Read Nugunu Filípe 3 Bible Online

Filípe 3 - Nugunu bible

Filípe 3

¹Bolimóní bámɛ, cúgidinyemú go nyó oyana caá, békelényéemú nɔnɔ go buimée bɔ́ɔbɔ Daadáa a lɔ́mɔ́ go busío bɛ́nyɔ́. Bó do céésényée goŋaá nnyó ɔ́ŋɔnɔ moóma múmmue eé múmmue; go busío bɛ́nyɔ́ bó lɔ́mɔ́ go go nyó gíndenye.

²Bébeŋéemú nɔnɔ go bɛbɛ́ bá boyogóní, bá lɔ́mɔ́ aŋa mbóa, bá gínigenye batɔ go go ancabana go dugúnú dugunu.

³Ɛɛ́ɛŋ, báaba bá lɔ́mɔ́ ancábáalú mammana mammana bá lɔ́mɔ́ bɛɛcɔ́ɔ. Dɛ búlugenye Asaŋa na Giliíli bɛhɛ́, dɛ lɛ́ na Yésu Kilítu, bɛyaŋa bɛ́cɔ́, mbémineminie yɛcɔ́ ɛ lɔ́mɔ́ naá mɔ́ɔ, caá akɛ́ naá bogaaga bɛ́cɔ́ bá moatɛ́ moatɛ.

⁴Asáa gɔgɔ́, bó do báá namɛ giédie caá ŋgága mbémineminie yamɛ naá yɔmɔ́ɔ moatɛ́. Aáŋa mɔtɔ a lɛ́ hɔ́ɔ mɔ́ɔnyɔ a béeniŋenyemú a amɔ́ a lɛ́ ba go ɔyɔ go bogaaga bɛ́hɛ́ bá moatɛ́, yɔmɔ́ɔ tɔ́nɔ, ndɛ́ ba go ɔyɔ go bogaaga bámɛ bá moatɛ́, mmo dómba.

⁵Ɛɛ́ɛŋ, bá mba ŋgancá naá buisí bá gánnámanyɛ́ bá nobébíényée námɛ, ndɛ́ moɔnɔ́ ba Bɛ́sɛlahɛ́ɛlɛ, naá nigúli ná Bɛncamɛ́ŋɛ, ndɛ́ mammana ya moɔnɔ́ ba Behébelée. Go go beŋebeŋe gá gicele, ndɛ́ naá giimbó gá Befelisiéŋe[4].

⁶Go gɛlola, mmba lɛ́ céesenye Giimbó gá boolímínyí bá Kilítusu[5]. Go botɛ́nɛ́ɛ bɔ́ɔbɔ gicele gɛ́ oyamɔ́, mmba lɛ́ hɔ́ɔ kanɛ cigíi.

⁷Akɛ́ nɔ́ɔnɔ, muimée mɔ́ɔmɔ mó mbaá lɛ na ndénégé naá busío bámɛ, ndɛ́ mó ɛ́náalú aŋa goyímenye go busío bá Kilítusu.

⁸Goíyime gá Yésu Kilítu Daadáa bamɛ gó lɛ́ gɛkɔ́nɔ́nɔ́ɔ gá besé gɛ́ dómba; gó lɛ́ ŋaáalú goŋaá, kɔ́lɔ buimée bɔ́ɔbɔ mbaá lɔmɔ́ ŋgágana odɛ́má yámɛ kɔ́ɔ, aŋa goyímenye. Ɛɛ́ɛŋ, go busío bɛ́hɛ́, ndɛ́ olímínyóolú go yímie buimée bɔ́ɔbɔ, mbó núune aŋa bɛnyáanyáa, go go mo bɛa,

⁹mbɛ́ɛmba mammana báladáalú nɛhɛ́, caá akɛ́ gɔnɔ́ na botɛ́nɛ́ɛ bɔ́ɔbɔ bó ɛ́damɔ́ go úlene naá gicele, kanɛ́ na bɔ́ɔbɔ bó úlenemú naá go ágana gá odɛ́má naá Kilítusu, botɛ́nɛ́ɛ bɔ́ɔbɔ bó ɛ́damɔ́ go úlene naá Asaŋa, mbɔ́gɔ́ ya bɔ́ naá gioliminyo.

