Read Nugunu Galáatɛ 5 Bible Online

Galáatɛ 5 - Nugunu bible

Galáatɛ 5

¹Bó mbaá lɔmɔ́ goŋaá dɛ úlukie mammana naá boɔlɛ́, gɔ́ɔ Kilítusu a mbaá có dúgúné. Kanɛ́, bágɛ́ndɛ́náamɔ́ nɔnɔ bese, no do gɔnɔ́ gunde naá boɔlɛ́ bɛ́nyɔ́ bá cóá.

²Yɔmɔ́ɔ Póolo ŋgaá nyó oyáná caá, no amɔ́ no ancaba, Kilítusu a dɛ gɔnɔ́ nyó dúgune go boóma.

³Ŋgaá gɔnɔ́ fitie caá, mɔtɔ uŋkimée mɔ́ɔnyɔ a ancabamɔ́, a háanana go hóogio buimée bɔ́ɔbɔ gicele gɛ́ oyamɔ́.

⁴Bɛɛnyɔ́ɔ báaba no fúmbemú go ɛ́ya bɛtɛ́nɛ́ɛ bá batɔ goŋaá no bienene aŋa gicele gɛ́ oyamɔ́, no á bádádóná na Kilítusu. Niibo ná Asaŋa nɛ́ dɛ báá nɛnyɔ́.

⁵Naá boayá bá bɛɛcɔ́ɔ báaba dɛ olimonyomú, dɛ ágana mbémineminie yɛcɔ́ naá Asaŋa mɔ́ɔnyɔ a ŋgaá có íyíe bɛtɛ́nɛ́ɛ bá batɔ. Boóma bɔ́ɔbɔ dɛ gɛ́ganamɔ́ bɔ́bɔ́ɔ, na gióhiginyo gá Gimmúmpúu gá Giliíli.

⁶Gɔ́ɔgɔ mɔtɔ a lɔ́mɔ́ báladáalú na Yésu Kilítu, ancábáalú akɛ́ kanɛ go ancaba, bó do báá na ndénégé; bɔ́ɔbɔ bó lɔ́mɔ́ na ndénégé bó lɔ́mɔ́ godúfenye gá gioliminyo gɛ́hɛ́ naá gɛnɔ́ɔ́nɛ́nɔ́.

⁷Cóá, no mba lɛ́ no ɛnda bese; ánɛ́ɛ a á ná nyó gɛ́mbɛ́ná pɛ́, ɛ báá nyó legé go biene aŋa mammana yɛ oyamɔ́ o?

⁸Mbɔ́dɔ ya mbééníŋínyí aŋa yɛ́ɛyɛ náana, ɛ dɛ ɛ́dá go úlene naá mɔ́ɔnyɔ a nyó dɔ́ŋɔnɔmɔ́.

⁹Baaná bá ondɔ yá go fudugenye uguŋe bá ŋanana goŋaá gɛdɔ́bɔ́ giimée giimée gɛ́ fuduge, aŋa batɔ bó oyamɔ́[19].

¹⁰Go busío bámɛ, mbémineminie naá Daadáa goŋaá no do gaá bɛáa mbééníŋínyí kóka na yamɛ. Kanɛ́ mɔ́ɔnyɔ a bueŋenyemú ɛdɛ́má yɛnyɔ́, Asaŋa a ŋga mo séésényée, akɛ́ a bɛ́ɛmba ánɛ́ɛ.

¹¹Bolimóní bámɛ, naá bámɛ boayá, caá kɔnɔ go oyanɛna batɔ goŋaá bá ancaba, kanɛ́ bá céesenyemú goakɛ́? Caá ŋgoya nɔ́ɔnɔ, nigúe ná Kilítusu naá kolósi nɛ́ dɛ bósó ba go lege mɔtɔ boóma.

¹²Ŋgáa báaba bá nyó bueŋenyemú bɛ́ ɛ́dana naá busío na meŋiigíe mábɔ́, bá búúlenye akɛ́ na mosámá má pindi kɛ́.

