔ́ɔnɔ gó nco go éme godɔ́ɔdɔ.

³⁰Moatɛ́, Ŋgɔ́ŋɛ́ yɛ oyamɔ́ yɛ amɔ́ nɛɛ́nɛ o? Yɛ oya yɛ amɔ́: «Nafá okɔ́dɔ mɔ́ɔnyɔ a lɔ́mɔ́ gɛɔlɛ́ na moɔnɔ́ bɛhɛ́; goakɛ́ moɔnɔ́ ba okɔ́dɔ mɔ́ɔnyɔ a lɔ́mɔ́ gɛɔlɛ́, a dɛ ŋgá bɛa tɛ́fá ya bonɔ́mɛ olɔŋɔ na moɔnɔ́ ba okɔ́dɔ mɔ́ɔnyɔ a lɔ́mɔ́ a dɛ bɛ́ɛ́mbá gɛɔlɛ́[18].»

³¹Náana gɔ́ɔ, bolimóní, dɛ lɔ́mɔ́ dɛ dɛ bɛ́ɛ́mbá baaná bá okɔ́dɔ mɔ́ɔnyɔ a lɔ́mɔ́ gɛɔlɛ́, kanɛ́ bá okɔ́dɔ mɔ́ɔnyɔ a lɔ́mɔ́ a dɛ bɛ́ɛ́mbá gɛɔlɛ́.