Read Nugunu Filípe 1 Bible Online

Filípe 1 - Nugunu bible

Filípe 1

¹Boyogóní bá Yésu Kilítu, Póolo nɛhɛ́ na Timotée, bá á bédíígíe boolímínyí bá Kilítusu biimée báaba bá lɔ́mɔ́ naá Filípe. Mbédíígí tɔ́nɔ na bogógí ɛlɔŋɔ bábɔ́, na boóhígínyí bábɔ́ biimée.

²Ŋgáa Asaŋa Isée bɛcɔ́ na Daadáa Yésu Kilítu, bá nyó boogo, bá nyó fáa buumbénú.

³Mbéhiigi Asaŋa bamɛ gɛcamɛna giimée gɛ́ɛgɛ nnyó béeniŋenyemú;

⁴ɛŋɛndɔ iŋkimée yɛ́ɛyɛ mbósógolonyomú go busío bɛ́nyɔ́ biimée, ŋŋanana nɔ́ɔ na bɛyaŋa.

⁵Ŋŋananamɔ́ nɔ́ɔ go bodáŋɔ bɔ́ɔbɔ no gɔ́lɔnɔmɔ́ olɔŋɔ nɛcɔ́ naá buelí bá go dúmenye Gɛnɔ́gɔ́ gá Cɔ́mɔ, a dúme naá mabayɛga gó nco húme godɔ́ɔdɔ.

⁶Ŋgíyimene caá, Asaŋa a ŋga maná gɛmánya gá buelí gɛ́ɛgɛ a mbaá bayɛ́gá naá bɛɛnyɔ́ɔ, gó ɛ́da gó éme naá buisí bá goncogunde gá Yésu Kilítu.

⁷Bó lɛ́ tɛ́nɛ́ɛ goŋaá mbɛa mbɔ́dɔ sá mbééníŋínyí aŋa sɛ́ɛsɔ nɔ́ɔnɔ go busío bɛ́nyɔ́ biimée, goakɛ́ no lɛ́ naá odɛ́má yámɛ. No gɔ́lɔnɔ buebíe bɛɛnyɔ́ɔ biimée naá odɛ́nɛ́ yɔ́ɔyɔ Asaŋa a mbaá páá, akɛ́ ndɛ́ naá ncíbo ya gɛaŋɔ́, akɛ́ ndɛ́ naá gobɔgɔbɔgɔ Gɛnɔ́gɔ́ gá Cɔ́mɔ na go gɛ́ gíndenye.

⁸Nnyó maamana makɔ́nɔ́ naá gɛnɔ́ɔ́nɛ́nɔ́ gá Yésu Kilítu; Asaŋa i íyimene a amɔ́ boóma bɔ́ɔbɔ ŋgoyamɔ́ bó lɛ́ mammana.

⁹Bɔ́ɔbɔ ŋgɔŋɔnɔmɔ́ Asaŋa naá mbósógólí sámɛ bó lɔ́mɔ́ goŋaá, ŋgáa gɛnɔ́ɔ́nɛ́nɔ́ gɛ́nyɔ́ gɛ́ goma makɔ́nɔ́, a gɔnɔ nyó fáa goɛ́nana masɛnɛ naá tɛ́nɛ́ɛ gɔnɔ́ na nciŋí dácɛ;

¹⁰go go íyime go iyide bɔ́ɔbɔ bó lɔ́mɔ́ bese. Nɔ́ɔ gɔ́ɔ no ná bɛ́ɛmbamɔ́ bɛmammana bá batɔ kanɛ cigíi go buisí bá Kilítusu goncogunde.

¹¹Na gióhiginyo gá Yésu Kilítu, gɛɔyɔ gɛ́nyɔ́ gɛ́ ná bɛ́ɛmba dácɛ na meŋiigíe má tɛ́nɛ́ɛ go nigúmi na mbúlugie ya Asaŋa.

¹²Bolimóní, ndɛ́galɛga goŋaá no íyime no amɔ́, boóma bɔ́ɔbɔ bó mbaá mbolɛ́ná, bó mba gɔnɔ́ ŋa goŋaá Gɛnɔ́gɔ́ gá Cɔ́mɔ gɛ́ saanana naá cí.

¹³Kɔ́ɔ, bebeŋíbéŋí ncíbo ya gɛaŋɔ́ biimée báaba naá ndáŋɛ na hoóma hiimée, bí íyimenemú godɔ́ɔdɔ bá amɔ́, ndɔ́mɔ́ naá ncíbo ya gɛaŋɔ́ go busío bá Kilítusu[1].

¹⁴Gɛaŋɔ́ gámɛ gɛ́ lɛ́ ŋaáalú goŋaá gɛca gá boolímínyí gɛ́ bɛa kélemene makɔ́nɔ́ ya go dúmenye nogálɔ ná Asaŋa kanɛ bofoá, magɛ́nda mábɔ́ má ɛ́da bó úlenine naá Daadáa.