¹³Bɛɛnyɔ́ɔ, bolimóní bámɛ báaba Asaŋa a á ná nyó dɔ́ŋɛ́nɔ́ go go bɛ́ɛmba naá bofilíi, ŋgaá nyó oyáná caá, bofilíi bɛ́nyɔ́ moánɛ bó do bɛ́ɛ́mbá gɛmbɛ́ná go go ɔyɔ aŋa no lɛ́galɛgamɔ́. Kanɛ́, ŋgáa onyɔ moánɛ a bɔ́yɔgɔnɛnɔ sɔ́gɔ́ɔ aŋa gɛnɔ́ɔ́nɛ́nɔ́ gɛ́ oyamɔ́.

¹⁴Ɛɛ́ɛŋ, dɛ lɛ́ ba go gálɛda kolá kúi go gicele giimée dɛ amɔ́: «O maamana sɔ́gɔ́ɔ aŋa maamɔ́ɔ moatɛ́[20].»

¹⁵Kanɛ́, bébeŋéemú nɔnɔ, no amɔ́ no ɛ́da go nómanɛna, no fafonanɛna, no gaá béfúúgíe bɛɛnyɔ́ɔ moatɛ́.

¹⁶Gó moánɛ nnyó oyanamɔ́ caá, ɛndáa nɔnɔ aŋa Gimmúmpúu gá Giliíli a nyó oyanɛnamɔ́, go goŋaá no do ɔyɔ́ɔ aŋa bɛbɛ́ bɛ́nyɔ́ bá mbééníŋínyí bɛ́ lɛ́galɛgamɔ́.

¹⁷Bɛbɛ́ bá mbééníŋínyí bɛ́ dɛ ɛndáa aŋa Gimmúmpúu gá Giliíli a lɛ́galɛgamɔ́, Gimmúmpúu gá Giliíli tɔ́nɔ, caŋa mmue. Naá tɛ́mádɛ́má yabɔ́, bó lɔ́mɔ́ goana bidé, gó moánɛ no lɔ́mɔ́ no do bɛanánáa bogaaga bá go ŋa bɔ́ɔbɔ no lɛ́galɛgamɔ́[21].

¹⁸Kanɛ́, aáŋa Gimmúmpúu gá Giliíli a nyó indenye, no do báá gɔnɔ́ bɛɔlɛ́ bá gicele.

¹⁹Meŋiigíe má bɛbɛ́ bá mbééníŋínyí má lɔ́mɔ́: gɛɔyɔ gá hanyɔ́, go báagana gá biílo, gɛɔyɔ gá mosɔmɔ,

²⁰go búlugenye gá bɛgɔgɔ́ na gɛdɔ́ɔ; mbɛlɔ́, cáŋɔ́, hɛagá, gimpímímpímí, go bábɛndabɛnda, go suŋe gá ɛdɛ́nɛ́ na go básalasala,

²¹gɛdɛ́mádɛ́má, nɛnyóa ná ginití, gɛnyáányɛ́ná na moóma múntió mɔ́ɔmɔ gɔnɔ́ nɔ́ɔnɔ. Báaba bá ŋananamɔ́ nɔ́ɔnɔ, ŋgaá nyó oyáná aŋa mbaá dóáná go nyó oyana caá, bá dɛ ŋgɛ́ ɛ́na Bufuŋe bá Asaŋa.

²²Kanɛ́ buelí bá Gimmúmpúu gá Giliíli bó úmemú moóma mɔ́ɔmɔ mó lɔ́mɔ́: gɛnɔ́ɔ́nɛ́nɔ́, bɛyaŋa, buumbénú, gogɛ́gana kanɛ tɔmbɛ́nɔ́ɔ, busi, gɛnɔ́gɔ́ gá odɛ́má, pídefide,

²³bopɔ́ɔ na gobánona gá odɛ́má; gicele gɛ́ dɛ bósó go legene meŋiigíe aŋa mɔ́ɔmɔ nɔ́ɔnɔ.

²⁴Biimée báaba bɔ́ ɔ́bɛnɔnɛnɔmɔ́ na Kilítusu, bá mbo óná nnyɔ́dɔ yabɔ́ na bɛdɛ́mádɛ́má bá yɛ́ na mbééníŋínyí sá yɛ́ naá kolósi.

²⁵Aŋa Gimmúmpúu gá Giliíli a có fáananamɔ́ gɛɔyɔ, ŋgáa dɛ mo dɛ́ɛna a có indenye.

²⁶Naá tɛ́mádɛ́má yɛcɔ́, dɛ dɛ bébúlúgényée, dɛ dɛ bɛ́ɛ́mbá na dusogí, dɛ dɛ bɛáa hɛagá.