Read Nugunu Ɛ́fɛsɛ 4 Bible Online

Ɛ́fɛsɛ 4 - Nugunu bible

Ɛ́fɛsɛ 4

¹Yɔmɔ́ɔ mɔ́ɔnyɔ ndɔ́mɔ́ naá ncíbo ya gɛaŋɔ́ go busío bá Daadáa, ŋgaá nyó béyééyídínyée caá, ɛndáa nɔnɔ naá odɛ́nɛ́ yɔ́ɔyɔ Asaŋa a mbaá nyó dɔ́ŋɛ́nɔ́.

²Bɛ́ɛ́mba nɔnɔ gɔgɔ́ na ibésiisie, na bopɔ́ɔ́, na kumbene odɛ́máa; no mɛnanɛna ginumpé naá gɛnɔ́ɔ́nɛ́nɔ́.

³Gɛ́ndɛ́mɛ́da nɔnɔ goŋaá no gɛ́ga naá bummué bɔ́ɔbɔ Gimmúmpúu gá Giliíli a nyó fáananamɔ́ go buumbénú bɔ́ɔbɔ bó nyó nebigenyemú.

⁴Nnyɔ́dɔ ɛ lɛ́ táŋɛ́ mmue[7] na Giliíli táŋɛ́ ummue; caŋa mmue, Asaŋa a mba nyó dɔ́ŋɛ́nɔ́ go mbémineminie táŋɛ́ mmue.

⁵Daadáa a lɛ́ táŋɛ́ ummue, gioliminyo táŋɛ́ gímmue, giyuminye táŋɛ́ gímmue.

⁶Asaŋa a lɛ́ táŋɛ́ ummue, gɔnɔ́ Isée ba biimée, a dómbana buimée, a yɔgɔnɔ naá biimée, a gɛ́ga naá biimée.

⁷Asáa gɔgɔ́ onyɔ moánɛ naá bɛɛcɔ́ɔ a mbaá bɛáa niibo ná Asaŋa, gɔgɔ́ aŋa Kilítusu a mbaá mo fáá.

⁸Go busío moánɛ gɔ́ɔ bó lɔ́mɔ́ ɔ́ŋɔ́ɔlú goŋaá: Gɔ́ɔgɔ a mbaá bólɛ́gá naá mmoɛná gúunú, a mba gumbénénée ŋkólío; batɔ bá báá bɛáa pááná sɛ́hɛ́[8].

⁹«A mba bólɛ́gá.» Hɔ́ɔlɔ́ naá cí nɛɛ́nɛ? Bó dúfenye goŋaá a mba manɛ́ siise a bɛ́ɛ́ ɛ́dá súge naá cí gúunú.

¹⁰Mɔ́ɔnyɔ a mbaá siisé a lɔ́mɔ́ tɔ́nɔ mɔ́ɔnyɔ a mbaá bólɛ́gá naá mmoɛná gúunú go go hóogio moóma muimée.

¹¹Mɔ́ɔ a mbaá fáánánáa batɔ pááná mbɔ́dɔ aá mbɔ́dɔ; báaba bá lɛ́ baapótɛlɛ, báaba mbúsí sá Asaŋa, bóncodío buuyí Gɛnɔ́gɔ́ gá Cɔ́mɔ, bóncodío gɔnɔ́ bá indenye boɛ́nɔ bá Asaŋa, bóncodío muloodio[9].

¹²Nɔ́ɔ gɔ́ɔ, aŋa a mbaá fáá boolímínyí pááná sɛ́ɛsɔ, a mba bó fáá nɛgaŋa ná go yɔgɔnɔ buelí bábɔ́ go go gumenye nnyɔ́dɔ ya Kilítusu[10].

¹³Gó ɛ́da go éme aŋa dɛ ŋgɛɛ́ ɛ́dá bola olɔŋɔ yúmmue báladáalú go gioliminyo na go goíyime gá Moɔnɔ́ ba Asaŋa. Dɛ gónɛna, Kilítusu a bɛ́ɛmba uŋkimée uŋkimée bɛhɛ́ naá bɛɛcɔ́ɔ.

¹⁴Nɔ́ɔ gɔ́ɔ, dɛ ŋgaá ŋá dɛ dɛ gɔnɔ́ bɛ́ɛ́mbá aŋa baábayɔ́ báaba gohúunenye gá batɔ bá mbele gó bó búugebugiemú aŋa miimpo má búugebugiemú gilué gɛgɔ́nɔ́, bá bó nɔɔnɔnɔ naá giédie aŋa ufufu yɔ́ɔyɔ yó fufenemú.

¹⁵Kanɛ́, aŋa dɛ ŋgoó oyáa mammana naá gɛnɔ́ɔ́nɛ́nɔ́, dɛ ŋga gomáa naá pɛ́ iŋkimée, dɛ ɛ́da bola naá odɛ́nɛ́ yá Kilítusu mɔ́ɔnyɔ a lɔ́mɔ́ odóɛ.

