Read Nugunu Ɛ́fɛsɛ 5 Bible Online

Ɛ́fɛsɛ 5 - Nugunu bible

Ɛ́fɛsɛ 5

¹Aŋa gɔ́ɔgɔ no lɔ́mɔ́ baaná báaba Asaŋa a maamanamɔ́, gɛ́ndɛ́mɛ́dá nɔnɔ no bɛ́ɛmba aŋa mɔ́ɔ[14].

²Ɔyɔ́ɔ nɔnɔ naá gɛnɔ́ɔ́nɛ́nɔ́ aŋa Kilítusu a mbaá có maamánáa, a báá bííŋéné mɔ́ɔ moatɛ́ naá Asaŋa go busío bɛ́cɔ́, aŋa gɛbáágá na gɛfoná gá gɛnɔ́gɔ́ gá gɛfofa[15].

³No ɔ́bɛnɔnɔ na Asaŋa, gɔ́ɔ gɛɔyɔ gá hanyɔ́ na gá biílo, na gɛdɛ́mádɛ́má gá go bɛa buimée, mó lɔ́mɔ́ mó do háánánáa go bɛ́ɛmba naá tɛ́mádɛ́má yɛnyɔ́.

⁴Dogálɔ dɔ́ɔdɔ dó lɔ́mɔ́ dó do fɛanánáa, aŋa dogálɔ dá bonnyama, dá kanɛ ndénégée na dá biílo, dó do hóámá dó do húmé naá eŋgúdé yɛ́nyɔ́. Gálágáláa nɔnɔ goana go go béhiigi Asaŋa.

⁵Íyíme nɔnɔ bese no amɔ́ mɔtɔ uŋkimée mɔ́ɔnyɔ ɔ ɔyɔmɔ́ gɛɔyɔ gá hanyɔ́, gɛɔyɔ gá biílo, umbulubúlúu goakɛ́ a lɛ́ aŋa ogɔgɔ́gɔgɔ, uŋkimée mɔ́ɔnyɔ a dɛ ŋgá bɛa bodáŋɔ naá Bufuŋe bá Kilítusu na Asaŋa.

⁶Mɔtɔ a dɛ hóámá a dɛ nyó belé na dogálɔ dá kanɛ kɔ́ɔ; mbɔ́dɔ sá moóma aŋa sɛ́ɛsɔ nɔ́ɔnɔ sɛ́ sɛ́ úlenemú na mpímí ya Asaŋa go báaba bá mo báaŋɛganamɔ́.

⁷No do bɛ́ɛ́mbá kanɛ́ olɔŋɔ nabɔ́.

⁸Cóá no mba lɛ́ naá mbíno, kanɛ́ godɔ́ɔdɔ no lɛ́ naá gise naá Daadáa[16]. Ɔyɔ́ɔ nɔnɔ kanɛ́ aŋa baaná bá gise.

⁹Moóma mɔ́ɔmɔ gise gɛ́ úmemú mó lɔ́mɔ́ busi, botɛ́nɛ́ɛ na mammana.

¹⁰Fúmbée nɔnɔ go lɛnca bɔ́ɔbɔ bó fɛanɛnanamɔ́ Daadáa.

¹¹No do bɛáa bodáŋɔ akɛ́ bá búmmue naá meŋiigíe má kanɛ ndénégée má mbíno[17]; moatɛ́ má baláamɔ́ nɔnɔ.

¹²Mammana, bɔ́ɔbɔ batɔ bá ŋananamɔ́ naá nɛɔsɛgɔ, bó núigeninye odóɛ go bó gálalaga.

¹³Kanɛ́ buimée bɔ́ɔbɔ bá balamɔ́, bó bóloodonyo naá gise,

¹⁴goakɛ́ buimée bɔ́ɔbɔ bó bóloodiomú naá gise bó lɛ́ gise. Go busío bá ndiemi gɔ́ɔ bó oyamɔ́ bá amɔ́: Foyóga, maamɔ́ɔ mɔ́ɔnyɔ o lɔ́mɔ́ go dɔnɔ́ɔ, fadɛ́gɛ́na naá kadɛ́gadɛ́ɛ ya begúe, manɛ́ Kilítusu a ná go fáamɔ́ gise gɛ́hɛ́.

¹⁵Bébeŋéemú nɔnɔ kanɛ́ go mbɔ́dɔ yɛnyɔ́ ya go ɔyɔ. No do ɔyɔ́ɔ aŋa biegu, kanɛ́ ɔyɔ́ɔ nɔnɔ aŋa benciŋínciŋi,

¹⁶no ɔyɔ nabɔ́ bese no labana go pɛ́ iŋkimée, goakɛ́ medúgú máama dɛ ɔyɔmɔ́ má lɛ́ gɛbɛ́.

¹⁷No do bɛ́ɛ́mbá kanɛ́ aŋa batɔ bá kanɛ nciŋí, gɛ́ndɛ́mɛ́dá nɔnɔ go go ɔ́bɔ bɔ́ɔbɔ Asaŋa a gɛ́ganamɔ́ naá boayá bɛ́nyɔ́.

