Read Nugunu Galáatɛ 6 Bible Online

Galáatɛ 6 - Nugunu bible

Galáatɛ 6

¹Bolimóní, no amɔ́ no ɛ́na mɔtɔ a ŋanana gɛoba, bɛɛnyɔ́ɔ báaba no lɔ́mɔ́ na Giliíli ba Asaŋa, mo bónónáamɔ́ nɔnɔ na odɛ́má yá lɛbɛlɛbɛ; o bébeŋe goŋaá maamɔ́ɔ tɔ́nɔ o do obɛ́ná naá ɛsɔgɛdɔ.

²Óhígónínyóo nɔnɔ go go bádóɛgana bɛnóɛ́ bɛ́nyɔ́, nɔ́ɔ gɔ́ɔ no gaá ná hóógío gicele gá Kilítusu.

³Aáŋa mɔtɔ a béeniŋenye a amɔ́ a lɛ́ gɛantáanta, asáa gɔgɔ́ mɔ́ɔ kanɛ ndénégée, a bébelebele mɔ́ɔ moatɛ́.

⁴Ŋgáa onyɔ moánɛ a hɛnyahɛnya miindíe mɛ́hɛ́; a amɔ́ ɛ ɛ́na a amɔ́ má lɛ́ bese, a lɛ́ ba go yaŋa go mɔ́ɔ moatɛ́, go dómba goŋaá a bédide na basɔ́gɔ́ɔ.

⁵Ɛɛ́ɛŋ, onyɔ moánɛ a háanana go bádóɛgɛna gɛnóɛ́ gɛ́hɛ́.

⁶Mɔtɔ mɔ́ɔnyɔ bá mo húunenyemú nogálɔ ná Asaŋa, a háanana go fáa mɔ́ɔnyɔ a mo húunenyemú bodáŋɔ naá bonɔ́mɛ bɛ́hɛ́ buimée.

⁷No do bébelébélée, bá dɛ fánɛ́náfánɛ́náa Asaŋa. Bɔ́ɔbɔ mɔtɔ a gónamɔ́ bɔ́ a ŋgaá sáŋáa[22].

⁸Mɔtɔ a amɔ́ a góna bɔ́ɔbɔ bó nɔ́ɔmɔ́ nnyɔ́dɔ yɛhɛ́, masáŋa máama a ná sáŋamɔ́ má ná bɛ́ɛmbamɔ́ nigúe. Kanɛ́ a amɔ́ a góna bɔ́ɔbɔ bó nɔ́ɔmɔ́ Giliíli, masáŋa máama a ná sáŋamɔ́ hɔ́ɔ má lɔ́mɔ́ gɛɔyɔ gá kanɛ mesúge.

⁹Ŋgáa dɛ ŋanana besé kanɛ tɔmbɛ́nɔ́ɔ, goakɛ́ aáŋa dɛ dɛ obá bɛnamá, dɛ ŋga sáŋáa aŋa gɛcamɛna gɛ́ ŋgaá háá.

¹⁰Gɔ́ɔ bó lɔ́mɔ́, gɛcamɛna gɛ́ɛgɛ dɛ lɔ́mɔ́ na ŋgásɛ́, ŋgáa dɛ ŋanana besé go mɔtɔ uŋkimée, dómbá dómbáa go bolimóní bɛ́cɔ́ báaba naá gioliminyo.

¹¹Ŋgaá nyó ɔ́ŋɛ́nɔ́ godɔ́ɔdɔ na ombɔ́gɔ yámɛ yá moatɛ́ aŋa no núunemú bɛantáanta bá ŋgɔ́ŋɛ́ bɛ́ɛbɛ.

¹²Batɔ báaba bá lɛ́galɛgamɔ́ bá amɔ́ no ancaba, bá lɛ́ báaba bá lɛ́galɛgamɔ́ goŋaá batɔ bá bó ɛ́na bese. Buimée bɔ́ɔbɔ bá lɛ́galɛgamɔ́ bó lɔ́mɔ́ goŋaá bá dɛ bɛáa noséésényée go busío bá kolósi ya Kilítusu.

¹³Mammana, bɔ́ɔbɔ moánɛ bá ancabanamɔ́, bɔ́ɔ moatɛ́ bá dɛ bienénée gicele; kanɛ́ bá lɛ́galɛga bá amɔ́ no ancabana go go béségi goŋaá bá á nyó gaŋáa go oliminyo gieninye gɛ́ɛgɔ naá bɛnyɔ́ nnyɔ́dɔ.

¹⁴Naá bámɛ boayá, cɛ bɛanánáa boóma búntió bá go béségi go bɔ́, goana kolósi ya Daadáa bɛcɔ́ Yésu Kilítu. Go yɛ́, moóma má cí mó lɛ́ mugúénú go busío bámɛ, yɔmɔ́ɔ tɔ́nɔ ugúénú go mɔ́.

¹⁵Go ancaba akɛ́ o do ancábá, ndénégé ɛ dɛ báá hɔ́ɔ; ndénégé ɛ lɔ́mɔ́ gɛpáa gá gɛɔyɔ.

¹⁶Go biimée báaba bá bienenemú gohúunenye gámɛ gɔ́ɔgɔ, ŋgoó oyɛ́dá caá: Ŋgáa buumbénú na ŋgɛ́na mahana ya Asaŋa mó bɛ́ɛmba nabɔ́ na boɛ́nɔ bá Asaŋa, Ɛ́sɛlahɛ́ɛlɛ.

¹⁷Gó bayɛga godɔ́ɔdɔ, mɔtɔ a dɛ gɔnɔ́ nco céesidinye, goakɛ́ binini bɛ́ɛbɛ ndɔ́mɔ́ na bɛ́ naá nnyɔ́dɔ bɛ́ lɔ́mɔ́ bá Yésusu.

¹⁸Bolimóní, ŋgáa niibo ná Daadáa bɛcɔ́ Yésu Kilítu nɛ́ bɛ́ɛmba nɛnyɔ́ biimée. Aamɛnɛ.