¹⁶Naá mɔ́ɔ gɔ́ɔ, nnyɔ́dɔ iŋkimée iŋkimée yɛ ɛndamɔ́ aŋa ŋgoŋa sɛ́ yɛ ladamɔ́; nɔ́ɔ gɔ́ɔ, aŋa gɛnamá giimée gá yɛ́ gɛ́ yɔgɔnɔmɔ́ aŋa gɛ́ háananamɔ́, nnyɔ́dɔ iŋkimée ɛ goma, ɛ gɔnɔ gónɛna naá gɛnɔ́ɔ́nɛ́nɔ́.

¹⁷Boóma kanɛ́ bɔ́ɔbɔ nnyó oyanɛnamɔ́ kunde ndatɛnana go ufíno yá Daadáa bɔ́bɔ́ɔ: no do gɔnɔ́ go ɔyɔ aŋa bindiíyímé Asaŋa báaba mbééníŋínyí sábɔ́ sɛ́ bó gɔ́gɔmɔ́ naá gosola.

¹⁸Mbééníŋínyí sábɔ́ sɛ́ lɛ́ naá mbíno, bá lɛ́ biinyí naá gɛɔyɔ gɛ́ɛgɛ gɛ́ ɛ́damɔ́ go úlene naá Asaŋa, goakɛ́ kanɛ goíyime yabɔ́ yɛ ɛ́damɔ́ go úlene naá golelenye gábɔ́ gá ɛdɛ́má.

¹⁹Kanɛ go nóa odóɛ, bá báá bííŋéné go gɛɔyɔ gá hanyɔ́, mbɔ́dɔ ya go ŋanana bɛbɛ́ bá moóma mbɔ́dɔ iŋkimée kanɛ go bégumbene odɛ́máa.

²⁰Naá bɛ́nyɔ́ boayá, bó do báá nɔ́ɔnɔ gɔ́ɔ no mbaá hóónáa goíyime ánɛ́ɛ a lɔ́mɔ́ Kilítusu.

²¹No mbɔ ɔ́bɔ́ bese bese buimée bɔ́ɔbɔ bó mo núunemú, bá báá nyó húúnényée mammana yɛ́ɛyɛ ɛ lɔ́mɔ́ naá Yésusu.

²²Bó úhene kanɛ́ goŋaá no básáŋona gɛcóa gá gɛɔyɔ, no bóodona gɛcóa gá mɔtɔ na bɛdɛ́mádɛ́má bɛ́hɛ́ bá mbele bɛ́ɛbɛ bɛ́ gɔ́gɔnɛnɔmɔ́ naá gosola.

²³No bádɛ́ɛna Gimmúmpúu gá Giliíli a núgie nciŋí yɛnyɔ́.

²⁴No bɛ́ɛmba gɛpáa gá mɔtɔ gedíelú aŋa Asaŋa a lɛ́galɛgamɔ́[11], naá botɛ́nɛ́ɛ na naá bummúmpúu, mɔ́ɔmɔ mó úlenemú naá mammana.

²⁵Kanɛ́ bɛɛnyɔ́ɔ bábáa mbele ɛ báá ná manɛ́ go nyó úlukinye, ŋgáa onyɔ moánɛ o oyana sɔ́gɔ́ɔ mammana, goakɛ́ dɛ lɛ́ bɛnamá bá nnyɔ́dɔ táŋɛ́ mmue.

²⁶No amɔ́ no ɔ́bɔ mpímí, no do ŋaáa gɛlɔgɔ; buisí bó do nyó fúíné na mpímí moánɛ.

²⁷No do fáá ohándá ŋgásɛ́ ya go nyó mánɛgɛna.

²⁸Mɔ́ɔnyɔ a mbaá lɔmɔ́ i íbene, ŋgáa a dɔmbɔ go íbene; a bííŋene go go yɔgɔnɔ na ɛmbɔ́gɔ yɛhɛ́ go go bɛa bɔ́ɔbɔ a gaá ná fáá mɔ́ɔnyɔ a lɔ́mɔ́ kanɛ bɔ́.

²⁹Gɛgálɛ́dɛ́ná akɛ́ gá gímmue gɛ́ dɛ húmé naá eŋgúdé yɛ́nyɔ́, kanɛ́ goana, dogálɔ dá ndénégé dɔ́ɔdɔ dó gaá nó óhígínyóo báaba bá nyó bódólonyomú, dó bó ŋanana besé.

³⁰No do ágá Gimmúmpúu gá Giliíli mɔ́ɔnyɔ Asaŋa a mbaá nyó fáá naá gɛdɔmbɔ[12]; mɔ́ɔ a lɔ́mɔ́ gilincie gá gɛfáŋɔ́ gɛ́nyɔ́ naá buisí bá mesúgidinye.

³¹Búúmbénéemú nɔnɔ gokánya gá odɛ́má guimée, gɛɛ́laga gá odɛ́má, mpímí, cáŋɔ́ na cigí; buimée bɔ́ɔbɔ bó háanana go úlukie naá kadɛ́gadɛ́ɛ yɛnyɔ́, gɔnɔ́ na mbɔ́dɔ ya bobɛ́ iŋkimée.

³²Bɛáa nɔnɔ busi na gɛnɔ́gɔ́ gá odɛ́má bɛnyɔ́ na bɛnyɔ́; hééhínénínyée nɔnɔ aŋa Asaŋa a mbaá nyó hééhínyée gá Kilítusu[13].