Read Nugunu Ɛ́fɛsɛ 6 Bible Online

Ɛ́fɛsɛ 6 - Nugunu bible

Ɛ́fɛsɛ 6

¹Baaná, ɔ́bɛ́nɔ́nɔ́ɔ nɔnɔ bebíéní bɛ́nyɔ́ aŋa Daadáa a lɛ́galɛgamɔ́, goŋaá nɔ́ɔnɔ gó lɛ́ tɛ́nɛ́ɛ.

²Hálámána tɛ́ɔ na yigúédíi, gɛlɔsɛnɔ gá busío gɛ́gɔ́ɔ na tánɔ naá nnyimé ya gɛ́,

³goŋaá ó bɛ́ ɛ́nánáa besé makɔ́nɔ́, o gunde o líhe naá cí yɛ́ɛyɛ[21].

⁴Bɛɛnyɔ́ɔ biisée, no do séésényée baaná bɛ́nyɔ́, goana bó guményéemú nɔnɔ, no bó bónona, no bó sɔ́mɔsɔmɔ aŋa Daadáa a lɛ́galɛgamɔ́.

⁵Boyogóní, ɔ́bɛ́nɔ́nɔ́ɔ nɔnɔ bagɔ́nɔ́ɔ bɛ́nyɔ́ bá cí, no bó hálamanana no bó dagadana, odɛ́má go cí, aŋa no ɔ́bɛnɔnɔmɔ́ Kilítusu,

⁶caá goana goŋaá bá nyó fɛ́fa, goŋaá nó ba bó nɔ́ɔ́, kanɛ́ goana aŋa boyogóní bá Kilítusu báaba bá yɔgɔnɔmɔ́ na odɛ́má usi aŋa Asaŋa a lɛ́galɛgamɔ́.

⁷Bó yɔgɔ́nɛ́nɔ́ɔmɔ́ nɔnɔ na gɛnɔ́gɔ́ gá odɛ́má aŋa no yɔgɔnɛnɔ Daadáa, caá batɔ.

⁸No íyime no amɔ́ mɔtɔ uŋkimée a ŋga bɛáa bɛsoɛná bɛ́hɛ́ naá Daadáa go besé yɛ́ɛyɛ a mbaá ŋanánáa, akɛ́ a bɛ́ɛmba uyogóní, akɛ́ a bɛ́ɛmba go mɔ́ɔ moatɛ́.

⁹Kanɛ́ bɛɛnyɔ́ɔ bagɔ́nɔ́ɔ, ŋanánáa nɔnɔ caŋa mmue naá boayá bá boyogóní bɛ́nyɔ́, no do bó mínémíníe, goŋaá Ogɔ́nɔ́ɔ ba bɛɛnyɔ́ɔ biimée a lɛ́ naá mmoɛná; mɔ́ɔ a lɔ́mɔ́ kanɛ kúe oŋgíso na mɔtɔ ummue[22].

¹⁰Naá go ɛ́da súgidinye, bɛáa nɔnɔ bogaaga naá gobálada gɔ́ɔgɔ na Daadáa, naá gɛantáanta gɛ́hɛ́ gá bogaaga.

¹¹Bá ágánáamɔ́ nɔnɔ bɛlɛŋɔ biimée bá bidé bɛ́ɛbɛ Asaŋa a fáanɛnamɔ́, go go bɛa bogaaga bá go nuigenye moloolio má ohándá.

¹²Dɛ dɛ noanánáa na batɔ, kanɛ́ dɛ noananamɔ́ na magɔ́nɔ́ɔ, na magaaga, na bɛmánɛgɛna bá cí ya mbíno yɛ́ɛyɛ, na bɛgáda bá biliíli bɛ́ɛbɛ naá mmoɛná.

¹³Gɔ́lɔ́ nɔnɔ kanɛ́ bɛlɛŋɔ biimée bá bidé bɛ́ɛbɛ Asaŋa a fáanɛnamɔ́, go goŋaá naá buisí bá gɛbɛ́, naá nnyimé ya nɛnoa niimée, no bɛ́ɛmba bɛyágáyága, no lɔbɛnɔ tɛ́nɛ́ɛ.