¹⁸No do gúénénée mɔgɛ́bɔ; ginití gá má gɛ́ nyó dómana go gɛbɛ́ gá gɛɔyɔ; kanɛ́ ŋgáa Gimmúmpúu gá Giliíli a hóogo naá nnyɔ́dɔ sɛ́nyɔ́.

¹⁹Bégúlúménínyéemú nɔnɔ na ɛsagɔ, na bɛlɛ́lɛ́, na bɛhɛma mɔ́ɔmɔ Gimmúmpúu gá Giliíli a nyó fáananamɔ́; no ágana ɛsagɔ na bɛlɛ́lɛ́ go go búlugenye Daadáa na odɛ́má yɛ́nyɔ́ uŋkimée[18].

²⁰Béhiigíimú nɔnɔ Asaŋa Isée go bɛcamɛna biimée gɔnɔ́ go buimée go ufíno yá Daadáa bɛcɔ́ Yésu Kilítu.

²¹Bɛɛnyɔ́ báaba no hálamananamɔ́ Kilítusu, bɛáa nɔnɔ ŋgɔ́bɛnɔ naá kadɛ́gadɛ́ɛ yɛ́nyɔ́.

²²Bakɔ́dɔ, ɔ́bɛ́nɔ́nɔ́ɔ nɔnɔ banɔ́mɛ bɛ́nyɔ́ aŋa no ɔ́bɛnɔnɔmɔ́ Daadáa.

²³Ɛɛ́ɛŋ, onɔ́mɛ a lɛ́ ogɔ́nɔ́ɔ ba okɔ́dɔ caŋa mmue aŋa Kilítusu a lɔ́mɔ́ ogɔ́nɔ́ɔ ba Giimbó gá boolímínyí, mɔ́ɔ Usódí ba giimbó gá boolímínyí gɛ́ɛgɛ gɛ́ lɔ́mɔ́ nnyɔ́dɔ ya yɛhɛ́.

²⁴Kanɛ́ aŋa giimbó gá boolímínyí gɛ́ ɔ́bɛnɔnɔmɔ́ Kilítusu, ŋgáa bakɔ́dɔ bɔ́ ɔ́bɛnɔnɔ banɔ́mɛ bábɔ́ go buimée.

²⁵Banɔ́mɛ, maamánáa nɔnɔ bakɔ́dɔ bɛ́nyɔ́ aŋa Kilítusu a mbaá maamánáa Giimbó gá boolímínyí, a bíí íŋéné gɛɔyɔ gɛ́hɛ́ go busío bá gɛ́.

²⁶A mba lɛ́gá nɔ́ɔnɔ go go gɛ́ íyie gimmúmpúu, a báá gɛ́ sogóná na miimpo máama má sogamɔ́[19]; a mba ŋaáa nɔ́ɔ na Nogálɔ.

²⁷A mba lɛ́gá goŋaá Giimbó gá boolímínyí gɛ́ bɛ́ɛmba naá busío bɛ́hɛ́ dácɛ na nigúmi, kanɛ gigégéyé, kanɛ gibéyífide, kanɛ giílo; a mba gɛ́ lɛ́gáa nɔ́ɔnɔ gimmúmpúu kanɛ cigíi.

²⁸Nɔ́ɔnɔ gɔ́ɔ onɔ́mɛ a háananamɔ́ go maamana okɔ́dɔ bɛhɛ́ aŋa nnyɔ́dɔ yɛhɛ́ ya moatɛ́; mɔ́ɔnyɔ a maamanamɔ́ okɔ́dɔ bɛhɛ́, a bámaamana mɔ́ɔ moatɛ́.

²⁹Mɔtɔ a gá báasa a dɛ bɛlábɛ́láa nnyɔ́dɔ yɛhɛ́ ya moatɛ́, goana a yɛ dúgemú, a yɛ lɔ́lɔ aŋa Kilítusu a ŋananamɔ́ go Giimbó gɛ́hɛ́ gá boolímínyí.

³⁰Dɛ lɔ́mɔ́ bɛnamá bá nnyɔ́dɔ yɛhɛ́.

³¹Go busío moánɛ gɔ́ɔ onɔ́mɔtɔ́ a ná húmemú naá nnyaŋá ya biisée, a bágódɛna okɔ́dɔ bɛhɛ́, biimée báandɛ́ bá bɛ́ɛmba nnyɔ́dɔ táŋɛ́ mmue[20].

³²Gɛantáanta gá mammana gɛ́ lɛ́ ɔsɛ́gɔ́ɔlú naá gɛbana gɛ́ɛgɛ; ŋgoó oyɛ́dá boóma moánɛ naá boayá bɔ́ɔbɔ bó núunemú Kilítusu, bó núune Giimbó gá boolímínyí.

³³Kanɛ́ bɛɛnyɔ́ɔ, ŋgáa uŋkimée a maamana okɔ́dɔ bɛhɛ́ aŋa mɔ́ɔ moatɛ́, okɔ́dɔ tɔ́nɔ a hálamanana onɔ́mɛ.