¹⁰Bó ŋgúhene go íyime Kilítusu, ŋgíyime bogaaga bɔ́ɔbɔ bó mbaá mo fúfúné naá begúe, na go bɛa bodáŋɔ naá makánya mɛ́hɛ́, mbɛ́ɛmba púényí yɛhɛ́ naá nigúe nɛ́hɛ́,

¹¹goŋaá, aáŋa bó lɛ́ bá go báŋa, mbɛ́ɛmba naá odɛ́nɛ́ yá go fúfuge naá kadɛ́gadɛ́ɛ ya begúe.

¹²Bó do báá kanɛ́ goŋaá mbáá go bɛa buimée bɔ́ɔbɔ, ɛ́na lí, mbáá go bɛ́ɛmba kanɛ cigíi; kanɛ́, ŋgɛ́danamɔ́ naá busío na odɛ́dá go go gumbene obɔ moánɛ, goakɛ́ Yésu Kilítu mɔ́ɔ a mbaá kumbéné yɔmɔ́ɔ moatɛ́ moatɛ.

¹³Bolimóní, cɛ bééníŋényée caá mbáá go bɛa obɔ moánɛ. Boóma bó lɛ́ táŋɛ́ búmmue: mbófoolio odɛ́dá yɔ́ɔyɔ mbáá ná manɛ́ go díine, ŋgɛ́dana naá busío,

¹⁴mbádómanɛna naá obɔ moánɛ go go bɛa bɛsoɛná bɛ́ɛbɛ Asaŋa naá mmoɛná gúunú a có dɔ́ŋɔnɔmɔ́ go go bóda naá gobálada gɔ́ɔgɔ na Yésu Kilítu.

¹⁵Bɛɛcɔ́ɔ biimée báaba dɛ báá ná manɛ́ go gónɛna naá gioliminyo, ŋgáa dɛ ɔyɔ naá mbééníŋínyí yɛ́ɛyɛ; gó amɔ́ gó húme goŋaá no bɛa mbééníŋínyí incodío, Asaŋa a ná nyó fáa gise tɔ́nɔ go boóma moánɛ.

¹⁶Kɔ́ɔ godɔ́ɔdɔ, naá odɛ́nɛ́ yɔ́ɔyɔ dɛ ná lɔ́mɔ́ kɔ́ɔ yɔ́ɔyɔ, ŋgáa dɛ no ɛnda dɛ núune hoóma táŋɛ́ hémmue.

¹⁷Bolimóní, bɛɛnyɔ́ɔ biimée biéne nɔnɔ gɛgɔ́ndɔ́ gámɛ; no ága oŋgíso yɛ́nyɔ́ naá báaba bɔ́ ɔyɔmɔ́ bá bienene gieninye gɛ́ɛgɛ dɛ mbaá nyó dúfíe.

¹⁸Mmba lɛ́ nnyó oyanɛna bɛcamɛna biimée, gɔ́ɔ kɔnɔmɔ́ nyó oyana godɔ́ɔdɔ ŋgɛ́da mbaŋa caá, gɛca gɛ́ lɛ́ hɔ́ɔ gɛ́ɛgɛ gɛ́ ɔyɔmɔ́ aŋa babɛlɔ́bɛlɔ bá kolósi ya Kilítusu.

¹⁹Bɔ́ɔbɔ moánɛ, bá ná súgudinye go yíme; asaŋa babɔ́ a lɔ́mɔ́ gadɛ́ɛ gábɔ́. Bá báfáanana ufíno naá bɔ́ɔbɔ bó lɔ́mɔ́ odóɛ gonóa yábɔ́, bá ágana odɛ́má yábɔ́ naá moóma má cí.

²⁰Mammana, bɛɛcɔ́ɔ tɛ́sɔnɔ yɛcɔ́ ɛ lɔ́mɔ́ naá mmoɛná; hɔ́ɔ gɔ́ɔ dɛ gɛ́ganamɔ́ Mɔ́ɔnyɔ a lɔ́mɔ́ Uféŋí bɛcɔ́, Daadáa Yésu Kilítu.

²¹Mɔ́ɔ, a ŋgaá núgíe nnyɔ́dɔ yɛcɔ́ ya mahana, go go fóanana nnyɔ́dɔ yɛhɛ́ ya nigúmi, na nɛgaŋa nɛ́ɛnɛ nɛ́ ŋananamɔ́ goŋaá a bɛ́ɛmba naá odɛ́nɛ́ yá go mánɛgɛna buimée.