¹⁴Lɔbɛ́nɔ nɔnɔ tɛ́nɛ́ɛ, mammana ɛ bɛ́ɛmba kandáa yɛnyɔ́ naá nosɛ́ŋɛ́, botɛ́nɛ́ɛ bó bɛ́ɛmba ŋgaŋa yɛnyɔ́ yɛ́ɛyɛ ɛ boɛganamɔ́ gɛsasɔ, gadɛ́ɛ na nnyimé.

¹⁵Ŋgáa gɛlola gá go dóogonyo Gɛnɔ́gɔ́ gá Cɔ́mɔ gá buumbénú gɛ́ bɛ́ɛmba nnaadɛna sɛ́nyɔ́ naá bɛgɔ́ndɔ́.

¹⁶Ŋgáa gioliminyo gɛ́ bɛ́ɛmba bɛcamɛna biimée ŋgaŋa yɛnyɔ́ yɛ́ɛyɛ ɛ fúenenemú bɛlolaga bá dotáa bá Ombɛ́.

¹⁷Gɔ́lɔ́ nɔnɔ gibúlú gá nɛnoa nɔ́ɔnɔ gó lɛ́ aá gisódio, na kalafɔ ya Gimmúmpúu gá Giliíli, nɔ́ɔnɔ gó lɛ́ aá nogálɔ ná Asaŋa[23].

¹⁸Ɔŋɔ́nɔ́ɔ nɔnɔ Asaŋa buimée bɔ́ɔbɔ naá mbósógólí. Bósógólónyóomú nɔnɔ kanɛ tɔmbɛ́nɔ́ɔ na bogaaga bá Gimmúmpúu gá Giliíli. Gɛ́gáa nɔnɔ pɔnyɛ́ɛ, no bósógolonyo kanɛ gɛdɔmbɔ go busío bá boɛ́nɔ bá Asaŋa.

¹⁹Bósógólónyóomú nɔnɔ tɔ́nɔ go busío bámɛ, go goŋaá Asaŋa a páa dogálɔ dɔ́ɔdɔ káananamɔ́ go gálagala, tóogonyo nnindíi ya Gɛnɔ́gɔ́ gá Cɔ́mɔ kanɛ gɛdɛ́ɛ naá nyuudé.

²⁰Akɛ́ aŋa ndɔ́mɔ́ naá ncíbo ya gɛaŋɔ́ godɔ́ɔdɔ, ndɛ́ udúmbí cɔ́mɔ ba Gɛnɔ́gɔ́ gá Cɔ́mɔ gɛ́ɛgɛ. Bósógólónyóomú nɔnɔ kanɛ́ goŋaá ŋgoya Gɛnɔ́gɔ́ gá Cɔ́mɔ moánɛ kanɛ gɛdɛ́ɛ naá nyuudé aŋa gó háananamɔ́.

²¹Ndɛ́galɛga goŋaá no íyime bɛɛnyɔ́ɔ tɔ́nɔ bɔ́ɔbɔ bó nnúunemú na boóma bɔ́ɔbɔ ŋŋananamɔ́. Tisíke[24], ondimóní bamɛ ba odɛ́má, uŋguyí cɔ́mɔ ba pídefide naá Daadáa, a gaá nyó oyánɛ́náa cɔ́mɔ iŋkimée.

²²Ŋgaá nyó mo dómɛ́ná kanɛ́ goŋaá a nco nyó oyana aŋa dɛ lɔ́mɔ́, a nyó gúluminye.

²³Ŋgáa Asaŋa Isée na Daadáa Yésu Kilítu bá fáa bolimóní biimée buumbénú, gɛnɔ́ɔ́nɛ́nɔ́ na gioliminyo.

²⁴Ŋgáa Asaŋa a fona biimée báaba bá maamanamɔ́ Daadáa bɛcɔ́ Yésu Kilítu na gɛnɔ́ɔ́nɛ́nɔ́ gá kanɛ mmanɛ́náa.