¹⁵Mammana, batɔ bóncodío bá dúmenye Kilítusu na gɛdɛ́mádɛ́má; bóncodío na ndoŋá ya go fúmbe go mánɛgana basɔ́gɔ́ɔ. Mbééníŋínyí sábɔ́ sɛ́ dɛ báá sɔgɔ́nɔ; bá fúmbe go kídenine makánya naá yɔmɔ́ gɛaŋɔ́. Kanɛ́, bóncodío bá yɔgɔnɔ buelí bá go dúmenye Kilítusu na gɛnɔ́gɔ́ gá mbééníŋínyí; báaba bá ŋanana nɔ́ɔ na odɛ́má yá gɛnɔ́ɔ́nɛ́nɔ́. Bí íyimene bá amɔ́, ndɔ́mɔ́ háalá go go bɔgɔbɔgɔ gɔ́ɔgɔ mbɔgɔbɔgɔmɔ́ Gɛnɔ́gɔ́ gá Cɔ́mɔ.

¹⁸Kɔ́ɔ, akɛ́ mbééníŋínyí sábɔ́ sɛ́ bɛ́ɛmba mammana, akɛ́ sɛ́ bɛ́ɛmba gɛbɛ́, ndénégé ɛ lɔ́mɔ́ goŋaá ufíno yá Kilítusu yɔ́ bá dúmenyemú. Mbékelenye go busío moánɛ, nnɛ́ ɛ́dana gɔnɔ́ naá busío, mbékelenye.

¹⁹Ŋgíyimene mammana caá buimée bɔ́ɔbɔ bó ná códio, mbósógólí sɛ́nyɔ́ na gióhiginyo gá Giliíli gá Yésu Kilítu.

²⁰Boóma moánɛ bɔ́ ndɛ́galɛgamɔ́, kɔnɔ gɛ́gana na bogaaga buimée. Cɛ ná nóa odóɛ go boóma, kanɛ́ mbɛanana toodo odɛ́máa goŋaá, gó bayɛga godɔ́ɔdɔ na bɛcamɛna biimée, bogɔ́nɔ́ɔ bá Kilítusu bó ná bédúfie naá yɔmɔ́ɔ, akɛ́ naá gɛɔyɔ gámɛ, akɛ́ naá nigúe námɛ.

²¹Go busío bámɛ, gɛɔyɔ gɛ́ lɔ́mɔ́ Kilítusu, nigúe nɛ́ lɔ́mɔ́ bɛsoɛná bámɛ.

²²Kanɛ́, aáŋa go dúmbenye na go ɔyɔ háalá naá cí gó páanana goŋaá nyɔgɔnɔ buelí bá ndénégé, cɛ íyíménée bɔ́ɔbɔ ndɔ́mɔ́ ba go iyide.

²³Bá kɔ́gɔ maayá miimée máandɛ́; ndɛ́galɛga go úlukie naá cí go go bɛ́ɛmba olɔŋɔ na Kilítusu; bɔ́ɔbɔ bɔ́ bó lɔ́mɔ́ besé makɔ́nɔ́ bó dómbɛdana.

²⁴Kanɛ́, bó lɛ́ bese makɔ́nɔ́ go busío bɛ́nyɔ́ goŋaá, túmbenye na go ɔyɔ naá cí háalá.

²⁵Aŋa bó lɔ́mɔ́ bese nɔ́ɔnɔ, ŋgíyimene caá nná gɛ́ga olɔŋɔ nɛnyɔ́ biimée, nnyó óhigonyo go go goma naá gioliminyo na bɛyaŋa.

²⁶Gɔ́ɔgɔ nná ncomɔ́ gunde naá bɛɛnyɔ́ɔ, nigúmi nɛ́ɛnɛ no bɛananamɔ́ gá Yésu Kilítu, nɛ́ ná goma go busío bámɛ.

²⁷Ɔyɔ́ɔ nɔnɔ goana aŋa Gɛnɔ́gɔ́ gá Cɔ́mɔ gá Kilítusu gɛ́ úhenemú, go goŋaá akɛ́ ŋgúle go go nco nyó ɛ́na akɛ́ cɛ úlé, ŋgáa ŋgɔ́bɔ bá gálagala go busío bɛ́nyɔ́ goŋaá no lɛ́ tɛ́ŋɛ́tɛŋɛ, bágódɛ́náalú na mbééníŋínyí táŋɛ́ mmue; no noanana go gioliminyo odɛ́má táŋɛ́ yúmmue, aŋa Gɛnɔ́gɔ́ gá Cɔ́mɔ gɛ́ oyamɔ́.

²⁸No do bádɛ́ɛ́ná, babɛlɔ́bɛlɔ bá dɛ nyó gólío bofoá akɛ́ goakɛ́; go busío bábɔ́, bó lɔ́mɔ́ gilincie gá gosola gábɔ́ go busío buimée; go busío bɛ́nyɔ́, bó lɔ́mɔ́ gilincie gá gisódio gɛ́nyɔ́; buimée bɔ́ɔbɔ bó ɛ́da go úlene naá Asaŋa.

²⁹Mɔ́ɔ a mbaá nyó boogó gá Kilítusu, caá akɛ́ goana goŋaá no ágana odɛ́má yɛ́nyɔ́ naá mɔ́ɔ, kanɛ́ gɔnɔ́ goŋaá no ɔ́bɛgɔnɔ go busío bɛ́hɛ́.

³⁰No mba bííŋéné go nɛnoa nímmue eé nímmue olɔŋɔ namɛ; nɛnoa nɛ́ɛnɛ ŋgúlemú nnoanana fueké. No íyimene bese no amɔ́ ká dúmbenye na nɛ́.