Read Nugunu Ɛ́fɛsɛ 3 Bible Online

Ɛ́fɛsɛ 3 - Nugunu bible

Ɛ́fɛsɛ 3

¹Go busío bá ndiemi gɔ́ɔ yɔmɔ́ɔ Póolo, mbósógolonyomú Asaŋa. Yɔmɔ́ɔ mɔ́ɔnyɔ ndɔ́mɔ́ naá ncíbo ya gɛaŋɔ́ go buelí bá Yésu Kilítu go busío bɛ́nyɔ́ báaba no lɔ́mɔ́ no do bɛ́ɛ́mbá Beyúdene.

²No mbɔ ɔ́bɔ́ bó oya bosɔ́mɔ bɔ́ɔbɔ Asaŋa, go niibo nɛ́hɛ́, a mbaá tóɛ́gɛ́ná go busío bɛ́nyɔ́ go go hóogio nokɛsa nɛ́hɛ́.

³A mba puuné oŋgíso go go ndincie nokɛsa nɛ́hɛ́ nɔ́ɔnɔ nó mbaá lɛ naá nnindíi, gɔgɔ́ aŋa ká lɔ́mɔ́ na go nyó fɛ́lɛdɛna bosɔ́mɔ moánɛ.

⁴Gɔ́ɔgɔ no gaá ná baná kálata yamɛ, no gaá lɛncá mbɔ́dɔ ɛhanɛ́ ŋgíyimenemú nnindíi yɛ́ɛyɛ ɛ núunemú Kilítusu.

⁵Nnindíi moánɛ, Asaŋa a dɛ mbá yɛ lincie go batɔ bá ɛgɛlɛ ya cóá aŋa a ncomɔ́ yɛ lincie godɔ́ɔdɔ gá Giliíli naá bimmúmpúu bɛ́hɛ́ bá baapótɛlɛ na mbúsí sɛ́hɛ́:

⁶báaba bá lɔ́mɔ́ bá dɛ bɛ́ɛ́mbá Beyúdene bá lɛ́ tɔ́nɔ naá bodáŋɔ bá bigíndé táŋɛ́ búmmue, bá lɛ́ bɛnamá bá nnyɔ́dɔ táŋɛ́ mmue, bá báá bó ladá go tánɔ táŋɛ́ mmue naá Yésu Kilítu go busío bá Gɛnɔ́gɔ́ gá Cɔ́mɔ.

⁷Asaŋa a mba ŋgíyíe uyogóní ba Gɛnɔ́gɔ́ gá Cɔ́mɔ go pááná ya niibo yɛ́ɛyɛ a mbaá ŋŋaáa, aŋa bogaaga bɛ́hɛ́ bó mbaá lɛ bó yɔgɔnɔ.

⁸Yɔmɔ́ɔ mɔ́ɔnyɔ ndɔ́mɔ́ hɛómaŋkóma há mesúgudinye naá boolímínyí biimée[6], mmba bɛáa niibo ná go dúmeninye báaba bá lɔ́mɔ́ bá dɛ bɛ́ɛ́mbá Beyúdene, bonɔ́mɛ bá kanɛ gieninye bá Kilítusu,

⁹ŋgága naá gise mbɔ́dɔ yɛ́ɛyɛ Asaŋa a hóogonyomú nokɛsa nɔ́ɔnɔ a lɔ́mɔ́ fueké gɔgɔ́ na nɔ́ ɔsɛ́gɔ́ɔlú. Mɔ́ɔ mɔ́ɔnyɔ a lɔ́mɔ́ ugedí muimée.

¹⁰Náana gó bayɛga godɔ́ɔdɔ, go biimbó bá boolímínyí, biimée báaba bá lɔ́mɔ́ na Nɛgaŋa na Bogaaga naá mmoɛná, bá gaá lɛncá nciŋí ya Asaŋa naá pɛ́ sá yɛ́ iŋkimée.

¹¹Buimée bɔ́ɔbɔ bó lɛ́ caŋa mmue na nokɛsa ná kanɛ mmanɛ́náa ná Asaŋa nɔ́ɔnɔ a mbaá hóógío gá Yésu Kilítu Daadáa bɛcɔ́.

¹²Naá gobálada gɔ́ɔgɔ na Kilítusu na gioliminyo gɛ́ɛgɛ dɛ bɛananamɔ́ naá mɔ́ɔ, dɛ bɛanana nɛgaŋa ná go dɛ́lɛmɛna naá busío bá Asaŋa na toodo odɛ́máa iŋkimée.

¹³Gɔ́ɔ nyó oyanamɔ́ caá, no do obá bɛnamá go bɛdɔmbɔ bɛ́ɛbɛ mbɛananamɔ́ go busío bɛ́nyɔ́; bɛdɔmbɔ bɛ́ɛbɔ bɛ́ lɛ́ nigúmi nɛ́nyɔ́.

¹⁴Gó moánɛ kulemú enúu go cí naá busío bá Asaŋa Isée,

¹⁵mɔ́ɔnyɔ ncíbo ya batɔ iŋkimée naá mmoɛná na naá cí ɛ bɛananamɔ́ ufíno yɛ́hɛ́.

¹⁶Mmo ɔŋɔnɔ goŋaá go bonɔ́mɛ bá nigúmi nɛ́hɛ́, a gíndie boɔtɔ bɛ́nyɔ́ na bogaaga bá Giliíli bɛhɛ́;

¹⁷Kilítusu, naá gioliminyo, a gɛ́ga naá ɛdɛ́má yɛnyɔ́; no bɛ́ɛmba suméelú gɔnɔ́ gónáalú naá gɛnɔ́ɔ́nɛ́nɔ́.

¹⁸Nɔ́ɔ gɔ́ɔ no gaá ná bɛáa bogaaga bá go ɔ́bɔ olɔŋɔ na boɛ́nɔ bá Asaŋa aŋa gɛnɔ́ɔ́nɛ́nɔ́ gá Kilítusu gɛ́ lɔ́mɔ́ gɛɔmpɔgɔ, mmɛndɛ́ɛ, tɛ́nɛ́ɛ na findímíi.

¹⁹Ɛɛ́ɛŋ, no gaá lɛncá gɛnɔ́ɔ́nɛ́nɔ́ gɛ́hɛ́ gɛ́ɛgɛ gɛ́ dómbanamɔ́ goíyime guimée, no bɛ́ɛmba dácɛ, Asaŋa a gɛ́ga uŋkimée uŋkimée naá bɛɛnyɔ́ɔ.

²⁰Go Asaŋa mɔ́ɔnyɔ a ŋananamɔ́ buimée bó dómba bɔ́ɔbɔ dɛ ɔŋɔnɔmɔ́ ɛ́na lí dɛ béeniŋenyemú, go bogaaga bɛ́hɛ́ bɔ́ɔbɔ bó yɔgɔnɔmɔ́ naá bɛɛcɔ́ɔ,

²¹ŋgáa nigúmi nɛ́ bɛ́ɛmba nɛhɛ́ naá giimbó gá boolímínyí gɔnɔ́ gá Yésu Kilítu go ɛgɛlɛ iŋkimée na bɛcamɛna biimée. Aamɛnɛ.